2 MBAN̄G 17

Ojee, mban̄g kə́ Israel taān̄ ɓē kə́ Samari

1Kem ɓāl̄ ko̰o̰ ɓē kə́ nge ko̰ kutə gidə i jōó yā Akaj mban̄g kə́ Juda tə́ ní, Ose ngōn̄ Ela ndi mban̄g dɔ Israel gə̄ tə́ kem ɓē kə́ Samari tə́. Ni o̰o̰ ɓē ɓāl̄ ndōhó. 2Ni-rāā yá̰á̰ kə́ majaĺ ta kum Kɔ́ɔ̄ɓē tə́, ɓá tā ba i tītə̄ yā mban̄g kə́ Israel tə́ kə́ kété non tə́ gə̄ alé.

3Salmanasar, mban̄g kə́ Asiri, reē rɔ̄ɔ̄ Ose. Anī Ose əla dɔn gíŕ tɔ́gən tə́ ō, tīr̄ yá̰a̰ adə̄n ō. 4Ba gō tə́ anī Ose oōn̄ naā kə madə̄n gēé dɔn tə́. Ni-əla de gə̄ Sayis rɔ̄ mban̄g kə́ Ejiptə tə́ ō, mbātə́ kadə̄ mban̄g kə́ Asiri yá̰a̰ tīr̄ ō. Dan ń Salmanasar reē ger̄ kadə̄ Ose oōn̄ naā kə madə̄n gēé anī, əhɔ ənīn dəngáyá ō, ənī súĺ njan tə́ ō. 5Gō tə́ anī aw̄ rɔ̄ɔ̄ ɓē kə́ Israel kə taá malang, ni rɔ̄ɔ̄ ɓē kə́ Samari, gīrən ɓāl̄ mətá. 6Kem ɓāl̄ ko̰o̰ ɓē yā Ose kə́ nge ko̰ ndōhó tə́ anī, mban̄g kə́ Asiri taā ɓē kə́ Samari ba ɔy Israel gə̄ aw̄ sedə́ gō nang kə́ Asiri tə́. Aw̄ tə́ndādə́ Hala ō, dɔ gɔ́sə Habor ń i bā kə́ gō nang kə́ Gojan tə́ ní ō, tə́ndādə́ kem ɓē gə̄ kə́ Medi tə́ ō.

Yá̰a̰ gə̄ ń nujən̄ ɓē ko̰o̰ kə́ Israel sák sák kɔ̄ɔ́ ní

7Yá̰á̰ ń noō rāā yá̰a̰ i tɔdɔ̄ ngán Israel gə̄ rāān̄ yá̰á̰ kə́ majaĺ kə Kɔ́ɔ̄ɓē Nə́ɓā yādə́ ń taādə́ jī Parao̰ mban̄g kə́ Ejiptə tə́, ba teē sedə́ kɔ̄ɔ́ kem ɓē kə́ Ejiptə tə́ ní ō, i i tɔdɔ̄ nin̄ ɓōlə́n̄ ndíl nə́ɓā gə̄ ń i ɓesə̄ gə̄ ō ní. 8Nin̄ unən̄ gō ndū najə̄ gə̄ yā nápar de gə̄ ń Kɔ́ɔ̄ɓē tə̄ɓādə́ kɔ̄ɔ́ nodə́ tə́ ní ō, unən̄ gō ndū najə̄ gə̄ ń mban̄g kə́ Israel tə́ gə̄ əndān̄ ngəran ní ō. 9Ngán Israel gə̄ rāān̄ yá̰a̰ kə́ to kadə̄ deē rāā aĺ gə̄ kə Kɔ́ɔ̄ɓē Nə́ɓā yādə́: Rāān̄ loo ndɔ̄ȳ gə̄ kə̄ kem ɓē yādə́ gə̄ tə́ malang, kə̄ kem kújə ngɔ̄m̄ gə̄ tə́ ō, kə̄ kem ɓē kə́ ngan̄g gə̄ tə́ ō. 10Túdə̄n̄ ngán mbal̄ gə̄ kə nja dɔɔ́ ō, kāgə̄ ɓesə̄ kə́ yā ɓōĺ gidə gə̄ ō, kə̄ dɔ ngán mbal̄ gə̄ tə́ malang ō, gír kāgə̄ gə̄ kə́ mbīdə́ i ngá̰ý gə̄ tə́ malang ō. 11Róōn̄ ndujə̄ yá̰á̰ kə́ kotə majə gə̄ dɔ loo ndɔ̄ȳ gə̄ tə́ malang tītə̄ yā nápar de gə̄ ń Kɔ́ɔ̄ɓē ɔydə́ aw̄ sedə́ loo kə́ rang tə́ ba əya̰ń loo adə̄də́ ní. Nin̄-rāān̄ yá̰á̰ kə́ majaĺ gə̄ adə̄ tōr̄ Kɔ́ɔ̄ɓē. 12Ndɔ̄ȳn̄ ɓesə̄ gə̄ ń Kɔ́ɔ̄ɓē ɔgə̄də́ ndɔ̄ȳ ní. 13Kɔ́ɔ̄ɓē əndā najə̄ ta ngé koō ta yān gə̄ tə́ malang ō, ta ngé ka̰a̰ yá̰a̰ yān gə̄ tə́ malang ō, tāań Israel gə̄ ō, Juda gə̄ ō, kété, ədadə́ na:

Əya̰ī kəla rāāsí kə́ majaĺ gə̄ kɔ̄ɔ́ ba ī-rāāī gō míndə gə̄ ń m-ə́dásí kadə̄ ī-rāāī ní ō, yá̰a̰ gə̄ ń m̄-ndang kadə̄ yā rāā ní ō, kə gō ndū najə̄ malang ń m-ādə̄ kaasí gə̄ ō, m-ə̄ndā ta ngé kəla yāḿ gə̄ ń i ngé koō ta yāḿ gə̄ ní tə́ adə̄ ədan̄sí ní ō.

14Banī nin̄ mbātə́n̄ koō yá̰á̰ ń ədan̄də́ ní. Dumə̄n̄ naā tītə̄ yā kaadə́ gə̄ ń taān̄ kem Kɔ́ɔ̄ɓē Nə́ɓā yādə́ aĺ ní. 15Nin̄ mbātə́n̄ ndū najə̄ yān gə̄ ō, madə̄ naā ń ni-əhɔ kə kaadə́ gēé ní ō, yá̰a̰ gə̄ ń ni-ra sedə́ ta rāā á ter̄ kemdə́ dɔ tə́ ní ō. Unən̄ gō yá̰á̰ kə́ karī gə̄, adə̄ nin̄ kɔ́ gə̄ télən̄ yá̰á̰ kə́ karī gə̄ ō. Ndájə̄n̄ nápar de gə̄ ń gīrə̄n̄ gidədə́ ní. I yá̰á̰ kə́ Kɔ́ɔ̄ɓē ɔgə̄də́ rāā ba nin̄ rāān̄. Tá Kɔ́ɔ̄ɓē ədadə́ na kə lōōn̄ rāā yá̰a̰ tītə̄ yādə́. 16Nin̄ mbātə̄ń rāā gō míndə gə̄ ń Kɔ́ɔ̄ɓē Nə́ɓā yādə́ əndā dɔdə́ tə́ kadə̄ rāān̄ ní malang, ba rāān̄ duĺ man̄g gə̄ jōó kə gində̄ kə́ nō horó tām̄ yādə́ tə́. Nin̄ udən̄ ɓesə̄ Asera ō, ɔsən̄ nodə́ nang tə́ no tə́yō̰ gə̄ malang kə́ dɔ rā̰ tə́ ō, rāān̄ kəla adə̄n̄ ɓesə̄ Baal ō. 17Ngáńdə́ kə́ dəngam gə̄ ō, kə́ dəyá̰ gə̄ ō ní, nin̄ róōn̄də́ horoó. Ndḛḛ̄n̄ sāā ō, ōōn̄ ta kɔdə̄ sāā gə̄ ō, rāān̄ yá̰á̰ kə́ majaĺ ta kum Kɔ́ɔ̄ɓē tə́ bátə́ adə̄ wōn̄g rāān ō. 18Loo ń noō tə́ wōn̄g yā Kɔ́ɔ̄ɓē ḭḭ seneé kə Israel gēé, ni ɔydə́ aw̄ sedə́ sa̰y kɔ̄ɔ́ rɔ̄n tə́. I gír ɓē yā Juda ngóy n ndi gotoó ní.

19Banī de kə́ gír ɓē yā Juda tə́ nəkɔ́ gə̄gē a rāān̄ gō míndə gə̄ ń Kɔ́ɔ̄ɓē Nə́ɓā yādə́ əndā dɔdə́ tə́ kaadə́ rāān̄ ní aĺ ō. Nin̄ unən̄ gō ndū najə̄ gə̄ ń Israel gə̄ tə́ndān̄ ní. 20I tām̄ najə̄ ń noō tə́ n Kɔ́ɔ̄ɓē mbātə́nń Israel gə̄ malang ní. Ni-əla rɔ̄sɔl̄ dɔdə́ tə́, əya̰də́ adə̄ ngé ɓogə gə̄ ɔyn̄ yá̰a̰ kənge yādə́ gə̄ ō, ta tɔ̄l̄ ta anī tə̄ɓādə́ əndādə́ sa̰y kɔ̄ɔ́ rɔ̄n tə́ ō.

21Dan ń Kɔ́ɔ̄ɓē taā Israel gə̄ kɔ̄ɔ́ jī de gə̄ kə́ gír kojə yā Dabid tə́ ba əndāń Jeroboam ngōn̄ Nebat mban̄g ní, Jeroboam rāā adə̄ Israel gə̄ tūrə̄n̄ gidədə́ kɔ̄ɔ́ ta Kɔ́ɔ̄ɓē tə́ ō, oōn̄ tan to̰ aĺ ō, rāā adə̄ Israel gə̄ rāān̄ yá̰á̰ kə́ majaĺ ngá̰ý gə̄ ō. 22Ngán Israel gə̄ ndájə̄n̄ yá̰á̰ kə́ majaĺ gə̄ malang ń Jeroboam rāā ní, nin̄ əya̰n̄ gō kɔ̄ɔ́ alé. 23Ta tɔ̄l̄ ta anī Kɔ́ɔ̄ɓē gḛy ka̰a̰də́ ta kumən tə́ to̰ alé. Ni ɔydə́ aw̄ sedə́ dɔ nang kə́ Asiri tə́, adə̄ ndin̄ noó bátə́ ɓōólaā gə̄gē. I beé n Kɔ́ɔ̄ɓē rāań adə̄ najə̄ ń ni-əda kété ní reē udəń gírí ní. Ni-əndā najə̄ ní i ta ngé kəla gə̄ ń i ngé koō ta yān gə̄ tə́ ní.

Ta kəla gír de gə̄ kə́ Samari

24Mban̄g kə́ Asiri ɔy de kə́ Babilon gə̄ ō, kə́ Kuta gə̄ ō, kə́ Awa gə̄ ō, kə́ Hamat gə̄ ō, kə́ Separbaim gə̄ ō, reē tə́ndādə́ kem ɓē kə́ Samari tə́ gotə ngán Israel gə̄ tə́. Nin̄ taān̄ gō nang kə́ Samari ba ndin̄ tū tə́ kə̄ kem ɓē gə̄ tə́. 25Ta kəla gíŕ tə́, dan ń ndin̄ dɔ nang kə́ Samari tə́ ní nin̄ ndɔ̄ȳn̄ Kɔ́ɔ̄ɓē alé, adə̄ Kɔ́ɔ̄ɓē əla ɓɔl gə̄ adə̄ əhɔn̄ de gə̄ ngá̰ý dandə́ tə́. 26Ədan̄ mban̄g kə́ Asiri na nápar de gə̄ ń na ɔydə́ aw̄ tə́ndādə́ kem ɓē kə́ Samari tə́ ní na gerə̄n̄ loo ndɔ̄ȳ nə́ɓā kə́ kem ɓē ní tə́ alé. I beé n nə́ɓā ní əla kə ɓɔl gēé adə̄ tɔ̄l̄də́, tɔdɔ̄ nin̄-gerə̄n̄ loo ndɔ̄ȳ nə́ɓā ní alé. 27Anī mban̄g ədadə́ na kə unən̄ nge tun̄ yá̰á̰ kógə̄ḿ dan ngé tun̄ yá̰á̰ kə́ Samari tə́ gə̄ ń ɔyn̄də́ reēn̄ sedə́ ní tə́ kadə̄ aw̄ ndi gogə́ Samari, kadə̄ ndóōdə́ loo ndɔ̄ȳ nə́ɓā kem ɓē ní tə́. 28Adə̄ nge tun̄ kógə̄ḿ dan ngé tun̄ yá̰á̰ kə́ Samari tə́ gə̄ ń ɔyn̄də́ aw̄n̄ sedə́ ní tél reē ndi Betel. Ni ndóōdə́ loo ɓōĺ ndíĺ Kɔ́ɔ̄ɓē.

29Nápar de kə́ tayā tayā gə̄ rāān̄ ndíĺ yá̰a̰ gə̄ kə́ ɔsən̄ kum gotə nə́ɓā yādə́ gə̄ kə dɔdə́ gēé, ba tə́ndān̄ kem kújə́ kə́ rāān̄ dɔ loo ndɔ̄ȳ gə̄ tə́. I de kə́ kem ɓē kə́ Samari tə́ kə́ kété gə̄ n rāān̄ kújə gə̄ ní. Gíŕ nápar de gə̄ ndéńg ndéńg rāān̄ i tītə̄ ń noō kem ɓē gə̄ ń nin̄ ndin̄ kemeé tə́ ní. 30De kə́ Babilon gə̄ udən̄ i ɓesə̄ Sukot Benot ō. De kə́ Kuta gə̄ udən̄ i ɓesə̄ Nergal ō, Hamat gə̄ udən̄ i ɓesə̄ Asima ō, 31Awi gə̄ udən̄ i ɓesə̄ Nibajə ō, ɓesə̄ Tartakə ō. Separbaim gə̄ na̰yn̄ i kə̄ loo róō ngáńdə́ gə̄ horó tə́ yā rɔ̄ȳń ɓesə̄ Adəramelek ō, Anamelek ō. 32Nin̄ ɓōlə́n̄ ndíĺ Kɔ́ɔ̄ɓē ō, gə̄rān̄ de gə̄ dandə́ tə́ tə́ndān̄də́ ngé tun̄ yá̰a̰ gə̄ tə́ loo ndɔ̄ȳ gə̄ tə́ kadə̄ rāān̄ kəla tun̄ yá̰a̰ kem kújə kə́ rāān̄ loo ndɔ̄ȳ gə̄ ní tə́ tām̄ yādə́ tə́. 33A ɓōlə́n̄ Kɔ́ɔ̄ɓē dām̄ kə́rēý tə́ ō, a rāān̄ kəla adə̄n̄ ɓesə̄ yādə́ gə̄ dām̄ kə́ rang tə́ kə gō yá̰a̰ kāgə̄ ɓē yā nápar de gēé ō. 34Ɓōólaā gə̄gē ngán kaadə́ gə̄ a rāān̄ yá̰a̰ kāgə̄ ɓē yādə́ kə́ jóo gə̄ noó ɓáý. Nin̄ ndɔ̄ȳn̄ Kɔ́ɔ̄ɓē kə́ rɔ̄ rɔ̄ gə̄ tə́ alé. Rāān̄ gō míndə gə̄ ń əndān̄ dɔdə́ tə́ kadə̄ rāān̄ ní aĺ ō, rāān̄ yá̰a̰ kāgə̄ ɓē yā Israel aĺ ō, rāān̄ yá̰á̰ ń ndū najə̄ yā Kɔ́ɔ̄ɓē əda ní aĺ ō, yá̰a̰ gə̄ ń Kɔ́ɔ̄ɓē əda kadə̄ ngán Jakob gə̄ rāān̄ ní aĺ ō. I Jakob ngeé ń toō n Kɔ́ɔ̄ɓē əndā rīn na i Israel ní.

35Kɔ́ɔ̄ɓē əhɔ madə̄ naā kə ngán Jakob gēé ba ədadə́ na kə rāān̄ ɓesə̄ gə̄ aĺ ō, kə ɔsən̄ nodə́ nang tə́ nodə́ tə́ aĺ ō, kə rāān̄ kəla kə adə̄n̄də́ aĺ ō, kə tunə̄n̄ yá̰a̰ kə adə̄n̄də́ aĺ ō. 36I Kɔ́ɔ̄ɓē ń teē sedə́ kɔ̄ɔ́ kem ɓē kə́ Ejiptə tə́ kə tɔ́gən kə́ ngá̰ý ō, kə jīn kə́ kəla kə̄ dɔɔ́ ō ní n kə ndɔ̄ȳnən̄ ní. I ni n kə ɔsə̄n̄ nodə́ nang tə́ non tə́ ō, kə tunə̄n̄ yá̰a̰ kə adə̄nən̄ ō ní. 37Gō míndə gə̄ ń Kɔ́ɔ̄ɓē əndā dɔ Israel gə̄ tə́ kadə̄ rāān̄ ní ō, yá̰a̰ kāgə̄ ɓē yādə́ gə̄ ō, ndū najə̄ ō, yá̰á̰ ń Kɔ́ɔ̄ɓē əda kadə̄ yā rāā ní ō. Yá̰a̰ malang ń Kɔ́ɔ̄ɓē ndang adə̄də́ ní kə əndān̄ kumdə́ gírí kə rāān̄ kə dɔ ndɔ̄ gə̄ kə rāān̄ ɓesə̄ gə̄ alé. 38Kadə̄ dɔdə́ kə ndígə̄nal madə̄ naā ń n-əhɔ sedə́ ní alé. Kə ndɔ̄ȳn̄ nə́ɓā gə̄ ń i ɓesə̄ gə̄ ní alé. 39I Kɔ́ɔ̄ɓē Nə́ɓā yādə́ n kə ndɔ̄ȳnən̄ ní. I ni n na a taādə́ jī madə̄ ba̰ā̰də́ gə̄ tə́ malang yā kəya̰də́ dɔɔ́ ní. 40Banī nin̄ oōn̄ alé. Na̰yn̄ kə̄ loo rāā yá̰a̰ kāgə̄ ɓē yādə́ kə́ jóo gə̄ tə́. 41Adə̄ a ndɔ̄ȳn̄ Kɔ́ɔ̄ɓē dām̄ kə́rēý tə́ ō, dām̄ kə́ rang tə́ anī a rāān̄ kəla adə̄n̄ ɓesə̄ yādə́ gə̄ ō. Ba gotədə́ tə́ ní, ngáńdə́ gə̄ ō, ngán kaadə́ gə̄ ō, a rāān̄ i yá̰á̰ kə́ kógə̄ḿ beē nəkɔ́ ń noō ɓáý bátə́ ɓōólaā gə̄gē.

Currently Selected:

2 MBAN̄G 17: SARDC

Highlight

Copy

Compare