BARUK 2
2
1Adə̄ yá̰á̰ ń Kɔ́ɔ̄ɓē əda dɔjí tə́ kété ní, ni rāā adə̄ reē udə gíŕ kə́ rɔ̄ tə́ dɔjí tə́ ō, dɔ ngé gān̄g sarya yājí gə̄ kə́ ngé kṵ ɓē dɔ nang kə́ Israel tə́ ō, dɔ mban̄g yājí gə̄ tə́ ō, ngār yājí gə̄ tə́ ō, dɔ de gə̄ kə́ Israel tə́ ō, Juda tə́ ō. 2Yá̰á̰ kə́ tōr̄ ngá̰ý gə̄ ń ni rāā kə ɓē kə́ Jerusalem kə gō ń ndangnə̄ń kem ndū najə̄ yā Moyijə tə́ ní, ni rāā lo kə́rēý tə́ dɔ nang tə́ aĺ ɓáý. 3De gə̄ aw̄n̄ bátə́ əsan̄ dā̰ ngáńdə́ kə́ dəngam gə̄ ō, kə́ dəyá̰ gə̄ ō. 4Gō tə́ anī, ni əladə́ gíŕ tɔ́gə yā ɓē kṵ gə̄ malang ń ndi gīrə̄n̄ gidədə́ ní tə́. I beé n madə̄ ɓēēdə́ gə̄ malang ń Kɔ́ɔ̄ɓē tə̄ndā tḭ̄ḭ̄də́ dandə́ tə́ ní, tájə̄nəńdə́ ō, əlanə̄ń rɔ̄sɔl̄ kə́ ngá̰ý dɔdə́ tə́ ō ní. 5Kadə̄ i jḭḭ̄ n i dɔ de gə̄ tə́ anī, i jḭḭ̄ n rāān̄jí ɓəlo tə́ ní. I tɔdɔ̄ jə-rāāī majaĺ kə Kɔ́ɔ̄ɓē Nə́ɓā yājí, j-oōī yá̰á̰ ń ni ədají ní alé.
6Kɔ́ɔ̄ɓē Nə́ɓā yājí i de kə́ sew, banī jḭḭ̄ ō, kaají gə̄ ō ní, yājí i rɔ̄sɔl̄ kə́ ngá̰ý tītə̄ ń jə-raīń ɓōólaā toó. 7Yá̰á̰ kə́ tōr̄ gə̄ ń Kɔ́ɔ̄ɓē tāājí najə̄n kété ní, reēn̄ dɔjí tə́ malang. 8Banī jḭḭ̄ jə-ndɔ̄ȳin̄ kadə̄ tūr̄jí kógə̄ḿ kógə̄ḿ kɔ̄ɔ́ ta gír̄ gə̄ ń teēn̄ kemjí kə́ majə aĺ tə́ ní alé. 9I tām̄ najə̄ ń toō tə́ n Kɔ́ɔ̄ɓē əndā kumən gíŕ yá̰á̰ kə́ tōr̄ ngá̰ý gə̄ ń toō tə́, ba reē sedə́ dɔjí tə́ ní. Tɔdɔ̄ Kɔ́ɔ̄ɓē i de kə́ sew tū yá̰a̰ malang ń ni ədají kadə̄ jə-rāāī tə́ ní. 10Banī jḭḭ̄ j-oōī tan alé, jə-rāāī yá̰a̰ gə̄ ń ni ədají kadə̄ jə-rāāī ní alé.
Rāā ɓɔ́
11Ba ngɔlaā ní Kɔ́ɔ̄ɓē Nə́ɓā yā Israel, ḭ̄ ń ī-teē kə gír deē yāí gēé kɔ̄ɔ́ kem ɓē kə́ Ejiptə tə́ kə ta kūl̄ tɔ́gə jīí ō, yá̰á̰ kə́ ī-rāā yā kɔjəń yá̰a̰ gə̄ ō, yá̰á̰ kə́ to ɓōĺ gə̄ ō, kə ta kūl̄ tɔ́gí kə́ ngá̰ý ō, jīí kə́ ə́la ō ní, ḭ̄ ń ī-rāā adə̄ rīí to nuú tītə̄ ń j-a̰a̰ń ɓōólaā ɓáý ní, 12jə-rāā majaĺ ō, jə-rāā yá̰a̰ kə gō kem ndigə yā Nə́ɓāá aĺ ō. Jə-rāā yá̰á̰ kə́ gōtə́ alé, Kɔ́ɔ̄ɓē Nə́ɓā yājí, yá̰a̰ malang ń ə́dájí kadə̄ jə-rāā ní, jə-rāā alé. 13Ī-tūr̄ ta wūn̄g yāí dɔjí tə́ kɔ̄ɔ́ kə̄ lo kə́ rang tə́, tɔdɔ̄ jḭḭ i kə́ kəya̰jí kɔ̄ɔ́, jḭḭ i sḛ́ý beē dan nápar de gə̄ ń ī-tə̄ndā ī-tḭ̄ḭ̄jí dɔ dáńdə́ tə́ ní.
14Kɔ́ɔ̄ɓē, ōō ndɔ̄ȳ yājí ō, yá̰á̰ ń jə-dəjeī ní ō, ī-gān̄g dɔjí najə̄ yāí tə́ ō, ī-rāā ādə̄ ngé gə̄ ń ɔyn̄jí dɔ gúú tə́ reēn̄ sejí ní, rāān̄ kem majə sejí ō. 15Lo ń nuū tə́ de kə́ dɔ nang tə́ gə̄ malang a gerə̄n̄ kadə̄ ḭ̄ i Kɔ́ɔ̄ɓē Nə́ɓā yājí, tām̄ rīí ɓār̄ dɔ Israel tə́ ō, dɔ gír kaa yān tə́ ō. 16Kɔ́ɔ̄ɓē, ī-ndi dɔɔ́ dɔ kújə́ kə́ táĺ yāí tə́ á̰a̰ lo kə̄ rɔ̄jí tə́ ō, ī-gír̄ dɔjí tə́ ō, ī-nēl̄ mbīí kə̄ rɔ̄jí tə́ ba ōō najə̄ kɔr̄jí ō. 17Ī-teē kumií á̰a̰ lo: i de gə̄ kə́ oy aw̄n̄ ɓádá, kə́ koōdə́ teē kɔ̄ɔ́ gə̄ n a ɔsən̄ go̰n Kɔ́ɔ̄ɓē ō, a a̰a̰n̄ yá̰a̰ rāā Kɔ́ɔ̄ɓē kə́ gōtə́ yā ger̄ ō ní alé, 18banī i deē ń rɔ̄n nelə̄n aĺ ngá̰ý ō, njə̄rā a əla i dɔn nang tə́ ō, tɔ́gən gətóo ō, kumən a ndām̄ i mbée ō, ɓōō rāan ō ní n i nge kɔsə go̰n Kɔ́ɔ̄ɓē ō, i nge ka̰a̰ yá̰a̰ rāā Kɔ́ɔ̄ɓē kə́ gōtə́ ger̄ ō ní!
19I beé ní Kɔ́ɔ̄ɓē Nə́ɓā yājí, j-əndā tɔ́gə́jí i dɔ yá̰a̰ rāā kaají gə̄ kə́ gōtə́ tə́ ō, yá̰a̰ rāā mban̄g yājí gə̄ tə́ ō n jə-rań ta kumií tə́ jə-rāāiń ɓɔ́ ní alé. 20Tɔdɔ̄ ī-bə̄gā wurkatə̄ yāí ō, wūn̄g yāí ō dɔjí tə́, tītə̄ ń ī-tāań najə̄n kété kə ta kūl̄ ngé kəla yāí gə̄ ń i ngé koō taa gə̄ ní, ə́da na: 21Najə̄ ń mā Kɔ́ɔ̄ɓē m-ə́dá ní n toó: ə́laī dɔsí nang tə́ ba ī-rāāī kəla ādī mban̄g kə́ Babilon, lo ń nuū tə́ ā ī-ndiī kem ɓē ń m-ādə̄ kaasí gə̄ tə́ ní. 22Banī Kɔ́ɔ̄ɓē ń əda na kə ī-rāāī kəla ādī mban̄g kə́ Babilon ní, ré ōōī tan aĺ anī, 23m-ā m̄-rāā kadə̄ kɔŕ rɔ̄nel̄ kə́ ngá̰ý ō, najə̄ kə́ to rɔ̄nel̄ ō, pā yā ngaa dəyá̰ ō, rɔ̄nel̄ kə́ ngá̰ý yā nge taā ngaa ō, a ɓār̄ kem ɓē gə̄ kə́ Juda tə́ tṵ aĺ ō, kum róbə kɔsə gə̄ kə́ Jerusalem tə́ tṵ aĺ ō. Tɔdɔ̄ ɓē a nujə sák sák ō, de kə́ kemeé gə̄ a gətóon̄ kɔ̄ɔ́ ō. 24Banī, dan ń ə́dájí na kə jə-rāā kəla j-adə̄ mban̄g kə́ Babilon ní, jḭḭ j-oō taí alé. Adə̄ yá̰á̰ ń ī-tāā najə̄n kété kə ta kūl̄ ngé kəla yāí gə̄ ń i ngé koō taa gə̄ ní, ī-rāā adə̄ reē udə gíŕ kə́ rɔ̄ tə́. Ə́dá kété na a ɔyn̄ kə̄ngā mban̄g yāsí gə̄ ō, kə̄ngā kaasí gə̄ ō kɔ̄ɔ́ kem bəlo yo yādə́ gə̄ tə́. 25Mban̄g yājí gə̄ ō, kaají gə̄ ō, oyn̄ i dan tápə̄ kə́ ngá̰ý tə́. Nin̄ oyn̄ i yo ɓōō ō, rɔ̄ɔ̄ ō, moy ngāl̄ bɔ̄gīí ō. Nīńdə́ to i dɔ ndágá kum mbang tə́ ō, kum kūl̄ tə́ ndɔ̄ɔ́ ō. 26Banī kújə́ ń ɓārə́n̄ rīí dɔ tə́ ní, ḭ̄ ī-rāan adə̄ tél to tītə̄ ń de gə̄ a̰a̰nə̄ń ɓōólaā toó, sɔɔ̄ń kem ndul yā gír de gə̄ yā Israel ō, kem ndul yā gír de gə̄ yā Juda ō. 27Ɓá tā ba Kɔ́ɔ̄ɓē, yá̰á̰ ń ī-rāā sejí ní, i kə gō rāā yá̰a̰ yāí kə́ gōtə́ malang ō, kum kṵ yāí kə́ ngá̰ý malang ō. 28Kə gō ń ī-tāań kété kə ta kūl̄ nge kəla yāí Moyijə, ndɔ̄ ń ə́danəń kadə̄ ndang ndū najə̄ yāí ta kum ngán Israel gə̄ tə́ ní, ə́da na: 29Ré ōōī taḿ aĺ anī, kósə de kə́ ngá̰ý gə̄ ń kōōdə́ ɓār̄ gijə gijə toó, a télən̄ i yá̰á̰ kə́ ngá̰ý aĺ bátə́ dan nápar de gə̄ ń m-ā m̄-tə̄ndā yā tḭ̄ḭ̄də́ dandə́ tə́ ní. 30Tām̄ m̄-ger̄ kadə̄ nin̄ a oōn̄ najə̄ yāḿ alé, tām̄ i gír de gə̄ kə́ dɔdə́ ngan̄g ngá̰ý. Banī nin̄ a udən̄ kə̄ rɔ̄ gír̄ yá̰a̰ tə́ kem ɓē ń ɔyn̄də́ aw̄n̄ sedə́ kemeé dɔ gúú tə́ ní tə́. 31Lo ń nuū tə́ a gerə̄n̄ kadə̄ Kɔ́ɔ̄ɓē Nə́ɓā yādə́ i mā. M-ā m-ādə̄də́ dan wur kə́ kadə̄ a gerə̄n̄ kadə̄ mā i Nə́ɓā yādə́ ō, mbī gə̄ kə́ a oōn̄ lo ō. 32Nin̄ a ɓōkə́mə̄n̄ tɔ̄ȳ kem ɓē ń ɔyn̄də́ aw̄n̄ sedə́ kemeé dɔ gúú tə́ ní ō, a əga kemdə́ dɔ rīḿ tə́ ō, 33a lōōn̄ gír dum̄ naā yādə́ tə́ ō, gír yá̰a̰ rāādə́ kə́ majə aĺ gə̄ tə́ ō. Tām̄ a əga kemdə́ dɔ háĺ ń kaadə́ gə̄ rāān̄ tə́ ní, kaadə́ gə̄ ń rāān̄ majaĺ kə Kɔ́ɔ̄ɓēé ní. 34Adə̄ m-ā m̄-rāā kadə̄ a télən̄ yā reē gogə́ kem ɓē ń m-ə̄nī ndūḿ yā kadə̄ kaadə́ gə̄ ń i Abəraham ō, Ijaak ō, Jakob ō ní tə́. Nin̄ a télən̄ kɔ́ɔ̄ ɓē ní. M-ā m̄-rāā kadə̄ kutədə́ a tél kə̄ nang tə́ tṵ alé, banī kadə̄ kutədə́ reē ngá̰ý! 35M-ā m-ə́hɔ madə̄ naā kə́ a to ngándáńg sedə́, yā kadə̄ mā i Nə́ɓā yādə́ ō, nin̄ i gír deē yāḿ gə̄ ō. M-ā m̄-teē kə Israel gə̄ ń i gír deē yāḿ gə̄ ní kɔ̄ɔ́ kem ɓē ń m-ādə̄də́ tə́ ní tṵ alé.
Currently Selected:
BARUK 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.