NDŪ NAJƏ̄ 22

Ka̰a̰ gō yá̰a̰ yā madí

1Ré á̰a̰ man̄g aláa batə̄ yā ngōkó̰ó̰í kə́ ta tḭ̄ḭ̄ anī, ī-lōō kəja rɔ̄í kɔ̄ɔ́ ba kəya̰n kadə̄ mān̄ aw̄. Əhɔn āwń ādə̄n. 2Ré ngōkó̰ó̰í ní ndi i rɔ̄í tə́ ngɔr alé, aláa ī-gerə̄n alé anī, ə́hɔ́ yá̰a̰ kul̄ yān ní āwń ɓēé looí, ī-ngɔ̄m̄ kə́ njɔ́ḿ gə̄ tə́ ādə̄ nəkɔ́ reē dəjeī najə̄n pá tā ādə̄n. 3ré ə́nge i kərō yān aláa i kūbə̄ yān anī ā ī-rāā i tītə̄ ń noō ō. Yá̰a̰ malang ń ngōkó̰ó̰í tḭ̄ḭ̄ ta ní ré ə́nge anī ā ī-rāā i tītə̄ ń noō, ā ī-tə́ja kumií kɔ̄ɔ́ ta tə́ alé.

4Ré á̰a̰ kərō, aláa man̄g yā ngōkó̰ó̰í əsō róbó anī, ə́ya̰n ta tə́ kə kérneé alé: Únən dɔɔ́ seneé.

Ndū najə̄ kə́ tayā tayā gə̄

5De kə́ dəyá̰ a o̰ō̰ kūbə̄ ko̰ō̰ de kə́ dəngam aĺ ō, de kə́ dəngam a o̰ō̰ kūbə̄ ko̰ō̰ de kə́ dəyá̰ aĺ ō. Tɔdɔ̄ deē ń rāā yá̰á̰ kə́ beē ní, i de kə́ yḛr ta kum Kɔ́ɔ̄ɓē Nə́ɓā yāí tə́.

6Ré ī-teē dɔ ɓē yel̄ tə́ dɔɔ́ dɔ kāgāá aláa nang tə́, kə ngán yel̄ gēé aláa kaa yel̄ gēé kemeé, ba kó̰o̰ yel̄ to dɔ ngánən tə́, aláa to dɔ kaan tə́ anī, ā ə́hɔ́ kó̰o̰ yel̄ ní naā tə́ kə ngánən gēé alé. 7Ā ə́yá̰ kó̰o̰ yel̄ ní kadə̄ aw̄ ba i ngánən gə̄ ngóy n ā ɔ́ýdə́. I beé n ā ī-ndiń majə ta kaw̄ jóó ní.

8Ré ī-rāā kújə́ dúŕ dur anī, ə̄ndā bɔr ta tə́ dɔɔ́, kadə̄ ɔgə̄ deē kḭḭ dɔ tə́ kəsō, na sōgə́ deē ḭḭ dɔ tə́ əsō oy anī, mósən dum̄ dɔí tə́.

9Ā ī-dubə̄ yá̰á̰ kə́ rang kem ndɔr̄ kāgə̄ nduú yāí tə́ alé, na sōgə́ kum yá̰á̰ ní gə̄gē, kan̄ nduú yāí gə̄gē malang télən̄ yá̰á̰ kə́ yā ɓōĺ gidə tām̄ yā Nə́ɓā tə́. 10Ā ə̄ndā man̄g ō, kərō ō, kadə naā tə́ yā ndɔrə̄ń alé. 11Ā ō̰ō̰ kūbə̄ kə́ əlan̄ bḭḭ̄ batə̄ naā tə́ kə lḛ́ḛ əjōn̄neé alé.

12Kūbə̄ ń ā ə̄nī dɔí tə́ ní, ā ī-tə́nā kəro kəlā gə̄ dām̄ kílən kə́ sɔ́ gə̄ tə́.

Najə̄ kə́ dɔ dəyá̰ tə́

13Ré deē kógə̄ḿ taā dəyá̰ ō, ɓīī seneé ō, ba gō tə́ anī nelə̄n seneé to̰ alé, 14adə̄ tə́da najə̄ kə́ majaĺ gə̄ dɔn tə́ nujəń kə rīneé əda na:

Dəyá̰ ń toō m̄-taān, m̄-ɓīī seneé, banī m-á̰a̰ kadə̄ i dəyá̰ kə́ ger̄ dəngam kɔ̄ɔ́ ɓá, 15anī bɔbə̄ dəyá̰ ō, kó̰o̰ dəyá̰ ō, a reēn̄ loo sarya tə́ kə yá̰á̰ ń ɔjə kadə̄ ngōn̄də́ ger̄ dəngam kété aĺ ní, yā nējəń najə̄ ta kum kum kɔɔ̄ gə̄ kə́ kem ɓēé tə́. 16Bɔbə̄ dəyá̰ ní a əda kum kɔɔ̄ gə̄ na:

Dəngam ń toō m-ādə̄n kə ngōnə̄ḿ kə́ dəyá̰ kadə̄ i nə̄yá̰n, anī lōō gíŕ tárən tə́, 17ba tétə̄ najə̄ gə̄ dɔn tə́, əda na ngōnə̄ḿ na ger̄ dəngam kə́ rang kété kɔ̄ɔ́. Ba yá̰a̰ ń ɔjə kadə̄ ngōnə̄ḿ ger̄ dəngam kété aĺ ní n toó. Bɔbə̄ dəyá̰ ō, kó̰o̰ dəyá̰ ō, a teēn̄ kem kūbə̄ ń ngōn̄də́ nin̄ kə dəngam ní ɓīīn̄ kə naá dɔ tə́ ndɔ̄ taā naā yādə́ tə́ ní yā kɔjə kum kɔɔ̄ gə̄. 18Loo ń noō tə́ kum kɔɔ̄ gə̄ kə́ kem ɓēé a əndan̄ dəngam ō, 19a taān̄ lamáń sə́lē arjā̰a̰ ɓú kógə̄ḿ jīn tə́ yā kadə̄ bɔbə̄ dəyá̰ ō, tām̄ ni nujə rī ngōn̄ kə́ mandə kə́ Israel tə́. Dəngam ní a taān kə̄ non tə́ ō, a asə tə̄ɓān aĺ ō, bátə́ kadə̄ nəkɔ́ dəngam ní oyń.

20Ba ré yá̰á̰ ní i rɔ̄kum, adə̄ dəyá̰ ní i dəyá̰ kə́ ger̄ dəngam kété kɔ̄ɔ́ anī, 21a aw̄n̄ seneé ta kújə yā bɔbə̄n tə́ kadə̄ de kə́ dəngam kə́ kem ɓē yān tə́ gə̄ tə́nīnən̄ kə mbalá yā tɔ̄lən. Ni-rāā i yá̰á̰ kə́ to rɔ̄sɔl̄ dɔ nang kə́ Israel tə́, tɔdɔ̄ ndi i ɓē bɔbə̄neé ɓáý n rāań kaya ní. I beé n ā ɔ̄rəń yá̰a̰ rāā kə́ majaĺ kɔ̄ɔ́ mbo̰ō̰í tə́ ní.

22Ré əhɔn̄ de kə́ dəngam loo ɓīī tə́ kə nə̄yá̰ deé anī, a tɔ̄lə̄n̄də́ jōó mbak. A tɔ̄lə̄n̄ dəngam ō, dəyá̰ ō. I beé n ā ɔ̄rəń yá̰á̰ kə́ majaĺ kɔ̄ɔ́ dan ngán Israel gə̄ tə́ ní.

23Ré əhɔn̄ gātə̄ dəyá̰ kə́ ger̄ dəngam aĺ ɓáý kɔ̄ɔ́, tá dəngam kə́ rang əngen kem ɓēé ba ɓīī seneé anī, 24ā ī-teēī sedə́ jōó mbak kə̄ gidə ɓē tə́ ndágá yā kaw̄ tə́nīdə́ kə mbalá tɔ̄l̄də́. Ā ī-tə́nāī dəyá̰ ní kə mbalá yā tɔ̄lən tām̄ ra i kem ɓēé ba əga kɔŕ ɓārə́nń deē kadə̄ dḭḭ̄n aĺ ō, ā ī-tə́nāī dəngam ní kə mbalá yā tɔ̄lən tām̄ ɓīī kə dəyá̰ kə́ de kə́ rang əhɔ gātə̄n kɔ̄ɔ́ ɓá tə́ ō. I beé n ā ɔ̄rəń yá̰a̰ rāā kə́ majaĺ kɔ̄ɔ́ mbo̰ō̰í tə́ ní. 25Ba ré dəngam ní ənge dəyá̰ ní i bembeé n ɓīī seneé dɔ gúú tə́ anī, i dəngam ngóy n a oy ní. 26Ā ī-rāāī yá̰á̰ kógə̄ḿ kə dəyá̰ alé. Tɔdɔ̄ ni-rāā yá̰á̰ kógə̄ḿ kə́ majaĺ kə́ asə reē kə yoó dɔn tə́ alé. Nge ń noō to i tītə̄ de kə́ madə̄n ḭḭ udə kə̄ dɔn tə́ tɔ̄lən beé 27Ni-əngen i bembeé, adə̄ ká dəyá̰ ní əgań i kɔŕ ɓārə́nń yá̰a̰ kadə̄ deē dḭḭ̄nneé gə̄gē anī, de kə́ yā dḭḭ̄n a gətóo.

28Ré dəngam kə́rēý ənge ngōn̄ kə́ mandə kə́ deē əhɔ gātə̄n aĺ ɓáý ba əhɔn ɓīī seneé dɔ gúú tə́ tá əhɔn̄də́ dɔ naā tə́ anī, 29dəngam ní a adə̄ bɔbə̄ dəyá̰ sə́lē arjā̰a̰ kutə mí ō, a taā dəyá̰ ní kə́ njɔ́ḿ gə̄ tə́ ō, a tə̄ɓān kɔ̄ɔ́ aĺ ō, bátə́ kadə̄ nəkɔ́ dəngam ní oyń, tām̄ ni ɓīī kə dəyá̰ ní kɔ̄ɔ́ ɓá.

Currently Selected:

NDŪ NAJƏ̄ 22: SARDC

Highlight

Copy

Compare