2 MBAN̄G 20

Ejekias rāā mo̰y ō, rɔ̄n ngan̄g ō

(Á̰a̰ī Ij 38.1-8; 2 Yá̰a̰ 32.24)

1Dan ngeé ń noō tə́ ní mo̰y kə́ asə tɔ̄l̄ deē əhɔ Ejekias. Anī Ijai nge koō ta kə́ ngōn̄ Amots reē a̰a̰n ba ədan na:

Kɔ́ɔ̄ɓē əda na kə ɔ́jə de kə́ kem kújə yāí tə́ gə̄ yá̰a̰ gə̄ ń kadə̄ rāān̄ ní, tɔdɔ̄ ā óy, ā ájə alé!

2Anī Ejekias tūr̄ kumən kə̄ kadə bɔr tə́ ba ndɔ̄ȳ Kɔ́ɔ̄ɓē, əda na:

3Kɔ́ɔ̄ɓē ādə̄ əga kemií na m̄-njə̄rā kə̄ ta kumií tə́ i kə háĺ kə́ gōtə́ ō, kə kem kə́ súmūú ō, m̄-rāā yá̰á̰ kə́ nelī ō.

Gō tə́ anī Ejekias nōō ngá̰ý kə man̄ kumneé. 4Ijai ugə̄ kem ndogə̄ kə́ danaá tə́ aĺ ɓáý anī, Kɔ́ɔ̄ɓē ədan na 5kə tél dɔ tə́ kə aw̄ gogə́ rɔ̄ Ejekias, ngār kə́ dɔ gír de gə̄ yān ni Kɔ́ɔ̄ɓē tə́ tə́. Kə ədan na yá̰á̰ ń Kɔ́ɔ̄ɓē Nə́ɓā yā kaan Dabid əda ní n toó: M-ōō ndɔ̄ȳ yāí ō, m-á̰a̰ man̄ kumií ō, adə̄ m-ā m̄-rāā kadə̄ rɔ̄í ngan̄g. Bírí i karī, ba loo tḭ̄ḭ̄ anī ā ásə kaw̄ kem kújə yā Kɔ́ɔ̄ɓē tə́. 6M-ə̄nā ɓāl̄ kutə gidə i mí ta madə̄ tə́ m-ādī. Ḭ̄ ō, ɓē kə́ Jerusalem ō ní, m-ā m̄-taāsí jī mban̄g kə́ Asiri tə́ yā kəya̰sí dɔɔ́. M-ā m̄-ngɔ̄m̄ ɓē ń toō i najə̄ yāḿ mā tə́ ō, i najə̄ yā nge kəla yāḿ Dabid tə́ ō.

7Ijai adə̄ ɔsən̄ kan̄ kótə̄ ba əndān̄ dɔ loo ń agə̄ tə́ ní kadə̄ rɔ̄ mban̄g ngangəń.

8Anī Ejekias dəje Ijai yá̰á̰ ń ɔjə kadə̄ Kɔ́ɔ̄ɓē na a rāā kadə̄ rɔ̄n ngan̄g kadə̄ loo tīī a n-a n-asə kaw̄ kem kújə yā Kɔ́ɔ̄ɓē tə́ ní. 9Anī Ijai tél ədan na yá̰á̰ ń a ɔjə kadə̄ Kɔ́ɔ̄ɓē a rāā yá̰á̰ ń əda ní n toó: Ndíl a a̰ȳ kɔ̄ɔ́ dɔ loo kəndā nja gə̄ ń Akaj a alə̄ń kə̄ dɔɔ́ kem kújə yān tə́ ní gír loo kutə. Ní ī-gḛy i kadə̄ a̰ȳ i kum kə̄ kété aké i kum kə̄ gogə́? 10Ejekias tél əda na:

Yā kadə̄ ndíl a̰ȳ kum kə̄ kété ní i yá̰á̰ kə́ tōr̄ alé. m̄-gḛy kadə̄ tél i kum kə̄ gogə́.

11Loo ń noō tə́ Ijai nge koō ta ndɔ̄ȳ Kɔ́ɔ̄ɓē, anī Kɔ́ɔ̄ɓē rāā adə̄ ndíĺ a̰ȳ kɔ̄ɔ́ dɔ loo kəndā nja gə̄ kə́ kutə kógə̄ḿ gə̄ tə́ kum kə̄ gogə́.

Ejekias əhɔ ngámbang kəla gə̄ kə́ Babilon kə̄ rɔ̄n tə́.

(Á̰a̰ī Ij 39)

12Dan ń noō tə́ ní Merodak Baladan ń i mban̄g kə́ Babilon ní əla kə makətūbūú ō, kə kadə̄ karī gēé ō, adə̄ Ejekias, tɔdɔ̄ ni oō najə̄ mo̰y yān. 13Ejekias rāā rɔ̄nel̄ ngámbang kəla gə̄ ń reē ugə̄n̄ ní ō, ɔjədə́ loo gə̄ ń a ngɔ̄m̄ yá̰a̰ kənge yān gə̄ tū tə́ ní ō malang. Ɔ̄jədə́ gində̄ arjā̰a̰ ō, lɔ́r ō, yá̰á̰ kə́ kɔtə majə gə̄ ō, yibə̄ kə́ rāā ndujə̄ yá̰á̰ kə́ kotə majə kum tə́ ō, yá̰a̰ rɔ̄ɔ̄ yān kə́ ngá̰ý gə̄ ō, yá̰a̰ malang kə́ loo ngɔ̄m̄ yá̰a̰ kənge yān gə̄ tə́ ō. Yá̰á̰ kə́ kem kújə yā Ejekias tə́, aláa kə́ dɔ nang yān tə́ kə́ ni ɔjədə́ aĺ gətóo.

14Gō tə́ anī Ijai nge koō ta reē ənge mban̄g Ejekias ba dəjen na ké de gə̄ ní ədanən̄ na i rí ō, ḭḭn̄ i rá ō wa. Anī Ejekias tél ədan na ḭḭn̄ na i ɓē kə́ sa̰y ngá̰ý tə́, ḭḭn̄ na i Babilon. 15Ijai dəjen ɓáý to̰ na ké yá̰á̰ ń a̰a̰n̄ kem kújə yān tə́ ní ké i rí wa. Anī Ejekias tél ədan na a̰a̰n̄ yá̰a̰ malang kə́ kem kújə yān tə́. Yá̰a̰ kənge yān kə́ n-ɔjədə́ aĺ na gətóo. 16Tā anī Ijai əda Ejekias na kə oō najə̄ ń Kɔ́ɔ̄ɓē əda ní:

17Ndɔ̄ kógə̄ḿ tə́ anī a ɔyn̄ yá̰a̰ malang kə́ kem kújə yāí tə́ ō, yá̰a̰ gə̄ ń kaaí gə̄ kánə̄n̄ kə̄ dɔ naā tə́ kemeé ní ō, yā kaw̄ń Babilon. Yá̰á̰ kógə̄ḿ a na̰y alé, i Kɔ́ɔ̄ɓē n əda ní. 18A ɔyn̄ ngán kemií gə̄ ngá̰ý yā rāādə́ áji mbang gə̄ tə́ kem ndogə̄ yā mban̄g kə́ Babilon tə́.

19Ejekias tél əda Ijai na najə̄ yā Kɔ́ɔ̄ɓē ń ədan ní na i najə̄ kə́ majə. Tɔdɔ̄ Ejekias gír̄ kemən tə́ na lápə́ya na a to ō, na n-a n-ndin̄ kanjə̄ sōl̄ yá̰á̰ kógə̄ḿ bátə́ kadə̄ n-oyń ō.

20Gotə yá̰á̰ kə́ rang gə̄ ń Ejekias rāā ní, ndangən̄ kem makətūbə̄ kəla rāā mban̄g gə̄ kə́ Juda tə́. Ənīn̄ gotə yá̰á̰ kə́ to kɔsə gɔn gə̄ ń ni-rāā ní ō, ɔjən̄ loo rāā ń ni-rāā gúr̄ man̄ ní ō, loo ndēr̄ ń ni ndēr̄ bəlo kə́ kə ngālāá kə́ kadə̄ man̄ aw̄ń kem ɓē kə́ Jerusalem tə́ ní ō, kem makətūbə̄ ní tə́. 21Dan ń Ejekias oy ní, i ngōnən Manase n o̰o̰ ɓē gotən tə́ ní.

Currently Selected:

2 MBAN̄G 20: SARDC

Highlight

Copy

Compare