NDŪ NAJƏ̄ 23

1Deē a taā nə̄yá̰ bɔbə̄n aĺ ō, a un kūbə̄ ń bɔbə̄n seĺ dɔ nə̄yá̰n tə́ ní aĺ ō#23.1 K. 1: Ré dəngam seĺ kūbə̄ yān dɔ dəyá̰ tə́ anī, ɔjə i ndigə kə́ ni ndigə taā dəyá̰ ní ō, ngɔ̄mən ō. Ba ré ngōn̄ un kūbə̄ dɔ nə̄yá̰ bɔbə̄n tə́ anī, sāā i taā dəyá̰ ń noō..

De kə́ ɔgə̄n̄də́ kudə dan ngé kán̄ naā tə́ gə̄

2De kə́ dəngam kə́ tɔ̄ɔ̄n̄ kɔ̄r̄ ndamən kɔ̄ɔ́, aláa gāngə̄n̄ mɔtən kɔ̄ɔ́, a udə dan ngé kán̄ naā gə̄ yā Kɔ́ɔ̄ɓē tə́ alé.

3Ngōn̄ kə́ kojən kə gō ndū najə̄ kə́ dɔ taā naā tə́ alé a udə dan ngé kán̄ naā gə̄ yā Kɔ́ɔ̄ɓē tə́ alé. Ngōnən ō, ngōn̄ kaan ō, kaa gugūn ō, kaa dɔgən ō, a udən̄ alé. Ká i gír kojə yān kə́ nge ko̰ kutə gə̄gē a udə alé.

4Amon gə̄ ō, Moab gə̄ ō, a udən̄ dan ngé kán̄ naā gə̄ yā Kɔ́ɔ̄ɓē tə́ alé i kə́ bátə́ gə̄ tə́. Ngáńdə́ gə̄ ō, ngán kaadə́ gə̄ ō, kaa gugūdə́ gə̄ ō, kaa dɔgədə́ gə̄ ō, a udən̄ dan ngé kán̄ naā gə̄ yā Kɔ́ɔ̄ɓē tə́ alé. Ká i gír kojə yādə́ kə́ nge ko̰ kutə gə̄gē a udə alé. 5Tɔdɔ̄ dan ń ī-teēī kɔ̄ɔ́ kem ɓē kə́ Ejiptə tə́ á sḭḭ̄ i róbó ɓáý ní, tə́nīn̄ tasí kə yá̰a̰ kəsaá aĺ ō, kə maná aĺ ō. Moab gə̄ əlan̄ gō Balam kə́ ngōn̄ Beor tə́ Petor, dām̄ nang kə́ Mesopotami#23.5 Mesopotami: Kumən na i ɓē kə́ dɔ dán bā kə́ jōó gə̄ tə́. kə́ kḭḭ kə̄ dɔɔ́ tə́, ba adə̄nən̄ nar kadə̄ ndɔ̄lə́nńsí. 6Banī Kɔ́ɔ̄ɓē Nə́ɓā yāí mbātə́ koō najə̄ yā Balam. Ni-rāā adə̄ ndɔ̄ĺ tél i tɔ́r̄ ta tām̄ yāí tə́#23.6 K. 6: Á̰a̰ī Tə́da 22—24. tɔdɔ̄ ni táriī. 7Kə ndɔ̄ gə̄ malang ń ā ī-ndiń kə kumií ní, ā ī-sāā ta róbə kadə̄ ndin̄neé kə rɔ̄nelēé aĺ ō, kadə̄ əngen̄neé yá̰a̰ aĺ ō.

8Ā ī-kídə̄ Edom gə̄ alé, tɔdɔ̄ nin̄ i ngákó̰ó̰í gə̄. Ā ī-kídə̄ de kə́ Ejiptə gə̄ aĺ ō, tām̄ kété ní ḭ̄ i tə̄rā kə́ nge nam̄ dɔ nang yādə́ tə́. 9Ngán kaa gugūdə́ gə̄ ń a ndin̄ dɔ nang yāí tə́ ní a asən̄ kudə dan ngé kán̄ naā gə̄ yā Kɔ́ɔ̄ɓē tə́.

Loo kə́ kem gérgereé

10Ré āw̄ yā rɔ̄ɔ̄ madə̄ ba̰ā̰í gə̄ ba ə́hɔ loo ī-ndiń anī, ī-lōō kadə̄ majaĺ tákī. 11Ré áskar yāí kógə̄ḿ tél de kə́ majaĺ tákə̄n tām̄ manə̄n teē rɔ̄n tə́ ndɔ̄ɔ́ anī, ni a teē kɔ̄ɔ́ kem gérgereé ō, a udə kemeé aĺ bátə́ kadə̄ mbang udəń ō. 12Ni a ndogə̄ man̄ ta jī loo tíbə́ tə́, ba ré mbang udə anī, a udə gogə́ kem gérgereé karī.

13Ā ī-rāā loo kə́rēý gidə gérger tə́ ndágá kadə̄ āw̄ ta wa tə́ tū tə́. 14Ā ī-ngɔ̄m̄ kāgə̄ kə́ ta katə dām̄ kógə̄ḿ dan yá̰a̰ yāí gə̄ tə́, kadə̄ ré āw̄ ta wa tə́ gidə gérger tə́ ndágá anī, ī-ndērəń bəlo. Ré édə kem bəlo ní tə́ oy anī, ī-tə́la ta. 15I gáŕ kadə̄ kem gérger yāí i kə́ táĺ, tɔdɔ̄ Kɔ́ɔ̄ɓē Nə́ɓā yāí a njə̄rā kemeé yā ngɔ̄mīneé ō, yā rāań kadə̄ ī-tetə madə̄ ba̰ā̰í gə̄ rɔ̄ɔ̄ ō. Ní ré ni teē dɔ yá̰á̰ kə́rēý kə́ to yḛr kum tə́ kemeé anī, a ndi seí alé.

Ɓəlo kə́ a̰ȳ ɓē kɔ́ɔ̄neé

16Ā ə́hɔ ɓəlo ń a̰ȳ ɓē kɔ́ɔ̄neé ba reē ɓɔ̄ɔ̄ rɔ̄n ɓēé looí ní yā tél kaw̄ seneé kadə̄n kə kɔ́ɔ̄neé gogə́ alé. 17Ni a ndi mbo̰ō̰í tə́ kem ɓē ń nelə̄n tə́ ní, loo ń ni ndigə tə́ ní. Ā ī-kə́ran alé.

Ájə́ba rāā ɓesə̄

18Dəyá̰ aláa dəngam kə́ Israel tə́ a rāā ájə́ba ń i rāā ɓesə̄ ní alé. 19Nar ájə́ba, aláa nar gíŕ bísə́ ní#23.19 Nar gíŕ bísə: Deē ń a ɓāŕnən̄ bísə́ ní i dəngam kə́ ɓīī kə dəngam madə̄neé, aláa kə dəyá̰ gír naraá yā ndɔ̄yń ɓesə̄. ā āwń kem kújə yā Kɔ́ɔ̄ɓē Nə́ɓā yāí tə́ yā kadə̄n kadə̄ karī tə́ tām̄ yā ndūí kə́ ə̄nī ādə̄ Kɔ́ɔ̄ɓē tə́ alé, tām̄ kəla rāādə́ yḛr kum Kɔ́ɔ̄ɓē Nə́ɓā yāí.

Yá̰á̰ kə́ kadə̄ kūl̄ tə́

20Ré ādə̄ ngōkó̰ó̰í yá̰a̰ loo tə̄nā tə́, adə̄ i nar, aké i yá̰a̰ kəsa, aké i yá̰á̰ kə́rēý kə́ rang anī, ā ī-taā manə̄n dɔ tə́ alé. 21Ā ādə̄ tə̄rā yá̰a̰ kūl̄ tə́, banī ngōkó̰ó̰í kə́ Israel ní ā ādə̄n yá̰a̰ kūl̄ tə́ alé, yā kadə̄ Kɔ́ɔ̄ɓē Nə́ɓā yāí rāań majə seí tū kəla rāāí gə̄ tə́ malang dɔ nang ń ā āw̄ yā taā tə́ ní.

Ndū kə́ kənī kadə̄ Nə́ɓā

22Ré ə̄nī ndūí ādə̄ Kɔ́ɔ̄ɓē Nə́ɓā yāí yā kadə̄n yá̰á̰ kə́rēý anī, ɔ́r bā̰ā̰ loo kaw̄ń kadə̄n tə́ alé. Tɔdɔ̄ ré i beé aĺ anī a dəjeī yá̰á̰ ní, adə̄ a tél i yá̰á̰ kə́ majaĺ kə́ ī-rāā. 23Ba ré ī-mbātə́ kənī ndūí anī, ī-rāā i yá̰á̰ kə́ majaĺ alé. 24Yá̰á̰ ń teē taí īkɔ́ tə́ á i ndūí ń ə̄nī kə gō kem ndigə yāí ādə̄ Kɔ́ɔ̄ɓē Nə́ɓā yāí ní, ə̄ndā kumií gīrí ī-rāā.

Ta róbə kəja kan̄ yá̰a̰

25Ré āw̄ kem ndɔr̄ kāgə̄ nduú yā madí tə́ anī, ə́sa kan̄ nduú kə́ kemeé tītə̄ ń kemií ndigə ní, banī ā ɔ́təń kem yá̰á̰ jīí tə́ alé. 26Ré údə kem kōō yā madí tə́ anī, ī-gán̄g dɔ kōō gə̄ ní kə jīí, ba ī-lōō kəja kə kəyá.

Currently Selected:

NDŪ NAJƏ̄ 23: SARDC

Highlight

Copy

Compare