2 YÁ̰A̰ GƏ̄ 5

1Dan ń Salomo̰ tɔ̄l̄ ta kəla malang kə́ tū kújə yā Kɔ́ɔ̄ɓē tə́ ní anī, adə̄ reēn̄ kə yá̰a̰ gə̄ ń bɔbə̄n Dabid ɔr̄ kam̄də́ tayā tām̄ yā Kɔ́ɔ̄ɓē tə́ ní, adə̄ i gində̄ arjā̰a̰ ō, lɔ́r ō, ngáń gájə́ yá̰a̰ rāā kəla gə̄ malang ō, yā kadə̄ ɓōkə́n̄ loo ngɔ̄m̄ yá̰á̰ tə́ kem kújə yā Kɔ́ɔ̄ɓē tə́.

Əndān̄ sandúkə madə̄ naā kem kújə yā Kɔ́ɔ̄ɓē tə́

(Á̰a̰ī 1 Mba 8.1-13)

2Dan ngeé ń noō tə́ ní mban̄g Salomo̰ ɓāŕ kum kɔɔ̄ gə̄ yā ngán Israel gə̄ ō, ngār gə̄ kə́ dɔ gír ɓē gə̄ tə́ ō, kə́ dɔ gír kojə gə̄ yā ngán Israel gə̄ tə́ ō, kadə̄ reēn̄ Jerusalem kun sandúkə madə̄ naā yā Kɔ́ɔ̄ɓē tə́, yā kḭḭń ɓē yā Dabid ń rīn na i Sion ní tə́ yā kaw̄ń kem kújə yā Kɔ́ɔ̄ɓē tə́. 3Loo ń noō tə́ de kə́ dəngam gə̄ malang kə́ Israel tə́ kánə̄n̄ naā rɔ̄ mban̄g tə́ tām̄ ndɔ̄ rāā nāā tə́, kem nāā kə́ nge ko̰ sīrí tə́. 4Dan ń kum kɔɔ̄ gə̄ malang yā ngán Israel gə̄ ugə̄n̄ anī, ngán Lebi gə̄ unən̄ sandúkə madə̄ naā. 5Nin̄-unən̄ sandúkə madə̄ naā ō, kújə kənge naā ō, ɔyn̄ yá̰á̰ kə́ yā ɓōĺ gidə gə̄ kə́ kem kújə tandā tə́ ō aw̄n̄neé. De gə̄ ní i ngé tun̄ yá̰a̰ gə̄ ō, ngán Lebi gə̄ ō. 6Mban̄g Salomo̰ ō, ngán Israel gə̄ malang ń kánə̄n̄ naā rɔ̄n tə́ kə̄ no sandúkə madə̄ naā tə́ ō ní, tɔ̄lə̄n̄ batə̄ gə̄ ō, man̄g gə̄ ō, ba tun̄ adə̄n̄ Nə́ɓā. Kutə man̄g gə̄ kə batə̄ gə̄ ní i ngá̰ý al̄ naā, adə̄ deē asə tə́dádə́ aĺ ō, deē asə ger̄ kutədə́ aĺ ō. 7Ngé tun̄ yá̰a̰ gə̄ aw̄n̄ kə sandúkə madə̄ naā yā Kɔ́ɔ̄ɓēé əndān̄ loo ń rāān̄ yā kəndān tū tə́ tə́ ní, kem kújə ń a ɓārə́n̄ na i loo kə́ táĺ ngá̰ý tə́ ní, gír bɔ̄gə̄ de kə́ dɔ rā̰ tə́ kə́ ngé ngɔ̄m̄ loo gə̄ tə́. 8De kə́ dɔ rā̰ tə́ gə̄ ní jā̰n̄ bɔ̄gə̄də́ dɔ loo ndi sandúkə ní tə́ utə̄n̄neé dɔ sandúkə madə̄ naā ō, utə̄n̄neé dɔ sáā kāgə̄ gə̄ kə́ yā kətōń gə̄ ō. 9Sáā kāgə̄ gə̄ ní ngālə̄n̄ ngá̰ý, adə̄ ré deē ra ta róbə́ kə́ yā kudəń kə̄ kem kújə́ kə́ yā ɓōĺ gidə tə́ anī, a a̰a̰ tadə́ kə́ teē kə̄ ndágá. Banī ré deē ra i ndágá anī a a̰a̰ alé. Ɓōólaā gə̄gē ton̄ noó ɓáý. 10Yá̰a̰ gə̄ ń ton̄ kem sandúkú ní, i bar mbal̄ kə́ jōó gə̄ ń Moijə ɓōkə́də́ kemeé ní ngóy. I bar mbal̄ gə̄ ń ni-ənge dɔ mbal̄ Horeb tə́ dan ń Kɔ́ɔ̄ɓē əhɔń madə̄ naā kə ngán Israel gēé, gō teē ń teē sedə́ kɔ̄ɔ́ kem ɓē kə́ Ejiptə tə́ ní.

11Ngé tun̄ yá̰a̰ gə̄ teēn̄ kɔ̄ɔ́ kem loo kə́ táĺ tə́. Nin̄ malang ń ran̄ loo ń noō tə́ ní, tə́gon̄ rɔ̄də́ i kə̄ noó kanjə̄ kaw̄ gō najə̄ kə́ dɔ gír ɓūtə̄ gə̄ tə́ tə́#5.11 Ɓūtə̄ gə̄: Ɓūtə̄ ngé tun̄ yá̰a̰ gə̄ gír i kutə jōó gidə i sɔ́. Á̰a̰ī 1 Yá̰a̰ 24.3-19. 12Gōsə̄ gə̄ kə́ ngán Lebi gə̄ ń i Asap ō, Heman ō, Yedutun ō, ngáńdə́ gə̄ ō, gotə ngéédə́ kə́ rang gə̄ kə́ gír kaa yādə́ gə̄ tə́ ō, ní, tə́lan̄ kūbə̄ lḛ́ḛ rɔ̄də́ tə́ ō, ran̄ i kə gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō, kənde gə̄ kə́ kəlādə́ i ngá̰ý aĺ gə̄ ō, kə́ kəlādə́ i ngá̰ý gə̄ ō jīdə́ tə́. Ré deē ra loo tun̄ yá̰á̰ tə́ anī, loo ń nin̄ ran̄ tū tə́ ní i kə̄ dām̄ kə́ gír ɓē tə́. Ngé tun̄ yá̰a̰ gə̄ ɓú kə kutə jōó i sedə́. Ngé tun̄ yá̰a̰ gə̄ ní a kɔ̄rə́n̄ i bərúnjə. 13Ngé kɔ̄ŕ bərúnjə gə̄ gə̄gē, ngé kənī pā gə̄ gə̄gē, ɓōkə́n̄ ndūdə́ gō naā tə́ malang yā tɔ̄yń Kɔ́ɔ̄ɓē ō, kɔsəń gɔnən ō. Dan ń kōō bərúnjə gə̄ ō, gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō, gotə yá̰á̰ kə́ ɓār̄ gōsə̄ kə́ rang gə̄ ō ɓār̄ anī, tɔ̄ȳn̄ Kɔ́ɔ̄ɓē ədan̄ na: Ī-tɔ̄yī Kɔ́ɔ̄ɓē tɔdɔ̄ ni i de kə́ majə ō, tɔdɔ̄ kem majə yān to ngándáńg ō. Loo ń noō tə́ kil̄ man̄ kə́ kem kújə yā Kɔ́ɔ̄ɓē tə́ taā kem kújə malang. 14Ngé tun̄ yá̰a̰ gə̄ asən̄ tél kun ta kəla yādə́ gogə́ to̰ alé najə̄ kil̄ man̄ ní tə́, tɔdɔ̄ kɔsə gɔn yā Kɔ́ɔ̄ɓē taā kem kújə yā Nə́ɓā malang.

Currently Selected:

2 YÁ̰A̰ GƏ̄ 5: SARDC

Highlight

Copy

Compare