2 YÁ̰A̰ GƏ̄ 7
7
Yá̰a̰ tun̄ gə̄ kə́ ndējə̄n̄ Kɔ́ɔ̄ɓē
(Á̰a̰ī 1 Mba 8.62-66)
1Dan ń Salomo̰ ndɔ̄ȳ Nə́ɓā oy anī yá̰a̰ tun̄ kə́ yā róō horoó ō, yá̰a̰ tun̄ kə́ tām̄ yā kem kógə̄ḿ tə́ ō ní, hor ḭḭ dɔ rā̰ tə́ əsō dɔ tə́ o̰o̰ malang ō, kɔsə gɔn yā Kɔ́ɔ̄ɓē taā loo malang kem kújə yā Kɔ́ɔ̄ɓē tə́ ō. 2Ngé tun̄ yá̰a̰ gə̄ asən̄ kudə kem kújə yā Kɔ́ɔ̄ɓē tə́ alé, tɔdɔ̄ kɔsə gɔn yā Kɔ́ɔ̄ɓē taā kem malang. 3Israel gə̄ malang ń ran̄ ní a̰a̰n̄ hor ní loo kḭḭ tə́ dɔ rā̰ tə́ ō, a̰a̰n̄ kɔsə gɔn yā Kɔ́ɔ̄ɓē ń ndə́lē kem kújə yā Kɔ́ɔ̄ɓē tə́ ní ō. Nin̄ ɔsən̄ nodə́ nang tə́ ō, dɔ loo kə́ ɓatə̄ kə mbalá tə́ ō rɔȳn̄neé Kɔ́ɔ̄ɓē ō, tɔ̄ȳn̄neé Kɔ́ɔ̄ɓē najə̄ kem majə yān tə́ ō, tár yān kə́ a tə̄gā aĺ tə́ ō.
4Mban̄g ō, Israel gə̄ malang ō, tunə̄n̄ yá̰a̰ adə̄n̄ Kɔ́ɔ̄ɓē. 5Dā̰ gə̄ ń tɔ̄lə̄n̄ ba tun̄ adə̄n̄ Kɔ́ɔ̄ɓē ní man̄g gə̄ i dūbú kutə jōó gidə i jōó ō, batə̄ gə̄ kə bə̄yā̰ gə̄ i dūbú ɓú kə kutə jōó ō. Nin̄ rāān̄ yá̰a̰ kūjə́ kə́ tām̄ yā kújə yā Nə́ɓā tə́ i tītə̄ ń noō. 6Ngé tun̄ yá̰a̰ gə̄ ran̄ ta loo kəla yādə́ gə̄ tə́ ō, ngán Lebi gə̄ ran̄ kə yá̰á̰ kə́ ɓār̄ gōsə̄ gə̄ ń mban̄g Dabid rāā yā ɓōkə́nń Kɔ́ɔ̄ɓē tɔ̄ȳ najə̄ tár yān kə́ a təgā aĺ tə́ ní ō. Ngé tun̄ yá̰a̰ gə̄ ran̄ nodə́ tə́ a kɔ̄rə́n̄ bərúnjə ō, ngán Israel gə̄ malang ran̄ kə njadə́ dɔɔ́ ō.
7Salomo̰ ɔr̄ kam̄ ndágə loo kə́ danaá ń to ta kújə yā Kɔ́ɔ̄ɓē tə́ ní, tām̄ loo tun̄ yá̰á̰ kə́ rāā kə gində̄ nə̄ngá kasaá ń ni-rāā ní asə kadə̄ deē ɓōkə́ yá̰a̰ kə́ tun̄ gə̄ dɔ tə́ malang alé. Adə̄ mban̄g róō dā̰ gə̄ kə́ yā tun̄də́ kə taá malang ō, kōō kə́ ndējə̄ gə̄ ō, yibə̄ dā̰ gə̄ kə́ yā tun̄də́ tām̄ yā kem kógə̄ḿ tə́ gə̄ ō, i ndágə loo kə́ gīr̄ gidə kújə yā Kɔ́ɔ̄ɓē ní tə́. 8Dan ngeé ń noō tə́ ní Salomo̰ rāā nāā kújə́ kámbə gə̄ bátə́ ndɔ̄ sīrí kə ngán Israel gēé malang. Ngán Israel gə̄ ní ḭḭn̄ i kə̄ loo gə̄ tə́ malang n reēn̄ ní. Ɓē gə̄ ń ḭḭn̄ tū tə́ malang ní əla gír i dɔ ɓē kə́ Lebo Hamat tə́ dām̄ mbɔ́r ɓē kə́ ko̰ó̰ tə́ bátə́ ugə̄ń ngōn̄ man̄ kə́ Ejiptə tə́.
9Kán̄ naā kə́ bo to kə ndɔ̄ kə́ nge ko̰ sɔ́sɔ́. Rāān̄ yá̰a̰ kūjə́ kə́ tām̄ yā kújə yā Nə́ɓā tə́ i ndɔ̄ sīrí ō, nāā kújə́ kámbə gə̄ i ndɔ̄ sīrí ō. 10Kə ndɔ̄ kə́ nge ko̰ kutə jōó gidə i mətá yā nāā kə́ nge ko̰ sīrí anī, mban̄g əya̰ ngán Israel gə̄ adə̄ teēn̄ kə̄ ɓē yādə́ gə̄ tə́. Nin̄ aw̄n̄ kə rɔ̄nelēé ō, kemdə́ nel̄də́ ō, tɔdɔ̄ Kɔ́ɔ̄ɓē rāā majə kə Dabid ō, kə̄ Salomo̰ ō, kə ngán Israel gə̄ ń i gír deē yān gə̄ ní ō.
Kɔ́ɔ̄ɓē ndɔ̄bə̄ Salomo̰ nja kə́ nge ko̰ jōó
(Á̰a̰ī 1 Mba 9.1-9; 2 Yá̰a̰ 1.7-12)
11Dan ń mban̄g Salomo̰ rāā kújə yā Kɔ́ɔ̄ɓē oy ō, rāā kújə mban̄g yān nəkɔ́ oy ō, rāā yá̰a̰ gə̄ ń ni gír̄ rāā kem kújə yā Kɔ́ɔ̄ɓē tə́ ō, kem kújə yān nəkɔ́ tə́ oy ō ní anī, 12Kɔ́ɔ̄ɓē ndɔ̄bən dan ndɔ̄ɔ́ ba ədan na: M-ōō ndɔ̄ȳ yāí ō, m̄-ndigə gə̄rā loo ń toō kadə̄ tunə̄n̄ yá̰a̰ tū tə́ adə̄mə̄n̄ ō. 13Tītə̄ ń toō ré m-ūtə̄ ta dɔ rā̰ adə̄ man̄ edə alé, aláa m-ə́da yim̄ gə̄ kadə̄ nujən̄ loo sák sák kɔ̄ɔ́ kem ɓēé, aláa m-ə̄nī mo̰y ngāl̄bɔ̄gīí dɔ gír deē yāḿ gə̄ tə́, 14ba ré gír deē yāḿ gə̄ ń m-ə̄ndā rīḿ dɔdə́ tə́ ní télən̄ kə rɔ̄də́ kə̄ nang tə́ ō, ndɔ̄ȳmə̄n̄ ō, sāāmə̄n̄ ō, lōōn̄ gíŕ háĺdə́ kə́ majaĺ gə̄ tə́ ō anī, mā m-ā m̄-nēl̄ mbīḿ dɔ rā̰ tə́ yā koōń ndūdə́. M-ā m̄-mā̰ȳ rɔ̄ḿ dɔ majaĺ yādə́ tə́ ō, m-ā m̄-rāā kadə̄ ɓē yādə́ ndi kə lápə́yaá ō. 15Əla gír ngɔr ń toō tə́ ní m̄-tḛḛ̄ kumḿ ō, m̄-nēl̄ mbīḿ kadə̄ m-ōoń ndɔ̄ȳ gə̄ malang ń a ndɔ̄ȳmə̄n̄ loo ń toō tə́ ní ō. 16Ba ngɔlaā ní m̄-gə̄rā kújə́ ń toō ō, m-ɔ̄r̄ kamə̄n tayā ō, kadə̄ rīḿ i dɔ tə́ ngándáńg. Kumḿ i dɔ tə́ ngándáńg ō, kemḿ i dɔ tə́ ngándáńg ō. 17Ḭ̄ tā anī ré ī-rāā háĺ ń bɔbí Dabid rāā ní seḿ, adə̄ ī-rāā yá̰a̰ malang ń m-ə́daī kadə̄ ī-rāā ní ō, ī-ngɔ̄m̄ ndū najə̄ yāḿ gə̄ ō, yá̰a̰ kāgə̄ ɓē yāḿ gə̄ ō anī, 18m-ā m̄-rāā kadə̄ ā ī-ndi ngan̄g dɔ kōr̄ kāgə̄ mbang yāí tə́, tītə̄ ń m-ə̄nań míndə́ḿ m-ādə̄ bɔbí Dabid ní. M-ə̄nā míndə́ḿ m-ādə̄n m-ə́da na deē yān kógə̄ḿ na a o̰o̰ ɓē dɔ Israel gə̄ tə́ ngándáńg. 19Banī ré ī-tūrī gidəsí kɔ̄ɔ́ taḿ tə́, ré ī-mbātíī rāā yá̰a̰ gə̄ ń ndū najə̄ yāḿ ədasí kadə̄ ī-rāāī ní ō, ī-mbātíī rāā gō míndə́ḿ gə̄ ní ō, ré āw̄ ī-rāāī kəla adī ɓesə̄ gə̄ ō, ə̄sōī kə̄ nang tə́ nodə́ tə́ ī-rɔyīdə́ ō anī, 20m-ā m̄-ngīsí yā kɔr̄sí kɔ̄ɔ́ dɔ nang ń m-ādə̄sí tə́ ní ō, kújə ń toō ń m-ɔ̄r̄ kamə̄n tayā kadə̄ ɓārə́n̄ rīḿ dɔ tə́ ní, m-ā m-ún kumḿ kɔ̄ɔ́ ta tə́ ō, a tél i yá̰a̰ mēlē tām̄ ō, kur̄ kəgō ō, yā gír de gə̄ malang. 21Kújə́ kə́ ngāl̄ ngá̰ý kum kə̄ dɔɔ́ ń toō ní, náā nəkɔ́ ń a mān̄ kadə tə́ anī a ɔr kumən ngá̰ý ō, a yáān ngá̰ý ō, adə̄ a dəje najə̄ a əda na ké Kɔ́ɔ̄ɓē rāā yá̰á̰ kə́ tītə̄ ń toō kə ɓē ń toō ō, kə kújə́ ń toō ō, i tām̄ rí tə́ wa. 22Anī a télən̄ yā kədan na: I tām̄ kəya̰ kə́ ngán Israel gə̄ əya̰n̄ Kɔ́ɔ̄ɓē Nə́ɓā yā kaadə́ gə̄ ń teē sedə́ kɔ̄ɔ́ kem ɓē kə́ Ejiptə tə́ ní kɔ̄ɔ́ tə́. Kɔ́ɔ̄ɓē rāādə́ yá̰á̰ kə́ to kum kaȳ aĺ gə̄ ń noō malang i tām̄ kəsō kə́ nin̄ əsōn̄ kə̄ nang tə́ kə̄ no nə́ɓā kə́ rang gə̄ tə́ rɔȳn̄də́ ō, rāān̄ kəla adə̄n̄ nə́ɓā kə́ rang gə̄ ō tə́.
Currently Selected:
2 YÁ̰A̰ GƏ̄ 7: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
