2 YÁ̰A̰ GƏ̄ 10
10
Gotə najə̄ yā Mban̄g gə̄ kə́ Juda tə́
(10—36)
Ngé kán̄ naā gə̄ kə́ Sisem
(Á̰a̰ī 1 Mba 12.1-15)
1Roboam aw̄ Sisem tɔdɔ̄ Israel gə̄ malang reēn̄ kəndān mban̄g tə́ i noó. 2Dan ngeé ń noō tə́ ní Jeroboam kə́ ngōn̄ Nebat i Ejiptə, tɔdɔ̄ ni a̰ȳ mban̄g Salomo̰ aw̄ ndi i noó. Dan ń oō najə̄ kán̄ naā kə́ Sisem anī, ḭḭ Ejiptə reē. 3Əlan̄ gōn tə́ adə̄ reē naā tə́ kə Israel gēé malang. Najə̄ gə̄ ń ɔrə̄n̄ kə Roboam ní n toó, nin̄ ədanən̄ na: 4Bɔbí əndā júgə́ kə́ kɔȳ dɔjí tə́. Ba n toō ní ī-rāā ādə̄ njúgə́ ń i kəla ɓəlo kə́ bɔbí əndā dɔjí tə́ ní hɔɔ́lɔ̄ sḛ́ý anī j-a jə-rāā kəla yāí. 5Roboam tél ədadə́ na: Āwī ī-rāāī ndɔ̄ mətá ba ī-tél ī-reē ə́ngemī. Loo ń noō tə́ nin̄ aw̄n̄.
6Mban̄g Roboam dəje kum kɔɔ̄ gə̄ kɔjə̄. I kum kɔɔ̄ gə̄ ń kété rāān̄ kəla kə bɔbə̄n Salomo̰ dan ń ndiń kə kumneé ɓáý ní. Ni dəjedə́ na ké kɔjə̄ ń nin̄ a adə̄nən̄ ní ké na i rí wa. 7Kum kɔɔ̄ gə̄ ədanən̄ na: Ré ɔ́jə de gə̄ ń toō kadə̄ ḭ̄ i de kə́ majə ō, ré yá̰a̰ gə̄ ń nin̄-dəjen̄ ní ī-rāā ādə̄də́ ō, ə́dádə́ najə̄ kə́ majə gə̄ ō anī, a télən̄ ngé rāā kəla yāí gə̄ ngándáńg.
8Banī Roboam əya̰ kɔjə̄ yā kum kɔɔ̄ gə̄ ń adə̄nən̄ ní kɔ̄ɔ́. Ni-dəje balsáa madə̄n gə̄ ń tɔgən̄ naā tə́ ō, a rāān̄ kəla yān ō ní kɔjə̄. 9Ni dəjedə́ na ké i kɔjə̄ rí n nin̄ a adə̄nən̄ ní wa. Gír de gə̄ ń toō ní na ədanən̄ na kə n-rāā njúgə́ ń bɔbə̄n əndā dɔdə́ tə́ ní kadə̄ hɔ̄ɔ́lɔ̄ sḛ́y ní ké kə n-tél kə n-ədadə́ na i rí wa. 10Balsáa gə̄ ń tɔgən̄ naā tə́ kə Roboam ní tél ədanən̄ na: De gə̄ ń ədanī na bɔbí na əndā júgə́ kə́ kɔȳ dɔdə́ tə́, ba ḭ̄ kə ī-rāā kadə̄ hɔ̄ɔ́lɔ̄ sḛ́ý ní, najə̄ ń kadə̄ ī-tél ə́dádə́ ní n toó, ə́dádə́ na ta ngōn̄ jīí kə́ bɔ̄gə̄ tə́ na bo tɔȳ kāsə̄ jī bɔbí. 11Bɔbí na əndā njúkə kə́ kɔȳ dɔdə́ tə́, ba ḭ̄ na ā ə̄ndā nge kə́ kɔȳ tɔȳ dɔdə́ tə́ ɓáý to̰. Bɔbí na əndadə́ na i kə ndéy məraw kə́ karīí a ba ḭ̄ na ā ə́ndádə́ na i kə ndéy məraw kə́ kə gindīí ta tə́.
12Kə ndɔ̄ kə́ nge ko̰ mətá tə́ anī, Jeroboam ō, ngán Israel gə̄ malang ō, reē əngen̄ Roboam tītə̄ ń ni ədańdə́ ní. 13Mban̄g əya̰ kɔjə̄ yā kum kɔɔ̄ gə̄ ń adə̄nən̄ ní kɔ̄ɔ́. 14Ni un kɔjə̄ yā balsáa gə̄ ɔrəń najə̄ kə́ ngan̄g ngá̰ý kə kósə de gēé əda na: Bɔbə́ḿ əndā júgə́ kə́ kɔȳ dɔsí tə́, banī mā m-ā m-ə̄ndā júgə́ kə́ kɔȳ tɔȳ ɓáý dɔsí tə́. Bɔbə́ḿ əndasí i kə ndéy məraw kə́ karīí, banī mā m-ā m-ə́ndásí i kə ndéy məraw kə́ kə gindīí ta tə́.
15Adə̄ mban̄g oō najə̄ yā kósə de gə̄ alé. Ba i ta róbə́ ń noō n Nə́ɓā un rāań yá̰á̰ ń Kɔ́ɔ̄ɓē əndā ta Ahia kə́ Silo tə́ adə̄ əda Jeroboam kə́ ngōn̄ Nebat ní.
Ɓē ko̰o̰ kēgə̄ naā tə́. Roboam, mban̄g kə́ Juda
(Á̰a̰ī 1 Mba 12.16-25)
16Dan ń ngán Israel gə̄ malang gerə̄n̄ kadə̄ mban̄g mbātə́ yá̰á̰ ń nin̄ gḛyn̄ ní anī, nin̄ tél ədanən̄ na: Usəjí i rí kə Dabidí? Yá̰á̰ kə́ ɓoojí naā tə́ kə ngōn̄ Jeseé gətóo! Israel gə̄, ī-téliī kógə̄ḿ kógə̄ḿ kə̄ kem kújə tandā yāsí gə̄ tə́! Ba ḭ̄ ń i de kə́ gír kojə yā Dabid tə́ ní, īkɔ́ á̰a̰ gō kem kújə yāí ngɔlaā!
Loo ń noō tə́ nin̄ tḭ̄ḭ̄n̄ naā. 17Ngán Israel gə̄ ń Roboam o̰o̰ ɓē dɔdə́ tə́ ɓáý ní i ngé gə̄ ń ndin̄ gō nang yā Juda tə́ ní ngóy. 18Mban̄g Roboam əla Hadoram ngol ngé kəla ngámba gə̄ rɔ̄ ngán Israel gə̄ tə́, banī nin̄ tə́nīnən̄ kə mbalá tə́nī tɔ̄l̄nən̄. Loo ń noō tə́ mban̄g Roboam al̄ dɔɔ́ láẃ kem púsə́ sə́nda yān tə́ ba a̰ȳ aw̄ Jerusalem. 19I beé n ngán Israel gə̄ mbātə́n̄neé kəla dɔdə́ gíŕ tɔ́gə yā de gə̄ kə́ gír kojə yā Dabid tə́ bátə́ ɓōólaā ní.
Currently Selected:
2 YÁ̰A̰ GƏ̄ 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
