2 KORḚNTƏ 5

1Rɔ̄jí i kújə yājí kə́ dɔ nang tə́ laā. Ba jə-gerī kadə̄ ré kújə yājí ngeé ń toō nujə kɔ̄ɔ́ anī, j-awī kə nge kə́ a to ngándáńg dɔ rā̰ tə́, kə́ Nə́ɓā rāā tām̄ yājí tə́, kújə́ ní i kújə́ kə́ deē rāā kə jīneé alé. 2Adə̄ dan ń jə-ndiī kem kújə́ kə́ dɔ nang tə́ ngeé ń toō tə́ ní, jə-to̰ō̰ī rus rus, tɔdɔ̄ ngur kəla kújə yājí kə́ dɔ rā̰ tə́ kūbə̄ tə́ rɔ̄jí tə́ dɔ madə̄ tə́ rāājí ngá̰ý. 3Tɔdɔ̄ Nə́ɓā a əngejí rɔ̄jí karī alé, loo ń ré kújə́ kə́ dɔ rā̰ tə́ ní utə̄ gidə rɔ̄jí ní. 4Rɔ̄kum, dan ń jə-ndiī i kem kújə́ kə́ dɔ nang tə́ ń toō tə́ ɓáý ní, j-a jə-to̰ō̰ī i mbée rus rus, tām̄ jḭḭ̄ i gíŕ yá̰á̰ kə́ kɔȳń tɔȳ tɔ́gə́jí tə́. Kumən na jə-sāāī i kadə̄ rɔ̄jí kə́ dɔ nang tə́ kə gətóo kɔ̄ɔ́ alé, banī jə-ndə̄ngāī i kadə̄ əlan̄ rɔ̄jí kə́ dɔ rā̰ tə́ rɔ̄jí tə́, yā kadə̄ yá̰á̰ ń a oy kɔ̄ɔ́ ní, ndi kə kumuú utə̄ dɔn kɔ̄ɔ́. 5Ba nge ń rāājí kə rī kadə̄ tūrə̄n̄jí kɔ̄ɔ́ ní, i Nə́ɓā ń adə̄jí Ndíĺ kə́ Táĺ ní. Ndíĺ kə́ Táĺ ń ni-adə̄jí ní, i ta kəla gíŕ yá̰a̰ gə̄ kə́ ni ngɔ̄m̄ tām̄ yājí tə́ ō, i yá̰á̰ kə́ ɔjə kadə̄ ni a adə̄jí yá̰a̰ gə̄ ní rɔ̄kum ō.

6Ngáńdáńg ní, jḭḭ j-ənī kemjí mámák jə-ndiń kanjə̄ sōl̄ yá̰á̰ kógə̄ḿ. Ba jə-ger̄ kadə̄ ré jə-ndi i kə dā̰ rɔ̄jí ń toō ɓáý anī, jḭḭ i kem kújə yājí tə́ alé, jḭḭ i sa̰y rɔ̄ Kɔ́ɔ̄ɓē tə́.

7Tɔdɔ̄ jḭḭ jə-njə̄rā i kə gō taā kem yājí, ba i kə gō yá̰á̰ ń j-a̰ā̰ kə kumjí ní alé. 8Rɔ̄kum, j-ənī kemjí mámák jə-ndiń kanjə̄ sōl̄ yá̰á̰ kógə̄ḿ ō, yá̰á̰ kə́ nel̄jí ngá̰ý i kadə̄ j-əya̰ rɔ̄jí ń toō kɔ̄ɔ́ ba j-aw̄ jə-ndi rɔ̄ Kɔ́ɔ̄ɓē tə́ ō. 9Banī yá̰á̰ ń jə-sāā pak pak kété no yá̰a̰ gə̄ tə́ malang ní, i kadə̄ ká jə-ndi i kə rɔ̄jí ń toō, aké jə-teē i kɔ̄ɔ́ kemeé gə̄gē anī, i kadə̄ nel̄ Kɔ́ɔ̄ɓē sejí. 10Tɔdɔ̄ i gáŕ kadə̄ jḭḭ̄ malang jə-raī no Kərist tə́, yā kadə̄ ni-gān̄g sarya dɔjí tə́. Loo ń noō tə́ deē kógə̄ḿ kógə̄ḿ a ənge yá̰á̰ gír kəla rāān kə́ majə, aké kə́ majaĺ tə́, adə̄ i yá̰a̰ gə̄ ń ni rāādə́ dan ń ni ndiń kə kumneé ɓáý tə́ ní.

Əndān̄jí naā tə́ kə Nə́ɓāá i kə ta kūl̄ Kərist

11Jḭḭ jə-ger̄ yá̰á̰ ń i ɓōĺ ndíĺ Kɔ́ɔ̄ɓē ní, adə̄ jə-sāā i kɔjə de gə̄ kadə̄ gerə̄n̄ najə̄ kə́ rɔ̄kum. Nə́ɓā ger̄jí majə ō, m̄-taā kem kadə̄ sḭḭ̄ ī-ger̄mī kemsí gə̄ tə́ majə ō. 12Jə-tél j-ədasí i Najə̄ kə́ Majə yājí jḭḭ gogə́ ɓáý to̰ alé, banī jə-sāā i kadə̄ ə́ngeī ta róbə kɔjə rɔ̄sí kə ta kūl̄jí, yā kadə̄ sḭḭ̄ ásiīneé tél kə najá kəda ngé gə̄ ń a ɔjən̄ rɔ̄də́ kə gidə yá̰á̰ kə́ ndágá karī, ba i kə yá̰á̰ kə́ ngarān̄g kem deē tə́ aĺ ní. 13Ré i rɔ̄kum kadə̄ jḭḭ i de kə́ mbóo gə̄ anī, i tām̄ yā Nə́ɓā tə́. Ba ré jḭḭ i de kə́ ngáā gə̄ anī, i tām̄ yāsí tə́. 14Tɔdɔ̄ tár yā Kərist o̰o̰ ɓē dɔjí tə́, jḭḭ ń jə-ger̄ majə ngá̰ý kadə̄ de kə́ kal kógə̄ḿ beē oy tām̄ yā de kə́ ngá̰ý gə̄ tə́ ní. Kumən na nin̄ malang oyn̄ seneé. 15Ni oy tām̄ yā de gə̄ tə́ malang, yā kadə̄ ngé gə̄ ń ndin̄ kə kumdə́ ní, ndin̄ kə kumdə́ i tām̄ yādə́ nin̄ kɔ́ gə̄ tə́ to̰ alé, ba i tām̄ yā nge ń oy tá ndól̄ tām̄ yādə́ tə́ ní.

16Adə̄ jḭḭ jə-ger̄ deē i kə gō yā dā̰ rɔ̄ɔ́ to̰ alé. Ká ré kété jóo jə-ger̄ Kərist i kə gō yā dā̰ rɔ̄ɔ́ gə̄gē anī, ngɔlaā jə-gerə̄n tītə̄ ń noō to̰ alé. 17Adə̄ ré deē kógə̄ḿ ɓoon̄ naā kə Kərist anī, ni i de kə́ kijə. Yá̰á̰ kə́ kété jóo mān̄ kɔ̄ɔ́, ba ngɔlaā yá̰á̰ ń to ní i yá̰á̰ kə́ kijə. 18Ba yá̰a̰ gə̄ ń toō malang teēn̄ i rɔ̄ Nə́ɓā ń əndājí naā tə́ seneé kə ta kūl̄ Kərist ō, adə̄jí kəla kəndā de gə̄ naā tə́ seneé ō ní. 19Tɔdɔ̄ kété Nə́ɓā rāā kəla kə ta kūl̄ Kərist, əndāń de gə̄ malang naā tə́ seneé, kanjə̄ kəhɔ gíŕ yá̰á̰ kə́ gō tə́ aĺ gə̄ ń nin̄-rāān̄ ní. Ba kəla kəndā de gə̄ naā tə́ seneé ngeé ń toō ní, ni-əndā kəla kəda de gə̄ najə̄n dɔjí tə́.

20I Kərist n əlají rɔ̄sí tə́ yā kɔr̄ najə̄ sesí kə rīneé ní. Adə̄ i tītə̄ kə́ i ngarān̄g kum Nə́ɓā nəkɔ́ n ndə̄mā tají adə̄ńsí kɔjə̄ beé. Ní, jə-rāāsí ɓɔ́ kə rī Kərist, ādī əndān̄sí naā tə́ kə Nə́ɓāá, ba ī-lōōī mbātə́. 21Kété ní Kərist i kanjə̄ yá̰á̰ kə́ majaĺ dɔn tə́, ba Nə́ɓā əndā yá̰á̰ kə́ majaĺ yājí dɔn tə́. I yā kadə̄ kə ta kūl̄ Kərist ɓáa, j-əngeīneé yá̰á̰ kə́ majə kə́ teē tū kəla ń Nə́ɓā rāā tə́ ní. Jə-téliī de kə́ gōtə́ gə̄ ta kum Nə́ɓā tə́, i kə ta kūl̄ kəla rāān ngeé ń toō.

Currently Selected:

2 KORḚNTƏ 5: SARDC

Highlight

Copy

Compare