NDŪ NAJƏ̄ 15

Ɓāl̄ kəya̰ gō kə̄rā gə̄ kɔ̄ɔ́

1Ā ə́ya̰ī gō kə̄rā yāsí gə̄ kə́ dɔ de gə̄ tə́ kɔ̄ɔ́ kem ɓāl̄ kə́ nge ko̰ sīrí tə́. 2Loo rāān n toó: Ré ɓāl̄ kəya̰ gō kə̄rā gə̄ kɔ̄ɔ́ yā rɔȳń Kɔ́ɔ̄ɓē ugə̄ adə̄ ənīn̄ mbērən anī, de gə̄ malang ń adə̄n̄ madə̄ ɓēdə́ gə̄, aláa ngákó̰ó̰də́ gə̄ yá̰a̰ loo tə̄nā tə́ ní, a əya̰n̄ gō kɔ̄ɔ́. A ɔsən̄ kə madə̄ ɓēdə́ gə̄, aláa kə ngákó̰ó̰də́ gə̄ ní ta kəgā kə̄rā ní alé. 3Ā ɔ́siī kə tə̄rāá ta kəgāsí kə̄rā yāsí, banī yá̰a̰ yāsí ń to jī ngōkó̰sí tə́ ní ā ə́ya̰ī gō kɔ̄ɔ́ yā kadə̄n.

4Kə́ rɔ̄kum tə́ tā anī majə kadə̄ nge ndoō gətóo dɔ dáńsí tə́. Tɔdɔ̄ Kɔ́ɔ̄ɓē Nə́ɓā yāsí a adə̄sí yá̰á̰ ngá̰ý dɔ nang ń ni a adə̄sí kadə̄ i yá̰a̰ yāsí tə́ ní, adə̄ yá̰á̰ kə́ kadə̄ ndoōn a rāāsí gətóo. 5Yá̰á̰ ń kadə̄ ī-rāāī ní i kadə̄ ōōī ta Kɔ́ɔ̄ɓē Nə́ɓā yāsí, ī-rāāī gō míndə gə̄ malang ń m-ə́dásí ɓōólaā ní ngóy. 6Kɔ́ɔ̄ɓē Nə́ɓā yāsí a adə̄sí yá̰a̰ kənge ngá̰ý adə̄ yá̰á̰ kə́ ndoōn a rāāsí a gətóo tītə̄ ń ənīń ndūn ní, adə̄ de kə́ a tə̄nā yá̰a̰ a gətóo dɔ dáńsí tə́. Ba i sḭḭ̄ n ā ādī nápar de gə̄ ngá̰ý yá̰a̰ loo tə̄nā tə́ ní. Sḭḭ̄ ā ó̰o̰ī ɓē dɔ nápar de kə́ ngá̰ý gə̄ tə́ ba nin̄ a o̰o̰n̄ ɓē dɔsí tə́ alé.

7Ré ngōkó̰ó̰sí kógə̄ḿ kə́ nge ndoō i kem ɓē yāsí tə́, dɔ nang ń Kɔ́ɔ̄ɓē Nə́ɓā yāsí a adə̄sí tə́ ní anī, ā ī-rāāī kem ngan̄g seneé aĺ ō, ā ī-kótī jīsí kɔ̄ɔ́ dɔ yá̰a̰ yāsí tə́ tan tə́ aĺ ō. 8Banī ā ī-teēī jīsí yā kadə̄n ō, yá̰á̰ ń ndoōn rāān á tə̄nāsí ní, ā ādə̄niī loo tə̄nā tə́ ō. 9Ī-lōōī gír̄ kemsí tə́ kəda na dɔ ɓāl̄ kə́ nge ko̰ sīrí ń i ɓāl̄ kəya̰ gō kə̄rā gə̄ kɔ̄ɔ́ ní i ngɔr ba rāań kem ngan̄g kə ngōkó̰ó̰sí kə́ nge ndoó ō, kɔgə̄nneé yá̰a̰ ō. Nge ń noō i gír̄ kə̄ majə alé. Ré ni sekə́sí rɔ̄ Kɔ́ɔ̄ɓē tə́ anī sarya a əhɔsí. 10Adə̄ ā ādə̄niī yá̰a̰ loo tə̄nā tə́ i kə kem kə́ majaá banī i kə kem kə́ majaĺ alé. Loo ń noō tə́ Kɔ́ɔ̄ɓē Nə́ɓā yāsí a rāā majə sesí tū kəla rāāsí gə̄ tə́ malang. 11Gíŕ ngé ndoō gə̄ kə́ kem ɓē yāsí tə́ a gān̄g alé. I yá̰á̰ ń toō n m-ə́dásí ní: Ī-teēī jīsí ngá̰ý kə̄ rɔ̄ ngákó̰ó̰sí gə̄ ń rɔ̄də́ tō ndoō ō, yá̰a̰ yādə́ gətóo ō ń ndin̄ kem ɓē yāsí tə́ ní.

Ɓāl̄ teē ɓəloó

12Ré ngōkó̰ó̰í kə́ Hebəro kógə̄ḿ kə́ dəngam aláa kə́ dəyá̰ igə kə rɔ̄neé jīí tə́ adə̄ ni i ɓəlo yāí anī, a rāā kəla yāí ɓāl̄ mehḛ́, ba ɓāl̄ kə́ nge ko̰ sīrí anī ā ə́ya̰n dɔɔ́. 13Ba ā ə́ya̰n kadə̄ aw̄ jīn karī alé. 14Yá̰a̰ malang ń Kɔ́ɔ̄ɓē Nə́ɓā yāí rāań kem majə seí á i batə̄ aké i bə̄yā̰, aké i kōō gémē, aké i kasə nduú ní, ā ādə̄n tə́. 15Ādə̄ əga kemií na kété ní ḭ̄ i ɓəlo dɔ nang kə́ Ejiptə tə́ ba i Kɔ́ɔ̄ɓē Nə́ɓā yāí n gān̄g dɔí ní. I tām̄ najə̄ ń noō tə́ n m-ə́daīneé yá̰á̰ ń toō ɓōólaā ní.

16Ba ré ɓəlo ní ədaī na n-ndigə kəya̰ī alé, tām̄ n-táriī kə gír kojə yāí ō, tām̄ n-ndi majə ɓēé looí ō anī, 17ā ə́hɔ mbīn yā kəndā tū kāgə̄ ta róbə́ kújə yāí tə́ ba ā ī-mbutə kə nēmbé. Loo ń noō tə́ ni i ɓəlo yāí kə́ njɔ́ḿ gə̄ tə́. Ká ré i ɓəlo kə́ dəyá̰ gə̄gē anī ā ī-rāā seneé i beé ō.

18Ī-lōō kadə̄ tōr̄ rɔ̄í najə̄ kəya̰ kə́ ə́ya̰n dɔɔ́ adə̄ aw̄ tə́. Tɔdɔ̄ kəla ń ni-rāā adī ɓāl̄ mehḛ́ ní teēī yá̰a̰ loo nja tə́ jōó tɔȳ yā nge kəla yāí kə́ rāā kəla yāí gír naraá. Adə̄ ré ə́ya̰n dɔɔ́ adə̄ aw̄ anī, Kɔ́ɔ̄ɓē Nə́ɓā yāí a rāā majə seí tū kəla rāāí gə̄ tə́ malang.

Najə̄ kə́ dɔ hágə́ yá̰a̰ kul̄ gə̄ tə́

19Hágə́ yá̰a̰ kul̄ yāí gə̄ malang, adə̄ i hágə man̄g, aké i batə̄, aké i bə̄yā̰ ní, ré i kə́ dəngam anī ā ɔ̄r̄ kamə̄n tayā tām̄ yā Kɔ́ɔ̄ɓē Nə́ɓā yāí tə́. Adə̄ hágə man̄g yāí ń i kə́ dəngam ní ā ī-rāań kəla alé. Ā ə́ja bḭḭ̄ hágə batə̄ yāí kə́ dəngam aĺ ō. 20Ā ə́sádə́ i kə dɔ ɓāl̄ gə̄ ta kum Kɔ́ɔ̄ɓē Nə́ɓā yāí tə́, naā tə́ kə de kə́ gír kojə yāí tə́ gēé, loo ń Kɔ́ɔ̄ɓē Nə́ɓā yāí a gə̄rā tə́ ní. 21Ba ré dā̰ ní i dā̰ kə́ nujə, adə̄ a tə́sō motə, aké kumən a̰a̰ loo alé, aké yá̰á̰ kə́ rang kə́ majaĺ i rɔ̄n tə́ anī, ā ī-tun̄ yā kadə̄ Kɔ́ɔ̄ɓē Nə́ɓā yāí alé. 22Ā ə́san i ɓēé looí. De kə́ yḛr ō, de kə́ unjə̄ njáý njáý ō, a əsan̄ naā tə́ mbak tītə̄ loo kəsa dā̰ kāl̄ aláa dā̰ lúm beé. 23Banī ā ə́sá mósə dā̰ ní alé. Ā ī-ɓōkə́ mósən i nang tə́ tītə̄ man̄ beé.

Currently Selected:

NDŪ NAJƏ̄ 15: SARDC

Highlight

Copy

Compare