NDŪ NAJƏ̄ 18

Yá̰a̰ yā ngán Lebi gə̄

1Ngáń Lebi gə̄ kə́ ngé tun̄ yá̰a̰ gə̄ ō, gotə de gə̄ malang kə́ gír ɓē yā Lebi tə́ ō ní, a əngen̄ yá̰a̰ nə̄ɓō, aké yá̰a̰ ndəbā naā tə́ kə gotə ngán Israel gēé alé. I dā̰ kə́ tun̄ kadə̄ Nə́ɓā n a əsan̄ ō, i yá̰a̰ yā Kɔ́ɔ̄ɓē n a əsan̄ ō ní. 2Nin̄ a əngen̄ núsə dɔ nang kə́ tām̄ yādə́ tə́ dan ngán Israel gə̄ tə́ alé, tɔdɔ̄ yá̰á̰ ń əngen̄ ní i rāā kəla yā Kɔ́ɔ̄ɓē, tītə̄ ń Kɔ́ɔ̄ɓē ədańdə́ ní.

3Dā̰ gə̄ ń ngán Israel gə̄ a tunə̄n̄ tām̄ yā kem kógə̄ḿ tə́ á i man̄g, aké i batə̄, aké i bə̄yā̰ ní, kɔ̄bə̄də́ ō, mbɔ́ŕdə́ ō, jodə́ ō, i tām̄ yā ngé tun̄ yá̰a̰ gə̄ tə́. 4Ā ādīdə́ kōō gémē ō, kasə nduú kə́ kijə ō, yibə̄ ō, kə́ ta kəga dɔ yāsí gə̄. Ā ādīdə́ bḭḭ̄ batə̄ kə́ ta kəga dɔ yāsí gə̄ ń ā ə́jaī ní ō. 5Tɔdɔ̄ i nin̄ n Kɔ́ɔ̄ɓē Nə́ɓā yāí gə̄rādə́ kə ngáńdə́ gēé dan gír ɓē gə̄ tə́ malang kadə̄ ran̄ loo ń noō tə́ yā rāā kəla kə rī Kɔ́ɔ̄ɓēé kə dɔ ndɔ̄ gə̄ ní.

6Ré ngōn̄ Lebi kə́rēý əya̰ ɓē ń ndi tū tə́ dɔ nang kə́ Israel tə́ ní anī, ādə̄ reē tītə̄ ń kemən ndigə ní loo ń Kɔ́ɔ̄ɓē gə̄rā tə́ ní. 7Ni a rāā kəla kə rī Kɔ́ɔ̄ɓē Nə́ɓā yānneé tītə̄ yā ngákó̰o̰n kə́ ngán Lebi gə̄ malang ń ra a rāān̄ kəla ta kum Kɔ́ɔ̄ɓē tə́ ní ō. 8Yá̰a̰ kəsa ń nin̄ malang a əngen̄ kə́ dɔ yá̰a̰ kənge yādə́ gə̄ ń nin̄ kógə̄ḿ kógə̄ḿ əngen̄ gíŕ yá̰a̰ yā bɔbə̄də́ gə̄ ń gātə̄n̄neé tə́ ní, a asə naā malang.

Najə̄ kə́ dɔ ngé koō ta gə̄ tə́

9Ré ūgə̄ dɔ nang ń Kɔ́ɔ̄ɓē Nə́ɓā yāí adī tə́ ní anī, ā ī-ndájə̄ yá̰a̰ rāā kə́ to yḛr kum gə̄ yā nápar de gə̄ ń ndin̄ tū tə́ ní alé. 10Ādə̄ de kə́ nge kənī ngōnən kə́ dəngam, aké kə́ dəyá̰ kum hor tə́ gətóo mbo̰ō̰í tə́ ō, de kə́ nge koō ta ɓádə gə̄, aláa kɔdə̄ wor, aláa kɔdə̄ gara, aláa nge bógə̄rō de gə̄, 11aláa nge kəga, aláa kɔdə̄ sāā, aláa de kə́ rang kə́ nge koō ta ndíl de gə̄ kə́ koy gətóo mbo̰ō̰í tə́. 12Tɔdɔ̄ de kə́ nge rāā yá̰á̰ kə́ beé i de kə́ yḛr ta kum Kɔ́ɔ̄ɓē tə́. Ba i tām̄ yá̰a̰ rāādə́ kə́ to yḛr kum kə́ beé gə̄ tə́ n Kɔ́ɔ̄ɓē Nə́ɓā yāí taāń dɔ nang jī nápar de gə̄ ń ndin̄ tū tə́ kété noí tə́ ní.

13Banī ḭ̄ ní ādə̄ hálí kə́ kə Kɔ́ɔ̄ɓē Nə́ɓā yāí i kə́ kanjə̄ najə̄ dɔ tə́.

14Nápar de gə̄ ń ā ī-rāā yā taā dɔ nang jīdə́ tə́ ní, i nápar de gə̄ kə́ ngé taā kɔjə̄ yā ngé koō ta ɓádə gə̄ ō, kɔdə̄ sāā gə̄ ō. Banī kə́ tām̄ yāí ḭ̄ tə́ ní, Kɔ́ɔ̄ɓē Nə́ɓā yāí ndigə kadə̄ ī-rāā yá̰á̰ kə́ beē alé. 15I nge koō ta yā Nə́ɓā kə́ tītə̄ḿ mā Moijə n Kɔ́ɔ̄ɓē Nə́ɓā yāí a əla seneé yā kadī ní. Deē ní i de kə́ gír yāí tə́, i ni n ā ōō najə̄ yān ní. 16I yá̰á̰ ń noō n ī-dəje Kɔ́ɔ̄ɓē Nə́ɓā yāí mbal̄ kə́ Horeb tə́, ndɔ̄ ń ī-kánīneé naā tə́ ní. Ndɔ̄ ń noō tə́ ní ə́da na ī-ndigə koō ndū Kɔ́ɔ̄ɓē Nə́ɓā yāí loo kɔr̄ najə̄ tə́ seí gogə́ to̰ aĺ ō, ī-ndigə ka̰a̰ hor kə́ bo ń toō gogə́ to̰ aĺ ō, ī-ndigə koy aĺ ō. 17Adə̄ Kɔ́ɔ̄ɓē ədam̄ na:

Najə̄ ń noō ń ədan̄ ní rāān̄ i yá̰á̰ kə́ majə. 18M-ā m-ə́la kə nge koō ta kə́ tītīí yā kadə̄də́. Deē ń m-ā m-ə́la seneé ní i de kə́ gír yādə́ tə́. M-ā m-ə̄ndā najə̄ yāḿ tan tə́, ba yá̰a̰ malang ń m-ā m̄-mērən kədadə́ ní, ni a ədadə́. 19Najə̄ ń nge koō ta ní a ɔr̄ kə rīḿ ní, ré deē kə́rēý rāā yá̰á̰ kə́ karī tə́ anī, i mə̄kɔ́ n m-ā m̄-dəje kɔ́ɔ̄ gíŕ ní. 20Ré kɔjə rɔ̄ rāā nge koō ta kógə̄ḿ adə̄ əda najə̄ kə́rēý kə rīḿ ba m̄-mērən kəda alé, aláa ɔr̄ najə̄ kə rī ɓesə̄ gə̄ ń nin̄ i nə́ɓā yādə́ gēé ní anī, i nge koō ta ní n a oy ní.

21Majanī ā ī-dəje rɔ̄í najə̄ ā əda na:

J-a jə-rāā i ba̰ý n j-a jə-gerə̄ń kadə̄ i Kɔ́ɔ̄ɓē n əda najə̄ aĺ ní? 22Ré yá̰á̰ ń nge koō ta əda kə rī Kɔ́ɔ̄ɓēé ní rāā yá̰a̰ aĺ anī, najə̄ ní i Kɔ́ɔ̄ɓē n əda ní alé. I kɔjə rɔ̄ n rāā nge koō ta á ədań najə̄ ní ba ī-lōō ɓōlə́n.

Currently Selected:

NDŪ NAJƏ̄ 18: SARDC

Highlight

Copy

Compare