2 KORḚNTƏ 7

1Kó tár yāḿ gə̄, dan ń Nə́ɓā ənī míndən beé adə̄jí ní, ādə̄ jə-tə́goī yá̰a̰ malang ń rāā dā̰ rɔ̄jí ō, ndíĺjí ō, adə̄ télən̄ yá̰á̰ kə́ yḛr gə̄ ní kɔ̄ɔ́, kadə̄ j-unjīneé njáý njáý. Adə̄ jə-tɔ̄lī ta kɔr̄ kam̄ rɔ̄ yājí kə ɓōĺ ndíĺ Nə́ɓāá.

Rɔ̄ Pol nelə̄n

2Ādī j-ənge loo kemsí tə́ sḛ́ý! Jə-rāā deē kógə̄ḿ yá̰á̰ kə́ tōr̄ aĺ ō, jə-nujə yá̰a̰ kənge yā deē aĺ ō, j-əsa tətō deē aĺ ō. 3M-ə́da nge ń noō i yā gāngəń sarya dɔsí tə́ alé. Tɔdɔ̄ tītə̄ ń m-ə́dań ní, jə-táŕsí ngá̰ý, adə̄ j-a jə-ndiī i kə naá ō, j-a j-oyiī i kə naá ō. 4M-ə̄nā kemḿ mámák m-ādə̄sí. M-ɔ́r ta rɔ̄ḿ ngá̰ý najə̄ yāsí tə́. Dan wur kɔl yājí gə̄ tə́ malang ní, m-ə́nge kem sɔl̄ ngá̰ý ō, rɔ̄ḿ nelə̄m̄ ngá̰ý ō.

5Tɔdɔ̄ dan ń j-ugə̄ dɔ nang kə́ Masedəwan tə́ ní, j-ɔr̄ koō aĺ bátə́. Wur kɔl əsō dɔjí tə́ kə ta róbə́ kə́ tayā tayā gēé: J-a jə-rɔ̄ɔ̄ kə de kə́ rang gēé ō, ɓōĺ i kemjí tə́ ō. 6Ba Nə́ɓā ń i nge sɔl̄ kem ngé gə̄ ń tɔ́gə́də́ ur̄ wak kɔ̄ɔ́ ní, sɔl̄ kemjí kə ta kūl̄ reē ń Titə reē ugə̄ ní. 7Tá i reē kugə̄n ngóy n sɔl̄ kemjí ní alé, ba sɔl̄ ń ī-sɔlī kemən á ni-ədají gotə ní sɔl̄ kemjí ō. Ni-ədají na ngur ka̰a̰ḿ na rāāsí ngá̰ý ō, na ī-nōōmī ngá̰ý kə man̄ kumsí ō, o̰o̰sí tɔdɔ̄ḿ ngá̰ý ō, adə̄ rɔ̄ḿ nelə̄m̄ ngá̰ý ɓáý to̰ najə̄n tə́.

8A̰á̰ā̰, ká ré makətūbə̄ ń m-ə́lań m-ādə̄sí ní rāāsí adə̄ rɔ̄sí nel̄sí aĺ gə̄gē anī, ngɔlaā m̄-ndə̄ngā rɔ̄ḿ najə̄n tə́ alé. m̄-ndə̄ngā rɔ̄ḿ i dan ń m-á̰a̰ kadə̄ makətūbə̄ ní rāā adə̄ rɔ̄sí nel̄sí aĺ ní, banī dan i ngá̰ý alé. 9Ngɔlaā m̄-rāā rɔ̄nel̄ ba i najə̄ rɔ̄sí kə́ nel̄sí aĺ tə́ alé, ba i najə̄ háĺsí kə́ ī-tūrī sɔɔ̄ń rɔ̄sí kə́ nel̄sí aĺ tə́. Nə́ɓā un rɔ̄sí kə́ nel̄sí aĺ ní rāań kəla, adə̄ yá̰á̰ ń jə-rāā sesí ní, rāā yá̰á̰ kógə̄ḿ kə́ majaĺ sesí alé. 10Tɔdɔ̄ rɔ̄ de kə́ nelə̄n aĺ ń Nə́ɓā un rāań kəla ní, a ojə i tūr̄ háĺ kə́ a aw̄ kə deé yā kəlan ta kajə tə́ ō, deē a ndə̄ngā rɔ̄n najə̄n tə́ aĺ ō. Banī rɔ̄nel̄ aĺ ń de kə́ dɔ nang tə́ gə̄ a adə̄n̄ ní a ojə i yo. 11Nə́ɓā un rɔ̄sí kə́ nel̄sí aĺ rāań kəla, ba ngɔlaā á̰a̰ī yá̰á̰ ń rɔ̄sí kə́ nel̄sí aĺ rāā ní! Rɔ̄sí ń nel̄sí aĺ ní ndḛḛ̄ kadə̄ ī-rāāī yá̰á̰ ń rāā yá̰á̰ ní i yá̰á̰ kógə̄ naā tə́ aĺ ō, údə ī-ndiī karī aĺ ō, banī ī-rɔ̄ɔ̄ī dɔ rɔ̄sí tə́. Rɔ̄sí ń nel̄sí aĺ ní rāā adə̄ wōn̄g rāāsí ngá̰ý ō, ɓōĺ rāāsí ngá̰ý ō, adə̄ ngur tél ka̰a̰m̄ gogə́ rāāsí ngá̰ý. Rāā adə̄ rɔ̄sí təngāsí loo rāā kəla tə́ ō, loo rāā deē yá̰á̰ kə́ tōr̄ tə́ tām̄ yá̰á̰ kə́ majaĺ kə́ ni-rāā tə́ ō. Sḭḭ̄ ɔ́jiī kə ta róbə́ kə́ tayā tayā gēé kadə̄ najə̄ gətóo dɔsí tə́ tū najə̄ ń noō tə́.

12Adə̄ ré m̄-ndang makətūbə̄ m-ādə̄sí anī, i tām̄ yā deē ń rāā yá̰á̰ kə́ majaĺ tə́ ní aĺ ō, deē ń rāān̄ yá̰á̰ kə́ majaĺ seneé tə́ ní aĺ ō, banī i yā kadə̄ ko̰o̰ ń o̰o̰sí tɔdɔ̄jí ní, ɔjəń rɔ̄n kə̄ ndágá dɔ dáńsí tə́ ta kum Nə́ɓā tə́. 13I tām̄ najə̄ ń noō tə́ n yá̰a̰ rāāsí sɔl̄ kemjí ní.

J-ənge i kem sɔl̄ ngóy alé, Titə ń sḭḭ̄ malang ī-rāāniī ādə̄ kemən tetə kə̄ nang tə́ ní, rɔ̄nel̄ yān adə̄jí rɔ̄nel̄ ngá̰ý ō. 14Ré m-ɔ́r ta rɔ̄ḿ najə̄ yāsí tə́ ta kumən tə́ anī, rɔ̄ḿ sɔlə̄m̄ najə̄n tə́ alé. Banī tītə̄ ń j-a j-ədasí i najə̄ kə́ rɔ̄kum ngándáńg ní, kɔr ń j-ɔr ta rɔ̄jí najə̄ yāsí tə́ ta kum Titə tə́ ní, najə̄ i yājí. 15Ba tár yā Titə kə́ tām̄ yāsí tə́ i ngá̰ý tɔȳ kə́ kété ɓáý, dan ń əga kemən dɔ koō ń sḭḭ̄ malang ōōī najə̄ tají tə́ ō, ə́hɔniī kə̄ rɔ̄sí tə́ kə ɓōló ō, kə rɔ̄ ndeweé ō tə́ ní. 16Rɔ̄ḿ nelə̄m̄ ngá̰ý tɔdɔ̄ m-ásə kəndā kemḿ dɔsí tə́ tū yá̰a̰ gə̄ tə́ malang.

Currently Selected:

2 KORḚNTƏ 7: SARDC

Highlight

Copy

Compare