2 KORḚNTƏ 9
9
Yá̰á̰ kə́ kadə̄ yā rāań kə ngákó̰o̰ naā gēé
1Kadə̄ m̄-ndang makətūbə̄ m-ādə̄sí tām̄ yā yá̰á̰ ń əlan̄neé adə̄n̄ de gə̄ yā Nə́ɓā ń ndin̄ dɔ nang kə́ Jude tə́ ní, i yá̰á̰ kə́ kumən gətóo. 2m̄-ger̄ yá̰á̰ kə́ majə gə̄ ń ī-sāāī rāā ní kɔ̄ɔ́, adə̄ m-ɔ́r ta rɔ̄ḿ najə̄ yāsí tə́ ta kum de gə̄ kə́ Masedəwan tə́: M-ə́dádə́ na de kə́ Akayi tə́ gə̄ əndān̄ dɔ rɔ̄də́ danaá kɔ̄ɔ́ i kaĺbēé beē. Adə̄ kɔl watang yāsí ɔsə kə ngé kán̄ naā gə̄ ngá̰ý ta rāā yá̰a̰ ō. 3Ɓá tā ba m-ə́la kə ngákó̰ó̰jí gə̄ ń toō rɔ̄sí tə́ i yā kadə̄ kɔr ń m-ɔ́r ta rɔ̄ḿ najə̄ yāsí tə́ tām̄ yā yá̰á̰ ń noō tə́ ní, i kɔr ta rɔ̄ kə́ ndāńg karī aĺ ō, kadə̄ tītə̄ ń m-ə́dań ní, sḭḭ̄ i kə́ ə̄ndāī dɔ rɔ̄sí danaá kɔ̄ɔ́ ɓá rɔ̄kum ō. 4Ré i beé aĺ anī dan ń de kə́ Masedəwan tə́ gə̄ a reēn̄ seḿ ba a̰a̰n̄ kadə̄ ə̄ndāī dɔ rɔ̄sí danaá aĺ ɓáý ní anī, taā ń jə-taā kemsí mámák ní a tél i rɔ̄sɔl̄ yājí, m-ə́da tītə̄ ń noō i yā kədań najə̄ rɔ̄sɔl̄ yāsí sḭḭ̄ ō alé. 5Adə̄ m-á̰a̰ā̰ ní, i só tə́ ngá̰ý kadə̄ m̄-dəje ngákó̰ó̰jí gə̄ kadə̄ aw̄n̄ loosí kété noḿ tə́, yā kəndā dɔ yá̰a̰ gə̄ ń ə̄nīī ndūsí yā kadə̄ ní danaá. I tītə̄ ń noō tá ré m-ūgə̄ anī yá̰a̰ i kə́ kəndā dɔ jī kɔ̄ɔ́ ɓá ō, yá̰á̰ ní a ɔjə kə̄ ndágá kadə̄ sḭḭ̄ ādī i kə kem kə́ majaá ba i kə jī ngangāá alé ō.
6Ādə̄ əga kemsí dɔ najə̄ ń toō tə́: Nge ń ənda i sḛ́ý beē anī a əja i sḛ́ý beē ō, nge ń ənda i ngá̰ý anī a əja i ngá̰ý ō!
7I beé ní ādə̄ de gə̄ kógə̄ḿ kógə̄ḿ adə̄n̄ yá̰a̰ kə gō kem ndigə yādə́, ba ādə̄ i kə́ kadə̄ kə ndə̄ngā rɔ̄ɔ́ gō tə́ aĺ ō, dɔ gúú tə́ aĺ ō. Tɔdɔ̄ Nə́ɓā tár i nge kadə̄ yá̰a̰ kə rɔ̄nelēé. 8Nə́ɓā asə kadə̄sí yá̰á̰ kə́ majə kə́ tayā tayā gə̄ malang ngá̰ý, yā kadə̄ sḭḭ̄ i kə yá̰a̰ malang kə́ asəsí kə ndɔ̄ gə̄ ō, kadə̄ gotə ń na̰y ní i ngá̰ý kadə̄ ī-rāāīneé kəla kə́ majə gə̄ malang ō, 9kə gō najə̄ ń ndangən̄ kem makətūbə̄ yā Nə́ɓā tə́ na:
Ni-adə̄ ngé ndoō gə̄ yá̰á̰ ngá̰ý,
Yá̰á̰ kə́ gōtə́ yān to ngándáńg#9.9 K. 9: Á̰a̰ī Pā 112.9.
10Ba nge ń i nge kadə̄ nge kənda kōō kum kōō ō, yá̰a̰ kəsa ō ní, a adə̄sí kum kōō ō, a rāā kadə̄ kum kōō ní teē ngá̰ý ō, a rāā kadə̄ yá̰a̰ rāāsí kə́ ɔjə kadə̄ sḭḭ̄ i de kə́ gōtə́ gə̄ teē yá̰á̰ ngá̰ý ō. 11Ā ə́ngeī yá̰á̰ ngá̰ý kə ta róbə́ kə́ tayā tayā gə̄, yā kadə̄ ásiīneé kadə̄ yá̰á̰ ngá̰ý kə kum mbang gə̄ malang. Adə̄ de gə̄ ngá̰ý a ndadə̄n̄ Nə́ɓā tām̄ yā yá̰a̰ gə̄ ń sḭḭ̄ ī-rāāīneé kem majə sedə́ ní tə́. 12Tɔdɔ̄ kəla ń toō ń ī-rāāī ní, a rāā kadə̄ de gə̄ yā Nə́ɓā əngen̄ yá̰á̰ ń ndoōn rāādə́ ní ngóy alé, ba a rāā kadə̄ de gə̄ ngá̰ý a ndadə̄n̄ Nə́ɓā. 13Kəla ń toō ń ī-rāāī ní, a ɔjə yá̰á̰ ń i sḭḭ̄ ní kə̄ ndágá. Adə̄ de gə̄ ngá̰ý a ɔsən̄ gɔn Nə́ɓā tām̄ yā sɔl̄ dɔ yāsí tə́, sɔl̄ dɔ ń ɔ́jiīneé kə̄ ndágá kadə̄ ī-taāī kem Najə̄ kə́ Majə yā Kərist ní. Nin̄ a ɔsən̄ gɔn Nə́ɓā tām̄ yā kem majə yāsí tə́ ō, adə̄ i kem majə ń ādīneédə́ nin̄ ō, gotə de kə́ rang gə̄ malang ō yá̰a̰ kənge yāsí ngá̰ý ní. 14Nin̄ a ndɔ̄ȳn̄ tām̄ yāsí tə́, tɔdɔ̄ nel̄də́ sesí najə̄ kem majə ń Nə́ɓā rāā sesí ngá̰ý tə́ ní. 15Ādə̄ de gə̄ tɔ̄ȳn̄ Nə́ɓā tām̄ yā yá̰á̰ kə́ dum̄ kəda gotə ń ni-adə̄ de gə̄ karī tə́ ní!
Currently Selected:
2 KORḚNTƏ 9: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
