2 MBAN̄G 19

Ejekias əla koō taá ɓē Ijai nge koō ta yā Kɔ́ɔ̄ɓē tə́

(Á̰a̰ī Ij 37.1-7)

1Dan ń mban̄g Ejekias oō najə̄ yādə́ ní anī, rə̄yā̰ kūbə̄ kə́ rɔ̄n tə́ ō, do̰ō̰ kūbə̄ sákə̄ gírən tə́ ō, ba aw̄ kem kújə yā Kɔ́ɔ̄ɓē tə́. 2Gō tə́ anī əla Eliakim de kə́ dɔ yá̰a̰ kənge yā mban̄g tə́ ō, Sebəna nge ndang makətūbə̄ ō, ngé tun̄ yá̰á̰ kə́ ngé rāā kəla tun̄ yá̰á̰ kété joó gə̄ ō, rɔ̄ Ijai nge koō ta yā Nə́ɓā ń i ngōn̄ Amots ní tə́. Nin̄ malang o̰ō̰n̄ kūbə̄ sákə̄ tə́ rɔ̄də́ tə́ n aw̄n̄ ní, 3yā kədan na:

Ejekias ɔr̄ najə̄ i beé əda na: Ɓōólaā i ndɔ̄ wur kɔl ō, ndéy ō, rɔ̄sɔl̄ ō! Ngán gə̄ əndān̄ rɔ̄də́ ta róbə́ tə́ yā teē kem kó̰də́ gə̄ tə́ kə̄ ndágá, banī tɔ́gə́ kə́ yā kojəńdə́ gətóo! 4Majanī Kɔ́ɔ̄ɓē Nə́ɓā yāí a oō najə̄ gə̄ malang ń mban̄g kə́ Asiri əla ngol ngé kadə̄ yá̰a̰ ka̰ȳ gə̄ adə̄ tájəń Nə́ɓā kə́ ndi kə kumneé ní ō, majanī a əndan tām̄ najə̄ kɔrə̄n tə́ ō! Ba ḭ̄ ī-ndɔ̄ȳn tām̄ yā gotə deē yān gə̄ ń na̰yn̄ tə́ ní.

5Ngé kəla yā Ejekias gə̄ reē ugə̄n̄ rɔ̄ Ijai tə́, 6anī ni ədadə́ na kə aw̄ kə ədan̄ ngoldə́ na Kɔ́ɔ̄ɓē əda na kə lōō ɓōĺ najə̄ kə́ to ngonjə̄ gə̄ ń ngé kəla yā mban̄g kə́ Asiri gə̄ ədan̄ dɔn ni Kɔ́ɔ̄ɓē tə́ á oō ní. 7Na n-a n-adə̄ mban̄g ndíĺ kógə̄ḿ kə́ kadə̄ ré oō najə̄ kógə̄ḿ anī a tél dɔ tə́ yā kaw̄ gogə́ ɓē yān tə́. Na n-a n-rāā kadə̄ a oy yo kaskar kem ɓē yān nəkɔ́ tə́.

Senakerib tél əla de gə̄ rɔ̄ Ejekias tə́ ɓáý to̰

(Á̰a̰ī Ij 37.8-13; 2 Yá̰a̰ 32.17)

8Dan ń ngol ngé kadə̄ mban̄g yá̰a̰ ka̰ȳ oō kadə̄ mban̄g kə́ Asiri gətóo Lakis anī, aw̄ əngen Libəna loo ń a rɔ̄ɔ̄ tū tə́ ní tə́. 9Tɔdɔ̄ mban̄g oō kadə̄ Tiraka mban̄g kə́ Kus na a reē kə áskar yān gēé yā kənīnneé rɔ̄ɔ̄.

Mban̄g kə́ Asiri tél əla de gə̄ rɔ̄ Ejekias ɓáý to̰, ədadə́ na 10kə aw̄ kə ədan̄ Ejekias mban̄g kə́ Juda na:

Ī-lōō kadə̄ Nə́ɓā yāí ń ə̄ndā kemií dɔn tə́ ní gólī ədaī na Jerusalem na a əsō kem jī mban̄g kə́ Asiri tə́ aĺ alé. 11Īkɔ́ ī-ger̄ yá̰á̰ ń mban̄g kə́ Asiri tə́ gə̄ rāān̄ kə gotə ɓē kə́ rang gə̄ malang ní: Nin̄ nujən̄ ɓē gə̄ ní sák sák kɔ̄ɔ́. Anī ḭ̄ ɔ́jəń na ā ī-teē kum tə́ a? 12Ɓē kə́ Gojan ō, Haran ō, Resep ō, ngáń kə́ Eden tə́ gə̄ ń ndin̄ Telasar á mban̄g kə́ Asiri tə́ kə́ kété noḿ tə́ gə̄ nujən̄də́ sák sák kɔ̄ɔ́ ní ō ní, ɓesə̄ yādə́ gə̄ taān̄də́ əya̰n̄də́ dɔɔ́ noō a? 13ī-gír̄ dɔ yá̰á̰ ń rāā mban̄g gə̄ kə́ Hamat ō, Arpad ō, Lair ō, Separbaim ō, Hena ō, Aba ō ní tə́!

Ndɔ̄ȳ yā Ejekias

(Á̰a̰ī Ij 37.14-20)

14Ejekias taā makətūbə̄ kə́ jī ngámbang kəla gə̄ tə́, tə́da ba aw̄ń kem kújə yā Kɔ́ɔ̄ɓē tə́. Ni teē kem makətūbə̄ ní ta kum Kɔ́ɔ̄ɓē tə́, 15ba ndɔ̄ȳ əda na:

Kɔ́ɔ̄ɓē Nə́ɓā yā Israel, ḭ̄ ń ī-ndi dɔɔ́ dɔ ngé ngɔ̄m̄ loo kə́ dɔ rā̰ tə́ gə̄ tə́ ní, i ḭ̄ kógə̄ḿ beē ngóy n i Nə́ɓā kə́ tām̄ yā ɓē ko̰o̰ gə̄ malang kə́ dɔ nang tə́ tə́, tām̄ i ḭ̄ n ī-rāā dɔ rā̰ ō, dɔ nang ō ní. 16Kɔ́ɔ̄ɓē, ī-nēl̄ mbīí ōōń nduḿ, ī-teē kumií á̰a̰ loo! Ōō najə̄ gə̄ ń Senakerib əla de gə̄ adə̄ reē tájə̄n̄neé Nə́ɓā kə́ ndi kə kumneé ní! 17Kɔ́ɔ̄ɓē, i rɔ̄kum kadə̄ mban̄g kə́ Asiri tə́ gə̄ nujən̄ nápar de kə́ rang gə̄ ngá̰ý ō, nujən̄ dɔ nang yādə́ gə̄ sák sák kɔ̄ɔ́ ō. 18Nin̄ róōn̄ nə́ɓā gə̄ ń i ɓesə̄ yādə́ gə̄ ní, tɔdɔ̄ ɓesə̄ gə̄ ní i Nə́ɓā kə́ rɔ̄kum alé. I yá̰a̰ gə̄ kə́ deē ndul rāā kə jīneé. Ɓesə̄ gə̄ ní i kāgə̄ gə̄ ō, mbal̄ gə̄ ō, adə̄ mban̄g kə́ Asiri tə́ gə̄ nujən̄də́ kɔ̄ɔ́ malang. 19Banī ḭ̄ Kɔ́ɔ̄ɓē Nə́ɓā yājí, ī-taājí jī Senakerib tə́ ə́yá̰jí dɔɔ́. Loo ń noō tə́, Kɔ́ɔ̄ɓē, de kə́ kem ɓē ko̰o̰ gə̄ kə́ dɔ nang tə́ gə̄ malang a gerə̄n̄ kadə̄ i ḭ̄ ngóy n i Nə́ɓā ní.

Ijai əda najə̄ ń Kɔ́ɔ̄ɓē tūr̄ əda ní

(Á̰a̰ī Ij 37.21-35)

20Ijai ngōn̄ Amots əla əda Ejekias na:

Yá̰á̰ ń Kɔ́ɔ̄ɓē Nə́ɓā yā Israel əda ní n toó: M-ōō ndɔ̄ȳ ń ī-ndɔ̄ȳm̄ najə̄ yā Senakerib mban̄g kə́ Asiri tə́ ní. 21Ba ōō najə̄ gə̄ ń m̄-tə́da dɔn tə́ ní.

Ngōmandə kə́ Sion kídī ō, əgōī ō.

Ngōn̄ kə́ dəyá̰ kə́ Jerusalem wél̄ dɔn gidií tə́.

22I Náā n ī-tájə̄n ō, ī-tə́da najə̄ kə́ to ngonjə̄ gə̄ dɔn tə́ ní ō?

I náā n ún ndūí kə̄ dɔɔ́ ɔ̄rəń najə̄ dɔn tə́ ní?

I náā n á̰a̰n kə ngēl̄ kumií ní?

Ī-rāā yá̰a̰ gə̄ ń noō i kə kə́ táĺ yā Israel.

23Ḭ̄ ə́la de gə̄ ādə̄ tájə̄n̄ Kɔ́ɔ̄ɓē kum gotií.

Əda na ḭ̄ Senakerib na āl̄ ta tél mbal̄ gə̄ tə́,

na āw̄ bátə́ ūgə̄ loo ɓɔ̄ɔ̄ rɔ̄ gə̄ kə́ Liban tə́,

kə́ dum̄ kadə̄ deē aw̄ tū tə́ gə̄ tə́ kə ta kūl̄ púsə rɔ̄ɔ̄ yāí kə́ ngá̰ý gēé,

yā tə́gā kāgə̄ sédər kə́ majə ngá̰ý gə̄ kə́ tū tə́ ō,

kāgə̄ sipəres kə́ ngāl̄ ngá̰ý gə̄ kə́ tū tə́ ō.

Əda na ā āw̄ bátə́ yā kugə̄ dɔ mbal̄ yān

kə́ ngāl̄ tɔȳ madə̄ gə̄ malang tə́ ō,

na ā āw̄ bátə́ yā kugə̄ kem ku kāgə̄ yān gə̄ tə́ ō.

24Əda na ī-ndēr̄ man̄ ō, na ā̰ȳ man̄ yā gír de kə́ rang gə̄ ō,

na ī-rāā adə̄ ta jī man̄ gə̄ kə́ Ejiptə tə́ gə̄

na iīn̄ kɔ̄ɔ́ malang gír njaí tə́ ō.

25Senakerib, m̄-nóm̄ rāā yá̰a̰ gə̄ ń noō i kété jóó ngá̰ý ní, ī-ger̄ aĺ a?

M-ə́lá gíŕ nóm̄də́ i kem ɓāl̄ gə̄ kə́ jóó ngá̰ý tə́ ní, ī-ger̄ aĺ a?

Ngɔlaā ní m̄-rāādə́.

M-ə̄ndāī i yā kadə̄ ī-nujə ɓē kə́ ngan̄g gə̄ sák sák kɔ̄ɔ́

kadə̄ télən̄ ndəbā ɓē gə̄.

26Tɔ́gə de kə́ kemeé gə̄ gətóo kɔ̄ɔ́. Nin̄-urə̄n̄ wak ō, rɔ̄də́ sɔl̄də́ ō.

Ton̄ tītə̄ mbī kōō kə́ kem ndɔrɔ́ beē, tītə̄ mu kə́ mbōl̄ gə̄ beé.

Tītə̄ kámbə́ kə́ kəɓa dɔ kújə tə́ gə̄ ń tɔgən̄ aĺ ɓáý anī gān̄g tutən̄ kɔ̄ɔ́ ní beē.

27Tá m̄-ger̄ yá̰a̰ rāāí gə̄ malang.

Ré ā ī-ndi i kə̄ nang tə́ a m̄-ger̄ ō,

ā ī-teē i kə̄ ndágá a m̄-ger̄ ō, ā údə i kə̄ kújú a m̄-ger̄ ō,

Ā ī-rāā i wōn̄g seḿ a m̄-ger̄ ō.

28ī-rāā wōn̄g seḿ ō, najə̄ kə́ to ngonjə̄ gə̄ ń ɔ̄r̄ dɔḿ tə́ ní m-ōō ō,

Adə̄ m-ā m-ə́la nə̄ngá kó̰ní tə́ ō, m-ā m-ə́lá jámá taí tə́ ō.

M-ā m-ādə̄ ā úń róbə́ gír njaí yā tél kaw̄ń gogə́ ɓēé.

29Ba ḭ̄ Ejekias, yá̰á̰ ń a rāā yā reē ní, ādə̄ m-ə́daī najə̄n kété: Kōnīí laā de gə̄ a əsan̄ dā̰ kōō gémē, ɓāl̄ kə́ nge ko̰ jōó tə́ anī de gə̄ a əsan̄ i kōō kə́ teē dɔ rɔ̄n. Banī ɓāl̄ kə́ nge ko̰ mətá tə́ anī, ī-dubī kōō gə̄ ō, ī-sāāī kōō gə̄ ō, ə́hɔī kāgə̄ nduú gə̄ ō, ba ə́saī kan̄də́ gə̄. 30De kə́ kem ɓē ko̰o̰ kə́ Juda tə́ gə̄ ń teēn̄ ta yo tə́ ní, a télən̄ yā to tītə̄ kāgə̄ kə́ əla ngəran nang tə́ ō, ta jīn gə̄ anə̄n̄ ō. 31Tɔdɔ̄ gotə de kə́ na̰y gə̄ a teēn̄ kem ɓē kə́ Jerusalem tə́ ō, de kə́ teē ta yo tə́ gə̄ a ḭḭn̄ dɔ mbal̄ Sion tə́ ō.

Ijai əda ɓáý to̰ na:

Yá̰á̰ ń Kɔ́ɔ̄ɓē a rāā sɔɔ̄ń tár yān kə́ ngá̰ý ní n noó. 32Ba ngɔlaā ní, yá̰á̰ ń Kɔ́ɔ̄ɓē əda dɔ mban̄g kə́ Asiri tə́ ní n toó: Ni a udə kem ɓē ń toō tə́ alé, a túrən kə kum gərá alé, a déw gidə der tə́ yā kənīnneé rɔ̄ɔ̄ alé, a ɔy nán̄g kə̄ dɔ naā tə́ kadə ndogə̄ mbal̄ kə́ gidə tə́ alé. 33A tél yā kun róbə́ gír njan ba a udə kem ɓē ń toō tə́ alé. I Kɔ́ɔ̄ɓē n əda ní. 34M-ā m̄-ngɔ̄m̄ ɓē kə́ Jerusalem ō, m-ā m-ájən ō, i najə̄ yāḿ mā tə́ ō, i najə̄ yā nge kəla yāḿ Dabid tə́ ō.

Senakerib tél aw̄ ɓēé ō, oy ō

(Á̰a̰ī Ij 37.36-38; 2 Yá̰a̰ 32.21-22)

35Teē kə ndɔ̄ kə́ noō ndɔ̄ɔ́ anī, nge kaw̄ kəla yā Kɔ́ɔ̄ɓē udə kem gérger yā de kə́ Asiri gə̄ tə́ ba tɔ̄l̄ de gə̄ 185 000. Dan ń de gə̄ ndótən̄ kə gidə gōó dəloí anī loo i nīń malang. 36Loo ń noō tə́ Senakerib mban̄g kə́ Asiri ndɔ̄tə́ kə gérger yānneé. Ni-tél dɔ tə́ aw̄ ndi gogə́ Ninibə. 37Ndɔ̄ kógə̄ḿ tə́ ndi a ndɔ̄ȳ kem kújə yā nə́ɓā yān ń i nə́ɓā Nisrok ní tə́ anī, ngánən kə́ dəngam gə̄ jōó, Adəramelek nin̄ kə Sareser tɔ̄l̄nən̄ kə kaskaraá ba a̰ȳ aw̄n̄ dɔ nang kə́ Ararat tə́. Ngōnən kə́ dəngam kə́ rang ń rīn na i Asaradon ní o̰o̰ ɓē gotən tə́.

Currently Selected:

2 MBAN̄G 19: SARDC

Highlight

Copy

Compare