2 YÁ̰A̰ GƏ̄ 31
31
Ejekias rāā adə̄ kəla njə̄rā majə
1Dan ń gír yá̰a̰ gə̄ ń noō malang gān̄g anī, ngán Israel gə̄ malang ń nin̄ i noó ní, aw̄n̄ kə̄ kem ɓē gə̄ kə́ Juda tə́ aw̄ tɔ̄ɔ̄n̄ mbal̄ kə́ túdə̄ kə nja dɔɔ́ gə̄ kɔ̄ɔ́ ō, jéngə̄n̄ kāgə̄ ɓesə̄ kə́ yā ɓōĺ gidə gə̄ kɔ̄ɔ́ ō, nujən̄ kə loo ndɔ̄ȳ gə̄ ō, kə loo tun̄ yá̰á̰ kə́ tū tə́ gə̄ ō kɔ̄ɔ́. Rāān̄ tītə̄ ń noō dɔ nang kə́ Juda tə́ malang ō, kə́ Benjamḛ tə́ ō, Epəraim tə́ ō, Manase tə́ ō. Gō tə́ anī nin̄ malang télən kógə̄ḿ kógə̄ḿ kə̄ ɓē yādə́ gə̄ tə́.
2Ejekias tə́nda ɓūtə̄ ngé tun̄ yá̰a̰ gə̄ ō, ngán Lebi gə̄ ō. Ni-adə̄də́ kəla kógə̄ḿ kógə̄ḿ kə dɔdə́ gēé kem ɓūtə̄ yādə́ gə̄ tə́. Adə̄ i kəla yá̰á̰ kə́ yā tun̄ kə taá gə̄ ō, yá̰a̰ tun̄ gə̄ kə́ tām̄ yā kem kógə̄ḿ tə́ ō, kəla ndadə̄ ō, tɔ̄ȳ Kɔ́ɔ̄ɓē ō, kadə̄ rāān̄ kem loo kə́ táĺ yā Kɔ́ɔ̄ɓē ń ənīn̄ ndogə̄ dɔ tə́ ní tə́. 3Mban̄g ɔr̄ núsə yá̰a̰ kənge yān tām̄ yā yá̰á̰ kə́ yā tun̄ kə taá gə̄ tə́, adə̄ i kə́ yā tun̄ dəloí ō, loo sɔlí ō, ndɔ̄ sabat gə̄ tə́ ō, ndɔ̄ teē nāā gə̄ tə́ ō, ndɔ̄ rāā nāā gə̄ tə́ ō, tītə̄ ń ndangən̄neé kem makətūbə̄ ndū najə̄ yā Kɔ́ɔ̄ɓē tə́ ní.
4Mban̄g əda de kə́ Jerusalem gə̄ malang kadə̄ adə̄n̄ ngé tun̄ yá̰a̰ gə̄ ō, ngán Lebi gə̄ ō, núsə́ yá̰á̰ kə́ tām̄ yādə́ tə́ ń sɔɔ̄ kadə̄ adə̄n̄də́ ní, tá kadə̄ nin̄ asən̄neé kadə̄ rɔ̄də́ kə taá malang ta kəla gə̄ ń ɔjən̄ tām̄ yādə́ tə́ kem ndū najə̄ yā Kɔ́ɔ̄ɓē tə́ ní. 5Dan ń ədan̄ najə̄ ń noō anī, ngán Israel gə̄ adə̄n̄ dɔ kōō kə́ kijə gə̄ kə́ ndɔr̄ yādə́ gə̄ tə́ ngá̰ý. Adə̄n̄ kōō gémē ō, kasə nduú ō, yibə̄ ō, yibə̄ tejə ō, yá̰á̰ kə́ rang gə̄ ō. Reēn̄ kə yá̰a̰ gə̄ kə́ kɔr̄də́ kógə̄ḿ kógə̄ḿ dan kə́ kutə gə̄ tə́ ngá̰ý adə̄n̄ ō. 6Juda gə̄ ō, Israel gə̄ ń ndin̄ kem ɓē gə̄ kə́ Juda tə́ ō ní reēn̄ kə dā̰ yādə́ gə̄ kə́ ɔrə̄n̄də́ kógə̄ḿ kógə̄ḿ dan kə́ kutə gə̄ tə́ adə̄n̄. Adə̄n̄ i man̄g gə̄ ō, batə̄ gə̄ ō, yá̰a̰ ndējə̄ kə́ kɔr̄ kam̄ tayā tām̄ yā Kɔ́ɔ̄ɓē yādə́ tə́ gə̄ ō. Kánə̄n̄ dūbə̄ yá̰á̰ kə́ tayā tayā gə̄ ní adə̄ ra dɔ naā tə́ bing. 7Əlan̄ gíŕ kán̄ dɔ naā tə́ i kem nāā kə́ nge ko̰ mətá tə́ ba tɔ̄lə̄n̄ ta i kem nāā kə́ ngé ko̰ sīrí tə́. 8Dan ń Ejekias nin̄ kə de kə́ bo gēé reē a̰a̰n̄ dɔ dūbə̄ yá̰á̰ kə́ kán̄ gə̄ ní anī, ndadə̄n̄ Kɔ́ɔ̄ɓē ō, Israel gə̄ ń i gír deē yān gə̄ ní ō. 9Mban̄g dəje ngé tun̄ yá̰a̰ gə̄ ō, ngán Lebi gə̄ ō, najə̄ kə́ dɔ yá̰a̰ gə̄ kə́ kán̄ dɔ naā tə́ ní, 10anī Ajaria ngol ngé tun̄ yá̰a̰ gə̄ ń i de kə́ gír kojə yā Sadok tə́ ní tél ədan na: Əla gír ndɔ̄ ń de gə̄ reēn̄ kə yá̰a̰ ndējə̄ gēé kem kújə yā Kɔ́ɔ̄ɓē tə́ ní, j-əsa yá̰a̰ jə-ndān̄ ō, gotə yá̰a̰ teē ngá̰ý ō. Tɔdɔ̄ Kɔ́ɔ̄ɓē rāā majə kə gír deē yān gēé. Yá̰a̰ gə̄ ń kánə̄n̄ dɔ naā tə́ bing bing toó i gotə yá̰á̰ kə́ teē kə̄ ndágá gə̄.
11Mban̄g əda kadə̄ rāān̄ kújə ngɔ̄m̄ yá̰a̰ gə̄ kadə kújə yā Kɔ́ɔ̄ɓē tə́. Dan ń rāān̄ oy anī 12reēn̄ kə dɔ yá̰á̰ kə́ kɔr̄ gēé kemeé ngándáńg. Reēn̄ kə yá̰á̰ kə́ kɔr̄ kógə̄ḿ dan kə́ kutə tə́ gə̄ ō, yá̰a̰ ndējə̄ gə̄ ō. I Konania kə́ ngōn̄ Lebi n i nge ka̰a̰ gō ní. Ngōkó̰o̰n Simei i nge ka̰a̰ gō seneé. 13De kə́ gír jīdə́ gə̄ tə́ ń a rāān̄ kəla sedə́ kə gō kem ndigə yā mban̄g Ejekias nin̄ kə Ajaria nge ka̰a̰ gō kújə yā Kɔ́ɔ̄ɓē ní i Yehiel ō, Ajajia ō, Nahat ō, Asael ō, Yerimot ō, Yojabad ō, Eliel ō, Ismakia ō, Mahat ō, Benaya ō. 14Kore ngōn̄ Iməna kə́ ngōn̄ Lebi kə́ nge ngɔ̄m̄ ta róbə́ kə́ dām̄ kə́ gír ɓē tə́ i nge ka̰a̰ gō yá̰a̰ ndējə̄ gə̄ ń de gə̄ ndējə̄n̄ Nə́ɓā ní ō, i nge nə̄ɓō ngé tun̄ yá̰a̰ gə̄ dɔ yá̰á̰ kə́ kɔr̄ tām̄ yā Kɔ́ɔ̄ɓē tə́ gə̄ ō, yá̰á̰ kə́ táĺ ngá̰ý gə̄ ō. 15De kə́ gír jīn tə́ gə̄ ń a rāān̄ kəla seneé ní i Eden ō, Miniamin ō, Yesua ō, Semaya ō, Amaria ō, Sekania ō, Nin̄ ndin̄ i kem ɓē gə̄ yā ngé tun̄ yá̰a̰ gə̄ tə́. Kəla rāādə́ i nə̄ɓō ngákó̰ó̰də́ gə̄ ń i de kə́ tɔgə gə̄ ō, ngán gə̄ ō ní yá̰a̰ kəsa kə gōó kanjə̄ kɔr̄ kamdə́ ō, kə gō gír ɓūtə̄ yādə́ gēé ō. 16De kə́ dəngam gə̄ ō, ngán kə́ dəngam gə̄ ń ɓāl̄də́ ḭḭ dɔ mətá tə́ kum kə̄ dɔɔ́ á ndangən̄ rīdə́ kem makətūbūú ní, adə̄n̄də́ yá̰a̰ ō, de gə̄ malang ń reēn̄ rāā kəla yādə́ tə́ kə gō gír ɓūtə̄ yādə́ gēé kem kújə yā Kɔ́ɔ̄ɓē tə́ ní adə̄n̄də́ yá̰a̰ kə dɔ ndɔ̄ gə̄ ō. 17Ndangən̄ rī ngé tun̄ yá̰a̰ gə̄ makətūbūú i kə gō gír kojə yā bɔbə̄də́ gēé. Banī yā ngán Lebi gə̄ ɓáa ɓāl̄də́ ḭḭ dɔ kutə jōó tə́ kum kə̄ dɔɔ́ pá tá ndangən̄ rīdə́ makətūbūú kə gō ɓūtə̄ yādə́ gēé ō, kə gō kəla rāādə́ gēé ō ɓáý. 18Ndangən̄ rīdə́ i kum gotə deē yādə́ gə̄ malang, kum gotə nə̄yá̰də́ gə̄ ō, ngáńdə́ kə́ dəngam gə̄ ō, kə́ dəyá̰ gə̄ ō, de gə̄ malang ń ndin̄ gírə̄n̄ gidədə́ á asən̄ kəsa yá̰a̰ ndējə̄ kə́ táĺ gə̄ kə kum mbang gə̄ malang ní ō. 19Kə́ tām̄ yā ngé tun̄ yá̰a̰ gə̄ ń i de kə́ gír kaa yā Aaro̰ tə́ gə̄ ba ndin̄ i bembeé kə gō gidə ɓē gə̄ yā ngé tun̄ yá̰a̰ gēé ní, tə́ndān̄ de gə̄ kem ɓē gə̄ yā ngé tun̄ yá̰a̰ gə̄ ní tə́ kə rī nə̄ɓōdə́ nin̄ ō, ngán Lebi gə̄ ń ndangən̄ rīdə́ makətūbūú ní ō, núsən yādə́.
20Ejekias rāā yá̰a̰ i tītə̄ ń noō dɔ nang kə́ Juda tə́ malang. Ni-rāā i yá̰á̰ kə́ majə ō, yá̰á̰ kə́ súmūú ō, ra dɔ ndūn tə́ ō, ta kum Kɔ́ɔ̄ɓē Nə́ɓā yān tə́. 21Dan ń ni gḛy rāā loo kújə yā Kɔ́ɔ̄ɓē Nə́ɓā kə́ nujə gə̄ ō, gḛy rāā kadə̄ de gə̄ ɓōlə́n̄ ndū najə̄ yā Nə́ɓā ō, gō míndə́ Nə́ɓā gə̄ ō ní, ni-əhɔ rɔ̄n tɔgə ger̄ yá̰á̰ ń kem Nə́ɓā ndigə ní. Ni-rāā yá̰a̰ tītə̄ ń noō i kə ngarā̰ kemən gēé mámák, adə̄ Nə́ɓā rāā adə̄ kəla yān teē yá̰a̰.
Currently Selected:
2 YÁ̰A̰ GƏ̄ 31: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
