NDŪ NAJƏ̄ 16

Nāā Pákə

1Ādə̄ dɔí ndígə̄nal rāā Pákə kem nāā Abib tə́ yā rɔȳń Kɔ́ɔ̄ɓē Nə́ɓā yāí alé. Tɔdɔ̄ Kɔ́ɔ̄ɓē teē seí kɔ̄ɔ́ kem ɓē kə́ Ejiptə tə́ i kem nāā Abib tə́ ndɔ̄ɔ́. 2Dā̰ gə̄ ń ā ī-ndējə̄ Kɔ́ɔ̄ɓē ndɔ̄ Pákə tə́ ní i batə̄ ō, bə̄yā̰ ō, man̄g ō. Ā ə́hɔ́də́ i dan yá̰a̰ kul̄ yāí gə̄ tə́. Ā ī-rāā Pákə ní i loo ń Kɔ́ɔ̄ɓē a gə̄rā yā kəndā rīn dɔ tə́ tə́ ní. 3Ā ī-rāā Pákə ní i kə mápá kə́ rāā kə kaa mápá alé. Ā ə́sa i mápá kə́ rāā kanjə̄ kaa mápa ndɔ̄ sīrí, i mápa wur kɔl. Tɔdɔ̄ ī-teē kɔ̄ɔ́ kem ɓē kə́ Ejiptə tə́ i kə nāgá. Ā ə́sá mápá ní i kadə̄ əgań kemií dɔ ndɔ̄ ń ī-teēń kɔ̄ɔ́ kem ɓē kə́ Ejiptə tə́ ní kə dɔ ndɔ̄ ndií kə kumií gə̄ malang. 4Kem ndɔ̄ kə́ sīrí gə̄ ń noō tə́ ní deē a ənge kaa mápa dɔ nang yāí tə́ alé. Ba dā̰ ń ī-tɔ̄l̄ loo tíbí kə ndɔ̄ kə́ ta kəga dɔɔ́ ní, ā ī-ngɔ̄m̄ kadə̄ loo tīī dɔ tə́ alé. 5Ɓē gə̄ ń Kɔ́ɔ̄ɓē Nə́ɓā yāí adī ní, i ɓē kə́ kə̄ noó n ā ī-rāā Pákə kemeé ní alé. 6Ba i nge ń ni a gə̄rā yā kəndā rīn dɔ tə́ ní tá ngóy. Ā ī-tɔ̄l̄ dā̰ Pákə i loo sɔlí ta mbang kur tə́, adə̄ i kə kum mbang ń ī-teēń kɔ̄ɔ́ kem ɓē kə́ Ejiptə tə́ ní. 7Ā ī-ndīr̄ dā̰ ní, ba ā ə́sa i loo ń Kɔ́ɔ̄ɓē Nə́ɓā yāí a gə̄rā tə́ ní. Ba ré teē dəloí kə ndɔ̄ kə́ noō anī, ā ī-tél kə̄ gogə́ ɓē yāí tə́. 8Ā ə́sá mápá kə́ rāā kanjə̄ kaa mápa ndɔ̄ mehḛ́, ba ndɔ̄ kə́ nge ko̰ sīrí i ndɔ̄ tɔ̄l̄ ta nāā yā rɔȳń Kɔ́ɔ̄ɓē Nə́ɓā yāí. Adə̄ ā ī-rāā kəla ndɔ̄ ń noō tə́ alé.

Nāā dəmásə gə̄

9Ā ī-tə́da dəmásə sīrí, ba ā ə́lá gíŕ tə́da i ndɔ̄ ń ə̄ndań ngorong tū kōō ɔ́rjə tə́ kadə̄ ə́jań ní. 10Gō tə́ anī ā ī-rāā nāā sāā kōō gə̄ tām̄ yā Kɔ́ɔ̄ɓē Nə́ɓā yāí tə́. Kadə̄ karī gə̄ ń ā ādə̄ Kɔ́ɔ̄ɓē Nə́ɓā yāí ní ā ādə̄n i kadə̄ asə kə gō rāā majə ń ni-rāā seí ní. 11Ā ī-rāā rɔ̄nel̄ ta kum Kɔ́ɔ̄ɓē Nə́ɓā yāí tə́, naā tə́ kə ngōnīí kə́ dəngam ō, kə́ dəyá̰ ō, nge rāā kəla yāí kə́ dəngam ō, kə́ dəyá̰ ō, ngōn̄ Lebi ń ndi kem ɓē yāí tə́ ní ō, tə̄rā kə́ nge nam̄ ō, ngōn̄ hal ō, dəyá̰ kə́ ngaa koy ō ń ndin̄ seí loo ń Kɔ́ɔ̄ɓē Nə́ɓā yāí a gə̄rā tə́ yā kəndā rīn dɔ tə́ ní. 12Ādə̄ əga kemií na kété ní ḭ̄ i ɓəlo dɔ nang kə́ Ejiptə tə́. Adə̄ ə̄ndā kumií gíŕ yá̰a̰ malang ń ndū najə̄ gə̄ ń toō ədan̄ ní tə́ ī-rāā.

Nāā kújə́ kámbə gə̄

13Ré ī-səɓā kōō yāí ō, ī-mbə́rē kan̄ kāgə̄ nduú yāí ō, malang adə̄ gír gān̄g anī, ā ī-rāā nāā kújə́ kámbə gə̄ ndɔ̄ sīrí. 14Ā ī-rāā rɔ̄nel̄ nāā ní i kum naā tə́ kə ngōnīí kə́ dəngam ō, kə́ dəyá̰ ō, nge rāā kəla yāí kə́ dəngam ō, kə́ dəyá̰ ō, ngōn̄ Lebi ō, tə̄rā kə́ nge nam̄ ō, ngōn̄ hal ō, dəyá̰ kə́ ngaa koy ō ń ndin̄ seí ní. 15Ā ī-rāā nāā ní i ndɔ̄ sīrí tām̄ yā Kɔ́ɔ̄ɓē Nə́ɓā yāí tə́, loo ń a gə̄rā tə́ ní. Tɔdɔ̄ Kɔ́ɔ̄ɓē a adī kōō ngá̰ý ō, kəla malang ń ā ī-rāā ní, ni a rāā kadə̄ teēī yá̰a̰ ō. Adə̄ yāí ḭ̄ i rɔ̄nel̄ rɔ̄kum.

16De kə́ dəngam gə̄ malang a aw̄n̄ yā ra ta kum Kɔ́ɔ̄ɓē Nə́ɓā yāí tə́ nja mətá kem ɓāl̄ kógə̄ḿ kə dɔ ɓāl̄ gə̄ loo ń ni a gə̄rā tə́ ní. A aw̄n̄ yā rāā nāā mápa kə́ kanjə̄ kaa mápa ō, nāā sāā kōō ō, nāā kújə́ kámbə gə̄ ō. Deē a aw̄ yā ra ta kum Kɔ́ɔ̄ɓē tə́ jīn karī alé. 17De gə̄ malang a aw̄n̄ kógə̄ḿ kógə̄ḿ kə yá̰á̰ kə́ kadə̄ asə kə gō rāā majə ń Kɔ́ɔ̄ɓē rāā sedə́ ní yā ndējən.

Ndū najə̄ kə́ dɔ ngé gān̄g sarya gə̄ tə́

18Ɓē gə̄ malang ń Kɔ́ɔ̄ɓē Nə́ɓā yāí a adī ní, ā ī-tə́ndā ngār sarya gə̄ ō, ngé ndóō de gə̄ ndū najə̄ gə̄ ō, kemeé kadə̄ gāngə̄n̄ sarya yā de gə̄ kə́ gír ɓē yāí gə̄ tə́ kə gōó. 19Ī-lōō tə́la ta njaí naā tə́ loo sarya tə́. Ā ī-gān̄g sarya tām̄ ta kum deē alé. Ī-lōō taā kadə̄ karī, tɔdɔ̄ kadə̄ karī i yá̰á̰ kə́ a utə̄ kum de kə́ ngáā gə̄ ō, a nujə najə̄ yā de kə́ sew gə̄ ō. 20Ā ún i gō yá̰a̰ rāā kə́ gōtə́ ngóy, kadə̄ ī-ndiń kə kumií ō, ī-taāń dɔ nang ń Kɔ́ɔ̄ɓē Nə́ɓā yāí a adī ní ō.

Ndɔ̄ȳ gə̄ kə́ nel̄ Kɔ́ɔ̄ɓē Nə́ɓā alé

21Ā údə kāgə̄ kógə̄ḿ tām̄ yāí tə́ kadə loo tun̄ yá̰á̰ ń ā ī-rāā tām̄ yā Kɔ́ɔ̄ɓē Nə́ɓā yāí tə́ ní alé. 22Ā údə mbal̄ tām̄ yāí tə́ aĺ ō, tām̄ i yá̰á̰ kə́ nel̄ Kɔ́ɔ̄ɓē Nə́ɓā yāí alé.

Currently Selected:

NDŪ NAJƏ̄ 16: SARDC

Highlight

Copy

Compare