2 KORḚNTƏ 12

Yá̰a̰ gə̄ ń Pol a̰a̰ ō, teēn̄ kumən dɔ tə́ ō ní

1I beé ní, i gáŕ kadə̄ m-ɔ́r ta rɔ̄ḿ, ká nge ń noō i yá̰á̰ kə́ majaĺ gə̄gē ní. Ba ń toō ɓáa m-ā m-ɔ̄r̄ i najə̄ yā yá̰a̰ gə̄ ń Kɔ́ɔ̄ɓē ɔjəm̄ adə̄ m-á̰a̰ā̰ ō, yá̰a̰ gə̄ ń ni-tḛḛ̄ kumḿ dɔ tə́ ō ní. 2m̄-ger̄ deē yā Kərist kógə̄ḿ, kə́ un aw̄n̄ seneé dɔ rā̰ kə́ nge ko̰ mətá tə́, asə ɓāl̄ kutə kógə̄ḿ gidə i sɔ́ kə̄ gogə́ nú kɔ̄ɔ́ tā. Ká unən̄ i mbéé kə́ rɔ̄kum tə́ aáā, ni-a̰a̰ i yá̰a̰ aáā, mā m̄-ger̄ alé, i Nə́ɓā tá ger̄. 3-4A̰á̰ā̰, m̄-ger̄ kadə̄ unnən̄ deē ní aw̄n̄ seneé bátə́ Paradis tə́. m̄-tél m-ə́dá ɓáý, ká unən̄ i mbée rɔ̄kum a̰á̰ā̰, ká ni-a̰a̰ i yá̰a̰ a̰á̰ā̰, m̄-ger̄ alé, i Nə́ɓā tá ger̄. Deē ní oō najə̄ gə̄ kə́ loo kədan gətóo ō, kə́ ɔgə̄n̄ deē ndul kəda gotə ō. 5Mā m-ā m-ɔ́r ta rɔ̄ḿ tām̄ yā de kə́ beé tə́, banī m-ā m-ɔ́r ta rɔ̄ḿ tām̄ yā rɔ̄ḿ mə̄kɔ́ tə́ alé. Ré m-ɔ́r ta rɔ̄ḿ anī, i tām̄ yā tɔ́gə gətóo yāḿ gə̄ tə́. 6Loo kə́ beé tə́, ré m̄-gḛy i kɔr ta rɔ̄ḿ anī, mā i de kə́ mbóo alé, tɔdɔ̄ m-ə́da i najə̄ kə́ rɔ̄kum. Ba m̄-lōō gírí, i tɔdɔ̄ m̄-gḛy kadə̄ deē gír̄ na mā m̄-tɔȳ yá̰á̰ ń ni-a̰a̰m̄ loo rāā tə́ ní aĺ ō, mā m̄-tɔȳ yá̰á̰ ń ni-oō najə̄n taḿ tə́ ní aĺ ō.

7Yá̰á̰ ń Nə́ɓā teē kumḿ dɔ tə́ ní, i yá̰á̰ kə́ bo ngá̰ý aĺ naā ō, ni gḛy kadə̄ m-ɔ́jə rɔ̄ḿ najə̄n tə́ aĺ ō. Adə̄ ni-əla kōn̄ kógə̄ḿ kem dā̰ḿ tə́, kōn̄ ní i de kə́ dɔ rā̰ tə́ kógə̄ḿ yā Sətan, kə́ kadə̄ əndam̄ na sōgə́ m-ɔ́jə rɔ̄ḿ. 8m̄-dəje Kɔ́ɔ̄ɓē nja mətá kadə̄ ɔrə̄m̄ kɔ̄ɔ́ kum tápə̄ ní tə́. 9Banī ni-tél ədam̄ na kem majə ń na n-rāā seḿ ní na asə tām̄ yāḿ tə́. Tām̄ tɔ́gən ɔjə rɔ̄n kə̄ ndágá ngá̰ý i dan ń tɔ́gə́ḿ mā na gətóo kɔ̄ɔ́ tə́ ní. Adə̄ yá̰á̰ ń kemḿ gḛy ngá̰ý ní i kɔjə rɔ̄ḿ tām̄ yā tɔ́gə gətóo yāḿ tə́, yā kadə̄ tɔ́gə Kərist ɔjəń rɔ̄n kə̄ ndágá kə ta kūlə̄ḿ. 10I tām̄ najə̄ ń noō tə́ n nelə̄m̄ yá̰a̰ gə̄ kə́ rāāmə̄n̄ adə̄ tɔ́gə́ḿ gətóo gə̄ ō, ndū gə̄ kə́ tájə̄mə̄n̄ ō, yá̰á̰ kə́ to ɓōĺ gə̄ kə́ rāāmə̄n̄ ō, rāā kə́ rāāmə̄n̄ ndoō tə́ ō, yá̰a̰ gə̄ kə́ rāāmə̄n̄ adə̄ m̄-ndi kə sōlōó kekəre gə̄ ō tām̄ yā Kərist tə́ ní. Tɔdɔ̄, m-ə́ngé tɔ́gə i dan ń m̄-ngan̄g aĺ ní.

Pol sōl̄ tām̄ yā Korḛntə gə̄ tə́

11M-ɔ̄r̄ najə̄ tītə̄ kə́ kɔ̄r̄ rāām̄ beé, ba i sḭḭ̄ n ī-raī seḿ ta rāā kɔ̄r̄ ní. Majə kadə̄ i sḭḭ̄ n ə́daī najə̄ kə́ majə yāḿ mā ní. Mā i yá̰á̰ kógə̄ḿ alé. 12Yá̰a̰ gə̄ ń ɔjən̄ kə̄ ndágá kadə̄ mā i ngōmbang kəla ní, rāān̄ yá̰a̰ dɔ dáńsí tə́. Nin̄ n toō: I tə́gā kə́ m̄-tə́gā taḿ ngá̰ý dan yá̰a̰ gə̄ tə́ malang ō, i yá̰á̰ kə́ majə ngá̰ý kə́ to kɔr kum gə̄ ō, i yá̰á̰ kə́ yáā kə́ tayā tayā gə̄ ō, i yá̰a̰ gə̄ kə́ rāā kə tɔ́gɔ́ ō. 13Yá̰á̰ ń de gə̄ kə́ kem Egəlijə kə́ rang gə̄ tə́ əngen̄ ba sḭḭ̄ əngeī aĺ ní i rí? I kadə̄ m-ɔ̄ȳsí aĺ ngóy aĺ a? Yá̰á̰ kə́ gōtə́ aĺ ń noō ń m̄-rāā sesí ní, m̄-dəjesí kadə̄ ī-mā̰yī rɔ̄sí dɔḿ tə́ najə̄n tə́!

14m̄-ndi dɔ rɔ̄ḿ tə́ kɔ̄ɔ́ yā kadə̄ m-āw̄ loosí nja kə́ nge ko̰ mətá, banī m-ā m-ɔ̄ȳsí alé. Tām̄ yá̰á̰ ń m̄-sāā ní, i yá̰a̰ kənge yāsí alé, ba i ngarān̄g kumsí sḭḭ̄ kɔ́ gə̄. Tɔdɔ̄ i ngán gə̄ n a kánə̄n̄ yá̰a̰ kənge kə̄ dɔ naā tə́ tām̄ yā ngé kojədə́ gə̄ tə́ ní alé, banī i ngé kojə ngán gə̄ n a kánə̄n̄ yá̰a̰ kənge kə̄ dɔ naā tə́ tām̄ yā ngáńdə́ gə̄ tə́ ní. 15m̄-ndigə ngá̰ý kadə̄ m-ādə̄ yá̰a̰ yāḿ malang ō, m-ādə̄ rɔ̄ḿ mə̄kɔ́ ō, yā rāań sesí. Ré m̄-táŕsí asə naā beé anī, ā ī-tármī sḛ́ý beē a?

16I beé ní, majə kadə̄ á̰a̰ ī-gerī kadə̄ m-ɔ̄ȳsí aĺ rɔ̄kum. Banī de kə́rēý a əda na kumḿ na edə̄ ngá̰ý, adə̄ na m-ə́wásí na i kə ngamaá. 17De gə̄ ń m-ə́ládə́ loosí ní, m-ə́sásí kə ta kūl̄ deē kógə̄ḿ dandə́ tə́ a? 18m̄-rāā Titə ɓɔ́ kadə̄ aw̄ loosí ō, ngōkó̰ó̰jí ń ī-ger̄niī ní, m-ə́lan kadə̄ aw̄ seneé ō. Ní, Titə əsasí tū yá̰á̰ kə́rēý tə́ a? Jḭḭ seneé ní jə-ra i dɔ gír̄ kə́ kógə̄ḿ beē tə́ n jə-rāań yá̰á̰ ní aĺ a? J-un i gō tóo naā aĺ a?

19Jóo toó ní, sḭḭ̄ ī-gírī kadə̄ jḭḭ j-a jə-nējə̄ i najə̄ dɔ rɔ̄jí tə́ ta kumsí tə́ a? I beé alé! Najə̄ ń j-ɔr̄ ní, j-ɔr̄ i tītə̄ ń Kərist ndigəń ní, ta kum Nə́ɓā tə́. Ba kó tár gə̄, j-ədasí yá̰a̰ gə̄ ń noō malang i yā kadə̄ ī-tɔgīneé kum kə̄ kété kété. 20m̄-ɓōĺ najə̄ kadə̄ ré m-āw̄ loosí anī, m-ə́ngésí i tītə̄ ń m̄-gírəń ní aĺ ō, sḭḭ̄ ə́ngemī i tītə̄ ń ī-gírīneé ní aĺ ō. m̄-ɓōĺ najə̄ kadə̄ kɔ̄l̄ naā gə̄, kə kəndā naā nii gə̄, kə wōn̄g gə̄, kə rɔ̄ɔ̄ naā dɔ loo tə́ gə̄, kə tájə̄ naā gə̄, kə tām̄ kə naá gə̄, kə haalo gə̄, kə kɔjə rɔ̄ gə̄, kə yá̰á̰ kə́ a̰a̰ gō naā aĺ gə̄ ton̄ dɔ dáńsí tə́. 21m̄-ɓōĺ najə̄ kadə̄ ré gogə́ m̄-teē loosí anī, Nə́ɓā əla rɔ̄sɔl̄ dɔḿ tə́ ta kumsí tə́, kadə̄ m̄-nōō tām̄ yā de kə́rēý gə̄ kə́ rāān̄ yá̰á̰ kə́ majaĺ kété, ba lōōn̄ gíŕ háĺ rāā yá̰á̰ kə́ to yḛr kum gə̄ tə́ aĺ ō, lōōn̄ gíŕ sāā naā loo kaya tə́ aĺ ō, lōōn̄ gíŕ háĺdə́ kə́ majaĺ tə́ aĺ ō tə́.

Currently Selected:

2 KORḚNTƏ 12: SARDC

Highlight

Copy

Compare