BARUK 3
3
1Kɔ́ɔ̄ɓē kə́ tɔ́gən i ngá̰ý, Nə́ɓā yā Israel, i deē kə́ ndi kə sōlōó kekəre, kə́ tɔ́gən ur̄ wak kɔ̄ɔ́ n a əga kɔŕ kə̄ dɔí tə́ ní. 2Kɔ́ɔ̄ɓē, ōō najə̄ yājí ba á̰a̰ kum tō ndoō yājí, tām̄ jə-rāā majaĺ seí. 3Tɔdɔ̄ ḭ̄ ī-ndi ngándáńg, banī jḭḭ ɓá anī tají tḭ̄ḭ̄ kɔ̄ɔ́ i kə́ njɔ́ḿ gə̄ tə́! 4Adə̄ Kɔ́ɔ̄ɓē kə́ tɔ́gən i ngá̰ý, Nə́ɓā yā Israel, ōō ndɔ̄ȳ yā de kə́ koy kɔ̄ɔ́ gə̄ kə́ Israel tə́, nin̄ ń i ngáń ngé gə̄ ń rāān̄ majaĺ seí ní: nin̄ oōn̄ ta Kɔ́ɔ̄ɓē Nə́ɓā yādə́ alé, i lo ń nuū tə́ n yá̰á̰ kə́ to kum tō ndoō gə̄ əhɔnə̄ń gōjí ní. 5Ī-lōō kadə̄ əga kemií dɔ yá̰a̰ rāā kaají gə̄ kə́ gōtə́ aĺ tə́, banī kum mbang ń toō tə́ ɓáa, ādə̄ əga kemií dɔ tɔ́gí tə́ ō, dɔí ḭ̄ kə́ i Nə́ɓā tə́ ō. 6Tām̄ i ḭ̄ n i Kɔ́ɔ̄ɓē Nə́ɓā yājí ō, j-a jə-ɓōkíī tɔ̄ȳ ō ní! 7I tām̄ najə̄ ń nuū tə́ n ḭ̄ ə́la ɓōĺ kemjí tə́ kadə̄ jə-ɓōlə́nń gidií ō, jə-ɓāríiń ní ō. J-a jə-ɓōkíī tɔ̄ȳ kem ɓē ń ɔyn̄jí aw̄n̄ sejí kemeé dɔ gúu tə́ ní tə́. Tām̄ yá̰a̰ rāā kaají gə̄ kə́ gōtə́ aĺ gə̄ ń nin̄ rāān̄nəń majaĺ seí ní, jə-tūr̄ gidəjí ta tə́ kɔ̄ɔ́. 8Ɓōólaā jḭḭ i kem ɓē ń ī-tə̄ndā ī-tḭ̄ḭ̄jí kemeé tə́ ní. De gə̄ tájə̄n̄jí kemeé ō, ndɔ̄lə́n̄jí kemeé ō. J-ənge ndéy sɔɔ̄ń yá̰a̰ rāā kaají gə̄ kə́ gōtə́ aĺ gə̄ malang. Nin̄ ɔrə̄n̄ rɔ̄də́ kɔ̄ɔ́ rɔ̄í ḭ̄ Kɔ́ɔ̄ɓē Nə́ɓā yājí tə́.
Kum kedə̄
Dɔ deē ndígə̄nal dɔ kum kedə̄ tə́
9Israel, ōō ndū najə̄ gə̄ ń deē un gō anī a ndi kə kumneé ní.
Ī-nēl̄ mbīí ī-ndóoń lo ka̰a̰ yá̰a̰ ger̄.
10Israel, i rí n rāā yá̰a̰? I tām̄ rí tə́ á ī-ndi dɔ nang yā madə̄ ba̰ā̰ gə̄ tə́ ní?
Ī-tɔgə ɓə́ga dɔ nang yā tə̄rā gə̄ tə́ i tām̄ rí tə́?
11I tām̄ rí tə́ á ɔ́də rɔ̄ de kə́ koy gə̄ ī-yḛrəń rɔ̄í ō,
ənīn̄ dan ngé kaw̄ ɓádá gə̄ tə́ ō ní?
12Kumən na ḭ̄ ə́ya̰ lo ń kum kedə̄ a teē tū tə́ ní kɔ̄ɔ́.
13Kété ní ré ún i gō róbə yā Nə́ɓā anī,
lo to beé ā ī-ndi i lɔm ngándáńg.
14Lo ń kəndā ma̰ȳ yá̰a̰ i tū tə́ ō, tɔ́gə i tū tə́ ō, ger̄ yá̰a̰ i tū tə́ ō ní, majə kadə̄ ī-ger̄,
yā gerə̄ń lo ń ndi kə kumuú kə́ dan i ngá̰ý i tū tə́ ní ō,
lo ń kum deē kə́ rɔ̄nel̄ rāā adə̄ ndə́lē i tū tə́ ní ō, lo ń lɔm i tū tə́ ní ō.
Kum kedə̄ i ngɔr rɔ̄ deē tə́ alé
15I náā n ənge lo ndi yā kum kedə̄ ō,
udə kem lo gə̄ ń ni a ngɔ̄m̄ yá̰a̰ kənge yān gə̄ tū tə́ ō ní?
16Ngār gə̄ kə́ dɔ gíŕ nápar de gə̄ tə́ ō,
ngé tetə dɔ dā̰ kə́ bembeé gə̄ kə́ dɔ nang tə́ gə̄ ō nin̄ i rá?
17Ngé gə̄ ń kəhɔ yel̄ kə́ dɔɔ́ gə̄ i yá̰á̰ kə́ hɔliyɔ tām̄ yādə́ tə́ ní, nin̄ i rá?
Gində̄ arjā̰a̰ ō, lɔ́r ō ń de gə̄ ənīn̄ kemdə́ adə̄n̄də́ ní,
ngé ngɔ̄m̄də́ gə̄ nin̄ i rá?
Nin̄ ń yá̰a̰ kənge yādə́ i kə́ ta ngóyn gətóó ní.
18Ngé rāā kəla gində̄ arjā̰a̰ gə̄ ō, ndi kə sōlōó najə̄n tə́ ō ní, nin̄ i rá?
Nin̄ ń kəla rāādə́ to kɔr kum ní nin̄ i rá?
19Nin̄ gətóon̄, oy aw̄n̄ ɓádá kɔ̄ɔ́ ō,
de kə́ rang gə̄ unən̄ gotədə́ ō.
20Ngé kə́ dūú ngá̰ý gə̄ ń utə̄n̄ gōdə́ ní, ndin̄ dɔ nang tə́ ō,
banī gerə̄n̄ róbə yā kum kedə̄ alé.
21Nin̄ əndān̄ kumdə́ gíŕ ngáń róbə yān gə̄ tə́ aĺ ō,
usədə́ dɔn tə́ aĺ ō.
Ngán gə̄ ran̄ dɔ róbə yā bɔbə̄də́ gə̄ tə́ alé.
22Deē oō najə̄ yā kum kedə̄ dɔ nang kə́ Kanaan tə́ aĺ ō,
deē a̰a̰n kem ɓē kə́ Teman tə́ aĺ ō.
23Ngán Agar gə̄ ń a sāān̄ yá̰a̰ ger̄ dɔ nang tə́ ní gə̄gē,
ngé rāā gātə̄ gə̄ kə́ Meran ō, kə́ Teman ō,
ngé kɔr̄ súū gə̄ ō, ngé sāā yá̰a̰ ger̄ gə̄ ō ní,
nin̄ gerə̄n̄ róbə yā kum kedə̄ aĺ ō,
əga kemdə́ dɔ ngáń róbə yān gə̄ tə́ aĺ ō.
24Á Israel, kújə yā Nə́ɓā bo ngá̰ý, #3.24 Kújə yā Nə́ɓā: i dɔ rā̰ ō, dɔ nang ō.
lo yān laa ngá̰ý,
25bo ngá̰ý ō, ta ngóyn gətóo ō,
ḭḭ kə̄ dɔɔ́ ngá̰ý ō, lo kɔjə ngālən gətóo ō!
26De kə́ ngāl̄ ngá̰ý gə̄ ń rīdə́ ɓār̄ ngá̰ý ní, ojən̄də́ i lo ń nuū tə́. Ngé kə́ ta kəla gíŕ tə́ gə̄,
i de kə́ ngāl̄ ngá̰ý gə̄ ō, gerə̄n̄ rɔ̄ɔ̄ ngá̰ý ō.
27I nin̄ n Nə́ɓā gə̄rādə́ ní aĺ ō,
i nin̄ n Nə́ɓā ɔjədə́ róbə kum kedə̄ ní aĺ ō.
28Nin̄ oyn̄, tām̄ kəndā ma̰ȳ yá̰a̰ yādə́ gətóo.
Nin̄ oyn̄, sɔɔ̄ń gír̄ yá̰a̰ aĺ yādə́.
29I náā n al̄ aw̄ dɔ rā̰ tə́ əhɔ kum kedə̄,
ba ḭḭ seneé dan kil̄ man̄ gə̄ tə́ reē seneé ní?
30I náā n aw̄ teē dɔn tə́ gidə bā bo tə́ ō,
adə̄ lɔ́ŕ kə́ unjə̄ ngá̰ý gírən tə́ ō, ba reē seneé ní?
31De kə́ ger̄ róbə yā kum kedə̄ gətóo ō,
de kə́ ger̄ lo kəngen gətóo ō.
Kum kedə̄ i kadə̄ karī kə́ Nə́ɓā ngɔ̄m̄ tām̄ yā Israel tə́
32Banī nge ń ger̄ yá̰a̰ malang ní, ger̄ kum kedə̄.
Ni teē dɔ kum kedə̄ tə́ i kə ta kūl̄ kur̄ dɔn.
Ni tə́ndā yá̰a̰ gə̄ kə gō loodə́ gēé dɔ nang tə́, kadə̄ ton̄ kə́ njɔ́ḿ gə̄ tə́.
Gō tə́ anī, rāā adə̄ dā̰ gə̄ taān̄ lo dɔ nang tə́.
33Ni əla lo kunjə̄ anī, lo kunjə̄ aw̄.
Ni ɓāŕ lo kunjə̄ anī, lo kunjə̄ oō tan ba ndew.
34Tíyō̰ gə̄ ndə́lēn̄ kə kum mbang yādə́ gə̄ ń nin̄ a ngɔ̄m̄nəń lo ní ō, rāān̄ rɔ̄nel̄ ō.
35Ni ɓāŕdə́ ō, nin̄ ndigənən̄ ō, ədan̄ na: Jḭḭ n toó!
Nin̄ ndə́lēn̄ kə rɔ̄nelé tām̄ yā nge kəndādə́ tə́.
36I nge kəndādə́ ngeé ń toō n i Nə́ɓā yājí ní ō,
i ni ngóy n i Nə́ɓā ní ō.
37I ni n ənge róbə ń a aw̄ kə̄ ɓē kum kedēé ní ō,
ɔjə nge kəla yān Jakob róbə́ ní ō,
Israel ń i kó tárkó tár yān ní, ni ɔjən ō.
38Gō tə́ anī, a̰a̰n̄ kum kedə̄ dɔ nang tə́ ō,
ni ndi dan de gə̄ tə́ ō.
Currently Selected:
BARUK 3: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.