2 MBAN̄G 24

1I ɓāl̄ ko̰o̰ ɓē yān tə́ n Nabukodonosor, mban̄g kə́ Babilon ḭḭń dɔɔ́ yā rɔ̄ɔ̄ de gə̄ ní. Joakim əla dɔn gír tɔ́gə yān tə́ ɓāl̄ mətá, banī gō tə́ anī mbātə́ kɔ̄ɔ́. 2Loo ń noō tə́ Kɔ́ɔ̄ɓē əla ɓūtə̄ ngé ɓogə gə̄ kə́ dɔ nang kə́ Kalde tə́ ō, kə́ Aram tə́ ō, kə́ Moab gə̄ ō, kə́ Amon gə̄ gə̄ ō, dɔ Joakim tə́. Ni əladə́ kadə̄ nujə ɓē kə́ Juda sák sák tītə̄ ń Kɔ́ɔ̄ɓē əndāń ta ngé koō ta gə̄ kété adə̄ ədan̄ ní. 3I Kɔ́ɔ̄ɓē n rāā adə̄ yá̰á̰ kə́ majaĺ gə̄ malang ń noō reēn̄ dɔ ɓē ko̰o̰ kə́ Juda tə́ ní, tām̄ ni gḛy ka̰a̰ ɓē ko̰o̰ kə́ Juda ta kumən tə́ to̰ alé. Tɔdɔ̄ mban̄g Manase rāā majaĺ ngá̰ý, 4ni tɔ̄l̄ de kə́ kanjə̄ najə̄ dɔdə́ tə́ ngá̰ý adə̄ majaĺ i ngá̰ý kem ɓē kə́ Jerusalem tə́. I tām̄ najə̄ ń noō tə́ n Kɔ́ɔ̄ɓē gḛyń mā̰ȳ rɔ̄n aĺ ní.

5Gotə yá̰á̰ kə́ rang gə̄ malang ń Joakim rāā ní, ndangən̄ kem makətūbə̄ kəla rāā mban̄g kə́ Juda tə́. 6Dan ń Joakim oy ní, i ngōnən Joakin n o̰o̰ ɓē gotən tə́ ní.

7Mban̄g kə́ Ejiptə tə́ teē loo to̰ alé, tɔdɔ̄ əla gír i man̄ kə́ Ejiptə tə́ bátə́ ugə̄ń bā Opəratə tə́ ní, mban̄g kə́ Babilon taā yá̰a̰ malang ń kété i yā mban̄g kə́ Ejiptə ní jīn tə́ kɔ̄ɔ́.

Joakin mban̄g kə́ Juda

Kaw̄ ɓəloó kə́ ta kəga dɔ

(Á̰a̰ī 2 Yá̰a̰ 36.9-10)

8Dan ń Joakin ndi mban̄g, ɓālə̄n i kutə gidə i sɔ́sɔ́. Ni-o̰o̰ ɓē Jerusalem i nāā mətá. Rī kó̰o̰n na i Nehusta, i ngōn̄ Elnatan kə́ Jerusalem. 9Ni-rāā yá̰á̰ kə́ majaĺ ta kum Kɔ́ɔ̄ɓē tə́ tītə̄ yā bɔbə̄n. 10Dan ngeé n noō tə́ ní ngol áskar gə̄ yā mban̄g Nabukodonosor ɔyn̄ ngé rɔ̄ɔ̄ kə́ Babilon gə̄ reēn̄neé kənī ɓē kə́ Jerusalem rɔ̄ɔ̄ tə́. Nin̄ gīrən̄ gidə ɓē kə́ Jerusalem. 11Nabukodonosor nəkɔ́ reē kum tə́ ō. 12Loo ń noō tə́ mban̄g Joakin əya̰ rɔ̄n adə̄ mban̄g Nabukodonosor. Ni teē kem ɓēé reē rɔ̄ mban̄g Nabukodonosor tə́. Reēn̄ nin̄ i kə kó̰o̰neé ō, kə ngé kəla yān gēé ō, kə de kə́ bo yān gēé ō, kə ngol áskar yān gēé ō. Mban̄g kə́ Babilon əhɔdə́ dəngáy. I kem ɓāl̄ ko̰o̰ ɓē yā Nabukodonosor kə́ nge ko̰ sɔ́sɔ́ tə́. 13Tītə̄ ń Kɔ́ɔ̄ɓē ədań kété ní, Nabukodonosor ɔy yá̰a̰ kənge kə́ kem kújə yā Kɔ́ɔ̄ɓē tə́ ō, kə́ kem kújə yā mban̄g tə́ ō, malang aw̄ń. Ni tɔ̄ɔ̄ ngáń gájə́ yá̰a̰ rāā kəla gə̄ ń mban̄g Salomo̰ adə̄ rāān̄ kə lɔ́rɔ́ tām̄ yā kújə yā Kɔ́ɔ̄ɓē tə́ ní kɔ̄ɔ́ malang. 14Ni ɔy de kə́ Jerusalem gə̄ malang aw̄ sedə́, ngār gə̄ ō de kə́ bo gə̄ ō. Malang i deē dūbú kutə kanjə̄ tə́da kɔdə gə̄ ō, ngé rāā lakélé ta róbə gə̄ ō. De gə̄ ń Nabukodonosor əya̰də́ ndin̄ gotoó kem ɓēé ní i nge ndoō gə̄. 15Ba mban̄g Joakin ō, kó̰o̰n ō, nə̄yá̰n gə̄ ō, ngol áskar yān gə̄ ō, ngār gə̄ kə́ Juda ō ní, ni ɔydə́ Jerusalem aw̄ sedə́ Babilon. 16Ni ɔy de kə́ bo gə̄ malang aw̄ sedə́ Babilon, adə̄ i de gə̄ dūbú sīrí ō, kɔdə̄ gə̄ kə́ ngé rāā lakélé ta róbə gə̄ i deē dūbú ō, go̰ rɔ̄ɔ̄ gə̄ malang ō. 17Mban̄g kə́ Babilon əndā Matania ń i bɔbə̄ Joakin kə́ dūú ní mban̄g gotə Joakin tə́. Ni tūr̄ rīn kə́ Matania kɔ̄ɔ́, ba əndā na i Sedekias.

Sedekias mban̄g kə́ Juda

(Á̰a̰ī Jer 52.1-3; 2 Yá̰a̰ 36.11-12)

18Dan ń Sedekias ndi mban̄g ní, ɓālə̄n i kutə jōó gidə i kógə̄ḿ. Ni-o̰o̰ ɓē ɓāl̄ kutə gidə i kógə̄ḿ kem ɓē kə́ Jerusalem tə́. Rī kó̰o̰n na i Hamutal, i ngōn̄ Irmeya kə́ Libəna. 19Sedekias rāā yá̰á̰ kə́ majaĺ ta kum Kɔ́ɔ̄ɓē tə́ tītə̄ yā Joakim.

20I wōn̄g n ndḛḛ̄ Kɔ́ɔ̄ɓē rāā kadə̄ yá̰á̰ kə́ majaĺ gə̄ ń noō reēn̄ dɔ ɓē kə́ Jerusalem tə́ ō, dɔ ɓē ko̰o̰ kə́ Juda tə́ ō ní. Ta tɔ̄l̄ ta anī ni-tə̄ɓādə́ əndādə́ sa̰y kɔ̄ɔ́ rɔ̄n tə́.

Nabukodonosor gīr̄ gidə ɓē kə́ Jerusalem

(Á̰a̰ī Jer 39.1-7; 52.3-11)

Sedekias mbātə́ kəla dɔn gír tɔ́gə yā mban̄g kə́ Babilon tə́.

Currently Selected:

2 MBAN̄G 24: SARDC

Highlight

Copy

Compare