NDŪ NAJƏ̄ 13

1Najə̄ malang kə́ dɔ yá̰á̰ kə́ yā rāā gə̄ tə́ ń m-ɔ̄r̄ sesí ní, ə̄ndāī kemsí dɔ tə́ ī-rāāīneé kəla. Ā ə̄nīī madə̄ ta tə́ aĺ ō, ā ɔ̄rī kumən kógə̄ḿ kɔ̄ɔ́ aĺ ō.

Najə̄ kə́ dɔ rāā ɓesə̄ gə̄ tə́

2Majanī a dansí tə́ ní nge koō ta, aláa de kə́ nī rāān, a ḭḭ yā kədasí najə̄ yá̰á̰ kógə̄ḿ kə́ to ɓōĺ ngá̰ý kə́ a rāā yā rāā yá̰a̰. 3Ká ré yá̰á̰ ní reē rāā yá̰a̰ rɔ̄kum tītə̄ ń ədań ní gə̄gē, ba ni mēr̄sí rāā ɓesə̄ gə̄ ō, rāā kəla kadə̄ ɓesə̄ gə̄ ń i nə́ɓā kə́ rang gə̄ kə́ sḭḭ̄ ī-gerīdə́ aĺ ní ō anī, 4ī-lōōī koō najə̄ yān. Tɔdɔ̄ nge ń noō i Kɔ́ɔ̄ɓē Nə́ɓā yāsí n a nāāsí yā ka̰a̰ń ké ī-tárniī kə ngarā̰ kemsí mámák ō, kə rɔ̄sí malang ō, wa noó. 5I Kɔ́ɔ̄ɓē Nə́ɓā yāsí ngóy n ā úniī gōn ō, ā ī-ɓōlíī ndílən ō ní. I yá̰a̰ gə̄ ń ni ədasí kadə̄ ī-rāāī ní ngóy n ā ī-rāāī ní ō. Ā ōōī i ndūn ni ō, ā ī-rāāī i kəla yān ni ō, ā ī-tə́ya̰ī i gōn ni tə́ ō. 6Banī a tɔ̄lə̄n̄ nge koō ta aláa nge nī rāā gə̄ ń toō kɔ̄ɔ́. Tām̄ ni mēr̄sí tūr̄ gidəsí kɔ̄ɔ́ ta Kɔ́ɔ̄ɓē ń i Nə́ɓā ń ɔr̄sí ɓəloó kɔ̄ɔ́ ō, teē sesí kɔ̄ɔ́ kem ɓē kə́ Ejiptə tə́ ō ní. A tɔ̄l̄nən̄ kɔ̄ɔ́ tām̄ ni sāā kadə̄ ī-tɔ̄ɔ̄ī kɔ̄ɔ́ gō róbə́ ń Kɔ́ɔ̄ɓē Nə́ɓā yāsí mēr̄sí kun tə́ ní. I beé n ā ɔ̄rīneé majaĺ kɔ̄ɔ́ dɔ dáńsí tə́ ní.

7Majanī ndɔ̄ kə́rēý tə́ ngōkó̰ó̰í, aláa ngōnīí kə́ dəngam, aké kə́ dəyá̰, aláa dəyá̰ jīí, aláa madə̄ taí kə́ nelī seneé ngá̰ý, a reē jəke yā kədaī loo mundə̄ tə́ na: Ādə̄ j-aw̄ jə-rāā kəla j-adə̄ nə́ɓā kə́ rang gə̄, nə́ɓā gə̄ ń noō ń sḭḭ̄ gə̄gē, kaasí gə̄ gə̄gē ī-gerī gíŕdə́ aĺ ní, 8nə́ɓā gə̄ ń gír de kə́ rang gə̄ ń ndin̄ ngɔr, aké sa̰y rɔ̄sí tə́ a ndɔ̄ȳn̄də́ ta ngóy dɔ nang kə́rēý tə́ bátə́ ta ngóy dɔ nang kə́ noō tə́ ní. 9Ā ī-ndigə yá̰á̰ kə́ to tītə̄ ń noō aĺ ō, i najə̄ kə́ to kadə̄ ōō mbīí tə́ aĺ ō. Kumií a o̰o̰ī tām̄ yān tə́ aĺ ō, ā ī-ɓɔ̄ɔ̄ dɔn aĺ ō. 10I gáŕ kadə̄ a tɔ̄lə̄n̄ nge mēr̄ kaw̄ ndɔ̄ȳ nə́ɓā kə́ rang gə̄ tə́ ní kɔ̄ɔ́. I deē ń ni sāā kaw̄ seneé ndɔ̄yɔ̄ɔ́ ní n a ɔy mbal̄ gə̄ yā tə́nīnneé kété, tá gotə gír de gə̄ a utə̄n̄ gōn ɓáý ní. 11Ā ī-tə́nāniī kə mbalá yā tɔ̄lən kɔ̄ɔ́ tām̄ ni sāā kadə̄ deē kógə̄ḿ dansí tə́ əya̰ Kɔ́ɔ̄ɓē Nə́ɓā yāsí ń i Kɔ́ɔ̄ɓē Nə́ɓā kə́ teē sesí kɔ̄ɔ́ kem ɓē ɓəloó dɔ nang kə́ Ejiptə tə́ ní. 12Ngán Israel gə̄ malang a oōn̄ najə̄n. Nin̄ a ɓōlə́n̄, adə̄ a rāān̄ yá̰á̰ kə́ majaĺ kə́ tītə̄ ń noō dɔ dáńsí tə́ gogə́ to̰ alé.

13-14Majanī ndɔ̄ kə́rēý tə́ ā ōōī kadə̄ kem ɓē kógə̄ḿ kə́ dan ngé gə̄ ń Kɔ́ɔ̄ɓē Nə́ɓā yāsí adə̄sí kadə̄ ī-ndiī tū tə́ tə́ ní, na de kə́ rim gə̄ kə́ dan deē yāsí gə̄ tə́ na gólə̄n̄ de kə́ kemeé gə̄ ədan̄də́ na:

Ādə̄ j-aw̄ jə-rāāī kəla j-adī nə́ɓā kə́ rang gə̄, nə́ɓā gə̄ ń sḭḭ̄ ī-gerī gíŕdə́ aĺ ní, 15anī ā ī-sāāī gír najə̄ ní yā ger̄ kə gōó. Ré ī-gerī gíŕ yá̰á̰ kə́ majaĺ ń rāā yá̰a̰ dɔ dáńsí tə́ ní oy anī, 16ā ī-tɔ̄lī de kə́ kem ɓē ń noō tə́ gə̄ ō, yá̰a̰ kul̄ kə́ kemeé gə̄ ō, kɔ̄ɔ́ malang kə kəyā kaskaraá. Gō tə́ anī ā ī-*bāāī dɔ ɓē ní ō, yá̰a̰ malang kə́ kemeé ō, tām̄ yā Nə́ɓā tə́. 17Ā ī-kánī yá̰a̰ kənge gə̄ kə́ kem ɓē ní tə́ ndágə looó malang ba ā ə́laī hor dɔ tə́ kɔ̄ɔ́. Ā ə́laī hor dɔ ɓē ní tə́ kə taá malang yā rɔȳń Kɔ́ɔ̄ɓē Nə́ɓā yāsí. Ɓē ní a tél i ndəbā ɓē kə́ njɔ́ḿ gə̄ tə́. Deē a tél yā rāā gogə́ to̰ alé i kə́ bátə́ gə̄ tə́. 18-19Yá̰á̰ ń i kə́ bāā dɔ tām̄ yā Nə́ɓā tə́ ní, ā úniī yā rāā yá̰a̰ yāsí tə́ alé, yā kadə̄ wōn̄g kə́ ngá̰ý yā Kɔ́ɔ̄ɓē Nə́ɓā yāsí dəbań. Ré ōōī tan, adə̄ ī-rāāī yá̰a̰ yān kə́ yā rāā gə̄ malang ń m-ɔ́jə́sí ɓōólaā ní ō, ī-rāāī yá̰á̰ kə́ súmūú ta kumən tə́ ō anī, ni a rāā kem majə sesí ō, a rāā kadə̄ kutəsí i ngá̰ý ō, tītə̄ ń ənīń ndūn adə̄ kaasí gə̄ ní.

Currently Selected:

NDŪ NAJƏ̄ 13: SARDC

Highlight

Copy

Compare