NDŪ NAJƏ̄ 21

De kə́ deē ger̄ nge tɔ̄lən alé

1Ré teēn̄ dɔ nīń deē kógə̄ḿ kə́ deē tɔ̄lən tə́ bembeé, dɔ nang ń Kɔ́ɔ̄ɓē Nə́ɓā yāí adī tə́ ní, ba deē ger̄ dɔ deē ń tɔ̄lən ní aĺ anī, 2kum kɔɔ̄ yāí gə̄ ō, ngé gān̄g sarya yāí gə̄ ō, a mbɔ̄jə́n̄ ngāl̄ loo ń ḭḭ rɔ̄ nīń deē ní tə́ ní bátə́ yā kugə̄ń ɓē gə̄ ń gīrə̄n̄ gidə tə́ ní, 3yā gerə̄ń ɓē ń i kə́ ngɔr ngá̰ý rɔ̄ tə́ ní. Loo ń noō tə́ kum kɔɔ̄ gə̄ kə́ kem ɓē ní tə́ a əhɔn̄ mandə man̄g kə́ deē ənī njúkə́ míndən tə́ rāań kəla aĺ ɓáý, 4yā kaw̄ń wól loo kə́ man̄ a nūgə́ tū tə́ ngándáńg tə́, kə́ deē ndɔr̄ tū tə́ aĺ ō, dubə̄ yá̰a̰ tū tə́ aĺ ō tə́, yā tetə míndən kum man̄ ní tə́.

5Tā anī ngán Lebi gə̄ ń nin̄ i ngé tun̄ yá̰a̰ gə̄ ní a ndɔ́tə̄n̄ kə̄ kété, tɔdɔ̄ i nin̄ n Kɔ́ɔ̄ɓē Nə́ɓā yāí gə̄rādə́ kadə̄ rāān̄ kəla adə̄nən̄ ō, tɔ́rə̄n̄ tadə́ kə rī Kɔ́ɔ̄ɓēé ō, kadə̄ gāngə̄n̄ sarya tṵ́ṵ̄ naā gə̄ ō, rɔ̄ɔ̄ naā gə̄ ō, sarya do gə̄ ō ní.

6Kum kɔɔ̄ gə̄ malang kə́ kem ɓēé ń reēn̄ ngɔr rɔ̄ nīń deē ní tə́ ní a tə́gon̄ jīdə́ kum man̄ tə́ dɔ mandə man̄g ń tetən̄ míndən tə́ ní, 7ba a ədan̄ na:

I jḭḭ n jə-tɔ̄l̄ deē ń noō aĺ ō, kumjí a̰a̰ yá̰á̰ ń rāā yá̰á̰ ní aĺ ō. 8Kɔ́ɔ̄ɓē, ī-mā̰ȳ rɔ̄í dɔ gír de gə̄ ń ī-gān̄g dɔdə́ tə́ ní. Ī-lōō kəndā najə̄ yo de kə́ kanjə̄ najə̄ dɔn tə́ dɔ Israel tə́. Loo ń noō tə́ Nə́ɓā a mā̰ȳ rɔ̄n dɔdə́ tə́.

9Ā ī-rāā beé yā kadə̄ nel̄ Kɔ́ɔ̄ɓē ō, kadə̄ únəń mósə de kə́ beé dɔí tə́ kɔ̄ɔ́ ō.

Dəyá̰ kə́ kəhɔn ta rɔ̄ɔ̄ tə́

10Ré āw̄ yā rɔ̄ɔ̄ madə̄ ba̰ā̰í gə̄ ba Kɔ́ɔ̄ɓē Nə́ɓā yāí əladə́ kem jīí tə́ adə̄ ə́hɔ́də́ ɓəlo tə́, 11ba á̰a̰ dəyá̰ kə́ mandə ngá̰ý dan ɓəlo gə̄ ní tə́, adə̄ ī-ndigə taān kə́ dəyá̰ tə́ anī, 12āw̄ seneé ɓēé looí. Dəyá̰ ní a dəsā dɔn ō, a tə́jā hēl̄ jīn gə̄ ō, 13a ɔr̄ kūbə̄ ń əhɔnən̄neé ní rɔ̄n tə́ kɔ̄ɔ́ ō, a əla kūbə̄ kə́ rang rɔ̄n tə́ ō#21.13 K. 13: Yá̰á̰ kə́ gír mətá gə̄ ń dəyá̰ rāā ní, ɔjə i kadə̄ ni əya̰ hálən kə́ jóo kɔ̄ɔ́ ba un kem háĺ kə́ kijə dan Israel gə̄ tə́. ba a ndi ɓēé looí. Dəyá̰ ní a əhɔ ndoō bɔbə̄n ō, kó̰o̰n ō, nāā kógə̄ḿ pá tá ā āw̄ rɔ̄n tə́ ɓáý. Loo ń noō tə́ ā ī-taān kə́ nə̄yá̰í tə́. 14Ba ré nelī seneé to̰ aĺ anī, ə́ya̰n ādə̄ aw̄ loo yān. Ā ígə seneé yā taāń nar aĺ ō, ā ī-rāān ɓəlo tə́ aĺ ō, tām̄ ī-ɓīī seneé kɔ̄ɔ́ ɓá.

Yá̰á̰ hágə

15Ré de kə́rēý taā dəyá̰ jōó, ba táŕ kógə̄ḿ tɔȳ madə̄ ō, dəyá̰ gə̄ ní ojən̄ ngáń kə́ dəngam gə̄ seneé jōó mbak ō, ba ngōn̄ kə́ ta kəga dɔ i ngōn̄ dəyá̰ ń ni tárən ngá̰ý aĺ ní anī, 16ndɔ̄ ń a nə̄ɓō ngánən gə̄ yá̰a̰ kənge yān tə́ ní, ni a ɔy yá̰á̰ hágə yā kadə̄ ngōn̄ dəyá̰ ń tárən ngá̰ý ní alé. Tām̄ i ngōn̄ dəyá̰ ń ni tárən ngá̰ý aĺ ní n i ngōn̄ hágən ní. 17Majə kadə̄ ger̄ na i ngōn̄ dəyá̰ ń ni tárən ngá̰ý aĺ ní n i ngōn̄ hágən ní. Adə̄ yá̰a̰ kənge yān malang ń ni a kēgə̄ yā kadə̄n ní, a adə̄n i loo nja kə́ jōó tə́ tɔdɔ̄ i ni n i ngōn̄ hágən ní ō, ta róbə kənge yá̰á̰ hágə i yān ō.

Ngōn̄ kə́ dum̄ naā

18Ré deē kógə̄ḿ aw̄ kə ngōn̄ kə́ dəngam kə́ dɔn oō loo aĺ ō, kə́ dum̄ naā ō, oō ta bɔbə̄n aĺ ō, kó̰o̰n aĺ ō, adə̄ ká bɔbə̄n nin̄ kə kó̰o̰neé əndanən̄ i mbée gə̄gē a oō tadə́ aĺ ō anī, 19bɔbə̄n nin̄ kə kó̰o̰neé a əhɔnən̄ yā kaw̄ seneé loo gān̄g sarya tə́, rɔ̄ kum kɔɔ̄ kə́ kem ɓē yān tə́ gə̄ tə́, 20ba a ədan̄də́ na:

Ngōn̄jí ń toō dɔn oō loo aĺ ō, dum̄ naā ngá̰ý ō, usən dɔ najə̄ kɔr̄jí tə́ aĺ ō, əsa wa ngá̰ý ō, a̰ȳ kasə ngá̰ý ō. 21Loo ń noō tə́ de gə̄ malang kə́ kem ɓē yān tə́ gə̄ a tə́nīnən̄ kə mbalá yā tɔ̄lən. I beé n ā ɔ̄rəń yá̰á̰ kə́ majaĺ kɔ̄ɔ́ mbo̰ō̰í tə́ ní. Ngán Israel gə̄ malang a oōn̄ adə̄ a ɓōlə́n̄.

Nīń de kə́ naā dɔɔ́

22Tītə̄ ń toō ré ī-tɔ̄l̄ deē kógə̄ḿ kə́ rāā yá̰á̰ kə́ asə kadə̄ ī-tɔ̄lə̄n, ba ī-naān dɔɔ́ tū kāgə̄ tə́ anī, 23loo a tíbə dɔ nīnə́n tə́ alé. I gáŕ kadə̄ ī-dubə̄ kɔ̄ɔ́ ndɔ̄ nəkɔ́ ń noō tə́. Tɔdɔ̄ nīń kə́ beé i yá̰á̰ kə́ a ɔr ndɔ̄ĺ yā Nə́ɓā yā reēń dɔ ɓē tə́. Ī-lōō reē kə majaĺ dɔ ɓē ń Kɔ́ɔ̄ɓē Nə́ɓā yāí adī tə́ ní.

Currently Selected:

NDŪ NAJƏ̄ 21: SARDC

Highlight

Copy

Compare