2 KORḚNTƏ 6
6
1I beé ní, jḭḭ ń i ngé rāā kəla gə̄ kə Nə́ɓāá ní, j-ɔjə̄sí kadə̄ rajə ń Nə́ɓā rajəsí ní kadə̄ gotə to karī alé. 2Tɔdɔ̄ Nə́ɓā əda na:
Kum mbang ń rāā majə kə deé yāḿ a ɔjəń rɔ̄n kə̄ ndágá tə́ ní,
m-ādī yá̰á̰ ń i dəjem̄ ní kadə̄ rɔ̄í nelī.
Ndɔ̄ kajə deē tə́ ní, mā m̄-reē m̄-dḭḭ̄#6.2 K. 2: Á̰a̰ī Ij 49.8.
I beé ní, kum mbang kə́ yā kadə̄ deē ndigəń rāā majə yā Nə́ɓā n toó, ndɔ̄ kajə deē n toó.
3Jə-sāā kadə̄ deē əda najə̄ kə́ majaĺ dɔ kəla rāājí tə́ alé. I tām̄ najə̄ ń noō tə́ n jə-sāań rāā yá̰á̰ kə́ kadə̄ deē əngeń ta róbə kəda najə̄ kə́ majaĺ aĺ ní. 4Ba tū yá̰a̰ gə̄ tə́ malang ɓáa j-ɔjə kə̄ ndágá kadə̄ jḭḭ i de kə́ bo gə̄ yā Nə́ɓā. Jə-tə́gā tají ngá̰ý dan wur kɔl gə̄ tə́ ō, dan yá̰á̰ gə̄ kə́ tɔyn̄ dɔjí tə́ ō, dan sōl̄ gə̄ tə́ ō. 5Əndan̄jí ō, ɓōkə́n̄jí dəngáyá ō, sə̄lān̄ de gə̄ dɔjí tə́ ō, jə-rāā kəla kə́ ngan̄g gə̄ ō, j-ənī ɓīī kumjí tə́ aĺ ō, jə-*ndi ɓō tām̄ yā Nə́ɓā tə́ ō. 6J-ɔjə kə̄ ndágá kadə̄ jḭḭ i ngé rāā kəla gə̄ yā Nə́ɓā, i kə ta kūl̄ háĺjí kə́ unjə̄ njáý njáý ō, ger̄ yá̰a̰ yājí ō, tə́gā ta yājí ō, kem majə yājí ō. I kə ta kūl̄ Ndíĺ kə́ Táĺ ō, tár yājí kə́ rɔ̄kum ō, 7najə̄ kə́ rɔ̄kum ń j-ɔjə ní ō, tɔ́gə yā Nə́ɓā ō. Yá̰a̰ rɔ̄ɔ̄ yājí ń j-aw̄ń ní i yá̰á̰ kə́ gōtə́, adə̄ j-a j-ənīń madə̄ ba̰ā̰ rɔ̄ɔ̄ ō, j-a jə-rɔ̄ɔń madə̄ ba̰ā̰ dɔ rɔ̄jí tə́ ō. 8De gə̄ ɔsən̄ gɔnjí ō, kídə̄n̄jí ō, ədan̄ najə̄ kə́ majaĺ dɔjí tə́ ō, ədan̄ najə̄ kə́ majə dɔjí tə́ ō. Rāān̄jí i de kə́ ngé sor̄ gə̄ tə́, banī jḭḭ i ngé kəda najə̄ kə́ rɔ̄kum gə̄. 9Rāān̄jí i de kə́ deē ger̄də́ aĺ gə̄ tə́, tá gerə̄n̄jí majə. Rāān̄jí i de gə̄ kə́ a oyn̄ ngɔr tə́, banī jə-ndi kə kumjí. Əndan̄jí, banī tɔ̄lə̄n̄jí alé. 10Rāān̄jí i de gə̄ kə́ rɔ̄nel̄ yādə́ gətóó tə́, banī rɔ̄jí nel̄jí ngándáńg. Rāān̄jí i ngé ndoō gə̄ tə́, banī jə-rāā adə̄ de gə̄ ngá̰ý əngen̄ yá̰á̰ ngá̰ý. Rāān̄jí i de gə̄ kə́ əngen̄ yá̰a̰ aĺ tə́, banī j-ənge yá̰a̰ malang.
11Sḭḭ̄ Korḛntə gə̄, jə-mundə̄sí yá̰á̰ kógə̄ḿ alé, j-ɔr̄ najə̄ sesí i wáńg. Jə-tḛḛ̄ kemjí ngá̰ý j-adə̄sí. 12Kəda na loo yāsí na gətóo kemjí tə́ ní, i najə̄ kə́ rɔ̄kum alé, ba i sḭḭ̄ n ī-teēī kemsí adə̄jí alé ní. 13Adə̄ m-ɔ̄r̄ najə̄ sesí i kə́ ngánə́ḿ gə̄ tə́: Yá̰á̰ ń jə-rāā sesí ní ī-tél ī-rāāī sejí kum gotə, ī-teēī kemsí ngá̰ý ādījí!
Tāān̄ ngé taā kem gə̄ najə̄ yā ngé taā kem aĺ gə̄ tə́
14Ngé taā kem aĺ gə̄ ní ī-lōōī ɓoo naā sedə́. Nin̄ i madə̄ tasí gə̄ kə́ majən̄ tām̄ yāsí tə́ alé. Tām̄ yá̰á̰ kə́ gōtə́ nin̄ kə rāā yá̰a̰ kə gō ń Nə́ɓā ndigə aĺ ní, a ɓoon̄ naā i ba̰ý? Loo kə́ unjə̄ kow nin̄ kə loo kə́ risə til nding ní a ɓoon̄ naā i ba̰ý? 15Kərist ō Sətan ō ní, ndūdə́ a aw̄ gō naā tə́ i ba̰ý? Nge taā kem ō nge taā kem aĺ ō ní, i rí n ɓoodə́ naā tə́ ní? 16Kújə yā Nə́ɓā ō, ɓesə̄ gə̄ ō ní, i rí n ɓoodə́ naā tə́ ní? Tɔdɔ̄ jḭḭ̄ i kújə yā Nə́ɓā kə́ ndi kə kumneé tītə̄ ń Nə́ɓā nəkɔ́ ədań ní, ni-əda na:
M-ā m̄-ndi sedə́ ō, m-ā m̄-njə̄rā sedə́ ō,
loo ń noō tə́ mā i Nə́ɓā yādə́ ō, nin̄ i gír deē yāḿ gə̄ ō.
17Adə̄ Kɔ́ɔ̄ɓē əda na:
Ī-teēī kɔ̄ɔ́ dan de gə̄ ń noō tə́,
ɔ̄rī rɔ̄sí kɔ̄ɔ́ rɔ̄də́ tə́,
ɔ́diī rɔ̄ yá̰á̰ kógə̄ḿ kə́ yḛr alé,
anī mā m-ā m-ə́wásí kə̄ rɔ̄ḿ tə́.
18Loo ń noō tə́ mā i bɔbə̄sí ō,
sḭḭ̄ i ngánə́ḿ kə́ dəngam gə̄ ō, kə́ dəyá̰ gə̄ ō.
Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n noó.
Currently Selected:
2 KORḚNTƏ 6: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
