NDŪ NAJƏ̄ 20

Ndū najə̄ kə́ dɔ rɔ̄ɔ̄ tə́

1Ré āw̄ yā rɔ̄ɔ̄ madə̄ ba̰ā̰í gə̄, ba á̰á̰ sə́nda gə̄ ō, púsə rɔ̄ɔ̄ gə̄ ō, kósə de gə̄ kə́ kutədə́ i ngá̰ý tɔȳ yāí ō anī, ī-lōō ɓōĺ. Tɔdɔ̄ Kɔ́ɔ̄ɓē Nə́ɓā yāí ń teē seí kɔ̄ɔ́ kem ɓē kə́ Ejiptə tə́ ní i naā tə́ seí. 2Ré ā ī-rāāī yā rɔ̄ɔ̄ ngɔr anī, nge tun̄ yá̰a̰ a ndɔ́tə̄ kə̄ kété ba a ɔr̄ najə̄ kə gír de gēé. 3a əda na:

Israel gə̄ ōōī. Ɓōólaā ā ī-rɔ̄ɔ̄ī madə̄ ba̰ā̰sí gə̄. Ī-lōōī kadə̄ kemsí gān̄g man̄ ō, ī-lōōī ɓōĺ ō, ī-lōōī kadə̄ kə̄ngā sāā əgasí ō, ī-lōōī ndebə ta kumdə́ tə́ ō. 4Tɔdɔ̄ i Kɔ́ɔ̄ɓē Nə́ɓā yāsí n a njə̄rā sesí yā rɔ̄ɔ̄ madə̄ ba̰ā̰sí gə̄ dɔsí tə́ ō, yā dḭḭ̄sí ō ní.

5Gō tə́ anī ngé kɔy de gə̄ áskaraá gə̄ a ədan̄ de gə̄ na:

De kə́ rāā kújə́ kə́ kijə ba ndi kemeé aĺ ɓáý i dansí tə́ laā a? Ādə̄ kɔ́ɔ̄ tél aw̄ gogə́ ɓēé na sōgə́ oy ta rɔ̄ɔ̄ tə́ anī de kə́ rang aw̄ ndi kemeé. 6De kə́ ndɔr̄ kāgə̄ nduú ba əja kan̄ nduú yān kə́ ta kəga dɔ aĺ ɓáý i dansí tə́ laā a? Ādə̄ kɔ́ɔ̄ tél aw̄ gogə́ ɓēé na sōgə́ oy ta rɔ̄ɔ̄ tə́ anī de kə́ rang əja. 7I náā n nong dəyá̰ ba taān aĺ ɓáý ní? Ādə̄ kɔ́ɔ̄ tél aw̄ gogə́ ɓēé na sōgə́ oy ta rɔ̄ɔ̄ tə́ anī de kə́ rang taā. 8Ngé kɔy de gə̄ áskaraá gə̄ a ədan̄ de gə̄ ɓáý to̰ na:

I náā n ɓōĺ adə̄ kemən gān̄g man̄ ní, ādə̄ kɔ́ɔ̄ tél aw̄ gogə́ ɓēé na sōgə́ rāā madə̄n gə̄ adə̄ kemdə́ gān̄g man̄ tītə̄ yān. 9Ré ngé kɔy de gə̄ áskaraá gə̄ ɔrə̄n̄ najə̄ kə de gēé gír gān̄g anī, a tə́ndān̄ ngol áskar gə̄ dɔ de gə̄ tə́.

10Ré ūgə̄ ɓē kə́rēý tə́ yā rɔ̄ɔ̄ ɓē ní anī, ī-dəje de kə́ kem ɓē ní tə́ gə̄ kadə̄ rɔ̄ɔ̄n̄ alé, ba kadə̄ lápə́ya to dɔ dáńsí tə́. 11Ré de gə̄ ní ndigən̄ ba teēn̄ ta róbə adə̄nī anī, ə̄ndā gúu dɔdə́ tə́ ādə̄ rāān̄ kəla adə̄nī. 12Ba ré ndigən̄ lápə́ya alé ba ndigən̄ i rɔ̄ɔ̄ anī, ɔ́r gong rɔ̄ɔ̄ gidə ɓē ní tə́. 13Ré Kɔ́ɔ̄ɓē Nə́ɓā yāí rāā adə̄ ɓē ní əsō jīí tə́ anī, ī-tɔ̄l̄ de kə́ dəngam gə̄ malang kə́ kemeé kɔ̄ɔ́ kə kaskaraá. 14Ā ə́ya̰ i dəyá̰ gə̄ ō, ngán gə̄ ō, yá̰a̰ kul̄ gə̄ ō, yá̰a̰ malang kə́ kem ɓē ní tə́ ō, ngóy tām̄ yāí tə́. Ā ə́sá yá̰a̰ kənge yā madə̄ ba̰ā̰í gə̄, tɔdɔ̄ i Kɔ́ɔ̄ɓē Nə́ɓā yāí n adī ní. 15Yá̰á̰ ń ā ī-rāā kə ɓē kə́ sa̰y gə̄ ń i ɓē gə̄ yā nápar de gə̄ ń ā ī-ndiī tū tə́ aĺ tə́ ní n noó. 16Ɓē gə̄ ń ā ə́ya̰ deē kógə̄ḿ kadə̄ ndi kə kumneé kemeé aĺ ní i ɓē gə̄ yā gír de gə̄ ń Kɔ́ɔ̄ɓē Nə́ɓā yāí adī ní ngóy. 17Ā ī-*bāā dɔ Het gə̄ ō, Amor gə̄ ō, Kanaan gə̄ ō, Periji gə̄ ō, Hibi gə̄ ō, Yebus gə̄ ō, kɔ̄ɔ́ malang tītə̄ ń Kɔ́ɔ̄ɓē Nə́ɓā yāí ədaīneé ní, 18na sōgə́ ndóōn̄sí loo rāā yá̰á̰ kə́ to yḛr kum gə̄ ń rāān̄ kadə̄ nel̄ ɓesə̄ yādə́ gə̄ ní. Nge ń noō a rāā kadə̄ ī-rāāī yá̰á̰ kə́ majaĺ kə Kɔ́ɔ̄ɓē Nə́ɓā yāsí.

19Ré ā ɔ́r gong rɔ̄ɔ̄ gidə ɓē kə́rēý tə́, ba ā ī-rɔ̄ɔ̄ ɓē ní i ndɔ̄ ngá̰ý tá yā taāń ɓē ní anī, ā ī-tə́gā kāgə̄ kə́ kan̄ gə̄ yā nujəń kɔ̄ɔ́ alé, tɔdɔ̄ ā ə́sa kan̄də́. Ní ā ī-tə́gādə́ kɔ̄ɔ́ alé. Kāgə̄ kə́ bembeé i deē madí á ā ə̄nīn rɔ̄ɔ̄ a? 20Banī kāgə̄ gə̄ ń ī-ger̄ kadə̄ deē a əsa kan̄də́ aĺ ní, m-ādī ta róbə́ tə́gādə́ yā kɔrəń gong gidə ɓē ń a rɔ̄ɔ̄sí tə́ ní bátə́ kadə̄ ɓē ní əsōń.

Currently Selected:

NDŪ NAJƏ̄ 20: SARDC

Highlight

Copy

Compare