NDŪ NAJƏ̄ 24

Dəyá̰ kə́ ngaan mbātə́n

1Ré de kə́rēý taā dəyá̰, ba nelə̄n kə dəyá̰ ní to̰ alé, tām̄ ni-ənge yá̰á̰ kə́ to rɔ̄sɔl̄ rɔ̄n tə́, ɓáa ādə̄ ndang makətūbə̄ mbātə́ naā əla jīn tə́ ba tə̄ɓān kɔ̄ɔ́, 2ba ré dəyá̰ ní aw̄ taā dəngam kə́ rang, 3ba dəngam ní nelə̄n seneé to̰ alé, adə̄ ndang makətūbə̄ mbātə́ naā əla jīn tə́ ba tə̄ɓān kɔ̄ɔ́, aké oy tan tə́ kɔ̄ɔ́ anī, 4ngaan kə́ kété ní a tél yā taān gogə́ to̰ alé, tɔdɔ̄ kə́ tām̄ yān tə́ ní ni-tél i dəyá̰ kə́ yḛr kɔ̄ɔ́. Ré taān anī rāā i yá̰á̰ kə́ to yḛr ta kum Kɔ́ɔ̄ɓē tə́. Ā ī-rāā yá̰á̰ kə́ beé yā kəlań rɔ̄sɔl̄ dɔ ɓē ń Kɔ́ɔ̄ɓē Nə́ɓā yāí adī tə́ ní alé.

Ngaa dəyá̰ kijə

5Ngaa dəyá̰ kijə a udə áskaraá aĺ ō, deē a əndā kəla dɔn tə́ aĺ ō. A rāā yá̰a̰ gə̄ ń noō aĺ ɓāl̄ kógə̄ḿ yā ndiń ɓēé kə nə̄yá̰neé, yā kadə̄ rɔ̄ nə̄yá̰n nelə̄nneé.

Yá̰a̰ tə̄nā yá̰a̰

6Deē a əhɔ mbal̄ kusə yá̰a̰ yā madə̄n kə̄rā tə́ alé, tɔdɔ̄ nge ń noō i taā yá̰á̰ ɓáā ta yā nge kə̄rāí jīn tə́ kɔ̄ɔ́.

Najə̄ kə́ dɔ ɓogə deē tə́

7Ré de kə́rēý ɓogə ngōkó̰o̰n kógə̄ḿ kə́ dan ngán Israel gə̄ tə́ rāān ɓəlo tə́, aláa igə seneé anī, i gáŕ kadə̄ a tɔ̄l̄nən̄ kɔ̄ɔ́. I beé n ā ɔ̄rəń yá̰á̰ kə́ majaĺ mbo̰ō̰í tə́ kɔ̄ɔ́ ní.

Mo̰y bānjə̄

8Ə̄ndā kumií dɔ rɔ̄í tə́ najə̄ yā mo̰y bānjə̄ tə́. Yá̰a̰ malang ń m-ɔ́jə́ ngán Lebi kə́ ngé tun̄ yá̰a̰ gə̄ á nin̄ ndóōn̄sí ní, ə̄ndāī kumsí gírí majə ī-rāāī. 9Ādə̄ əga kemií dɔ yá̰á̰ ń Kɔ́ɔ̄ɓē Nə́ɓā yāí rāā kə Miriamá róbó dan ń ī-teēīneé kɔ̄ɔ́ kem ɓē kə́ Ejiptə tə́ ní#24.9 Miriam: Á̰a̰ī Tə́da 12.10.

Yá̰a̰ tə̄nā yá̰á̰ ɓáý to̰

10Ré ādə̄ madə̄ ɓēí yá̰a̰ loo tə̄nā tə́ anī, ī-lōō kudə kújə yān tə́ kəhɔ yá̰á̰ kə̄rā tə́. 11Ḭ̄ ā ī-ra i ndágá ba i ni n a un yá̰a̰ tə̄nā yá̰a̰ yā reēń kadī ní. 12-13Ré i de kə́ nge ndoō n un kūbə̄ yān tə̄nāīneé yá̰a̰ anī, ī-lōō kadə̄ mbang udə dɔ kūbə̄ ní tə́. Ré mbang a rāā yā kudə anī ī-tél kə kūbə̄ yān ní āwń gogə́ ādə̄n ādə̄ ɓīiń. Loo ń noō tə́ ni a tɔ́r̄ tan dɔí tə́ ō, Kɔ́ɔ̄ɓē Nə́ɓā yāí a rāāī de kə́ sew tə́ ō.

Najə̄ kə́ dɔ ngé ndoō gə̄ tə́

14Ā ə́sa tətō nge kəla yāí kə́ nge rɔ̄ tō ndoō ō, ndoō rāān ō alé. Ká ni i ngōkó̰ó̰í, aké i tə̄rā kə́ nge nam̄ kə́ ndi dɔ nang yāí tə́, kem ɓē yāí tə́ gə̄gē anī, ā ə́sa tətōn alé. 15Kəla kə́ ndɔ̄ kógə̄ḿ ń rāā adī ní ā ə̄gān pá tá mbang a udə. Tɔdɔ̄ ni i de kə́ nge rɔ̄ tō ndoō, adə̄ əndā kemən i dɔ kəgā yān tə́ kekəre. Ī-lōō kadə̄ əga kɔŕ dɔ Kɔ́ɔ̄ɓē tə́ kə rīí tɔdɔ̄ nge ń noō a reē ənī najə̄ dɔí tə́.

A tɔ̄lə̄n̄ deē tām̄ yā madə̄n tə́ alé

16A tɔ̄lə̄n̄ bɔbə̄ ngán gə̄ tām̄ majaĺ yā ngáńdə́ gə̄ tə́ aĺ ō, a tɔ̄lə̄n̄ ngán gə̄ tām̄ majaĺ yā bɔbə̄də́ gə̄ tə́ aĺ ō, banī a tɔ̄lə̄n̄ de gə̄ kógə̄ḿ kógə̄ḿ i tām̄ majaĺ yādə́ nin̄ kɔ́ gə̄ tə́.

Yá̰á̰ kə́ yā rāā kə ngé ndoō gēé

17Ā ī-tūr̄ gidə yá̰á̰ kə́ gōtə́ yā tə̄rā kə́ nge nam̄ aĺ ō, yā ngōn̄ hal aĺ ō. Ā ə́hɔ kūbə̄ yā dəyá̰ kə́ ngaa koy kə̄rā tə́ gíŕ yá̰á̰ kə́ ādə̄n loo tə̄nā tə́ tə́ aĺ ō. 18Ādə̄ əga kemií na kété ní ḭ̄ i ɓəlo dɔ nang kə́ Ejiptə tə́, ba i Kɔ́ɔ̄ɓē Nə́ɓā yāí n gān̄g dɔí ní. I tām̄ najə̄ ń noō tə́ n m-ə̄ndā dɔí tə́ kadə̄ ī-rāā yá̰a̰ gə̄ ń m-ə́daī toó ní.

19Ré ī-sāā kōō kə́ kem ndɔr̄ yāí tə́, ba dɔí ndígə̄nal dɔ kōō yāí kə́ do̰ō̰ kem ndɔrɔ́ anī, ī-lōō tél kaw̄ gō tə́ kun. Ā ə́ya̰ tām̄ yā tə̄rā kə́ nge nam̄ tə́ ō, ngōn̄ hal tə́ ō, dəyá̰ kə́ ngaa koy tə́ ō. Loo ń noō tə́ Kɔ́ɔ̄ɓē Nə́ɓā yāí a rāā majə seí tū kəla malang ń ā ī-rāā tə́ ní. 20Ré ə́nda kan̄ kāgə̄ olibə yāí gə̄ anī, ī-lōō tél kaw̄ tə́jā kanə̄n gə̄ ń dɔí ndígə̄nal ní. Ā ə́ya̰ tām̄ yā tə̄rā kə́ nge nam̄ tə́ ō, ngōn̄ hal tə́ ō, dəyá̰ kə́ ngaa koy tə́ ō. 21Ré ə́ja kan̄ nduú yāí oy kɔ̄ɔ́ anī, ī-lōō tél kaw̄ ɓur gotə. Ā ə́yá̰ ngé gə̄ ń kumií mān̄ dɔ tə́ ní tām̄ yā tə̄rā kə́ nge nam̄ tə́ ō, ngōn̄ hal tə́ ō, dəyá̰ kə́ ngaa koy tə́ ō. 22Ādə̄ əga kemií na kété ní ḭ̄ i ɓəlo dɔ nang kə́ Ejiptə tə́. I tām̄ najə̄ ń noō tə́ n m-ə̄ndā dɔí tə́ kadə̄ ī-rāā yá̰a̰ gə̄ ń m-ə́daī toó ni.

Currently Selected:

NDŪ NAJƏ̄ 24: SARDC

Highlight

Copy

Compare