BARUK 5
5
1Jerusalem, ɔ̄r̄ kūbə̄ ka̰a̰ tápə̄ yāí ō kəhɔ ndoō yāí ō kɔ̄ɔ́,
ba ə́lá yá̰á̰ súū rɔ̄ kə́ majə ń i kɔsə go̰n yā Nə́ɓā ní rɔ̄í tə́ tītə̄ kūbə̄ beé, ādə̄ to ngándáńg rɔ̄í tə́.
2Ūtə̄ gidə rɔ̄í kə kūbə̄ yá̰a̰ rāā kə́ gōtə́ yā Nə́ɓā ō,
ə́lá yá̰á̰ súū rɔ̄ ń i kɔsə go̰n yā Nge Ndi ngándáńg ní dɔí tə́ ō.
3Tɔdɔ̄, dɔ nang kə taá malang ń i gír rā̰ tə́ ní, Nə́ɓā a ɔjən ndə́lē yāí ō,
4a əndā rī ń toō dɔí tə́ kadə̄ a to ngándáńg ō.
Rī ní n toó: Kem sɔl̄ yā yá̰a̰ rāā kə́ gōtə́ ō, kɔsə go̰n yā nge kəhɔ gō Nə́ɓā ō!#5.4 Á̰a̰ī: Jer 33.16.
5Jerusalem ḭ́ḭ dɔɔ́, ī-ra dɔ mbalá ba ī-tūr̄ kumií kə̄ dām̄ kə́ gír ɓē tə́:
Á̰á̰ ngání gə̄ ń najə̄ yā Nge kə́ Táĺ ḭḭ sedə́ no ɓē tə́ ō, gír ɓē tə́ ō, ba ɔsə dɔdə́ naā tə́ lo kógə̄ḿ ní.
Nin̄ rāān̄ rɔ̄nel̄ tām̄ əga kem Nə́ɓā dɔdə́ tə́.
6Ḭ̄ á̰á̰də́ lo kaw̄ tə́ kə njadə́ ō, madə̄ ba̰ā̰ gə̄ a mbə́rēn̄ gōdə́ ō,
banī Nə́ɓā tél a reē sedə́ kum kə̄ rɔ̄í tə́.
Ətōn̄də́ i kətō kə́ to kɔsə go̰n, tītə̄ mban̄g gə̄ kə́ ndin̄ dɔ kōr̄ kāgə̄ mbang tə́ beē.
7Tɔdɔ̄ Nə́ɓā adə̄ ndūn kadə̄ mbal̄ kə́ ngāl̄ kə̄ dɔɔ́ gə̄ ō,
ngán mbal̄ gə̄ ō ní,
kə télən̄ sedə́ kə̄ nang tə́.
Ni adə̄ utə̄n̄ wól lo gə̄ kadə̄ gidə dɔ nang asə naā,
yā kadə̄ Israel njə̄rā tū tə́ kanjə̄ kadə̄ yá̰a̰ əga njan ō,
kɔsə go̰n yā Nə́ɓā dān̄ gōn ō.
8Nə́ɓā adə̄ ndūn kadə̄ ku kāgə̄ gə̄ ō,
kāgə̄ kə́ otə majə gə̄ kógə̄ḿ kógə̄ḿ ō, rāān̄ ndíl tām̄ yā Israel tə́.
9Tɔdɔ̄ Nə́ɓā a tél yā reē kə Israel gogə́.
Ni a rāā kadə̄ Israel a a̰a̰ lo i kə kɔsə go̰n yāneé.
Kem majə yān ō, yá̰a̰ rāā kə́ gōtə́ yān ō, a dan gō Israel.
Currently Selected:
BARUK 5: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.