NDŪ NAJƏ̄ 17

1Man̄g aké batə̄ ń loon kə́rēý nujə ní, ā ī-tun̄ yā kadə̄ Kɔ́ɔ̄ɓē Nə́ɓā yāí alé, tām̄ nge ń noō i yá̰á̰ kə́ a yḛr kum Kɔ́ɔ̄ɓē Nə́ɓā yāí.

2Ɓē gə̄ ń Kɔ́ɔ̄ɓē Nə́ɓā yāí a adī kadə̄ ī-ndi kemeé ní, ré de kə́ dəngam, aláa kə́ dəyá̰ kə́ ndi kem nge kə́ kógə̄ḿ tə́ rāā yá̰á̰ kə́ majaĺ ta kum Kɔ́ɔ̄ɓē Nə́ɓā yāí tə́ mānəń dɔ ndū najə̄ kə́ dɔ madə̄ naā yā Kɔ́ɔ̄ɓē tə́, 3adə̄ rāā kəla adə̄ i ɓesə̄ gə̄ ō, ɔsə i non nang tə́ nodə́ tə́ ō, no mbang tə́ ō, no nāā tə́ ō, tə́yō̰ gə̄ malang kə́ dɔ rā̰ tə́ tə́ ō, ndɔ̄yńdə́, nge ń noō ń i yá̰á̰ kə́ m-ə́daī kadə̄ ī-rāā aĺ ní, 4ré najə̄n əsō mbīí tə́ anī, ā ī-ndəle gír kə gōó majə. Ré ī-teē dɔ tə́ adə̄ yá̰á̰ kə́ to yḛr kum ń toō i kə rāā dɔ nang kə́ Israel tə́ rɔ̄kum anī, 5ā ī-teē kə dəngam, aláa dəyá̰ ń rāā yá̰á̰ kə́ beé ní gidə ɓē tə́ ndágá yā tə́nīn kə mbalá tɔ̄lən.

6Deē a gān̄g sarya yo dɔ deē tə́ i kə ta kūl̄ najə̄ ta de kə́ kum tə́ kə́ kógə̄ḿ beē alé, banī i kə ta kūl̄ najə̄ ta de kə́ kum tə́ gə̄ kə́ asən̄ jōó aláa mətá. 7I de kə́ kum tə́ gə̄ n i ngé tə́nīn kə mbalá kété pá tá gotə gə̄ a tə́nīnən̄ kə mbalá yā tɔ̄lən ɓáý ní. I beé n ā ɔ̄rəń majaĺ kɔ̄ɔ́ mbo̰ō̰í tə́ ní.

Sarya gə̄ kə́ yā kaw̄ń kem loo kə́ táĺ tə́

8Ré ngé sarya gə̄ kə́ kem ɓē yāí tə́ asən̄ gān̄g sarya mósə deē, aláa sarya tṵ́ṵ̄ naā, aláa sarya do alé anī, ā āwń loo ń Kɔ́ɔ̄ɓē Nə́ɓā yāí a gə̄rā tə́ ní, 9adə̄ i rɔ̄ ngán Lebi gə̄ kə́ ngé tun̄ yá̰a̰ gə̄ tə́ ō, rɔ̄ nge gān̄g sarya kə́ kem ndɔ̄ gə̄ ń noō tə́ ō, yā kadə̄ ōō yādə́. Nin̄ a ədanī yá̰á̰ kə́ dɔ tə́. 10Yá̰a̰ malang ń a ədanī loo ń Kɔ́ɔ̄ɓē a gə̄rā tə́ ní, ā ə̄ndā kumií gírí yā rāā kə gōó. 11Ā ī-rāā yá̰a̰ malang ń a ədanī ní kanjə̄ tɔ̄ɔ̄ geleé ō, ko̰ó̰ ō. 12Deē ń i nge kɔjə rɔ̄n adə̄ a rāā yá̰a̰ i kə dɔneé kanjə̄ koō yā nge tun̄ yá̰á̰ ń ra loo ní tə́ á a rāā kəla yā Kɔ́ɔ̄ɓē Nə́ɓā yāí ní ō, kanjə̄ koō yā nge gān̄g sarya ō ní, a tɔ̄l̄nən̄ kɔ̄ɔ́. I beé n ā ɔ̄rəń yá̰á̰ kə́ majaĺ kɔ̄ɔ́ dan ngán Israel gə̄ tə́ ní. 13Gír de gə̄ malang ń a oōn̄ ní ɓōĺ a rāādə́ kadə̄ de kógə̄ḿ a ɔjə rɔ̄n gogə́ to̰ alé.

Ndū najə̄ gə̄ kə́ dɔ mban̄g tə́

14Loo ń ā ūgə̄ dɔ nang ń Kɔ́ɔ̄ɓē Nə́ɓā yāí a adī tə́ ō, ī-taā dɔ nang ní ī-ndi tū tə́ ō, ba ī-sāā kəndā mban̄g kógə̄ḿ dɔí tə́ tītə̄ yā nápar de kə́ rang gə̄ ń ndin̄ gīrə̄n̄ gidií ní anī, 15mban̄g ń ā ə̄ndān dɔí tə́ ní i deē ń Kɔ́ɔ̄ɓē Nə́ɓā yāí a gə̄rān ní. I ngōkó̰ó̰í kógə̄ḿ n ā ə̄ndān mban̄g dɔí tə́ ní. Tə̄rā ń i ngōkó̰ó̰í aĺ ní, ā ə̄ndān mban̄g dɔí tə́ alé.

16Mban̄g yāí a aw̄ kə sə́nda gə̄ ngá̰ý aĺ ō, a əla de gə̄ ngá̰ý mangaá dɔ nang kə́ Ejiptə tə́ aĺ ō. Tām̄ Kɔ́ɔ̄ɓē ədasí na:

Ī-lōōī tél kun róbə́ gír njasí. 17Mban̄g yāí a táā dəyá̰ gə̄ ngá̰ý alé, na sōgə́ kemən əya̰ Nə́ɓā kɔ̄ɔ́. Ni a aw̄ kə gində̄ arjā̰a̰ ngá̰ý aĺ ō, gində̄ lɔ́ŕ ngá̰ý aĺ ō.

18Ré ndi dɔ kōr̄ kāgə̄ mbang yān tə́ oy anī, a taā ndū najə̄ ń toō ń to jī ngán Lebi kə́ ngé tun̄ yá̰a̰ gə̄ tə́ ní yā ndang kem makətūbūú tām̄ yān nəkɔ́ tə́. 19Ni a ngɔ̄m̄ makətūbə̄ ndū najə̄ ní rɔ̄n tə́ yā tə́da kə dɔ ndɔ̄ gə̄ malang ń a ndiń kə kumneé ní, yā ndóoń loo ɓōĺ Ndíĺ Kɔ́ɔ̄ɓē Nə́ɓā yān. Ni a əndā kumən gíŕ yá̰a̰ malang ń to kem makətūbə̄ ndū najə̄ tə́ ní ō, jī bēl̄ loo rāā yá̰a̰ gə̄ malang ń ndū najə̄ əda kadə̄ yā rāā ní ō, yā rāādə́. 20I beé n a ɔjəń rɔ̄n dɔ ngákó̰o̰n gə̄ tə́ aĺ ō, a tɔ̄ɔń geleé aláa ko̰ó̰ dɔ róbə́ ń gō míndə ɔjə ní tə́ aĺ ō ní. Loo ń noō tə́ ni gə̄gē, ngánən gə̄gē, ngán kaan gə̄gē, a o̰o̰n̄ ɓē ta kaw̄ jóo dɔ ngán Israel gə̄ tə́.

Currently Selected:

NDŪ NAJƏ̄ 17: SARDC

Highlight

Copy

Compare