2 YÁ̰A̰ GƏ̄ 6
6
1Loo ń noō tə́ Salomo̰ əda na: Kɔ́ɔ̄ɓē, ī-gḛy i ndi kem loo kə́ risə til tə́. 2Mā m̄-rāā kújə́ kə́ bo m-ādī i loo kə́ kadə̄ ī-ndi tū tə́ ngándáńg!
Najə̄ ń Salomo̰ əda ɔrə̄ń kam̄ kújə yā Kɔ́ɔ̄ɓē ní
(Á̰a̰ī 1 Mba 8.14-21)
3Mban̄g tūr̄ kumən kə̄ rɔ̄ ngé kán̄ naā gə̄ malang kə́ Israel tə́ ba tɔ́r̄ tan dɔdə́ tə́. Ngé kán̄ naā gə̄ ní ran̄ i kə njadə́ kə́ dɔɔ́. 4Gō tə́ anī mban̄g əda na: m̄-tɔ̄ȳ Kɔ́ɔ̄ɓē Nə́ɓā yā Israel! Nəkɔ́ rāā yá̰á̰ ń ənī ndūn adə̄ bɔbə́ḿ Dabid najə̄n tə́ ní. Ni-ənī ndūn adə̄ bɔbə́ḿ Dabid i beé, əda na: 5Əla gír ndɔ̄ ń na n-teēń kə gír deē yān gēé kɔ̄ɔ́ kem ɓē kə́ Ejiptə tə́ ní, na n-gə̄rā ɓē kógə̄ḿ dan ɓē gə̄ kə́ Israel tə́ adə̄ rāān̄ kújə́ kógə̄ḿ kə́ rīn i dɔ tə́ kemeé aĺ ɓáý ō, na n-gə̄rā deē kógə̄ḿ adə̄ ndi ngār dɔ Israel gə̄ ń i gír deē yān gə̄ ní tə́ aĺ ɓáý ō, 6banī na n-gə̄rā ɓē kə́ Jerusalem kadə̄ rīn i dɔ tə́ ō, na n-gə̄rāī ḭ̄ Dabid kadə̄ ó̰o̰ ɓē dɔ gír deē yān gə̄ tə́ ō. 7Tá bɔbə́ḿ Dabid gír̄ rāā kújə́ kə́ tām̄ yā Kɔ́ɔ̄ɓē Nə́ɓā yā Israel tə́. 8Banī Kɔ́ɔ̄ɓē ədan na gír̄ rāā kújə́ kə́ tām̄ yān ni Kɔ́ɔ̄ɓē tə́ ń na aw̄ń kemən tə́ ní na i gír̄ kə́ majə ngá̰ý. 9Banī na i ni Dabid n na a rāā kújə́ ní alé ba na i ngōnən. A̰á̰ā̰, na i ngōn̄ kemən n na a rāā ní. 10Adə̄ Kɔ́ɔ̄ɓē ra dɔ míndən ń ənī tə́ ní: M-ó̰o̰ ɓē gotə bɔbə́ḿ Dabid tə́, m̄-ndi dɔ kōr̄ kāgə̄ mbang yā Israel tə́ tītə̄ ń Kɔ́ɔ̄ɓē ədań ní ō, m̄-rāā kújə́ ń toō tām̄ yā Kɔ́ɔ̄ɓē Nə́ɓā yā Israel tə́ ō. 11M-ə̄ndā sandúkə́ ń madə̄ naā yā Kɔ́ɔ̄ɓē i kemeé ní tū té ō. I madə̄ naā ń ni-əhɔ kə ngán Israel gēé ní.
Salomo̰ ndɔ̄ȳ Nə́ɓā ta kum ngán Israel gə̄ tə́
(Á̰a̰ī 1 Mba 8.22-53)
12Gō tə́ anī mban̄g ra ta loo tun̄ yá̰a̰ yā Kɔ́ɔ̄ɓē tə́, ta kum ngán Israel gə̄ malang ń kánə̄n̄ naā tə́ ní, ba ɔy jīn kə̄ dɔɔ́ yā ndɔ̄yń Kɔ́ɔ̄ɓē. 13Kété ní Salomo̰ adə̄ rāān̄ yá̰á̰ kə́ yā kadə̄ deē ra dɔ tə́ kə gində̄ nə̄ngá kasaá əndān̄ ndágə looó danaá bang. Yá̰á̰ ní ngālən i kíl deē mí ō, laan i kíl deē mí ō, ngālən kə́ kə̄ dɔɔ́ i kíl deē mətá ō. Salomo̰ al̄ dɔ tə́ ba tétə̄ kejən nang tə́ ta kum ngán Israel gə̄ malang ń kánə̄n̄ naā tə́ ní. Ni ɔy jīn kə̄ dɔɔ́ ndɔ̄yń Nə́ɓā, 14əda na: Kɔ́ɔ̄ɓē Nə́ɓā yā Israel, Nə́ɓā kə́ tītīí gətóo dɔ rā̰ tə́ dɔɔ́ ō, dɔ nang tə́ laā ō. Tām̄ dan ń ngé kəla yāí gə̄ ənīn̄ kemdə́ mámák njə̄rān̄neé noí tə́ ní, madə̄ naā yāí to gotoó sedə́ ō, kem ndaa yāí to gətóo sedə́ ō. 15Yá̰á̰ ń ə̄nī ndūí yā rāā kadə̄ bɔbə́ḿ Dabid kə́ nge kəla yāí ní, ī-rāā kɔ̄ɔ́ ɓá. A̰á̰ā̰, yá̰á̰ ń ə́dan kété ní, ī-rāā ɓōólaā kɔ̄ɔ́. 16I beé ní Kɔ́ɔ̄ɓē Nə́ɓā yā Israel, yá̰á̰ ń ə́da bɔbə́ḿ Dabid kə́ nge kəla yāí ní, ī-rāā ngɔlaā ō. Tām̄ ə̄nī ndūí ādə̄n ə́da na, ré ngánən gē, ngán kaan gē na ɓōlə́n̄ ndū najə̄ yāí adə̄ ngɔ̄mə̄n̄ háĺdə́ majə njə̄rān̄neé kə̄ noí tə́ tītə̄ yān anī, ngándáńg deē kógə̄ḿ dandə́ tə́ na a ndi ta kumií tə́ yā ko̰o̰ ɓē dɔ Israel gə̄ tə́. 17Ní Kɔ́ɔ̄ɓē Nə́ɓā yā Israel, ī-rāā yá̰á̰ ń ə̄nī míndí yā rāā kadə̄ nge kəla yāí Dabid ní ngɔlaā! 18Nə́ɓā asə ndi kə deē ndul gēé dɔ nang tə́ rɔ̄kum a? Dɔ rā̰ ń laa ngá̰ý ní gə̄gē ba asə ndin aĺ anī, kújə́ ń m̄-rāā toó tá a asən i ba̰ý? 19Ɓá tā ba Kɔ́ɔ̄ɓē Nə́ɓā yāḿ, ī-tūr̄ kumií kə̄ rɔ̄ḿ tə́ ōō ndɔ̄ȳ yāḿ ō, ōō rāā ɓɔ́ yāḿ ō. Ī-nel mbīí ōoń ɓāŕ ń m̄-ɓāríī ní ō, ooń ndɔ̄ȳ ń m̄-ndɔyī ní o. 20Ādə̄ kumií i kə̄ dɔ kújə́ ń toō tə́ ndɔ̄ɔ́ ō, kadaá ō. Loo ń ə́da na ā ə̄ndā rīí dɔ tə́ ní, ādə̄ kumií i dɔ tə́. Ōō ndɔ̄ȳ ń m̄-ndɔ̄yī loo ń toō tə́ ní. 21Ōō ɓār̄ ń mā ō, Israel gə̄ ń i deē yāí gə̄ ní ō, j-tūr̄ kumjí kə̄ loo ń toō tə́ j-ɓārī ní ō. Kɔ́ɔ̄ɓē, ōō ndūjí loo ń ī-ndi tū tə́ dɔ rā̰ tə́ ní. Ōō ndūjí ō, ī-mā̰ȳ rɔ̄í dɔjí tə́ ō.
22Ré ɔsən̄ deē kógə̄ḿ rāā yá̰á̰ kə́ majaĺ kə madə̄neé ba ran̄ kə deē ní ta túbə kə yá̰á̰ kə́ majaĺ kógə̄ḿ kadə̄ rāān, adə̄ kɔ́ɔ̄ reē ra ta loo tun̄ yá̰a̰ yāí tə́ kem kújə́ ń toō tə́ túbəń anī, 23Kɔ́ɔ̄ɓē, ḭ̄ ń ī-ndi dɔ rā̰ tə́ ní ōō najə̄. Ī-rāā yá̰á̰ kógə̄ḿ ī-gāngəń sarya kə́ dɔ dáń ngé kəla yāí gə̄ tə́. Deē ń najə̄ i dɔn tə́ ní, ī-rāā ādə̄ hál kɔ́ɔ̄ tél əsō dɔ kɔ́ɔ̄ tə́ ō, deē ń najə̄ gətóo dɔn tə́ ní, ɔ́jə kə̄ ndágá kadə̄ najə̄ gətóo dɔn tə́ ō, ī-rāā seneé kə gō hálən kə́ gōtə́ ō. 24Ré Israel gə̄ ń i gír deē yāí gə̄ ní, madə̄ ba̰ā̰də́ gə̄ tetən̄də́ rɔ̄ɔ̄ tɔdɔ̄ nin̄ rāān̄ yá̰á̰ kə́ majaĺ seí, banī tél tūrə̄n̄ háĺdə́ ō, tɔ̄ȳn̄ rīí ō, ndɔ̄ȳnī ō, rāā ɓɔ́ kem kújə́ ń toō tə́ ō anī, 25ḭ̄ n ī-ndi dɔ rā̰ tə́ ní ōō ndūdə́ ō, ī-mā̰ȳ rɔ̄í dɔ majaĺ yādə́ tə́ ō, ī-tél ī-reē sedə́ gogə́ dɔ nang ń ādə̄də́ nin̄ō, kaadə́ gə̄ ō ní tə́.
26Aláa ré dɔ rā̰ utə̄ tan adə̄ man̄ edə alé, tɔdɔ̄ ngán Israel gə̄ rāān̄ yá̰á̰ kə́ majaĺ seí, ba ré nin̄ tūrə̄n̄ kumdə́ kə̄ loo ń toō tə́ ndɔ̄ȳnīneé ō, tɔ̄ȳn̄neé rīí ō, tūrə̄n̄ háĺdə́ tɔdɔ̄ ī-rāādə́ yá̰á̰ kə́ tōr̄ ō anī, 27ḭ̄ ń ī-ndi dɔ rā̰ tə́ ní ōō ndūdə́ ō, ī-mā̰ȳ rɔ̄í dɔ majaĺ yādə́ tə́ ō, tɔdɔ̄ nin̄ i ngé kəla yāí gə̄ ō, i gír deē yāí gə̄ ō. Tá ɓáý to̰ ní, ɔ́jə́də́ ta róbə́ kə́ majə ń kadə̄ unən̄ ní ō. Gō tə́ anī ī-rāā ādə̄ man̄ edə dɔ nang yāí ń ādə̄də́ kə́ yādə́ tə́ ní.
28Ré ɓō aláa mo̰y ngāl̄bɔ̄gīí əsō kem ɓēé, aláa kōō gə̄ tutən̄ aké ndumən̄ kə njadə́ dɔɔ́, ré yim̄ gə̄ aláa gaẃ gə̄ teēn̄ ngá̰ý kem ɓēé, aláa madə̄ ba̰ā̰ Israel gə̄ gīrə̄n̄ gidə ɓē yādə́ gə̄ kə rɔ̄ɔ́, ká i yá̰á̰ kə́ tōr̄ kə́ ba̰ý n rāań yá̰a̰ gə̄gē, ká i mo̰y kə́ ba̰ý n əsōń kem ɓēé gə̄gē, 29ká i yá̰á̰ rí n deē ndɔ̄yī najə̄n tə́ gə̄gē, ká i yá̰á̰ rí n deē rāāī ɓɔ́ najə̄n tə́ gə̄gē, ká i de kə́ kal kógə̄ḿ beē, aláa i Israel gə̄ malang ń i gír deē yāí gə̄ ní n rāān̄ī ɓɔ́ gə̄gē, ré nin̄ kógə̄ḿ kógə̄ḿ gerə̄n̄ kum yá̰á̰ kə́ majaĺ ń reē dɔdə́ tə́ ní ō, gerə̄n̄ kum yá̰á̰ kə́ tōr̄ ń rāādə́ ní ō, ba tūrə̄n̄ kumdə́ sɔɔ̄ kújə́ ń toō ba ɔyn̄ jīdə́ kə̄ dɔɔ́ ndɔ̄ȳnīneé anī, 30ḭ̄ ń ī-ndi dɔ rā̰ tə́ ní, ōō ndūjí loo ń ī-ndi tū tə́ ní tə́. Ī-mā̰ȳ rɔ̄í dɔdə́ tə́ ba ī-rāā yá̰á̰ ń majə kadə̄ ī-rāā sedə́ ní kógə̄ḿ kógə̄ḿ kə dɔdə́ gēé sɔɔ̄ń háĺdə́ tām̄ ī-ger̄ kemdə́. Tɔdɔ̄ i ḭ̄ kógə̄ḿ beē n i nge ger̄ kem de gə̄ ní. 31Ī-rāā tītə̄ ń noō ādə̄ Israel gə̄ unən̄neé háĺ ń kemií ndigə ní ō, ɓōlə́n̄neé ndílí kə dɔ ndɔ̄ gə̄ ń nin̄ a ndin̄neé kə kumdə́ dɔ nang ń ādə̄ kaají gə̄ tə́ ní ō.
32Ré tə̄rā ń i Israel alé, adə̄ i de kə́ dan gír deē yāí gə̄ tə́ aĺ ní ḭḭ dɔ nang kə́ sa̰y tə́ reē najə̄ rīí tə́ tɔdɔ̄ rīí a ɓār̄ ngá̰ý adə̄ de gə̄ a oōn̄ ō, a oōn̄ najə̄ yā jīí kə́ kə tɔ́gɔ́ ń ə́la kə̄ dɔɔ́ ní ō, ré tə̄rā ní reē tūr̄ kumən sɔɔ̄ kújə́ ń toō ndɔ̄yīneé anī, 33ḭ̄ Kɔ́ɔ̄ɓē ń loo ndií i dɔ rā̰ tə́ ní, ī-ndi tū tə́ ōoń ndū tə̄rā ní ba ī-rāā yá̰a̰ malang ń dəjeī ní. I beé tá gír de kə́ dɔ nang tə́ gə̄ malang a gerə̄n̄neé rīí ō, a ɓōlə́n̄neé ndílí tītə̄ ń gír deē yāí gə̄ a ɓōlə́n̄neé ndílí ní ō, a gerə̄n̄neé kadə̄ rīí ɓār̄ dɔ kújə́ ń toō ń m̄-rāā tə́ ní ō.
34Ré gír deē yāí gə̄ aw̄n̄ yā rɔ̄ɔ̄ madə̄ ba̰ā̰də́ gə̄ dām̄ loo ń ə́ládə́ tū tə́ ní tə́, ba tūrə̄n̄ rɔ̄də́ kə̄ rɔ̄í tə́ kumdə́ sɔɔ̄ ɓē ń toō ń ī-gə̄rā ní ō, kújə́ ń toō ń m̄-rāā kadə̄ rīí ɓār̄ dɔ tə́ ní ō, ba ndɔ̄ȳnī anī, 35ḭ̄ ń ī-ndi dɔ rā̰ tə́ ní ōō ndɔ̄ȳ yādə́ ō, ōō rāā ɓɔ́ yādə́ ō, ba ī-rāā sedə́ ādə̄ tetən̄ rɔ̄ɔ̄ tām̄ najə̄ i yādə́.
36Ré nin̄ a rāān̄ yá̰á̰ kə́ majaĺ seí - tɔdɔ̄ deē ndul kə́ rāā yá̰á̰ kə́ majaĺ aĺ gətóo - adə̄ wōn̄g rāāī sedə́ ba ə́ládə́ kem jī madə̄ ba̰ā̰də́ gə̄ tə́ adə̄ tetən̄də́ rɔ̄ɔ̄ ba əhɔn̄də́ aw̄n̄ sedə́ ɓəloó dɔ nang kə́ sa̰y tə́, aláa i loo kə́ ngɔr tə́, 37ré ndin̄ kə̄ ɓē ɓəlo tə́ noō gírə̄n̄ yá̰a̰ ba ndə̄ngān̄ rɔ̄də́ ō, rāānī ɓɔ́ dɔ nang yā madə̄ ba̰ā̰də́ gə̄ tə́ ədan̄ na n-rāān̄ yá̰á̰ kə́ majaĺ gə̄ ō, kə́ gōtə́ aĺ gə̄ ō, adə̄ najə̄ na i dɔdə́ tə́, 38ré tél reēn̄ gogə́ rɔ̄í tə́ dɔ nang yā madə̄ ba̰ā̰də́ gə̄ tə́ kə ngarā̰ kemdə́ mámák ō, kə rɔ̄də́ malang ō, ba tūrə̄n̄ kumdə́ sɔɔ̄ dɔ nang ń ādə̄ kaadə́ gə̄ ní ō, ɓē ń toō ń ī-gə̄rā ní ō, kújə́ ń toō ń m̄-rāā kadə̄ rīí ɓār̄ dɔ tə́ ní ō, ba ndɔ̄ȳnī anī, 39ḭ̄ ń ī-ndi dɔ rā̰ tə́ ní ōō ndɔ̄ȳ yādə́ ō, ōō rāā ɓɔ̄ɔ̄ yādə́ ō loo ń ī-ndi tū tə́ ní tə́. Ba ī-rāā sedə́ ādə̄ tetən̄ rɔ̄ɔ̄ tām̄ najə̄ i yādə́ ō, ī-mā̰ȳ rɔ̄í dɔ gír deē yāí gə̄ ń rāān̄ majaĺ seí tə́ ní ō. 40Ngɔlaā ní Nə́ɓā yāḿ, ī-teē kumií ō, ī-nēl̄ mbīí ōoń ndɔ̄ȳ ń m̄-ndɔ̄yī loo ń toō tə́ ní ō.
41Ba ngɔlaā ní Kɔ́ɔ̄ɓē Nə́ɓā, ḭ́ḭ dɔɔ́ ī-reē loo kɔr̄ koō yāí tə́, ḭ̄ ō, sandúkə ń tɔ́gə yāí i kemeé ní ō.
Kɔ́ɔ̄ɓē Nə́ɓā, ādə̄ əlan̄ kūbə̄ kajə rɔ̄ ngé tun̄ yá̰a̰ yāí gə̄ tə́ ō, ādə̄ deē yāí gə̄ ń ran̄ dɔ ndūdə́ tə́ ní ndin̄ majə kə rɔ̄nelēé ō.
42Kɔ́ɔ̄ɓē Nə́ɓā, ī-lōō mbātə́ mban̄g yāí ń úr yibə̄ dɔn tə́ ní. Ādə̄ əga kemií dɔ yá̰á̰ kə́ majə gə̄ malang ń ī-rāā ādə̄ nge kəla yāí Dabid ní tə́.
Currently Selected:
2 YÁ̰A̰ GƏ̄ 6: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
