2 KORḚNTƏ 11

Pol ō ngámbang kəla kə́ rɔ̄kum aĺ gə̄ ō

1Á! m̄-ndə̄ngā kadə̄ ī-tə́gāī tasí dɔḿ tə́ kadə̄ m̄-rāań kɔ̄r̄ sḛ́ý! A̰á̰ā̰, majə kadə̄ ī-tə́gāī tasí dɔḿ tə́! 2m̄-rāā jang najə̄ yāsí tə́, ba jang ń m̄-rāā ní, i jang kə́ ḭḭ i rɔ̄ Nə́ɓā tə́. Tām̄ sḭḭ̄ i tītə̄ ngōmandə kə́ ger̄ dəngam aĺ ɓáý kə́ m-ə́hɔ gātə̄sí tām̄ yā dəngam kə́ kógə̄ḿ beē tə́, dəngam ní i Kərist. 3Banī m̄-ɓōĺ najə̄ kadə̄ gír̄ yāsí nujə adə̄ ə́ya̰ī Kərist kɔ̄ɔ́, tītə̄ ń lī góləń Ebə kə ngam yānneé ní. 4Tɔdɔ̄ ré deē kógə̄ḿ reē ɔjəsí najə̄ yā Jeju kə́ rang ba i yā nge ń j-ɔjəsí najə̄ yān kété ní alé, aláa ə́hɔī ndíĺ kə́ rang kə̄ rɔ̄sí tə́ ba i nge ń ə́ngein̄ kété ní alé, aláa ī-taāī kem Najə̄ kə́ Majə kə́ rang ba i nge ń ī-taāī kem kété ní aĺ anī, sḭḭ̄ ī-tə́gāī tasí dɔ tə́ majə ngá̰ý.

5Ɓá tā banī m-á̰a̰ kadə̄ ngámbang kəla yāsí kə́ bo ngá̰ý gə̄ ń noō, tɔȳmə̄n̄ kə yá̰á̰ kógə̄ḿ alé! 6Ré m̄-ger̄ kɔr̄ najə̄ aĺ gə̄gē anī, m̄-ger̄ yá̰a̰ aĺ alé. J-ɔjəsí tū yá̰a̰ gə̄ tə́ malang kadə̄ jḭḭ i de kə́ ger̄ yá̰a̰ gə̄.

7Téĺ ń mə̄kɔ́ m̄-tél kə rɔ̄ḿ kə̄ nang tə́ ba m-ɔ́sə́sí kə̄ dɔɔ́, tɔdɔ̄ m-ɔ́jə́sí Najə̄ kə́ Majə yā Nə́ɓā i karī ní, m̄-rāā i yá̰á̰ kə́ gōtə́ aĺ a? 8m̄-taā yá̰a̰ i jī de gə̄ kə́ kem Egəlijə kə́ rang gə̄ tə́, i yá̰a̰ gə̄ ń nin̄-adə̄n̄ kadə̄ m-ə́sá tá m̄-rāań kəla m-ādə̄sí ní. 9Ba dan ń m̄-ndi dansí tə́ á ndoō rāām̄ ní, m-ɔ̄ȳ deē kógə̄ḿ alé. Tɔdɔ̄ ngákó̰ó̰jí gə̄ ń ḭḭn̄ dɔ nang kə́ Masedəwan tə́ reēn̄ ní, adə̄mə̄n̄ yá̰a̰ malang ń ndoōn rāām̄ ní. Mā m̄-mbātə́ kɔȳsí ō, m̄-na̰y kə̄ loo mbātə́ tə́ ɓáý ō. 10Yá̰a̰ kɔr ta rɔ̄ yāḿ ń toō, deē a taā jīḿ tə́ dɔ nang kə́ Akayi tə́ alé. M-ə́da nge ń noō kə̄ ndágá, i kə ta kūl̄ najə̄ kə́ rɔ̄kum yā Kərist ń to kemḿ tə́ ní. 11M-ə́da nge ń noō i tām̄ yā rí tə́? I tām̄ gḛy kə́ m̄-gḛysí aĺ tə́ a? Nə́ɓā ger̄ majə kadə̄ m̄-gḛysí ngá̰ý!

12Yá̰á̰ ń m̄-rāā toó m-ā m-ún ta ɓáý, yā kadə̄ ngé gə̄ ń a sāān̄ najə̄ kə́ yā kəga rɔ̄də́ gidə tə́ ba kɔrəń ta rɔ̄də́ ō, kədań na kəla rāādə́ na i tītə̄ yājí ō ní, əngen̄neé ta róbən alé. 13De gə̄ ń noō i ngámbang kəla kə́ rɔ̄kum aĺ gə̄. Najə̄ kə́ dɔ kəla yādə́ gə̄ ń a rāān̄ tə́ ní, nin̄ a gólə̄n̄ i loo, ba tūrə̄n̄ rɔ̄də́ adə̄ de gə̄ a̰a̰n̄də́ i ngámbang kəla yā Kərist gə̄ tə́. 14Banī nge ń noō i yá̰á̰ kə́ to kɔr kum alé, tām̄ Sətan nəkɔ́ gə̄gē ní, i nge tél de kə́ dɔ rā̰ tə́ yā loo kə́ unjə̄ kow ō. 15Adə̄ ré ngé kəla yān gə̄ a télən̄ ngé kəla gə̄ yā yá̰á̰ kə́ gōtə́ anī, i yá̰á̰ kə́ jákə́ alé. Banī ta tɔ̄l̄ tadə́ a to i tītə̄ kəla rāādə́ gə̄.

Yá̰á̰ kə́ tōr̄ ń rāā Pol loo rāā kəla ngōmbang kəla tə́ ní

16m̄-tél m-ə́da ɓáý to̰: Ādə̄ deē kógə̄ḿ rāām̄ nge kɔ̄r̄ tə́ alé. Aĺ ɓá anī ī-rāāmī nge kɔ̄r̄ tə́ ādə̄ m-ə́ngeń ta róbə kɔr ta rɔ̄ḿ sḛ́ý ō. 17Najə̄ ń m-ā m̄-rāā yā kɔr̄ toó ní, i nge ń Kɔ́ɔ̄ɓē ndigə kadə̄ m-ɔ̄r̄ ní alé rɔ̄kum. Banī m-ā m-ɔ̄r̄ i kə́ loo nge kɔ̄r̄ tə́, tɔdɔ̄ m̄-sāā kɔr ta rɔ̄ḿ. 18Tītə̄ ń de gə̄ ngá̰ý ɔrən̄ ta rɔ̄də́ kə yá̰a̰ gə̄ kə́ gō yā deē ndul tə́ ní, mā m-ā m-ɔ́r ta rɔ̄ḿ ō. 19Sḭḭ̄ ń i ngé kum kedə̄ gə̄ ní, tə́gā ta dɔ ngé kɔ̄r̄ gə̄ tə́ i yá̰á̰ kə́ tōr̄ rɔ̄sí alé! 20Ré əndān̄ gúu dɔsí tə́ tītə̄ kə́ sḭḭ̄ i ɓəlo gə̄ beé, aláa əsan̄ tətōsí, aláa gólə̄n̄sí, aláa kídə̄n̄sí, aláa əndan̄ dan kumsí anī, sḭḭ̄ ī-tə́gāī tasí dɔ tə́. 21Najə̄ ń m-ə́da ní rɔ̄ḿ sɔlə̄m̄ loon tə́: Tām̄ yá̰á̰ ń jə-rāā ní i kə́ loo de gə̄ kə́ tɔ́gə́də́ gətóo adə̄ al̄ naā tə́!

Ɓá tā ba ré de kə́rēý nāā kɔjə rɔ̄n kə yá̰á̰ kógə̄ḿ anī, mā m-ā m̄-nāā kɔjə rɔ̄ḿ sḛ́ý ō. Najə̄ ń m-ā m-ɔ̄r̄ toó i tītə̄ najə̄ kɔr̄ nge kɔ̄r̄ beé: 22Nin̄ i Hebəro gə̄ a? Mā i Hebəro ō. Nin̄ i ngán Israel gə̄ a? Mā i ngōn̄ Israel ō. Nin̄ i ngán kaa Abəraham gə̄ a? Mā i ngōn̄ kaa Abəraham ō. 23Nin̄ i ngé rāā kəla gə̄ yā Kərist a? Ré i nge ń noō ɓáa m-ā m-ɔ̄r̄ i kə́ nge kɔ̄r̄ tə́ ɗer. Mā m̄-tɔȳdə́ loo rāā kəla yā Kərist tə́. m̄-rāā kəla m̄-tɔȳdə́. m̄-rāā dəngáy kə̄ nja naā tə́ ō, əndamə̄n̄ nja i ngá̰ý ō, m-ə́ngé yá̰á̰ kə́ asə yoḿ kə̄ nja naā tə́ ō. 24Jipə gə̄ əndamə̄n̄ jīdə́ kutə mətá gidə i ndōhó nja i mí ō, 25Rom gə̄ əndamə̄n̄ kə ndéy mərawaá nja i mətá ō, de gə̄ sāān̄ tɔ̄lə̄m̄ nja kógə̄ḿ ō, tɔdɔ̄ tə́nīmə̄n̄ kə mbalá. To bɔɔ seḿ nja mətá, m̄-rāā ndɔ̄ kógə̄ḿ ō kadə kógə̄ḿ ō dan ɓūl̄ man̄ tə́. 26m̄-njə̄rā mbā ngá̰ý, adə̄ m-ə́ngé yá̰á̰ kə́ to yo gə̄ dɔ bā bo gə̄ tə́ ō, jī ngé gān̄g róbə gə̄ tə́ ō, jī náparəḿ mə̄kɔ́ gə̄ tə́ ō, jī nápar de kə́ rang gə̄ tə́ ō. M-ə́ngé yá̰á̰ kə́ to yo gə̄ kem ɓē bo gə̄ tə́ ō, kem dəla loo gə̄ tə́ ō. M-ə́ngé yá̰á̰ kə́ to yo dɔ bā bo tə́ ō, jī ngákó̰ó̰ḿ kə́ rɔ̄kum aĺ gə̄ tə́ ō. 27m̄-rāā kəla kə́ ngan̄g gə̄ adə̄ kɔr rāām̄ ō, yá̰a̰ nāā kə́ ngan̄g gə̄ nāāmə̄n̄ ō, m-ə̄nā ɓīī kumḿ tə́ aĺ nja i ngá̰ý ō. Ɓō rāām̄ ō, kəndā rāām̄ ō. M-ə́sá yá̰a̰ aĺ nja i ngá̰ý ō. Kūl̄ o̰o̰m̄ ō, m̄-nal̄ kūbə̄ ko̰ō̰ ō. 28Tá kanjə̄ tə́dá yá̰á̰ kə́ rang gə̄ ní, m̄-sōl̄ najə̄ yā de gə̄ kə́ kem Egəlijə gə̄ tə́ malang kə dɔ ndɔ̄ gə̄ ō. 29I náā n ngan̄g aĺ kanjə̄ kadə̄ m̄-ngan̄g aĺ seneé ní? I náā n rāā yá̰á̰ kógə̄ḿ kə́ majaĺ kanjə̄ kadə̄ najə̄n tōrə̄m̄ ní?

30Ré i yā kadə̄ m-ɔ́jə rɔ̄ḿ anī, i yá̰a̰ malang ń a ɔjə tɔ́gə gətóo yāḿ kə̄ ndágá ní n m-ā m-ɔ́jəń rɔ̄ḿ ní. 31Nə́ɓā, adə̄ i Bɔbə̄ Kɔ́ɔ̄ɓē Jeju ń de gə̄ tɔ̄ȳn̄ rīn ngándáńg ní, ger̄ kadə̄ m̄-sor̄ alé. 32Dan ń mā i kem ɓē kə́ Damas tə́ ní, nge ko̰o̰ ɓē ń i nge rāā kəla yā mban̄g Aretas ní, tə́ndā ngé ngɔ̄m̄ loo gə̄ kə ta róbə gə̄ kə́ yā teēń kem ɓēé kə̄ ndágá tə́. 33Banī de gə̄ əndāmə̄n̄ kem dōbə̄ kógə̄ḿ kə́ bo tə́ ba əlamə̄n̄ kum ko̰rō̰ kújə́ kə́ tū ndogə̄ mbal̄ tə́ kə̄ gidə tə́ ndágá. I tītə̄ ń noō n m̄-teēń ta jīn tə́ ní.

Currently Selected:

2 KORḚNTƏ 11: SARDC

Highlight

Copy

Compare