NDŪ NAJƏ̄ 19

Ɓē ɓɔ̄ɔ̄ rɔ̄ gə̄

1Kɔ́ɔ̄ɓē Nə́ɓā yāí a nujə nápar de kə́rēý gə̄, ba a adī dɔ nang yādə́. I beé n ā ī-taāń dɔ nang yādə́ ō, ā ī-ndiń kem ɓē yādə́ gə̄ tə́ ō, kem kújə yādə́ gə̄ tə́ ō ní. 2-3Ā ī-gán̄g dɔ nang ń Kɔ́ɔ̄ɓē a adī ní naā tə́ gír loo mətá. Ba gír loo kə́ mətá gə̄ ní, ā ī-tə́ndā ɓē gə̄ kógə̄ḿ kógə̄ḿ kemeé ō, ā ī-rāā kadə̄ róbə gə̄ kə́ yā kaw̄ń kə̄ kem ɓē gə̄ ní tə́ kundə́ tōr̄ aĺ ō, yā kadə̄ deē ń tɔ̄l̄ deē ní əngeń loo ɓɔ̄ɔ̄ rɔ̄n ō.

4I deē ń tɔ̄l̄ deē ba i kə gō kem ndigə yānneé aĺ ō, kanjə̄ kimə̄n kemən tə́ kété ō, ní ngóy n a ɓɔ̄ɔ̄ rɔ̄n kem ɓē gə̄ ní tə́ yā kajəń rɔ̄n ní. 5I tītə̄ yā deē ń aw̄ kə madə̄neé kem ku kāgə̄ gə̄ tə́ tə́gā kāgāá, ba un kə̄ngā kə̄ dɔɔ́ yā tə́gań kāgə̄ anī, kə̄ngā teē ta kūl̄ tə́ jīn tə́ ur madə̄n adə̄ tɔ̄lən ní. Deē ní asə ɓɔ̄ɔ̄ rɔ̄n kem ɓē kógə̄ḿ kə́ dan ɓē kə́ mətá gə̄ ní tə́ yā kajəń rɔ̄n. 6Ādə̄ nge dal ba̰ā̰ deē ń oy ní tə̄ɓā gō nge tɔ̄l̄ deē ní kə wōngōó ba əhɔn tām̄ róbə́ kə́ ngāl̄ ngá̰ý tə́ tɔ̄lən alé. Tɔdɔ̄ nge tɔ̄l̄ deē ní rāā i yá̰á̰ kə́ asə reē kə yoó dɔn tə́ alé, tām̄ ni im̄ deē ń tɔ̄l̄ ní kemən tə́ kété alé. 7I yá̰á̰ ń noō n m-ə́daī kadə̄ ɔ̄r̄ ɓē gə̄ mətá ə̄ndādə́ tayā kadə̄ de gə̄ ɓɔ̄ɔ̄n̄ rɔ̄də́ kemeé ní.

8-9Ré ə̄ndā kumií gō míndə́ Nə́ɓā ń m-ādī ɓōólaā tə́ ní kə taá ba ī-rāā yá̰a̰ gə̄ ń ədan̄ ní ō, ī-táŕ Kɔ́ɔ̄ɓē Nə́ɓā yāí ō, ī-rāā yá̰á̰ ń kemən ndigə ní kə ndɔ̄ gə̄ ō anī, ndɔ̄ kə́rēý tə́ ni a adī dɔ nang kə́ rang dɔ madə̄ tə́ kadə̄ dɔ nang yāí a laa ngá̰ý. Ni a adī dɔ nang malang ń ənī ndūn adə̄ kaaí gə̄ yā kadə̄də́ ní. Loo ń noō tə́ ā ɔ̄r̄ ɓē gə̄ mətá yā kəndādə́ tayā ɓáý kadə̄ ərō ngé kə́ mətá kə̄ kété gə̄. 10I beé n a ənīn̄neé mósə de kə́ najə̄ gətóo dɔn tə́ dɔ nang ń Kɔ́ɔ̄ɓē Nə́ɓā yāí a adī tə́ ní aĺ ní. Ré i beé aĺ anī, mósə deē ń najə̄ gətóo dɔn tə́ ní a əsō dɔí tə́.

11Ré de kə́rēý im̄ madə̄n, ba um̄ madə̄n ní ō, əsō seneé ba əndan adə̄ oy ō, tá a̰ȳ aw̄ ɓɔ̄ɔ̄ rɔ̄n kem ɓē ɓɔ̄ɔ̄ rɔ̄ kógə̄ḿ tə́ anī, 12kum kɔɔ̄ gə̄ kə́ kem ɓē yān tə́ a əlan̄ deē kógə̄ḿ gōn tə́ kadə̄ əhɔn. Nin̄ a əlan̄ nge tɔ̄l̄ deē ní jī nge dal ba̰ā̰ tə́ kadə̄ tɔ̄lən ō. 13Kumií a o̰o̰ī tām̄ yān tə́ alé. Deē ń tɔ̄l̄ de kə́ najə̄ gətóo dɔn tə́ ní, ā ɔ̄r̄ kɔ́ɔ̄ dan ngán Israel gə̄ tə́ kɔ̄ɔ́ i tītə̄ ń noō yā kadə̄ ī-ndiń majə.

Najə̄ kə́ dɔ dɔ nin̄ naā tə́

14Yá̰á̰ ń kaaí gə̄ ń ugə̄n̄ kété dɔ nang ń Kɔ́ɔ̄ɓē Nə́ɓā yāí adī tə́ ní udən̄ dɔ nin̄sí tə́ kə madə̄ ɓēí ní, ā ī-ndɔ́təń alé.

De kə́ kum yá̰á̰ tə́ gə̄

15Najə̄ ta de kə́ kum tə́ kə́ kal kógə̄ḿ beē asə kadə̄ deē gāngəń sarya dɔ de kə́ əndān̄ najə̄ tɔ̄l̄ deē dɔn tə́ tə́ aĺ ō, dɔ de kə́ əndān̄ najə̄ majaĺ kə́ rāā dɔn tə́ tə́ aĺ ō, dɔ de kə́ əndān̄ najə̄ rāā yá̰á̰ kə́rēý kə́ gōtə́ aĺ dɔn tə́ tə́ aĺ ō, banī i najə̄ ta de kə́ kum tə́ gə̄ kə́ asən̄ jōó aláa mətá n a ɔjə kadə̄ deē ní rāā yá̰á̰ ní rɔ̄kum ní.

16Ré de kə́ kum tə́ kə́rēý kə́ nge sor̄ ḭḭ əndā najə̄ dɔ de kə́rēý tə́ anī, 17deē ní ō, nge kəndā najə̄ dɔn tə́ ní ō, a aw̄n̄ kem loo kə́ táĺ yā Kɔ́ɔ̄ɓē tə́ yā kaw̄ kɔjə ngé tun̄ yá̰a̰ gə̄ ō, ngé gān̄g sarya gə̄ ō ń a rāān̄ kəla kem ndɔ̄ gə̄ ń noō tə́ ní. 18Ngé gān̄g sarya gə̄ a ndəlen̄ gír najə̄ ní kə gōó. Ré gerə̄n̄ gír kə goó majə kadə̄ de kə́ kum tə́ ní sor̄ i mbée, adə̄ tetə i najə̄ dɔ madə̄n tə́ kanjə̄ kumən anī, 19yá̰á̰ ń ni sāā rāā kə madə̄neé ní, ā ī-rāāī seneé. I beé n ā ɔ̄rəń yá̰á̰ kə́ majaĺ kɔ̄ɔ́ mbo̰ō̰í tə́ ní. 20Gotə de gə̄ ń a oōn̄ ní, ɓōĺ a rāādə́ adə̄ deē a rāā yá̰á̰ kə́ majaĺ kə́ beē mbo̰ō̰í tə́ gogə́ to̰ alé. 21Ā á̰a̰ kum tō ndoō yā deē ń sarya əhɔn ní alé: Ré tɔ̄l̄ i deē anī, ā ī-tɔ̄lə̄n ō, tɔ̄ɔ̄ i kum deē anī, ā ī-tɔ̄ɔ̄ kumən ō, tetə i ngān̄g deē anī, ā ī-tetə ngāngən ō, tetə i jī deē anī, ā ī-tetə jīn ō, tetə i nja deē anī, ā ī-tetə njan ō.

Currently Selected:

NDŪ NAJƏ̄ 19: SARDC

Highlight

Copy

Compare