2 MBAN̄G 18

Ejekias mban̄g kə́ Juda

(Á̰a̰ī 2 Yá̰a̰ 29.1-2; 31.1)

1Kem ɓāl̄ ko̰o̰ ɓē kə́ nge ko̰ mətá yā Ose ngōn̄ Ela, mban̄g kə́ Israel tə́ ní, Ejekias ngōn̄ Akaj mban̄g kə́ Juda ndi mban̄g. 2Dan ń əla gír ndi mban̄g ní ɓālə̄n i kutə jōó gidə i mí. Ni o̰o̰ ɓē ɓāl̄ kutə jōó gidə i ndōhó kem ɓē kə́ Jerusalem tə́. Rī kó̰o̰n na i Abi, i ngōn̄ Jakari. 3Ejekias rāā yá̰á̰ kə́ gōtə́ ta kum Kɔ́ɔ̄ɓē tə́ tītə̄ yā kaan Dabid jéjé. 4Ni nujə loo ndɔ̄ȳ gə̄ ō, tɔ̄ɔ̄ mbal̄ kə́ kudə dɔɔ́ gə̄ ō, tə́gā kāgə̄ ɓesə̄ kə́ yā ɓōĺ gidə gə̄ kɔ̄ɔ́ ō. Ni jén̄g lī gində̄ nə̄ngá kasə ń Moijə rāā ní kɔ̄ɔ́ ō, tɔdɔ̄ bátə́ ugə̄ń dan ngeé ń noō tə́ ní ngán Israel gə̄ a róōn̄ ndujə̄ yá̰á̰ kə́ kotə majə gə̄ a adə̄n̄ lī gində̄ ní. Nin̄ əndān̄ rīn na i Nehustan#18.4 Nehustan: Kumən na i lī kə́ rāā kə gində̄ nə̄ngá kasaá..

5Ejekias ənī kemən adə̄ Kɔ́ɔ̄ɓē Nə́ɓā yā Israel. Kété non tə́ ní mban̄g kə́ tītə̄n dan mban̄g gə̄ kə́ Juda tə́ gətóo ō, gotən tə́ ní mban̄g kə́ tītə̄n gətóo ō. 6Ni-əhɔ gō Kɔ́ɔ̄ɓē kanjə̄ kəya̰ gōn. Ni ngɔ̄m̄ gō míndə gə̄ ń Kɔ́ɔ̄ɓē adə̄ Moijə ní. 7Kɔ́ɔ̄ɓē i naā tə́ seneé adə̄ yá̰a̰ malang ń əla gír rāā ní tɔ̄l̄ ta majə. Ni-mbātə́ kəla dɔn gíŕ tɔ́gə yā mban̄g kə́ Asiri tə́. 8Tetə Pilistin gə̄ rɔ̄ɔ̄, tə̄ɓādə́ bátə́ ugə̄ sedə́ gō nang kə́ Gaja tə́. ba taā ɓē kə́ ngan̄g gə̄ ō, kújə ngɔm̄ gə̄ ō.

Najə̄ kə́ dɔ ɓē kə́ Samari kə́ taān̄ tə́

9Kem ɓāl̄ ko̰o̰ ɓē yā Ejekias kə́ nge ko̰ sɔ́ tə́, ba i kə́ nge ko̰ sīrí tə́ yā Ose ngōn̄ Ela mban̄g kə́ Israel tə́ ní, Salmanasar mban̄g kə́ Asiri reē gīr̄ gidə ɓē kə́ Samari. 10Rāā ɓāl̄ mətá pá tá de kə́ Asiri gə̄ taān̄ ɓē kə́ Samari ɓáý. Taān̄ i kem ɓāl̄ ko̰o̰ ɓē kə́ nge ko̰ mehḛ́ yā Ejekias tə́ ō, i kem ɓāl̄ ko̰o̰ ɓē kə́ nge ko̰ ndōhó yā Ose mban̄g kə́ Israel tə́ ō. 11Mban̄g kə́ Asiri ɔy Israel gə̄ aw̄ sedə́ dɔ nang kə́ Asiri tə́, aw̄ tə̄ndādə́ gō nang kə́ Hala tə́ ō, dɔ gɔ́sə Habor ń i bā kə́ gō nang kə́ Gojan tə́ ní ō, kem ɓē gə̄ kə́ Medi tə́ ō. 12Yá̰a̰ gə̄ ń noō malang rāān̄ yá̰a̰ i tɔdɔ̄ Israel gə̄ oōn̄ ndū Kɔ́ɔ̄ɓē Nə́ɓā yādə́ ní aĺ ō, ran̄ dɔ madə̄ naā yān tə́ aĺ ō. Ndū najə̄ gə̄ ń Moijə nge kəla yā Kɔ́ɔ̄ɓē adə̄də́ ní nin̄ nēlə̄n̄ mbidə́ oōnneé aĺ ō, rāān̄ yá̰a̰ gə̄ ń ndū najə̄ gə̄ ədan̄ ní aĺ ō.

Senakerib taā loo kem ɓē ko̰o̰ kə́ Juda tə́

(Á̰a̰ī Ij 36.1; 2 Yá̰a̰ 32.1)

13Kem ɓāl̄ ko̰o̰ ɓē kə́ nge ko̰ kutə gidə i sɔ́ yā Ejekias tə́ ní, Senakerib mban̄g kə́ Asiri reē ənī rɔ̄ɔ̄ ɓē kə́ ngan̄g ngan̄g gə̄ malang kə́ kem ɓē ko̰o̰ kə́ Juda tə́ ba táā. 14Ejekias mban̄g kə́ Juda əla əda mban̄g kə́ Asiri kem ɓē kə́ Lakis tə́ na n-rāā yá̰á̰ kə́ gōtə́ alé, ba kə lōō rɔ̄ɔ̄n na yá̰a̰ malang ń na a əndā dɔn tə́ ní na n-ā n-rāā. Mban̄g kə́ Asiri gān̄g arjā̰a̰ kə́ kɔȳn i kəlōo dūbú ndōhó ō, lɔ́ŕ kə́ kɔȳn i kəlōo ɓú ndōhó ō, dɔ Ejekias tə́ kadə̄ adə̄. 15Ejekias ɔy gində̄ arjā̰a̰ malang kə́ kem kújə yā Kɔ́ɔ̄ɓē tə́ ō, kə́ loo ngɔ̄m̄ yá̰a̰ kənge kə́ kem kújə yā mban̄g tə́ ō adə̄. 16I dan ngeé ń noō tə́ n Ejekias tétəń bápə gə̄ kə́ ta kújə yā Kɔ́ɔ̄ɓē tə́ ō, tétəń kāgə̄ ta róbə́ kújə gə̄ yā Kɔ́ɔ̄ɓē ō ń nəkɔ́ mban̄g kə́ Juda rāā lɔ́r gidə tə́ ní. Ni ɔy malang adə̄ mban̄g kə́ Asiri.

Najə̄ kɔr nge kɔsə kíl Senakerib

(Á̰a̰ī Ij 36.2-22; 2 Yá̰a̰ 32.9-16)

17Mban̄g kə́ Asiri ndi Lakis ba əla ngol áskar yān gə̄ ō, ngol áskar kə́ bo gə̄ ō, nge kɔsə kílən ō, ɓūtə̄ áskar kə́ ngá̰ý gə̄ sedə́ ō, rɔ̄ mban̄g Ejekias tə́ Jerusalem. Nin̄ reē ugə̄n̄ Jerusalem anī ran̄ kadə bəlo kə́ ndēr̄ kadə̄ man̄ kə́ kem gár̄ kə́ dɔɔ́ tə́ mān̄ tū tə́ ní tə́, dɔ róbə́ kə́ yā kaw̄ń kə̄ kem ndɔr̄ yā ngé rāā kəla kūbə̄ gə̄ tə́. 18Ran̄ loo ń noō tə́ ba gḛyn̄ kadə̄ mban̄g reē rɔ̄də́ tə́. Banī i Eliakim ngōn̄ Hilkia ń i ngār kem ndogə̄ yā mban̄g ní ō, Sebəna nge ndang makətūbə̄ ō, Yoa kə́ ngōn̄ Asap ń i kɔdə̄ mbēr̄ ní ō n teē aw̄n̄ rɔ̄də́ tə́ ní. 19Ngol ngé kadə̄ mban̄g yá̰a̰ ka̰ȳ ədadə́ na:

Āw̄ ə́daī Ejekias na mban̄g kə́ bo ń i mban̄g kə́ Asiri ní, əda na: Yá̰á̰ ń ə̄ndā kemií dɔ tə́ á ī-ndiń ní i rí? 20Ḭ̄ ə́da na i najə̄ kə́ taí tə́ ngóy n ā ə́ngeń kajə ō, tɔ́gə ō loo rɔ̄ɔ̄ tə́! Ə̄ndā kemií i dɔ náā tə́ n ī-mbātə́nń koō najə̄ taḿ tə́ ní? 21I dɔ ɓē kə́ Ejiptə tə́ a? Ə̄ndā kemií i dɔ tə̄ɓā kə́ tetə kɔ̄ɔ́ ń a sēr̄ jī náā nəkɔ́ ń a ndə̄nā rɔ̄n tū tə́ ní tə́ a? Parao̰ mban̄g kə́ Ejiptə i tītə̄ ń noō kə de gə̄ malang ń a əndān̄ kemdə́ dɔn tə́ ní.

22Ā ə́damī na ə̄ndāī kemsí na i dɔ Kɔ́ɔ̄ɓē Nə́ɓā yāsí tə́. Ba i Ejekias n nujə loo ndɔ̄ȳ gə̄ yā Kɔ́ɔ̄ɓē Nə́ɓā yāsí ō, loo tun̄ yá̰a̰ yān gə̄ ō, ba əda de kə́ Jerusalem gə̄ ō, de kə́ Juda gə̄ ō, na kə ndɔ̄ȳn̄ loo kə́ rang tə́ alé, ba na i ta loo tun̄ yá̰á̰ kə́ Jerusalem tə́ ngóý ní aĺ a? 23Beé ɓáa ī-tɔ́sī gātə̄ naā kə kɔ́ɔ̄ḿ mban̄g kə́ Asiri: Ré ḭ̄ Ejekias ásə kənge ngé kal̄ sə́nda gə̄ dūbú jōó anī, m-ā m-ādī sə́nda dūbú jōó kadə̄ alə̄n̄. 24Ḭ̄ ń ə̄ndā kemií dɔ kənge púsə rɔ̄ɔ̄ gə̄ ō, sə́nda gə̄ ō, jī ɓē kə́ Ejiptə tə́ ní, ā ásə rāā kadə̄ kógə̄ḿ dan ngol áskar gə̄ yā kɔ́ɔ̄ḿ tə́ tél kə̄ gogə́ i ba̰ý? Ká i ngol áskar gə̄ kə́ dūú gə̄gē a tél kə̄ gogə́ i ba̰ý? 25m̄-reē rɔ̄ɔ̄ ɓē ń toō tə́ yā nujəń kɔ̄ɔ́ i kanjə̄ kadə̄ Kɔ́ɔ̄ɓē ndigə gōḿ tə́ a? I Kɔ́ɔ̄ɓē n ədam̄ na kə m̄-reē kə m̄-rɔ̄ɔ̄ ɓē ń toō, ba kə m̄-nujəń sák sák kɔ̄ɔ́ ní!

26Eliakim ngōn̄ Hilkia ō, Sebəna ō, Yoa ō, ədan̄ ngol nge kɔsə kíl Senakerib na:

Ɔ̄r̄ najə̄ sejí jḭḭ ngé kəla yāí gēé kə ta Aram, tɔdɔ̄ jə-ger̄ ta Aram. Ba ī-lōō kɔr̄ najə̄ sejí kə ta Hebəroó ta mbī ngán Israel gə̄ ń ran̄ dɔ ndogə̄ mbal̄ yā ɓē tə́ ní.

27Ngol nge kɔsə kíl Senakerib tél ədadə́ na:

Najə̄ ń kɔ́ɔ̄ḿ əlam̄ kɔrɔ́ ní i tām̄ yā kɔ́ɔ̄sí tə́ ō, tām̄ yāsí sḭḭ̄ tə́ ō ngóy a? I tām̄ yā de gə̄ malang ń ran̄ dɔ ndogə̄ mbal̄ tə́ noō ō, nin̄ ń a əsan̄ yedə̄də́ tītə̄ yāsí ō, a a̰ȳn̄ ngédə̄ māńdə́ tītə̄ yāsí ō ní!

28Gō tə́ anī ngol ngé kadə̄ mban̄g yá̰a̰ ka̰ȳ ra dɔɔ́ ba əga kɔŕ əda kə ta Hebəroó na:

Ōōī najə̄ ń mban̄g kə́ bo ń i mban̄g kə́ Asiri əda ní! 29Mban̄g əda na kə ī-lōōī kadə̄ Ejekias gól̄sí, tɔdɔ̄ ni na asə kɔr̄sí jīn tə́ alé. 30Ni ədasí na kə ə̄nī kemsí ādī Kɔ́ɔ̄ɓē na Kɔ́ɔ̄ɓē a gān̄g dɔsí rɔ̄kum. Ni-əda na, rɔ̄kum ɓē ń toō a əsō kem jī mban̄g kə́ Asiri tə́ alé. 31Ī-lōōī koō najə̄ kɔr̄ Ejekias, banī ōōī najə̄ ń mban̄g kə́ Asiri ɔr̄ sesí ní, ni-əda na:

Ī-téĺ ə̄ndāī najə̄ naā tə́ seḿ, ə́ya̰ī rɔ̄sí kem jīḿ tə́. Loo ń noō tə́ sḭḭ̄ kógə̄ḿ kógə̄ḿ ā ə́saī kan̄ kāgə̄ nduú yāsí gə̄ ō, ā ā̰yī man̄ kə́ kem bəlo taā man̄ ndī yāsí gə̄ tə́ ō. 32yā ngóoń kadə̄ n-aw̄ n-ɔýsí n-aw̄ sesí kem ɓē kə́ tītə̄ yāsí tə́, ɓē kə́ gémē ō, kasə nduú kə́ kijə ō, mápa ō, ndɔr̄ kāgə̄ nduú gə̄ ō, kāgə̄ olibə gə̄ kə́ yā rāā yibə̄ kə́ kijə tə́ ō, yibə̄ tejə ō i tū tə́. I beé n ā ī-ndiīneé kə kumsí ba ā óyīneé aĺ ní. Ōōī najə̄ yā Ejekias alé, tɔdɔ̄ ni gól̄sí əda na Kɔ́ɔ̄ɓē na a gān̄g dɔsí. 33Nə́ɓā gə̄ ń i ɓesə̄ yā nápar de kə́ rang gə̄ ní ɔgə̄mə̄n̄ taā ɓē yādə́ a? 34Nə́ɓā gə̄ yā ɓē kə́ Hamat ō, yā ɓē kə́ Arpad ō, rāān̄ i rí? Tá nə́ɓā gə̄ yā ɓē kə́ Separbaim ō, yā ɓē kə́ Hena ō, yā ɓē kə́ Aba ō, nin̄ rāān̄ i rí? Nin̄ ɔgə̄mə̄n̄ taā ɓē kə́ Samari a? 35Dan nə́ɓā gə̄ malang yā ɓē gə̄ ń noō tə́ ní, i nge kə́ rá kə́ dandə́ tə́ n taā ɓē yān jīḿ tə́ ní? Ní, Kɔ́ɔ̄ɓē asə kɔgə̄m̄ taā ɓē kə́ Jerusalem a?

36De gə̄ malang ran̄ kə tadə́ kə́ mbóó, ədan̄ najə̄ kógə̄ḿ alé, tɔdɔ̄ mban̄g adə̄də́ ndūn, ədadə́ na kə dalən̄ alé. 37Eliakim ngōn̄ Hilkia ń i de kə́ dɔ yá̰a̰ kənge yā mban̄g tə́ ní ō, Sebəna nge ndang makətūbə̄ ō, Yoa ngōn̄ Asap ń i kɔdə̄ mbēr̄ ní ō, rə́yā̰n̄ kūbə̄ yādə́ gə̄ ba tél reēn̄ gogə́ rɔ̄ Ejekias tə́ ɔjənən̄ gotə najə̄ yā ngol ngé kadə̄ mban̄g yá̰a̰ ka̰ȳ.

Currently Selected:

2 MBAN̄G 18: SARDC

Highlight

Copy

Compare