2 YÁ̰A̰ GƏ̄ 8
8
Kəla kə́ tayā tayā gə̄ ń Salomo̰ rāā ní
(Á̰a̰ī 1 Mba 9.10-28)
1Salomo̰ rāā kújə yā Kɔ́ɔ̄ɓē ō, kújə mban̄g yān nəkɔ́ ō, kem ɓāl̄ kutə̄ jōó tá tɔ̄l ta ɓáý. 2Ni-tél rāā ɓē gə̄ ń mban̄g Hiram adə̄n ní gogə́ rang ba tə́ndā ngán Israel gə̄ kemeé. 3Gō tə́ anī, ni-aw̄ ənī ɓē kə́ Hamat Soba rɔ̄ɔ̄ ba taā. 4Ni-tél rāā ɓē kə́ Tadəmor ń i ɓē kə́ gō nang kə́ mángá tə́ ní gogə́ rang ō, ɓē gə̄ ń ni rāādə́ kété gō nang kə́ Hamat tə́ yā kán̄ sádə̄ yān gə̄ kemeé ní, ni-tél rāādə́ gogə́ rang ō. 5Bet Horon kə́ dɔɔ́ ō, Bet Horon kə́ nang tə́ ō ń i ɓē kə́ ngan̄g gə̄ ō, kə́ tə́nīn̄ ndogə̄ mbal̄ gə̄ adə̄ gīr̄ gidə ō, utə̄n̄ tadə́ kə bápə gə̄ ō, kə lakélé gə̄ ō ní, ni-tél rāādə́ gogə́ rang ō. 6Ɓē kə́ Baalat ō, ɓē yān gə̄ malang ń ni kán̄ yá̰a̰ gə̄ kemeé ní ō, ngé gə̄ ń ni tə́ndā púsə rɔ̄ɔ̄ gə̄ kemeé ō, ngé gə̄ ń ni ɓōkə́ ngé kal̄ sə́nda gə̄ kemeé ō ní, ni-tél rāādə́ gogə́ rang ō. Kújə gə̄ malang ń kemən gḛy rāā ní, ni rāādə́ kem ɓē kə́ Jerusalem tə́ ō, dɔ mbal̄ Liban tə́ ō, kem ɓē gə̄ malang ń ni-o̰o̰ ɓē dɔ tə́ ní ō. 7Het gə̄ ō, Amor gə̄ ō, Periji gə̄ ō, Hibi gə̄ ō, Yebus gə̄ ō ń nin̄ i Israel gə̄ aĺ ní, na̰yn̄ i ngá̰ý kem ɓēé ɓáý. 8Ngáńdə́ gə̄ ń na̰yn̄ gotədə́ tə́ kem ɓēé á ngán Israel gə̄ tɔ̄lə̄n̄də́ kɔ̄ɔ́ malang aĺ ní, Salomo̰ tə́ndā kəla kə́rēý gə̄ dɔdə́ tə́, adə̄ ɓōólaā gə̄gē nin̄ a rāān̄ kəla gə̄ ní noō ɓáý. 9Banī Salomo̰ tə́ndā kəla gə̄ ní dɔ ngán Israel gə̄ tə́ alé, tām̄ nin̄ i ngé rɔ̄ɔ̄ gə̄ ō, nin̄ i ngol gə̄ kə́ dɔ ngol áskar gə̄ tə́ ō, ngol ngé kal̄ púsə rɔ̄ɔ̄ gə̄ ō, ngé kal̄ sə́nda gə̄ ō. 10Ngé ko̰o̰ ɓē gə̄ ɔyn̄ kabāta gə̄ ɓú jōó kə kutə mí kadə̄ əndān̄ kumdə́ gíŕ kósə de gə̄ ń a rāān̄ kəla yā mban̄g Salomo̰ tə́ ní.
11Salomo̰ adə̄ nə̄yá̰n kə́ ngōn̄ Parao̰ teē kɔ̄ɔ́ kem ɓē yā Dabid tə́ ba adə̄ aw̄ ndi kem kújə́ ń ni-rāā tām̄ yān tə́ ní tə́. Tām̄ ni-əda na majə kadə̄ nə̄yá̰n kə ndi kem kújə yā Dabid ń i mban̄g kə́ Israel tə́ ní alé. tɔdɔ̄ kújə gə̄ ń əndān̄ sandúkə yā Kɔ́ɔ̄ɓē kemeé ní i kújə́ kə́ táĺ gə̄.
12Loo ń noō tə́ Salomo̰ ndējə̄ Kɔ́ɔ̄ɓē yá̰a̰ tun̄ kə́ róō horoó kə taá malang gə̄ dɔ loo tun̄ yá̰á̰ ń ni-rāā tām̄ yā Kɔ́ɔ̄ɓē tə́ ta ngōn̄ kújə́ kə́ ta róbə́ tə́ ní. 13Ni ndējə̄ Kɔ́ɔ̄ɓē yá̰a̰ tun̄ gə̄ ndɔ̄ sabat tə́ ō, ndɔ̄ teē nāā tə́ ō, ndɔ̄ nāā kə́ bo gə̄ ń a rāān̄ nja mətá kem ɓāl̄ kógə̄ḿ tə́ ní ō, adə̄ i ndɔ̄ nāā yā mápa gə̄ kə́ kanjə̄ kaa mápa tə́ ō, ndɔ̄ nāā sāā kōō gə̄ tə́ ō, ndɔ̄ nāā yā kújə kámbə gə̄ tə́ ō. Ni ndējə̄ yá̰a̰ tun̄ gə̄ ní i kə jī bēl̄ loo rāā yá̰a̰ gə̄ ń Moijə ɔjəń kadə̄ ndējə̄n̄ kə dɔ ndɔ̄ gə̄ ń noō ní. 14Salomo̰ rāā jī bēl̄ loo rāā yá̰a̰ gə̄ ń bɔbə̄n Dabid gḛy rāā ní, ni tə́ndā ɓūtə̄ gə̄ yā ngé tun̄ yá̰a̰ gə̄ kem kəla yādə́ gə̄ tə́ ō, ngán Lebi gə̄ n ə̄ndān̄ dɔdə́ tə́ kadə̄ ɔsən̄ gɔn Kɔ́ɔ̄ɓē kə dɔ ndɔ̄ gə̄ aláa kadə̄ ɔsən̄ kíl ngé tun̄ yá̰a̰ gə̄ kem kəla yādə́ tə́ ní, ni tə́ndādə́ kem kəla yādə́ gə̄ tə́ ō, ni tə́ndā ngé ngɔ̄m̄ ta róbə gə̄ kem kəla yādə́ gə̄ tə́ kə gō ɓūtə̄ yādə́ gēé ta róbə gə̄ tə́ kógə̄ḿ kógə̄ḿ ō. Yá̰á̰ ń Dabid kə́ deē yā Nə́ɓā əda kadə̄ yā rāā ní n noó. 15jī bēl̄ loo rāā yá̰a̰ gə̄ ń mban̄g əda tām̄ yā ngé tun̄ yá̰a̰ gə̄ tə́ ō, tām̄ yā ngán Lebi gə̄ tə́ ō ní, deē tɔ̄ɔ̄ kɔ̄ɔ́ gō nge kə́ kógə̄ḿ tə́ aĺ ō, deē tɔ̄ɔ̄ kɔ̄ɔ́ gō yá̰a̰ gə̄ ń ni-əda tām̄ yā yá̰a̰ kənge gə̄ tə́ ní aĺ ō. 16I beé n kəla yā Salomo̰ malang udəń gírí bátə́ ndɔ̄ ń əndān̄neé ngəra kújə yā Kɔ́ɔ̄ɓē tə́ ō, ndɔ̄ ń tɔ̄l̄ə̄n̄neé ta tə́ ō ní. Adə̄ kújə yā Kɔ́ɔ̄ɓē i kə́ rāā oy kɔ̄ɔ́. 17Loo ń noō tə́ Salomo̰ aw̄ Esion Geber ō, Elat ō ń i ɓē gə̄ kə́ dɔ gɔ́sə bā bo kə́ dɔ nang kə́ Edom tə́ ní. 18Mban̄g Hiram əla ngé kəla yān gə̄ kə too bo gēé kadə̄n tə́ ō, adə̄n ngé kəla gə̄ kə́ gerə̄n̄ bā bo majə ō. Ngé kəla gə̄ ní aw̄n̄ naā tə́ kə ngé kəla gə̄ yā Salomo̰ dɔ nang kə́ Opir tə́, aw̄ reēn̄ kə lɔ́ŕ kə́ kɔȳn tɔȳ kəlōo dūbú kutə gidə i mətá adə̄n̄ mban̄g Salomo̰.
Currently Selected:
2 YÁ̰A̰ GƏ̄ 8: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
