2 MBAN̄G 23

1Mban̄g əla gō kum kɔɔ̄ gə̄ kə́ Juda tə́ ō, kə́ Jerusalem tə́ ō, adə̄ reēn̄ rɔ̄n tə́ malang. 2Ni-aw̄ sedə́ kem kújə yā Kɔ́ɔ̄ɓē tə́. De kə́ Juda gə̄ malang ō, kə́ Jerusalem gə̄ malang ō, dānə̄n̄də́, adə̄ ngé tun̄ yá̰a̰ gə̄ ō, ngé koō ta gə̄ ō, ngán gə̄ ō ngátɔ́gə gə̄ ō. Mban̄g tə́da najə̄ gə̄ kə́ kem makətūbə̄ madə̄ naā ń əngen̄ kem kújə yā Kɔ́ɔ̄ɓē tə́ ní adə̄ oōn̄ malang. 3Mban̄g ra njan kə́ dɔɔ́ ta kum Kɔ́ɔ̄ɓē dɔ loo ndɔ̄ȳ kə́ kḭḭ kə̄ dɔɔ́ tə́ rāań madə̄ naā kə Kɔ́ɔ̄ɓēé. Ni-ənī ndūn yā kun gō Kɔ́ɔ̄ɓē ō, yā rāā gō míndə gə̄ ń əda ní ō, yá̰a̰ gə̄ ń ɔjə ní ō, yá̰a̰ gə̄ ń ndū najə̄ yān əda ní ō, kə ngarā̰ kemənneé mámák ō, kə rɔ̄neé malang ō. Ni-ənī ndūn yā rāā yá̰a̰ malang ń i kə́ ndang kem makətūbə̄ madə̄ naā tə́ ní ō. Ngán Israel gə̄ malang ndigən̄ madə̄ naā ní adə̄ nin̄ ənīn̄ ndūdə́.

Nujən̄ ɓesə̄ gə̄ kə́ dɔ nang kə́ Juda tə́ kɔ̄ɔ́

(Á̰a̰ī 2 Yá̰a̰ 34.3-5)

4Mban̄g əda Hilkia ngol ngé tun̄ yá̰a̰ gə̄ ō, ngé tun̄ yá̰á̰ kə́ gōn tə́ gə̄ ō, ngé ngɔ̄m̄ ta róbə́ kújə gə̄ ō, kadə̄ teēn̄ kə yá̰a̰ gə̄ ń rāān̄ yā rɔȳń ɓesə̄ Baal ō, ɓesə̄ Asera ō, ɓesə̄ tə́yō̰ gə̄ malang kə́ dɔ rā̰ tə́ ō ní kɔ̄ɔ́ kem kújə yā Kɔ́ɔ̄ɓē tə́. Róōn̄ yá̰a̰ gə̄ ní horoó gidə ɓē kə́ Jerusalem tə́ ndágá kem wól man̄ Sedəron tə́ ba ɔyn̄ būdə́ gə̄ aw̄n̄neé Betel. 5Ngé tun̄ yá̰á̰ kə́ rɔ̄kum aĺ gə̄ ń mban̄g kə́ Juda gə̄ adə̄n̄ a tunə̄n̄ yá̰a̰ dɔ loo ndɔ̄ȳ gə̄ tə́ kem ɓē gə̄ kə́ Juda tə́ ō, kə gō gidə ɓē kə́ Jerusalem ō ní, mban̄g Josias tə̄ɓādə́ kɔ̄ɔ́. Ni-tə̄ɓā ngé róō ndujə̄ yá̰á̰ kə́ kotə majə gə̄ kadə̄ ɓesə̄ Baal ō, ɓesə̄ Mbang ō, ɓesə̄ Nāā ō, ɓesə̄ Tə́yō̰ gə̄ malang kə́ dɔ rā̰ tə́ ō. 6Ni un kāgə̄ ɓesə̄ Asera kem kújə yā Kɔ́ɔ̄ɓē tə́ aw̄ń gidə ɓē kə́ Jerusalem tə́ ndágá adə̄ róōn̄ horoó wól loo kə́ Sedəron tə́. Róōn̄ kāgə̄ ɓesə̄ Asera ní ba ɔyn̄ būn ɓōkə́n̄ dɔ ɓádá ń kə́nə̄n̄ nīń kósə de gə̄ kemeé tə́ ní. 7Kújə gə̄ kə́ kadə kújə yā Kɔ́ɔ̄ɓē tə́ ń de gə̄ a rāȳn̄ kemeé a ndɔ̄ȳnə̄ń ɓesə̄ gə̄ ní mban̄g Josias tɔ̄ɔ̄də́ kɔ̄ɔ́. Dəyá̰ gə̄ a əjōn̄ kūbə̄ gə̄ kə́ yā ndɔ̄ý ɓesə̄ Asera i kem kújə gə̄ ní tə́.

8Gō tə́ anī Josias əla gō ngé tun̄ yá̰a̰ gə̄ kə́ gō nang kə́ Juda tə́ malang adə̄ reēn̄ Jerusalem ō, ni-rāā adə̄ majaĺ tákə̄ loo ndɔ̄ȳ gə̄ ń a róōn̄ ndujə̄ yá̰á̰ kə́ kotə majə gə̄ dɔ tə́ ní ō, əla gír i Geba bátə́ ugə̄ń Beer Seba. Ni nujə ngé kə́ ta róbə́ tə́ gə̄ kɔ̄ɔ́, nujə nge ń ra ta róbə yā Jojue nge ko̰o̰ ɓē tə́ kum kə̄ kemeé ní tə́ ō, nge ń deē a udə kə̄ kem ɓēé anī ra i dɔ jī gel tə́ ní ō. 9Ɓá tā ba ɔgə̄n̄ ngé tun̄ yá̰a̰ loo ndɔ̄ȳ gə̄ tə́ kaw̄ tun̄ yá̰á̰ loo yā Kɔ́ɔ̄ɓē tə́ kem ɓē kə́ Jerusalem tə́. Yá̰á̰ ń asən̄ rāā ní i kəsa mápá kə́ rāā kanjə̄ kaa mápa naā tə́ kə ngákó̰ó̰də́ gēé ngóy.

10Mban̄g rāā adə̄ majaĺ tákə̄ loo kə́ Topet ń ra kum wól loo kə́ Ben Hinom tə́ ní adə̄ de gə̄ róō ngáńdə́ kə́ dəngam gə̄ ō kə́ dəyá̰ gə̄ ō, horoó kadə̄ ɓesə̄ Molok ɓáý to̰ alé. 11Ni-adə̄ sə́nda gə̄ ń mban̄g kə́ Juda gə̄ rāā tə́ndān̄ ta kújə yā Kɔ́ɔ̄ɓē tə́ yā ndɔ̄ȳń mbang ní gətóon̄ kɔ̄ɔ́. Sə́nda gə̄ ní ran̄ i kadə kújə yā Netan Melek ń i de kə́ tɔ̄ɔ̄n̄ gumən kɔ̄ɔ́ ní tə́. Ba kújə yā Netan Melek ní ra i kadə kújə madə̄ gə̄ ń əhɔn̄ ta naā kə kújə yā Kɔ́ɔ̄ɓēé ní tə́. Mban̄g Josias əla hor dɔ púsə yā mbang tə́ kɔ̄ɔ́. 12Ni tɔ̄ɔ̄ loo tun̄ yá̰a̰ gə̄ ń mban̄g kə́ Juda gə̄ rāān̄ dɔ kújə́ kə́ dɔɔ́ yā Akaj tə́ ní kɔ̄ɔ́ ō, tɔ̄ɔ̄ loo tun̄ yá̰a̰ gə̄ ń Manase rāādə́ ndágə loo kə́ gīr̄ gidə kújə yā Kɔ́ɔ̄ɓē kə́ jōó gə̄ kə́ ta kújə yā Kɔ́ɔ̄ɓē tə́ ní kɔ̄ɔ́ ō. Ni ɔydə́ loo ní tə́ kɔ̄ɔ́ ba ɓōkə́ būdə́ kum wól loo kə́ Sedəron tə́. 13Ni-rāā adə̄ majaĺ tákə̄ loo ndɔ̄ȳ gə̄ ń ran̄ sɔɔ̄ ta ɓē kə́ Jerusalem ní. Ré deē ra mbal̄ kāgə̄ olibə gə̄ tə́ anī, loo ndɔ̄ȳ gə̄ ní ran̄ i kə̄ dām̄ mbɔ́r ɓē kə́ geleé tə́. Salomo̰ mban̄g kə́ Israel rāā loo ndɔ̄ȳ gə̄ ní kété adə̄ i Astarte ń i ɓesə̄ kə́ majaĺ ngá̰ý yā Sidon gə̄ ní ō, adə̄ i Kemos ń i ɓesə̄ kə́ majaĺ ngá̰ý yā Moab gə̄ ō, Milkom ń i ɓesə̄ kə́ majaĺ ngá̰ý yā Amon gə̄ ní ō. 14Ni tɔ̄ɔ̄ mbal̄ kə́ kudə dɔɔ́ gə̄ kɔ̄ɔ́ ō, tə́gā kāgə̄ ɓesə̄ kə́ yā ɓōĺ gidə gə̄ kɔ̄ɔ́ ō, ba kán̄ kə̄ngā de gə̄ gotoó.

Nujən̄ ɓesə̄ gə̄ kə́ dɔ nang kə́ Israel tə́

(Á̰a̰ī 2 Yá̰a̰ 34.6-7)

15Josias bótə̄yō̰ loo tun̄ yá̰á̰ kə́ Betel kɔ̄ɔ́ ō, nujə loo ndɔ̄ȳ kə́ kḭḭ kə̄ dɔɔ́ ń Jeroboam ngōn̄ Nebat rāā ba sə̄lā Israel gə̄ adə̄ rāān̄ majaĺ ní kɔ̄ɔ́ ō. Ni-əla hor dɔ tə́ ō, rāā adə̄ əsō bū ō, róō kāgə̄ ɓesə̄ kə́ yā ɓōĺ gidə kɔ̄ɔ́ horoó ō. 16Josias tūr̄ rɔ̄n anī a̰a̰ dɔ ɓádə gə̄ dɔ mbalá. Anī əla adə̄ ɔyn̄ kə̄ngā de gə̄ kə́ kem bāá ɓádə gə̄ ní tə́, ba róōdə́ dɔ loo tun̄ yá̰á̰ tə́. Ni-rāā adə̄ majaĺ tákə̄ loo tun̄ yá̰a̰ tītə̄ ń Kɔ́ɔ̄ɓē ədań ní. Kɔ́ɔ̄ɓē əndā najə̄ ní i ta deē yā Nə́ɓā tə́, deē ń un ndūn kə̄ dɔɔ́ ngá̰ý ədań yá̰a̰ gə̄ ń toō ní. 17Josias dəje na ké mbal̄ kə́ kudə dɔɔ́ ń n-a̰a̰ noó ní kə́ i mbal̄ kəga kem dɔ rí tə́ wa. Anī de kə́ kem ɓēé gə̄ tūr̄ ədanən̄ na i dɔ ɓádə deē yā Nə́ɓā kə́ dɔ nang kə́ Juda tə́. Ba yá̰a̰ gə̄ ń ī-rāā dɔ ō tun̄ yá̰á̰ kə́ Betel tə́ toō i ni n reē ɔr̄ najə̄n kété kə ndū boó ní. 18Loo ń noō tə́ Josias əda na:

Əya̰ī ɓádə́ ń noō! Adə̄ deē ɔdə rɔ̄ kə̄ngā deē yā Nə́ɓā ń noō alé!

I beé n əya̰n̄neé kə̄ngān gə̄ ō, kə̄ngā nge koō ta yā Nə́ɓā kə́ kḭḭ Samari ní.

19Kújə gə̄ ń mban̄g kə́ Israel tə́ gə̄ rāān̄ dɔ loo ndɔ̄ȳ gə̄ tə́ kə gō kem ɓē gə̄ kə́ Samari adə̄n̄neé Kɔ́ɔ̄ɓē wōn̄g ní, Josias bótə̄yō̰də́ malang kɔ̄ɔ́ tītə̄ ń rāań Betel ní. 20Ni tɔ̄l̄ ngé tun̄ yá̰a̰ gə̄ ń a tunən̄ yá̰a̰ dɔ loo ndɔ̄ȳ gə̄ tə́ ní kɔ̄ɔ́ malang dɔ loo tun̄ yá̰a̰ gə̄ tə́ ō, róō kə̄ngā de gə̄ dɔ tə́ ō. Gō tə́ anī Josias tél dɔ tə́ reē gogə́ Jerusalem.

De kə́ Juda gə̄ rāān̄ nāā Pákə

(Á̰a̰ī 2 Yá̰a̰ 35.1,18-19)

21Mban̄g Josias əda ngán Israel gə̄ malang na kə rāān̄ nāā Pákə kə rɔȳn̄neé Kɔ́ɔ̄ɓē Nə́ɓā yādə́ tītə̄ ń ndangən̄neé kem makətūbə̄ madə̄ naā tə́ ní. 22Tɔdɔ̄ əla gír dɔ ɓāl̄ gə̄ ń nge sarya gə̄ ō, mban̄g gə̄ ō, a o̰o̰n̄neé ɓē Israel tə́ ō, Juda tə́ ō ní, deē rāā nāā Pákə kə́ tītə̄ ń toō aĺ ɓáý. 23Rāān̄ nāā Pákə ní rɔȳn̄neé Kɔ́ɔ̄ɓē kem ɓē kə́ Jerusalem tə́ i kem ɓāl̄ kə́ nge ko̰ kutə gidə i sɔ́sɔ́ ń Josias ndiń mban̄g tə́ ní.

Ta tɔ̄l̄ ta najə̄ kə́ dɔ ko̰o̰ ɓē yā Josias tə́

(Á̰a̰ī 2 Yá̰a̰ 35.20-27; 36.1)

24Josias rāā adə̄ ngé koō ta de kə́ koy gə̄ ō, kɔdə̄ sāā gə̄ ō, ɓesə̄ Terapim gə̄ ō, gotə ɓesə̄ kə́ rang gə̄ ō, gətóon̄ kɔ̄ɔ́ malang dɔ nang kə́ Juda tə́ ō, kem ɓē kə́ Jerusalem tə́ ō. Ni-rāā yá̰á̰ ń ndangən̄ kem makətūbə̄ ndū najə̄ ń Hilkia ngol ngé tun̄ yá̰a̰ gə̄ ənge kem kújə yā Kɔ́ɔ̄ɓē tə́ ní.

25Mban̄g kə́ kété no mban̄g Josias tə́ kə́ tél reē rɔ̄ Kɔ́ɔ̄ɓē tə́ kə ngarā̰ kemən gēé mámák ō, kə rɔ̄n gēé malang ō, kə tɔ́gən gēé malang ō, tītə̄ ń ndū najə̄ yā Moijə ədań ní gətóo ō, mban̄g kə́ gotən tə́ tītə̄n gətóo ō. 26Ɓá tā ba wōn̄g kə́ ngá̰ý ń rāā Kɔ́ɔ̄ɓē dɔ ɓē ko̰o̰ kə́ Juda tə́ ní tetə alé sɔɔ̄ń yá̰á̰ kə́ to wur tōr̄ gə̄ malang ń mban̄g Manase rāā seneé tə́ ní. 27Adə̄ Kɔ́ɔ̄ɓē əda na tītə̄ ń na n-gḛyń ka̰a̰ de kə́ kem ɓē ko̰o̰ kə́ Israel tə́ gə̄ ta kumən tə́ to̰ aĺ ní, na n-gḛy ka̰a̰ ngé kə́ Juda tə́ gə̄ ta kumən tá aĺ ō. Na n-mbātə́ ɓē kə́ Jerusalem ń na n-gə̄rā ní ō, kújə yān ń n-ənī ndūn yā kəndā rīn dɔ tə́ ní ō.

28Gotə yá̰á̰ kə́ rang gə̄ malang ń Josias rāā ní, ndangən̄ kem makətūbə̄ kəla rāā mban̄g gə̄ kə́ Juda tə́. 29I kem ɓāl̄ ko̰o̰ ɓē yān tə́ n Parao̰ Neko, mban̄g kə́ Ejiptə, aw̄ń kə ngé rɔ̄ɔ̄ yān gēé kum kə̄ bā Opəratə tə́ yā kaw̄ dḭḭ̄ń mban̄g kə́ Asiri ní. Mban̄g Josias gḛy kɔgə̄ de kə́ Ejiptə tə́ gə̄ mān̄, adə̄ dan ń Parao̰ a̰a̰n Megido ní tɔ̄lən. 30Ngol áskar yān gə̄ unən̄ nīnə́n Megido kem púsú reēn̄neé Jerusalem. Dubə̄nən̄ i kem bāá ɓádə yān tə́. De kə́ Juda gə̄ unən̄ Joakajə ngōn̄ Josias urən̄ yibə̄ dɔn tə́ ba əndānən̄ mban̄g gotə bɔbə̄n tə́.

Joakajə mban̄g kə́ Juda

(Á̰a̰ī 2 Yá̰a̰ 36.2-4)

31Dan ń Joakajə ndi mban̄g ní, ɓālə̄n i kutə jōó gidə i mətá. Ni-o̰o̰ ɓē Jerusalem i nāā mətá. Rī kó̰o̰n na i Hamutal, i ngōn̄ Irmeya kə́ Libəna. 32Joakajə rāā yá̰á̰ kə́ majaĺ ta kum Kɔ́ɔ̄ɓē tītə̄ yā kaan gə̄. 33Parao̰ Neko əhɔ ənīn dəngáyá kem ɓē kə́ Ribəla tə́ dɔ nang kə́ Hamat tə́. I beé n gír ko̰o̰ ɓē yān gāngəń ní. Parao̰ Neko gāng gində̄ arjā̰a̰ kə́ kɔȳn i kəlōo dūbú mətá ō, lɔ́r kə́ kɔȳn i kəlōo mətá ō, dɔ ɓē kə́ Juda tə́. 34Gō tə́ anī əndā Eliakim ngōn̄ Josias mban̄g gotə bɔbə̄n tə́ ba tūr̄ rīn kɔ̄ɔ́, əndā na i Joakim. Joakajə tá aw̄ seneé Ejiptə tə́ adə̄ oy i nú. 35Joakim adə̄ Parao̰ Neko gində̄ arjā̰a̰ ō, lɔ́r ō ń gān̄g dɔn tə́ ní. Ni gān̄g i lambóo dɔ de kə́ kem ɓēé gə̄ tə́ n əngeń kutə nar ń Parao̰ gḛy ní. Gində̄ arjā̰a̰ ō, lɔ́r ō ń ni-gān̄g dɔ de kə́ kem ɓēé gə̄ tə́ yā kadə̄ Parao̰ ní, gān̄g i kə gō yá̰a̰ kənge yādə́ gēé.

Joakim mban̄g kə́ Juda

(Á̰a̰ī 2 Yá̰a̰ 36.5-8)

36Dan ń Joakim ndi mban̄g ní ɓālə̄n i kutə jōó gidə i mí. Ni-o̰o̰ ɓē ɓāl̄ kutə gidə i kógə̄ḿ kem ɓē kə́ Jerusalem tə́. Rī kó̰o̰n na i Jebuda, i ngōn̄ Pedaya kə́ Ruma. 37Joakim rāā yá̰á̰ kə́ majaĺ ta kum Kɔ́ɔ̄ɓē tə́ tītə̄ yā kaan gə̄.

Currently Selected:

2 MBAN̄G 23: SARDC

Highlight

Copy

Compare