NDŪ NAJƏ̄ 14

Loo rāā ndoō de kə́ koy kə́ ɔgə̄n̄ Israel gə̄

1Sḭḭ̄ i ngán Kɔ́ɔ̄ɓē Nə́ɓā yāsí, adə̄ ā ī-tə́jāī rɔ̄sí, aláa ā ī-dəsāī dɔsí yā rāań ndoō de kə́ koy alé. 2Tɔdɔ̄ sḭḭ̄ i gír de kə́ ɔrə̄n̄ kam̄sí tayā gə̄ tām̄ yā Kɔ́ɔ̄ɓē Nə́ɓā yāsí tə́. I sḭḭ̄ n Kɔ́ɔ̄ɓē gə̄rāsí dan gír de gə̄ malang kə́ dɔ nang tə́ tə́ kadə̄ ī-téliī gír deē yān gə̄ ní.

Dā̰ kə́ yā kəsa gə̄ ō, kə́ yā kəsa aĺ gə̄ ō

3Ā ə́saī yá̰á̰ kə́ majaĺ tákə̄ alé. 4Dā̰ gə̄ ń ā ə́saī ní rīdə́ n toó: Man̄g, batə̄, bə̄yā̰, 5lúm, kāl̄, dḛ́ḛ#14.5 Dḛ́ḛ: I dā̰ kə́ teē tōw̄ ba gajən tɔ̄ɔ̄ gír i ngá̰ý, kāl̄, kaya, nasə̄, bə̄yā̰ kɔ̄r̄. 6Dā̰ gə̄ malang ń hēl̄ njadə́ gar gajə jōó ō, a ɔsən̄ mu ō ní, ā ə́saī. 7Ba dā̰ gə̄ ń a ɔsən̄ mu#14.7 Ɔsən̄ mu: I dā̰ gə̄ kə́ əsan̄ yá̰a̰ urən̄ kemdə́ tə́ ba tél ɔsə reēnəń tadə́ tə́ gogə́ əsan̄. ngóy ní ā ə́saī aĺ ō ngé gə̄ ń hēl̄ njadə́ gar gajə jōó ngóy ō ní ā ə́saī aĺ ō. Ā ī-rāāī jámbal ō, dɔgəm̄ ō, dā̰ damā̰a̰ ō#14.7 Dā̰ damā̰a̰: I dā̰ kə́ to tītə̄ dɔgəm̄., i dā̰ gə̄ kə́ yḛr tə́, tɔdɔ̄ nin̄ a ɔsən̄ mu banī njadə́ gar gajə jōó alé. 8Ā ī-rāā kosong i dā̰ kə́ yḛr tə́ ō, tɔdɔ̄ hēl̄ njan gar gajə jōó ɓá tā banī ni-ɔsə mu alé. Ā ə́saī dā̰ gə̄ ń noō aĺ ō, ā ɔ́diī nīńdə́ aĺ ō.

9Yá̰a̰ gə̄ malang ń a njə̄rān̄ kum man̄ tə́ ní ā ə́saī i ngé gə̄ ń əɓan̄ jenjədə́ ō, ngɔ́də́ to ō ní. 10Banī yá̰a̰ gə̄ malang ń jenjədə́ gətóo ō, ngɔ́də́ gətóo ō ní, ā ə́saī alé. Ā ī-rāāīdə́ i yá̰á̰ kə́ yḛr tə́.

11Yel̄ malang ń i kə́ unjə̄ njáý njáý ní, ā ə́saī. 12Ba yel̄ gə̄ ń ā ə́saī aĺ ní, rīdə́ n toó: Kə̄rō, gərā, tɔ́sə̄-ngɔ́r, 13busar#14.13 Busar: I yel̄ kə́ to tītə̄ nənga., māl̄ bal mojə, gíŕ kólīyó kə́ dáńg dáńg gə̄, 14gíŕ ká̰ā̰ kə́ dáńg dáńg gə̄, 15burum, kɔȳ múu gə̄, yel̄ dɔ bā, gír nənga kə́ dáńg dáńg gə̄, 16gír kɔȳ kə́ dáńg dáńg gə̄, 17gíŕ ká̰ā̰ kə́ dūú gə̄, māl̄ yedə̄, nūgə̄, 18kóndə́la, gír go̰ kə́ dáńg dáńg gə̄, ngā wor, dō.

19Ngán kur gə̄ malang ń a ḭḭn̄ bɔ̄gə̄ ní, ā ī-rāāīdə́ i yá̰á̰ kə́ yḛr tə́, adə̄ ā ə́saī alé. 20Ba ngán kur̄ gə̄ ń a ḭḭn̄ bɔ̄gə̄ ba i kə́ unjə̄ njáý njáý ní, ā ə́saī.

21Ā ə́saī nīń dā̰ alé. I tə̄rā kə́ ngé nam̄ gə̄ ń ndin̄ kem ɓē yāsí tə́ ní n ā ādīdə́ kadə̄ əsan̄ ní. Aĺ anī ā ígiīneé jī tə̄rā kə́ rang gə̄ tə́. Tɔdɔ̄ sḭḭ̄ i gír de kə́ ɔrə̄n̄ kam̄sí tayā gə̄ tām̄ yā Kɔ́ɔ̄ɓē Nə́ɓā yāsí tə́. Ā ə̄nī ngōn̄ bə̄yā̰ kum mba kó̰o̰n tə́ yā ndīrəń alé.

Ndū najə̄ kə́ dɔ yá̰á̰ kə́ kɔr̄ dan kə́ kutə tə́

22Kōō gə̄ malang ń ī-sāāī kem ndɔr̄ yāsí gə̄ tə́ ní, ā ɔ̄rī dɔ kə́ nge ko̰ kutə kə dɔ ɓāl̄ gə̄ tām̄ yā Nə́ɓā tə́. 23Dɔ kōō ō, dɔ man̄ nduú ō, dɔ yibə̄ ō, kə́ nge ko̰ kutə ń ɔ̄rī ní ō, hágə man̄g ō, hágə batə̄ ō, hágə bə̄yā̰ ō ní, ā ə́saī i ta kum Kɔ́ɔ̄ɓē Nə́ɓā yāsí tə́, loo ń a gə̄rā yā kəndā rīn dɔ tə́ ní tə́. I beé n ā ī-ndóōīneé loo ɓōĺ Ndíĺ Kɔ́ɔ̄ɓē Nə́ɓā yāsí kə dɔ ndɔ̄ gə̄ ní. 24Ré Kɔ́ɔ̄ɓē Nə́ɓā yāsí rāā adə̄ ə́ngeī yá̰á̰ ngá̰ý, ba loo ń ni gə̄rā yā kəndā rīn dɔ tə́ ní i sa̰y, adə̄ ásiī kaw̄ tū tə́ kə dɔ yá̰á̰ kə́ nge ko̰ kutə yāsí ń ɔ̄rī tām̄ yān tə́ ní aĺ anī, 25ā ígiīneé kɔ̄ɔ́ ba ā ə́hɔī narən jīsí tə́ yā kaw̄ń loo ń Kɔ́ɔ̄ɓē Nə́ɓā yāsí gə̄rā tə́ ní. 26Ā ī-mangiī yá̰a̰ malang ń kemsí ndigə ní i loo ní tə́. Ré ī-ndigiī i mang man̄g, aláa batə̄, aláa bə̄yā̰, aláa kasə nduú, aláa kasə kə́ ngan̄g gə̄ anī, ī-mangiī. Yá̰a̰ malang ń kemsí ndigə ní, ī-mangiī ba ə́saī kə gír kojə yāsí gēé kə rɔ̄nelēé ta kum Kɔ́ɔ̄ɓē Nə́ɓā yāsí tə́. 27Ba ngán Lebi gə̄ ń ndin̄ kem ɓē yāsí gə̄ tə́ ní, ā ī-rāāīdə́ nja bə̄yā̰ kə́ gogə́ tə́ ndɔ̄ ń noō tə́ alé, tām̄ nin̄ əngen̄ núsə dɔ nang kə́ tām̄ yādə́ tə́ sesí alé.

28Ā ī-tə́daī ɓāl̄ mətá, anī ā ɔ̄rī dɔ kōō yāsí gə̄ malang kə́ nge ko̰ kutə kə́ kem ɓāl̄ kə́ nge ko̰ mətá tə́ yā kán̄ loo kógə̄ḿ kə̄ kem ɓē yāsí gə̄ tə́, 29kadə̄ ngán Lebi gə̄ ń əngen̄ dɔ nang kə́ tām̄ yādə́ tə́ sesí aĺ ō, tə̄rā kə́ ngé nam̄ gə̄ ō, ngán hal gə̄ ō, dəyá̰ kə́ ngaa koy gə̄ ō ń ndin̄ kem ɓē yāsí gə̄ tə́ ní əngen̄neé yá̰a̰ kəsa kadə̄ ndānə̄n̄, ɓá anī Kɔ́ɔ̄ɓē Nə́ɓā yāsí a rāā majə sesí tū kəla rāāsí gə̄ tə́ malang.

Currently Selected:

NDŪ NAJƏ̄ 14: SARDC

Highlight

Copy

Compare