2 YÁ̰A̰ GƏ̄ 32
32
Senakerib taā loo ɓē ko̰o̰ kə́ Juda tə́
(Á̰a̰ī 2 Mba 18.13; Ij 36.1)
1Gō yá̰a̰ gə̄ ń noō tə́ ō, ra dɔ ndū tə́ ń Ejekias ra dɔ tə́ kə Nə́ɓāá ní ō anī, Senakerib mban̄g kə́ Asiri reē dɔ nang kə́ Juda tə́ ba əndā gérger yān ta ɓē kə́ ngan̄g ngan̄g gə̄ kə́ kem ɓē kó̰ó̰ kə́ Juda tə́ ń ni núm̄ taā ní. 2Dan ń Ejekias a̰ā̰ kadə̄ Senakerib reē i yā rɔ̄ɔ̄ ɓē kə́ Jerusalem anī, 3oōn̄ naā kə de kə́ bo yān gə̄ ō, ngol áskar yān gə̄ ō. Ni dəjedə́ kadə̄ utə̄n̄ ta kəɓa man̄ gə̄ kə́ gidə ɓē tə́ ndágá kɔ̄ɔ́. Anī nin̄ ndigən̄ gōn tə́. 4Loo ń noō tə́ kósə de kə́ ngá̰ý gə̄ teē əngen̄ naā ba utə̄n̄ ta kəɓa man̄ gə̄ malang ō, utə̄n̄ ta nge ń a nūgə́ kem bəlo loo ń ndērə̄n̄ gíŕ nángāá tə́ ní ō. Tɔdɔ̄ nin̄ ədan̄ na: Kadə̄ mban̄g kə́ Asiri gə̄ reē ugə̄n̄ anī əngen̄ man̄ ngá̰ý i tām̄ rí tə́?
5Ejekias əhɔ rɔ̄n tɔgə, tél rāā ndogə̄ mbal̄ ń tétə̄n̄ nang tə́ kɔ̄ɔ́ ní gogə́ rang ō, rāā kújə gə̄ ta tə́ dɔɔ́ ō, ənī ndogə̄ mbal̄ kə́ rang gidə madə̄ tə́ ndágá ō, tél rāā Milo#32.5 Milo: Á̰a̰ī 1 Yá̰a̰ 11.8 gogə́ rang kem ɓē yā Dabid tə́ ō, adə̄ oon̄ nənga gə̄ ngá̰ý ō, der gə̄ ngá̰ý ō. 6Ni-tə́ndā ngol áskar gə̄ dɔ de gə̄ tə́ ba ɓāŕdə́ malang adə̄ reēn ndágə loo kə́ ta ɓē tə́, ba ɔjə̄də́ əda na: 7Ādī kem kə̄ngāsí ngan̄g ō, ə́hɔī rɔ̄sí tɔgə ō. Ī-sōlī yá̰á̰ kógə̄ḿ aĺ ō, ī-lōōī ɓōĺ mban̄g kə́ Asiri ō, kósə de kə́ ngá̰ý gə̄ ń seneé ní ō. Tɔdɔ̄ deē ń sejí ní i de kə́ bo tɔȳ ngé gə̄ ń i seneé ní. 8Ngé rɔ̄ɔ̄ gə̄ ń seneé ní i de gə̄, banī jḭḭ̄ ɓáa Kɔ́ɔ̄ɓē Nə́ɓā yājí n i sejí ní. Ni a dḭḭ̄jí adə̄ a rɔ̄ɔ̄ dɔjí tə́. Najə̄ ń mban̄g Ejekias ɔr̄ ní adə̄ de gə̄ malang tɔ́gə.
Najə̄ ń Senakerib ɔr̄ kə de kə́ Jerusalem gēé ní
(Á̰a̰ī 2 Mba 18.17-37; Ij 36.2-22)
9Gō tə́ sḛ́ý anī Senakerib mban̄g kə́ Asiri ɔy ngé rɔ̄ɔ̄ yān gə̄ malang aw̄ gīrəń ɓē kə́ Lakis. Ni-ndi Lakis noó ba əla ngé kəla yān gə̄ Jerusalem rɔ̄ Ejekias mban̄g kə́ Juda tə́ ō, rɔ̄ de kə́ dəngam gə̄ malang kə́ Juda tə́ ń ndin̄ Jerusalem ní ō, kadə̄ ədan̄də́ na: 10Najə̄ ń Senakerib mban̄g kə́ Asiri əda ní n toó, əda na: Jerusalem ń i ɓē kə́ ngan̄g ngá̰ý ní ə̄ndāī kemsí i dɔ rí tə́ n ī-ndiīneé kemeé ní? 11Ejekias ədasí na Kɔ́ɔ̄ɓē Nə́ɓā yāsí na a taāsí jīḿ tə́. Kógə̄ḿ alé, ni gól̄sí i mbée yā kadə̄ ɓō tɔ̄l̄sí ō, kəndā man̄ tɔ̄l̄sí ō. 12I Ejekias n nujə loo ndɔ̄ȳ gə̄ yā Kɔ́ɔ̄ɓē ō, loo tun̄ yá̰a̰ yān gə̄ ō, kɔ̄ɔ́ ba əda de kə́ Juda gə̄ ō, Jerusalem gə̄ ō, kadə̄ kə ɔsən̄ nodə́ nang tə́ na i ta loo tun̄ yá̰á̰ kə́ gíŕ kógə̄ḿ beē tə́ ngóy ō, kə róōn̄ kajaja na i loo nəkɔ́ ń noō tə́ ngóy ō ní aĺ a? 13Yá̰á̰ ń mā ō, kaaḿ gə̄ ō, jə-rāā kə gír de gə̄ malang kə́ dɔ nang tə́ ní ī-gerī aĺ a? Nə́ɓā gə̄ ń i ɓesə̄ yā nápar de gə̄ ń noō ní ɔgə̄mə̄n̄ taā ɓē yādə́ a? 14Dan nə́ɓā gə̄ malang yā nápar de gə̄ ń kaaḿ gə̄ nujən̄də́ sák sák kɔ̄ɔ́ tə́ ní i ɓesə̄ kə́ rá n taā gír deē yān gə̄ jīḿ tə́ á Nə́ɓā yāsí a asəń taāsí jīḿ tə́ ní? 15Beé ní ī-lōōī kəya̰ Ejekias kadə̄ sor̄sí ō, gól̄sí ō tītə̄ ń noō, ī-lōōī taā kemən! Tɔdɔ̄ nə́ɓā kógə̄ḿ yā nápar de gə̄ kógə̄ḿ, aláa yā ɓē ko̰o̰ kógə̄ḿ kə́ asə taā gír deē yān gə̄ jīḿ tə́ aké jī kaaḿ gə̄ tə́ gətóo. Adə̄ nə́ɓā yāsí gə̄ a ajən̄sí aĺ ō. 16Ngámbang kəla gə̄ yā mban̄g kə́ Asiri na̰yn̄ kə̄ loo tə́da najə̄ kə́ majaĺ gə̄ dɔ Kɔ́ɔ̄ɓē Nə́ɓā tə́ ō, dɔ Ejekias nge kəla yān tə́ ō.
Senakerib ndájə̄ najə̄ dɔ Kɔ́ɔ̄ɓē tə́
(Á̰a̰ī 2 Mba 19.14-19; Ij 37.14-20)
17Gō tə́ anī Senakerib ndang makətūbə̄ sāań ta Kɔ́ɔ̄ɓē Nə́ɓā yā Israel ō, tə́dań najə̄ kə́ majaĺ gə̄ dɔn tə́ ō. Ni-əda kem makətūbə̄ ní tə́ na: Ɓesə̄ gə̄ yā nápar de gə̄ kə́ rang kə́ dɔ nang tə́ gə̄ asən̄ taā gír deē yādə́ gə̄ jīḿ tə́ aĺ ní, Nə́ɓā yā Ejekias a asə taā gír deē yān gə̄ jīḿ tə́ aĺ ō. 18Ngámbang kəla yā Senakerib gə̄ unən̄ ndūdə́ i kə̄ dɔɔ́ n a ɔr̄ə̄n̄neé najə̄ kə tɔ́gɔ́ kə de gə̄ ń ran̄ dɔ ndogə̄ mbal̄ kə́ Jerusalem tə́ ní. Nin̄ ɔrə̄n̄ najə̄ sedə́ i kə ta Hebəro. San̄ i kəla ɓōĺ kemdə́ tə́ ō, kɔr̄ tɔ́gə́də́ kɔ̄ɔ́ ō, yā taāń ɓē. 19Nin̄ ədan̄ najə̄ yā Nə́ɓā kə́ Jerusalem i tītə̄ ń ədan̄neé najə̄ yā ɓesə̄ gə̄ yā gír de kə́ rang gə̄ ń i yá̰á̰ kə́ jī deē rāā gə̄ ní.
De kə́ Asiri gə̄ a̰ȳn̄ naā ō, Senakerib oy ō
(Á̰a̰ī 2 Mba 19.15,35-37; Ij 37.15,36-38)
20Loo ń noō tə́ mban̄g Ejekias nin̄ kə Ijai nge koō ta kə́ ngōn̄ Amots ndɔ̄ȳn̄ tām̄ yā najə̄ ń noō tə́ ō, əgan̄ kɔŕ kə̄ dɔɔ́ dɔ rā̰ tə́ ō. 21Anī Kɔ́ɔ̄ɓē əla de kə́ dɔ rā̰ tə́ yān kógə̄ḿ kem gérger yā mban̄g kə́ Asiri tə́ adə̄ tɔ̄l̄ go̰ rɔ̄ɔ̄ gə̄ malang kɔ̄ɔ́ ō, tɔ̄l̄ ngol ngé rɔ̄ɔ̄ gə̄ ō, de kə́ bo gə̄ ō. Mban̄g kə́ Asiri tél kə rɔ̄sɔl̄ gēé ta kaw̄ gogə́ ɓēé. Dan ń udə kem kújə yā nə́ɓā yān tə́ anī, ngán kemən nəkɔ́ gə̄ tɔ̄l̄nən̄ kə kaskaraá. 22Kɔ́ɔ̄ɓē ajə Ejekias ō, de kə́ Jerusalem gə̄ ō, jī Senakerib mban̄g kə́ Asiri tə́ ō, jī madə̄ ba̰ā̰də́ kə́ rang gə̄ tə́ ō, i tītə̄ ń noō. Ni-rāā adə̄ ndin̄ majə tɔdɔ̄ rāā adə̄ madə̄ ba̰ā̰də́ gə̄ ń ndin̄ gīrə̄n̄ gidədə́ ní rɔ̄ɔ̄n̄də́ alé. 23De gə̄ ngá̰ý reēn̄ Jerusalem kə yá̰a̰ ndējə̄ yādə́ gēé adə̄n̄ Kɔ́ɔ̄ɓē ō, kə kadə̄ karī gēé adə̄n̄ Ejekias mban̄g kə́ Juda tə́ ō. I loo ń noō tə́ n nápar de gə̄ malang əlan̄ gír ɓōĺ ndíl Ejekias ngá̰ý ní.
Gír ko̰o̰ ɓē yā Ejekias gān̄g
(Á̰a̰ī 2 Mba 20.1-21; Ij 38.1-8; Ij 39)
24Dan ngeé ń noō tə́ ní mo̰y kógə̄ḿ kə́ ngan̄g ngá̰ý əhɔ mban̄g Ejekias yā tɔ̄lən. Ni-ndɔ̄ȳ Kɔ́ɔ̄ɓē, anī Kɔ́ɔ̄ɓē tūrə̄n najə̄ tə́ ō, rāā yá̰á̰ kə́ to kɔr kum tām̄ yān tə́ ō. 25Banī Ejekias ger̄ majə ń Nə́ɓā rāā seneé ní alé, ba ɔjə rɔ̄n ngá̰ý adə̄ Kɔ́ɔ̄ɓē rāā wōn̄g seneé ō, rāā wōn̄g kə ɓē kə́ Jerusalem ō, kə ɓē ko̰o̰ kə́ Juda ō. 26Ɓá tā ba Ejekias ō, de kə́ Jerusalem gə̄ ō, gerə̄n̄ majaĺ yādə́, adə̄ ɓāl̄ ko̰o̰ ɓē yā Ejekias tə́ ní Kɔ́ɔ̄ɓē ḭḭ sedə́ kə wōngōó alé. 27Yá̰a̰ kənge yā Ejekias i ngá̰ý ō, de gə̄ ɔrən̄ tan ngá̰ý ō. Ni-rāā kújə gə̄ kə́ yā ngɔ̄məń arjā̰a̰ ō, lɔ́r ō, mbal̄ gə̄ kə́ gātə̄də́ i ngá̰ý gə̄ ō, yá̰á̰ kə́ kotə majə gə̄ ō, der gə̄ ō, gotə yá̰á̰ kə́ rang kə́ tayā tayā gə̄ malang kə́ gātə̄də́ i ngá̰ý gə̄ ō. 28Ejekias adə̄ rāān̄ kújə gə̄ kə́ yā kánə̄ń kōō gə̄ ō, kasə nduú ō, yibə̄ ō. Adə̄ rāān̄ kújə yā dā̰ yān gə̄ ō, gong gə̄ kə́ tām̄ yā yá̰a̰ kul̄ yān gə̄ tə́ ō. 29Adə̄ rāān̄ ɓē gə̄ adə̄nən̄ ō, ənge yá̰a̰ kul̄ gə̄ ngá̰ý ō, ul̄ batə̄ gə̄ ō, bə̄yā̰ gə̄ ō, man̄g gə̄ ō, tɔdɔ̄ Nə́ɓā adə̄n yá̰a̰ kənge ngá̰ý. 30Loo kə́ dɔ mbalá ń man̄ Gihon a teē tū tə́ ní i Ejekias n utə̄ ta ba rāā adə̄ man̄ Gihon nūgə́ kum kə̄ nang tə́, dām̄ kə́ no ɓē tə́, kem ɓē yā Dabid tə́ ní. Yá̰a̰ malang ń Ejekias rāā ní majə ō, teē yá̰a̰ ō. 31Ɓá tā ba dan ń ngé ko̰o̰ ɓē kə́ Babilon gə̄ əlan̄ de kə́ bo yādə́ gə̄ rɔ̄n tə́ kadə̄ dəjenən̄ najə̄ kə́ dɔ yá̰á̰ kə́ to kɔr kum ń rāā yá̰a̰ kem ɓēé tə́ ní anī, Nə́ɓā əya̰n kɔ̄ɔ́ sāań najə̄ kə́ kemən tə́, yā gerə̄ń yá̰a̰ malang kə́ kemən tə́.
32Ndangən̄ gotə najə̄ kə́ rang gə̄ yā Ejekias i kem makətūbə̄ yá̰a̰ gə̄ ń Ijai nge koō ta kə́ ngōn̄ Amots a̰ā̰ tə́ ní ō, kem makətūbə̄ yā mban̄g gə̄ kə́ Juda tə́ ō kə́ Israel tə́ ō. 33Dan ń Ejekias oy ní dubə̄nən̄ i loo ń dubə̄n̄ de kə́ gír kojə yā Dabid tə́ gə̄ tū tə́ ní. Ba dubə̄nən̄ i dāmə̄n kə́ kḭḭ kə̄ dɔɔ́ tə́. Juda gə̄ malang ō, de kə́ Jerusalem gə̄ ō, ɔrən̄ tan ndɔ̄ yon tə́. I ngōnən Manase n o̰o̰ ɓē gotən tə́ ní.
Currently Selected:
2 YÁ̰A̰ GƏ̄ 32: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
