2 MBAN̄G 22

Josias mban̄g kə́ Juda

(Á̰a̰ī 2 Yá̰a̰ 34.1-2)

1Dan ń Josias əla gír ndi mban̄g ní ɓālə̄n i sɔ́sɔ́. Ni-o̰o̰ ɓē ɓāl̄ kutə mətá gidə i kógə̄ḿ kem ɓē kə́ Jerusalem tə́. Rī kó̰on na i Yedida, ngōn̄ Adaya kə́ Boskat. 2Josias rāā yá̰á̰ kə́ gōtə́ ta kum Kɔ́ɔ̄ɓē tə́. Ni ndájə̄ kəla rāā kaan Dabid kanjə̄ tɔ̄ɔ̄ geleé aláa ko̰ó̰.#22.2 K. 2: Á̰a̰ī Ndū 17.18-20

Ngol ngé tun̄ yá̰a̰ teē dɔ makətūbə̄ ndū najə̄ tə́

(Á̰a̰ī 2 Yá̰a̰ 34.8-18)

3Kem ɓāl̄ kə́ nge ko̰ kutə gidə i sɔ́sɔ́ ń Josias ndiń mban̄g tə́ ní, ni-əla Sapan nge ndang makətūbə̄ kə́ ngōn̄ Asalia kə́ ngōn̄ Mesulam kem kújə yā Kɔ́ɔ̄ɓē tə́. Ni ədan na kə 4aw̄ rɔ̄ Hilkia ngol ngé tun̄ yá̰a̰ gə̄ tə́ kə ədan kadə̄ tə́da kutə nar ń de gə̄ reēn̄neé kem kújə yā Kɔ́ɔ̄ɓē tə́ á ngé ngɔ̄m̄ ta róbə́ kújə gə̄ táān̄ jī ngán Israel gə̄ tə́ ní. 5Kadə̄ télən̄ kə nar ní kə ɓōkə́n̄ jī de gə̄ ń tə́ndān̄də́ dɔ kəla kújə yā Kɔ́ɔ̄ɓē tə́ ní, kadə̄ əgān̄neé de gə̄ ń a rāān loo kə́ nujə kə́ tū tə́ gə̄ ní. 6De gə̄ ní i ngé kəja kāgə̄ gə̄ ō, ngé kəndā bɔr gə̄ ō, ngé kɔsə kíldə́ kem kəla gə̄ tə́ ō, kadə̄ mangən̄neé sáā kāgə̄ gə̄ ō, mbal̄ kə́ tɔ́sə̄ kadə gə̄ ō, yā rāań loo kə́ nujə gə̄ kə́ tū kújə yā Kɔ́ɔ̄ɓē tə́. 7Banī kadə̄ deē dəjedə́ gír yá̰á̰ ń rāān̄ kə nar ń adə̄n̄də́ ní alé, tɔdɔ̄ nin̄ rāān̄ yá̰a̰ i kə gōó.

8Dan ń ngol ngé tun̄ yá̰a̰ gə̄ oō najə̄ ní oy anī, əda Sapan na n-ənge makətūbə̄ ndū najə̄ kem kújə yā Kɔ́ɔ̄ɓē tə́. Ni adə̄ Sapan makətūbə̄ ní adə̄ tə́da.

9Gō tə́ anī Sapan nge ndang makətūbə̄ tél aw̄ rɔ̄ mban̄g tə́ aw̄ ɔjən gotə yá̰a̰ malang əda na: Ngé tun̄ yá̰a̰ gə̄ ɔyn̄ nar malang kə́ kem sandúkə ngɔ̄m̄ nar kə́ kem kújə yā Kɔ́ɔ̄ɓē tə́ adə̄n̄ de gə̄ ń tə́ndān̄də́ dɔ kəla rāā loo kə́ nujə gə̄ kə́ tū kújə yā Kɔ́ɔ̄ɓē tə́ ní. 10Gō tə́ anī Sapan əda na Hilkia ngol ngé tun̄ yá̰a̰ gə̄ na adə̄n makətūbə̄ ń toō. Sapan tə́da makətūbə̄ ní adə̄ mban̄g.

Josias mēr̄ kaw̄ koō taá rɔ̄ Hulda tə́

(Á̰a̰ī 2 Yá̰a̰ 34.19-28)

11Dan ń mban̄g oō najə̄ kə́ kem makətūbə̄ ndū najə̄ tə́ oy anī, rə́yā̰ kūbə̄ gə̄ kə́ rɔ̄n tə́. 12Ni-ɓāŕ Hilkia ngol ngé tun̄ yá̰a̰ gə̄ ō, Ahikam ngōn̄ Sapan ō, Akbor ngōn̄ Mikaya ō, Sapan nge ndang makətūbə̄ ō, Asaya pajā yā mban̄g ō, ba ədadə́ na 13kə aw̄ kə sāān̄ dɔn tə́ ō, dɔ de kə́ Juda tə́ gə̄ ō, rɔ̄ nge koō ta yā Kɔ́ɔ̄ɓē tə́, tām̄ yā najə̄ kə́ kem makətūbə̄ ń əngen̄ ní tə́. Wōn̄g ń rāā Kɔ́ɔ̄ɓē sedə́ ní na i wōn̄g kə́ ngá̰ý, tɔdɔ̄ yá̰a̰ gə̄ ń i kə́ ndang kem makətūbūú kadə̄ yā rāā ní kaadə́ gə̄ na nēlən̄ mbīdə́ oōnneé aĺ ō, rāān̄ aĺ ō.

14Hilkia ngol ngé tun̄ yá̰a̰ gə̄ ō, Ahikam ō, Akbor ō, Sapan ō, Asaya ō, aw̄ əngen̄ Hulda nge koō ta kə́ dəyá̰. I nə̄yá̰ Salum kə́ nge ngɔ̄m̄ kūbə̄ tun̄ yá̰a̰ gə̄ kə́ kem kújə yā Kɔ́ɔ̄ɓē tə́. Salum i ngōn̄ Tikəba kə́ ngōn̄ Haras. Hulda ndi i Jerusalem kem ɓē kə́ kijə tə́. Dan ń de gə̄ ní ɔjən̄ nge koō ta kə́ dəyá̰ yá̰a̰ gə̄ ń rāān̄ yá̰á̰ ní oy anī, 15ni ədadə́ na:

Kɔ́ɔ̄ɓē Nə́ɓā yā Israel əda na kə ə́daī deē ń əlasí rɔ̄ḿ tə́ ní na: 16M-ā m̄-reē kə yá̰á̰ kə́ to kum kaȳ aĺ dɔ ɓē kə́ Jerusalem tə́ ō, dɔ de kə́ kemeé gə̄ tə́ ō, tītə̄ ń ndangən̄neé kem makətūbə̄ ń mban̄g kə́ Juda tə́dá tə́ ní. 17De kə́ Jerusalem gə̄ əya̰mə̄n̄ kɔ̄ɔ́, nin̄-tunə̄n̄ yá̰a̰ adə̄n̄ nə́ɓā gə̄ ń i ɓesə̄ gə̄ ní. Yá̰a̰ malang ń nin̄ rāān̄ ní adə̄m̄ wōn̄g. Ba wōn̄g ń rāām̄ kə ɓē ń toō ní i wōn̄g kə́ ngá̰ý adə̄ a dəba alé. 18Banī ə́daī mban̄g kə́ Juda ń əlasí koō ta Kɔ́ɔ̄ɓē tə́ ní na najə̄ ń Kɔ́ɔ̄ɓē yā Israel əda ní n toó: Ḭ̄ ōō najə̄ kə́ kem makətūbə̄ ní tə́ majə. 19Najə̄ ń m-ə́da kemeé dɔ ɓē kə́ Jerusalem tə́ ō, dɔ de kə́ kemeé gə̄ tə́ ō, na loo n toō a tél loo kə́ to kum ko̰o̰ ō, ní ī-nēl̄ mbīí ōoń majə, adə̄ ī-ndə̄ngā rɔ̄í ō, ī-tél kə rɔ̄í kə̄ nang tə́ ta kumḿ tə́ ō, ī-*rə́yā̰ kūbə̄ yāí gə̄ ō, ī-nōō kə man̄ kumií ō. Ní, mā Kɔ́ɔ̄ɓē m-ə́daī na m-ōō ndūí. 20Adə̄ m-ā m-ə́ya̰ī kadə̄ óy āw̄ gō kaaí gə̄ tə́ kə kem kə́ sɔl̄ lɔmɔɔ́. A əlanī ɓádá kanjə̄ kadə̄ á̰á̰ yá̰á̰ kə́ to kum kaȳ aĺ gə̄ malang ń m-ā m̄-reēń dɔ ɓē kə́ Jerusalem tə́ ní.

Josias un ta madə̄ naā kum kə̄ kété kə́ Nə́ɓā

(Á̰a̰ī 2 Yá̰a̰ 34.29-32)

Hilkia ngol ngé tun̄ yá̰a̰ gə̄ nin̄ kə madə̄n gēé tél reē ədan̄ mban̄g Josias najə̄ ń nge koō ta kə́ dəyá̰ tūr̄ ədadə́ ní.

Currently Selected:

2 MBAN̄G 22: SARDC

Highlight

Copy

Compare