2 KORḚNTƏ 8

Yá̰á̰ kə́ kadə̄ kə kem ndaá

1Ngákó̰ó̰jí gə̄, jə-gḛy kadə̄ ī-gerī kem majə ń Nə́ɓā rāā kə de gə̄ kə́ kem Egəlijə gə̄ kə́ dɔ nang kə́ Masedəwan tə́ ní. 2Wur kɔl əsō dɔ ngé taā kem kə́ tū tə́ gə̄ ngá̰ý. Banī rɔ̄də́ nel̄də́ ngá̰ý dan yá̰á̰ kə́ tōr̄ gə̄ nəkɔ́ ń noō tə́. Nin̄-ndoōn̄ ngá̰ý ɓá tā ba rāān̄ kem majə ngá̰ý. 3Yá̰á̰ ń nin̄-adə̄n̄ ní i yá̰á̰ kə́ asə kə gō tɔ́gə́də́, adə̄ mā i de kə́ kum tə́ yādə́. Nin̄-adə̄n̄ adə̄ mān̄ dɔ ɓáý gə̄gē. Nin̄-rāān̄jí ɓɔ́ ngá̰ý kə gō kem ndigə yādə́ nin̄ kɔ́ gɔ̄ɔ́. 4Yá̰a̰ gə̄ ń de gə̄ ɔsən̄ dɔ naā tə́ yā rāań kə ngé taā kem gə̄ kə́ dɔ nang kə́ Jude tə́ ní, nin̄-rāān̄jí ɓɔ́ ngá̰ý kadə̄ n-adə̄n̄ yādə́ tū tə́ ō. 5Yá̰á̰ ń nin̄-rāān̄ ní tɔȳ nge ń j-əndā kemjí dɔ tə́ ní. Nin̄-adə̄n̄ Kɔ́ɔ̄ɓē rɔ̄də́ kété pá tá, gō tə́ anī adə̄n̄jí rɔ̄də́ kə gō kem ndigə yā Nə́ɓāá ō. 6I tām̄ najə̄ ń noō tə́ n jə-rań kə Titə ta kaw̄ tɔ̄l̄ ta kəla kem majə ní tə́ loosí kə gōgēé, tītə̄ ń ni-əlań gíŕ ní. 7Sḭḭ̄ ə́ngeī yá̰a̰ malang ngá̰ý kɔ̄ɔ́ ɓá: Adə̄ i taā kem ō, ger̄ kɔr̄ najə̄ ō, yá̰a̰ ger̄ ō, kəndā rɔ̄ ta yá̰á̰ tə́ kanjə̄ dəba ō, táŕ kə́ tayā tayā gə̄ malang ń sḭḭ̄ ə́ngeī rɔ̄jí tə́ ní ō. Adə̄ kəla kem majə ngeé ń toō ní jḭḭ jə-gḛy kadə̄ ī-rāāī ngá̰ý ō.

8I yá̰á̰ kə́ m-ɔ́sə sesí ta rāā alé, ba dan ń m-ɔ́jə́sí loo kəndā ń madə̄sí gə̄ əndān̄ rɔ̄də́ ta yá̰á̰ tə́ rāān̄ ní, m̄-nāāsí i mbéé m-á̰a̰ń ké tár yāsí i kə́ rɔ̄kum wa ngóy. 9Tɔdɔ̄ sḭḭ̄ ī-gerī yá̰á̰ ń Kɔ́ɔ̄ɓē yājí Jeju Kərist rāā ní: Ni ń ənge yá̰á̰ ngá̰ý ní, tél nge ndoō tām̄ yāsí tə́, kadə̄ ī-téliīneé ngé kənge yá̰á̰ ngá̰ý gə̄ kə ta kūl̄ ndoō ń rāān ní.

10I beé ní, m-ə́dásí gír̄ yāḿ kə́ dɔ yá̰á̰ ń noō tə́: Dan ń i sḭḭ̄ n ə́laī gír rāā yá̰á̰ ní kaĺbēé ní, majə kadə̄ úniī ta. 11Ní, úniī ta ngɔlaā ō, ī-rāāī ī-tɔ̄lī ta ō. Ī-rāāī kəla ní ī-tɔ̄lī ta majə tītə̄ ń ī-gírīneé ta kəla gíŕ tə́ ní kə yá̰á̰ kə́ jīsí tə́. 12Tɔdɔ̄ ré gír̄ kə́ kem deē tə́ ń adə̄ń yá̰á̰ ní i gír̄ kə́ majanī, a ndigən̄ kɔ́ɔ̄ i tām̄ yá̰á̰ kə́ to jīn tə́ tə́, ba i tām̄ yá̰á̰ kə́ gətóo jīn tə́ tə́ alé.

13I yā kadə̄ sḭḭ̄ ī-ndiī kum ndoō tə́ yā rāań kadə̄ yā madə̄sí gə̄ i sódə́ tə́ alé. Ba i kadə̄ yá̰a̰ yāsí gə̄ ō, yādə́ gə̄ ō asən̄ naā. 14Ngɔlaā ní sḭḭ̄ ī-ndiī i dan yá̰a̰ kal̄ loo tə́, adə̄ ásiī rāā kə ngé gə̄ ń ndin̄ dan ndoō tə́ ní. Ba ré ndɔ̄ kə́rēý tə́ sḭḭ̄ ī-ndiī dan ndoō tə́, banī nin̄-ndin̄ i dan yá̰a̰ kal̄ loo tə́ anī, nin̄ a asən̄ rāā sesí ō. I tītə̄ ń noō n yá̰a̰ a asəń naā ní, 15tɔdɔ̄ makətūbə̄ yā Nə́ɓā əda na:

Nge ń ɔy ngá̰ý ní, ənge ngá̰ý al̄ naā aĺ ō,

nge ń ɔy sḛ́ý beē ní, nal̄ yá̰a̰ aĺ ō#8.15 K. 15: Á̰a̰ī Teē 16.18.

Titə nin̄ kə madə̄ mbān gēé

16Ādə̄ de gə̄ ndadə̄n̄ Nə́ɓā tām̄ rāā ń ni-rāā adə̄ o̰o̰ Titə tɔdɔ̄sí tītə̄ yājí ní. 17Titə ndigə rāā yá̰á̰ ń jə-dəjen kadə̄ rāā ní. Tá kə́ tɔȳ nge ń noō ní, o̰o̰n tɔdɔ̄sí ngá̰ý, adə̄ nəkɔ́ gḛy kaw̄ loosí. 18Ba ngōkó̰ó̰jí ń de gə̄ kə́ kem Egəlijə gə̄ tə́ malang tɔ̄ȳnən̄ tām̄ kəla kɔjə Najə̄ kə́ Majə tə́ ní, j-əlan kadə̄ aw̄ seneé. 19Tá ɓáý to̰ ní, i de gə̄ kə́ kem Egəlijə gə̄ tə́ n gə̄rānən̄ kadə̄ ni i madə̄ mbājí tām̄ yā kəla kem majə ń toō tə́ ní. J-a jə-rāā kəla ní i yā kadə̄ de gə̄ ɔsən̄neé gɔn Kɔ́ɔ̄ɓē ō, i yā kadə̄ j-ɔjəń kə̄ ndágá kadə̄ de gə̄ gerə̄n̄ na yá̰á̰ ń jə-sāā rāā ní i yá̰á̰ kə́ majə ō.

20Jə-gḛy kadə̄ deē əda najə̄ kə́ majaĺ dɔjí tə́ tām̄ kəla nar kə́ ngá̰ý ń əlan̄ gír jījí tə́ ní alé. 21Jə-sāā rāā yá̰á̰ kə́ majə i ta kum Kɔ́ɔ̄ɓē tə́ ngóy alé, banī i ta kum de gə̄ tə́ ō.

22Ngōkó̰ó̰jí ń jə-nāān tū yá̰a̰ gə̄ tə́ nja i ngá̰ý ba ɔjə kə̄ ndágá kadə̄ o̰o̰n tɔdɔ̄ kəla ngá̰ý ní, j-əlan kadə̄ aw̄ sedə́. Ngɔlaā o̰o̰n tɔdɔ̄ kəla ngá̰ý tɔȳ kə́ kété ɓáý, tɔdɔ̄ ni-ənī kemən mámák adə̄sí. 23Kə́ sɔɔ̄ dɔ Titə tā anī ni i madə̄ njə̄rāḿ ō, nge rāā kəla seḿ tām̄ yāsí tə́ ō. Ba ngákó̰ó̰jí kə́ rang gə̄ ń aw̄n̄ seneé ní, i de gə̄ kə́ kem Egəlijə gə̄ tə́ n əlan̄də́ ní ō, yá̰a̰ rāādə́ i yá̰á̰ kə́ kadə̄ ɔsə gɔn Kərist ō. 24Ɔ́jiīdə́ kadə̄ ī-táriīdə́ kə́ rɔ̄kum tə́ ādə̄ de gə̄ kə́ kem Egəlijə tə́ gə̄ gerə̄n̄. Loo ń noō tə́ kɔr ń j-ɔr ta rɔ̄jí najə̄ yāsí tə́ ta kumdə́ tə́ ní, najə̄ i yājí.

Currently Selected:

2 KORḚNTƏ 8: SARDC

Highlight

Copy

Compare