2 YÁ̰A̰ GƏ̄ 9
9
Mban̄g kə́ dəyá̰ kə́ Saba reē go̰ō̰ Salomo̰ tə́
(Á̰a̰ī 1 Mba 10.1-13)
1Mban̄g kə́ dəyá̰ kə́ Saba oō najə̄ yā Salomo̰ anī reē dəjen najə̄ kə́ ngan̄g gə̄ tə́ nāań kum kedə̄ yān. Ni-reē Jerusalem i kə de gēé ngá̰ý gōn tə́ ō, kə jámbal gə̄ kə́ ətōn̄ yá̰á̰ kə́ kotə majə gə̄ ō, lɔ́ŕ kə́ ngá̰ý ō, mbal̄ gə̄ kə́ gātə̄də́ i ngá̰ý gə̄ ō. Dan ń ugə̄ rɔ̄ Salomo̰ tə́ anī dəjen najə̄ gə̄ malang ń ni núm̄ dəjen ní. 2Salomo̰ tūrə̄n najə̄ gə̄ malang, kógə̄ḿ kə́ dumə̄n gətóo. 3Mban̄g kə́ dəyá̰ kə́ Saba a̰a̰ kum kedə̄ yā Salomo̰ ō, a̰a̰ kújə́ ń rāā ní ō, 4yá̰a̰ kəsa kə́ ta tábəl yān tə́ ō, kújə ɓīī ngé kəla yān gə̄ ō, a̰a̰ majə ngé rāā kəla kem kújə yān tə́ gə̄ ō, kūbə̄ ko̰ō̰də́ kə́ i tayā ō, a̰a̰ ngé ɓōkə́ kasə yān gə̄ ō, kūbə̄ ko̰ō̰də́ kə́ i tayā ō, a̰a̰ yá̰a̰ tun̄ kə́ yā róō horoó kə taá malang gə̄ ń Salomo̰ a tun̄ kem kújə yā Kɔ́ɔ̄ɓē tə́ ní ō, anī kə̄ngā sāā gāngə̄n. 5Loo ń noō tə́ ni-əda mban̄g na: Najə̄ kɔrīí gə̄ ō, kəla rāāí gə̄ ō, kum kedə̄ yāí ō ń m̄-ndi ɓēé m-ōō kōō ní, i yá̰á̰ kə́ rɔ̄kum. 6Dan ń m̄-reē m-á̰a̰ā̰ kə kumḿ aĺ ɓáý ní m̄-taā kem alé. Tá kum kedə̄ yāí kə́ ngá̰ý ní, núsən gə̄gē a ɔjəmə̄n̄ alé! Kōōí ń m-ōō ní ī-mān̄ dɔ sa̰y ngá̰ý. 7Deē yāí gə̄ ō, ngé kəla yāí gə̄ ō, ń asən̄ ndi ta kumií tə́ ngándáńg yā koōń kum kedə̄ yāí ní, nin̄ i kə rɔ̄nelēé! 8Kɔ́ɔ̄ɓē Nə́ɓā yāí ń əndāī mban̄g dɔ Israel gə̄ tə́ kadə̄ ó̰o̰ ɓē dɔdə́ tə́ kə rīneé ní, ādə̄ de gə̄ ɓōkə́nən̄ tɔ̄ȳ! I tām̄ táŕ kə́ Nə́ɓā yāí tár Israel gə̄ ō, gḛy rāā kadə̄ ndin̄ ngándáńg ō tə́ n ni əndāineé mban̄g dɔdə́ tə́ ō, əndāń dɔí tə́ kadə̄ ī-gān̄g sarya kə gō róbə́ kə́ súmūú ō, kə́ gōtə́ ō ní.
9Gō tə́ anī mban̄g kə́ dəyá̰ kə́ Saba adə̄ mban̄g Salomo̰ lɔ́ŕ kə́ kɔȳn asə kəlōo dūbú mətá kə dɔɔ́ ō, adə̄n yá̰á̰ kə́ kotə majə gə̄ ngá̰ý ō, adə̄n mbal̄ gə̄ kə́ gātə̄də́ i ngá̰ý gə̄ ō. Deē a̰a̰ yá̰á̰ kə́ kotə majə gə̄ kə́ tītə̄ ń noō kété aĺ ɓáý.
10Ngé kəla gə̄ yā mban̄g Hiram nin̄ kə ngé kəla gə̄ yā Salomo̰ ń aw̄n̄ Opir ní, tél reēn̄ kə lɔ́r ō, kə kāgə̄ santal ō, kə mbal̄ gə̄ kə́ gātə̄də́ i ngá̰ý gə̄ ō. 11Mban̄g Salomo̰ ɔy kāgə̄ santal ní ɔsə̄ kə ta naā nang tə́ kem kújə yā Kɔ́ɔ̄ɓē tə́ ō, kem kújə yā mban̄g tə́ ō, rāā kāgə̄ kənde gə̄ kə́ kəlādə́ i ngá̰ý tə́ ō, kə́ kəlādə́ i ngá̰ý aĺ tə́ ō, tām̄ yā ngé kənī pā gə̄ tə́. Jóo toó deē a̰a̰ kāgə̄ kə́ tītə̄ ń noō dɔ nang kə́ Juda tə́ aĺ ɓáý.
12Mban̄g Salomo̰ adə̄ mban̄g kə́ dəyá̰ kə́ Saba yá̰a̰ malang ń kemən gḛy á dəjen ní. Yá̰á̰ ń mban̄g Salomo̰ adə̄ mban̄g kə́ dəyá̰ kə́ Saba ní tɔȳ nge ń ni reēń adə̄n ní. Gō tə́ anī mban̄g kə́ dəyá̰ ní tél dɔ tə́ aw̄ gogə́ ɓēé kə ngé kəla yān gēé.
Yá̰a̰ kənge yā Salomo̰
(Á̰a̰ī 1 Mba 10.14-29)
13Lɔ́ŕ kə́ kem ɓāl̄ kógə̄ḿ beē ń Salomo̰ a ənge ní kɔȳn malang i kəlōo dūbú kutə jōó, 14kanjə̄ tə́da nge ń ngé njə̄rā mbā tə́ ō, ngé rāā gātə̄ gə̄ ō, a reēn̄neé adə̄nən̄ ní. Mban̄g gə̄ malang kə́ dɔ nang yā Arabə gə̄ tə́ ō, ngé ko̰o̰ ɓē kə́ kem ɓēé gə̄ ō, i ngé reē kə lɔ́r ō, kə gində̄ arjā̰a̰ ō, kadə̄ Salomo̰.
15Mban̄g Salomo̰ rāā der kə́ bo gə̄ ɓú jōó kə lɔ́ŕ kə́ tə̄ndāá. Kɔȳ lɔ́ŕ kə́ tām̄ yā der kə́ kógə̄ḿ beē tə́ i kəlōo mehḛ́. 16Ni-rāā ngán der kə́ dūú gə̄ ɓú mətá kə lɔ́ŕ kə́ tə̄ndāá. Kɔȳ lɔ́ŕ tām̄ yā ngōn̄ der kə́ kógə̄ḿ beē tə́ i kəlōo mətá. Mban̄g kán̄ der gə̄ ní i kem kújə́ ń a ɓārə́n̄ na i ku kāgə̄ gə̄ kə́ Liban tə́ ní.
17Mban̄g rāā kōr̄ kāgə̄ mbang kə́ bo kə ngān̄g dā̰á̰, ba rāā lɔ́ŕ kə́ unjə̄ njáý njáý gidə tə́ adə̄ utə̄ gidə malang. 18Kōr̄ kāgə̄ mbang ní əndān̄ i dɔ loo kə́ rāān̄ adə̄ ḭḭ kə̄ dɔɔ́ tə́. Ba rāān̄ loo tə́ndā nja kə́ yā kal̄ kaw̄ń dɔ loo ní tə́ gír i mehḛ́. Rāān̄ yá̰a̰ kəndā nja dɔ tə́ kógə̄ḿ kə lɔ́rɔ́ ta kōr̄ kāgə̄ mbang ní tə́ ō. Rāān̄ loo ɓōkə́ jī gə̄ tū kōr̄ kāgə̄ mbang ní tə́ dām̄ jōó ō, rāān̄ ɓɔl gə̄ jōó ba tə́ndān̄də́ kadə loo ɓōkə́ jī gə̄ ní tə́ ō, 19rāān̄ ɓɔl kə́ rang gə̄ kutə gidə i jōó ba tə́ndān̄də́ dɔ loo tə́ndā nja gə̄ ní tə́ mehḛ́ mehḛ́ dām̄ jōó ō. Deē rāā yá̰á̰ kə́ tītə̄ ń noō kem ɓē kə́rēý tə́ aĺ ɓáý.
20Kópə ka̰ȳ yá̰a̰ gə̄ malang yā mban̄g Salomo̰ i kə́ rāā kə lɔ́r ō, gájə́ yá̰a̰ rāā kəla gə̄ malang kə́ kem kújə ń a ɓārə́n̄ na i ku kāgə̄ gə̄ kə́ Liban tə́ ní, i kə́ rāān̄də́ kə lɔ́ŕ kə́ unjə̄ njáý njáý ō. Ɓāl̄ yā Salomo̰ tə́ ní, rāān̄ gində̄ arjā̰a̰ i yá̰á̰ kə́ karī tə́. 21Tɔdɔ̄ mban̄g aw̄ kə to bo gə̄ kə́ a əlań Tarsis kə ngé kəla gə̄ yā Hiram. Kə dɔ ɓāl̄ kə́ nge ko̰ mətá gə̄ malang ń noō to bo gə̄ ní a tél reēn̄ kə lɔ́r ō, kə gində̄ arjā̰a̰ ō, kə ngān̄g dā̰á̰ ō, kə ɓetə̄ gēé ō, kə yel̄ pá̰a̰ gēé ō adə̄nən̄.
22Mban̄g Salomo̰ tɔȳ gotə mban̄g gə̄ malang kə́ dɔ nang tə́ kə yá̰a̰ kəngeé ō, kə kum kedēé ō. 23Nə́ɓā rāā adə̄ kum kedə̄ yān i ngá̰ý, adə̄ mban̄g gə̄ malang kə́ dɔ nang tə́ a reēn̄ rɔ̄n tə́ koō kum kedə̄ yān tə́. 24Kə dɔ ɓāl̄ gə̄ ń noō malang mban̄g gə̄ ní a reēn̄ kə kadə̄ karī yādə́ gēé a adə̄n̄ Salomo̰, a adə̄nən̄ yá̰a̰ gə̄ kə́ rāān̄də́ kə gində̄ arjā̰a̰á̰ ō, kə lɔ́rɔ́ ō, kūbə̄ gə̄ ō, yá̰a̰ rɔ̄ɔ̄ gə̄ ō, yá̰á̰ kə́ kotə majə gə̄ ō, sə́nda gə̄ ō, kərō rapáy gə̄ ō. 25Salomo̰ aw̄ kə kújə sə́nda gə̄ dūbú sɔ́ ō, púsə rɔ̄ɔ̄ gə̄ ō, ngé kal̄ sə́nda gə̄ dūbú kutə gidə i jōó ō. Ni gangdə́ kə̄ kem ɓē gə̄ tə́ ō, ɓōkə́də́ ngɔr rɔ̄ mban̄g tə́ kem ɓē kə́ Jerusalem tə́ ō. 26Ni-o̰o̰ ɓē dɔ mban̄g gə̄ malang ń dɔ nang yādə́ əla gír i bā Opəratə tə́ bátə́ ugə̄ń dɔ nang yā Pilistin gə̄ tə́ ō, dɔ nin̄ dɔ nang kə́ Ejiptə tə́ ō ní. 27Mban̄g rāā adə̄ gində̄ arjā̰a̰ i ngá̰ý tītə̄ kɔkərɔ beé kem ɓē kə́ Jerusalem tə́ ō, rāā adə̄ kāgə̄ sédər gə̄ i ngá̰ý tītə̄ kāgə̄ sikomor gə̄ ń a əɓan̄ gō nang kə́ mbal̄ kə́ bo gə̄ gətóon̄ tū tə́ ní tə́ beé ō. 28A ḭḭn̄ kə sə́nda gə̄ yā Salomo̰ i gō nang kə́ Ejiptə tə́ ō, gō nang kə́ rang gə̄ tə́ ō.
Salomo̰ oy
(Á̰a̰ī 1 Mba 11.41-43)
29Gotə yá̰á̰ kə́ rang gə̄ ń Salomo̰ rāā ní, adə̄ i yá̰a̰ gə̄ kə́ ta kəla gír tə́ gə̄ ō, kə́ ta tɔ̄l̄ ta tə́ gə̄ ō ní, ndangən̄də́ i kem makətūbə̄ gə̄ ń a ɓārə́n̄də́ na i Kəla rāā Natan kə́ nge koō ta ō, najə̄ kɔr̄ Ahia kə́ loo nge koō ta tə́ kə́ Silo ō, yá̰á̰ kə́ Yedo kə́ nge ka̰a̰ yá̰a̰ a̰a̰ ō ní tə́ - nge kə́ gō gogə́ laā ń toō ɔjə i gotə najə̄ yā Jeroboam ngōn̄ Nebat, mban̄g kə́ Israel tə́. 30Salomo̰ o̰o̰ ɓē ɓāl̄ kutə sɔ́ Jerusalem dɔ ngán Israel gə̄ tə́ malang. 31Dan ń oy ní dubə̄nən̄ i kadə bɔbə̄n tə́ kem ɓē yā Dabid tə́. I ngōnən Roboam n o̰o̰ ɓē gotən tə́ ní.
Currently Selected:
2 YÁ̰A̰ GƏ̄ 9: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
