2 KORḚNTƏ 10
10
Najə̄ ń Pol tūr̄ əda ngé tə́da najə̄ dɔ kəla yān tə́ gə̄ ní
1Mə̄kɔ́ Pol m̄-rāāsí ɓɔ́, mā ń de gə̄ ədan̄ dɔḿ tə́ na ré jə-ndi ta kum naā tə́ anī najə̄ḿ na gətóo, ba ré mā i sa̰y anī na m̄-ɓōĺsí aĺ bátə́ ní. m̄-rāāsí ɓɔ́, kə ta kūl̄ háĺ kə́ sɔl̄ lɔm yā Kərist ō, kə ta kūl̄ kem majə yān ō. 2Ī-lōōī ra seḿ ta kɔr̄ najə̄ sesí kanjə̄ ɓōĺ dan ń m-ā m̄-ndi sesí ní. Tām̄ de gə̄ ń ədan̄ na jə-rāā yá̰a̰ na i gō gír̄ yā deē ndul gə̄ tə́ ní, m̄-sāā kɔjədə́ kadə̄ gerə̄n̄ na m̄-ɓōĺdə́ alé. 3Jḭḭ i deē ndul gə̄ ɓá tā, ba j-a jə-rɔ̄ɔ̄ i tītə̄ ń deē ndul gə̄ a rɔ̄ɔ̄n̄neé ní alé. 4Tɔdɔ̄ yá̰a̰ rɔ̄ɔ̄ gə̄ ń j-a jə-rɔ̄ɔń ní, i deē ndul n rāā ní alé. Ba i yá̰a̰ rɔ̄ɔ̄ kə́ ngan̄g gə̄ yā Nə́ɓā yā nujəń kújə́ kə́ ngan̄g gə̄#10.4 Kújə́ kə́ ngan̄g gə̄ ní i de gə̄ ń ɔjən̄ rɔ̄də́ ngá̰ý ō, əndān̄ tɔ́gə́də́ i dɔ rɔ̄də́ nin̄ kɔ́ gə̄ tə́ ngóy ō ní.. Jə-nujə gír̄ kə́ gō tə́ aĺ gə̄ kɔ̄ɔ́ ō, 5yá̰a̰ gə̄ malang ń de gə̄ rāān̄ kə kɔjə rɔ̄ɔ́ yā kɔgə̄ń de gə̄ ger̄ Nə́ɓā ní ō. J-əhɔ j-a gír̄ kə́ kem de gə̄ tə́ malang ɓəlo tə́ kadə̄ oōn̄ ta Kərist. 6Ba jə-ndi dɔ rɔ̄jí tə́ kɔ̄ɔ́ ɓá, yā kadə̄ ré sḭḭ̄ ɔ́jiī kə̄ ndágá kadə̄ sɔl̄ dɔ yāsí i kə́ majə ɔtə̄ kə taá anī, deē ń a ḭḭ yā rāā dɔ ngan̄g ní, j-a jə-rāān yá̰á̰ kə́ tōr̄, tām̄ yā yá̰á̰ kə́ majaĺ ń ni-rāā tə́ ní.
7Sḭḭ̄ ā á̰a̰ī i gidə yá̰á̰ kə́ ndágá! Adə̄ ré de kə́rēý gír̄ kemən tə́ kadə̄ ni i deē yā Kərist anī, ādə̄ kɔ́ɔ̄ tél gír̄ rang ɓáý to̰ na ré ni i yā Kərist anī, jḭḭ i yān ō. 8-9Tɔ́gə́ ń Kɔ́ɔ̄ɓē adə̄jí yā kadə̄ jə-rāań sesí kadə̄ āwī kum kə̄ kété, ba i yā kadə̄ jə-nujəńsí aĺ ní, ká ré m-ɔ́r ta rɔ̄ḿ ngá̰ý najə̄n tə́ adə̄ mān̄ dɔ loon gə̄gē anī, rɔ̄ḿ sɔlə̄m̄ tāmən tə́ alé. 10Tām̄ de gə̄ ədan̄ na: Najə̄ ń Pol ndang kem makətūbə̄ yān gə̄ tə́ əlań ní, i najə̄ kə́ to ɓōĺ ngá̰ý gə̄ ō, i najə̄ kə́ ngan̄g ngá̰ý gə̄ ō. Ba ré nəkɔ́ i danjí tə́ anī, tɔ́gən gətóo ō, najə̄ kɔrə̄n to ngár̄ aĺ ō. 11Deē ń ɔr̄ najə̄ tītə̄ ń noō ní, ādə̄ kɔ́ɔ̄ ger̄ najə̄ ń toō majə: Najə̄ gə̄ ń jḭḭ i dansí tə́ aĺ anī j-a j-ɔr̄ sesí kem makətūbūú ō, yá̰á̰ ń jḭḭ i dansí tə́ anī j-a jə-rāā ō ní, i yá̰a̰ gə̄ kə́ ton̄ tītə̄ naā aĺ alé.
12Kə́ rɔ̄kum tə́ tā anī, jḭḭ j-a jə-nāā kəndā rɔ̄jí kadə yā ngé gə̄ ń ədan̄ najə̄ kə́ majə dɔ rɔ̄də́ nin̄ kɔ́ gə̄ tə́ ní alé. Nin̄-gerə̄n̄ yá̰a̰ alé, tām̄ unən̄ i kāgə̄ rɔ̄də́ nin̄ kógə̄ n ɔjən̄neé ngāl̄ rɔ̄də́ ní. Nin̄-əndān̄ kāgə̄ rɔ̄də́ ní kadə rɔ̄də́ nin̄ kɔ́ gə̄ tə́, yā ka̰a̰ń ké n-ton̄ tītə̄ kāgə̄ rɔ̄də́ ní wa. 13Jḭḭ tā a j-a j-ɔr ta rɔ̄jí kə yá̰á̰ kə́ mān̄ dɔ nin̄ loo ń Nə́ɓā ɔjə tə́ ní alé. Ba j-a j-ɔr ta rɔ̄jí i kə gō dɔ nin̄ loo kəla ń Nə́ɓā adə̄jí ní tá ngóy. Tām̄ ni-adə̄jí ta róbə adə̄ j-aw̄ bátə́ j-ugə̄ loosí. 14Jḭḭ jə-mān̄ dɔ nin̄ loo yājí alé. Nə́ngētə́ gēé kété ní j-aw̄ j-ugə̄ loosí aĺ anī, jə-mān̄ i dɔ dɔ nin̄ loo yājí. Banī j-aw̄ bátə́ j-ugə̄ loosí rɔ̄kum kə Najə̄ kə́ Majə yā Kərist. 15Adə̄ dɔ nin̄ loo ń Nə́ɓā ɔjə ní, jḭḭ jə-mān̄ dɔ alé. J-ɔr ta rɔ̄jí kə kəla kə́ de kə́ rang gə̄ rāān̄ alé. Ba j-əndā kemjí dɔ tə́ kadə̄ taā kem yāsí a ḭḭ kə gidəneé, yā kadə̄ j-asəń rāā kəla kə bo tɔȳ nge ń jə-rāā kété dɔ dáńsí tə́ ní. Banī j-a jə-ra i dɔ nin̄ loo ń Nə́ɓā ɔjəjí tə́ ní ngándáńg. 16Gō tə́ anī ɓē gə̄ ń ndin̄ gidəsí tə́ nú ní, j-a j-aw̄ tū tə́ kə Najə̄ kə́ Majaá. Banī j-a j-ɔr ta rɔ̄jí kə kəla ń de kə́ rang gə̄ rāān̄ dɔ nin̄ loo kəla yādə́ tə́ ní alé.
17Makətūbə̄ yā Nə́ɓā əda na:
Deē ń gḛy kɔr ta rɔ̄n anī, ādə̄ ɔr ta rɔ̄n tām̄ kəla ń Kɔ́ɔ̄ɓē rāā tə́ ní.
18Tām̄ i deē ń əda najə̄ kə́ majə ngá̰ý dɔ rɔ̄n nəkɔ́ tə́ ní n a ndigənən̄ ní alé. Banī i deē ń Kɔ́ɔ̄ɓē əda najə̄ yān kə́ majə ní.
Currently Selected:
2 KORḚNTƏ 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
