2 YÁ̰A̰ GƏ̄ 33
33
Manase o̰o̰ ɓē
(Á̰a̰ī 2 Mba 21.1-18)
1Dan ń Manase ndi mban̄g ní, ɓālə̄n i kutə gidə i jōó. Ni o̰o̰ ɓē Jerusalem ɓāl̄ kutə mí. 2Ni rāā yá̰á̰ kə́ nel̄ Kɔ́ɔ̄ɓē alé, tɔdɔ̄ ndájə̄ yá̰a̰ kə́ to yḛr kum gə̄ malang yā nápar de gə̄ ń Kɔ́ɔ̄ɓē tə̄ɓādə́ kɔ̄ɔ́ kem ɓēé ba əya̰ń loo adə̄ ngán Israel gə̄ ní. 3Loo ndɔ̄ȳ gə̄ ń bɔbə̄n Ejekias nujəń kɔ̄ɔ́ ní ni tél rāādə́ gogə́ rang. Ni rāā loo tun̄ yá̰a̰ gə̄ kə́ yā tunəń yá̰a̰ kadə̄ ɓesə̄ Baal gə̄ ō, túdə̄ kāgə̄ ɓesə̄ kə́ yā ɓōĺ gidə gə̄ ō, ɔsə non nang tə́ no tə́yō̰ gə̄ malang kə́ dɔ rā̰ tə́ tə́ rɔȳńdə́ ō, rāā kəla adə̄də́ ō. 4Kújə yā Kɔ́ɔ̄ɓē ń Kɔ́ɔ̄ɓē əda najə̄ kə́ dɔ tə́ na rīn na a to Jerusalem ngándáńg ní, Manase rāā kə́ yā tunə̄ń yá̰a̰ kadə̄ ɓesə̄ gə̄ kemeé ō. 5Ndágə loo kə́ gīr̄ gidə kújə yā Kɔ́ɔ̄ɓē ní, ni-rāā loo gə̄ tū tə́ yā tunə̄ń yá̰a̰ kadə̄ tə́yō̰ kə́ dɔ rā̰ tə́ gə̄ ō. 6Ni-aw̄ bátə́ tɔ̄l̄ ngánən kə́ dəngam gə̄ ba tun̄də́ wól loo kə́ Ben Hinom tə́. Ni-rāā mbōlí kə́ tayā tayā gə̄ ō, rāā kəga kə́ tayā tayā gə̄ ō, aw̄ ndḛḛ̄ sāá ɓē kɔdə̄ sāā gə̄ tə́ ō. Ni-rāā yá̰á̰ kə́ nel̄ Kɔ́ɔ̄ɓē aĺ gə̄ ngá̰ý adə̄ wōn̄g rāā Kɔ́ɔ̄ɓē seneé. 7Ni udə ɓesə̄ kāgə̄ kə́ tɔ́sə̄ kem kújə yā Nə́ɓā tə́ ō. Tá kété ní Nə́ɓā əda Dabid nin̄ kə ngōnən Salomo̰ na: Kújə ń toō ō, ɓē kə́ Jerusalem ō ń i ɓē ń m̄-gə̄rā dan gír ɓē gə̄ malang kə́ Israel tə́ ní rīḿ a ɓār̄ dɔ tə́ ngándáńg. 8yá̰a̰ gə̄ malang ń m̄-ndang kadə̄ yā rāā ní ō, ndū najə̄ gə̄ ō, jī bēl̄ loo rāā yá̰a̰ gə̄ ō ń m̄-ndang m-ādə̄ ngán Israel gə̄ kə ta kūl̄ Moijə ní, ré ngán Israel gə̄ əndān̄ kumdə́ gírí malang rāān̄ anī, m-ā m̄-rā sedə́ kə gúu ta teē kɔ̄ɔ́ kem ɓē ń m-ādə̄ kaadə́ gə̄ tə́ ní to̰ alé. 9Banī Manase ndóm̄ kə Juda gēé ō, kə de kə́ Jerusalem gēé ō, adə̄ rāān̄ yá̰á̰ kə́ majaĺ tɔȳ yā nápar de gə̄ ń Kɔ́ɔ̄ɓē tɔ̄l̄də́ kɔ̄ɔ́ malang ba əya̰ń loo adə̄ ngán Israel gə̄ ní. 10Kɔ́ɔ̄ɓē ɔr̄ najə̄ kə mban̄g Manase ō, kə gír deē yān gə̄ ō, banī de kə́ əndā kumən gírí gətóo. 11Loo ń noō tə́ Kɔ́ɔ̄ɓē rāā adə̄ ngol gə̄ yā ngé rɔ̄ɔ̄ gə̄ yā mban̄g kə́ Asiri reē rɔ̄ɔ̄n̄də́. Nin̄ əhɔn̄ Manase kə kuyú#33.11 Kuȳ: I kuȳ kə́ bo kə́ ta i kósə́ ngá̰ý ba kəlā i gírí., tṵ́ṵ̄nən̄ kə súĺ gində̄ nə̄ngá kasə kə́ kəga gidə naā tə́ jōó, ba aw̄n̄ seneé Babilon. 12Dan ń wur kɔl əsō dɔ Manase tə́ anī, Manase rāā Kɔ́ɔ̄ɓē Nə́ɓā yān ɓɔ́. Yá̰á̰ kə́ gōtə́ aĺ gə̄ malang ń ni-rāā ní ni ndigə ta kum Nə́ɓā yā kaan gə̄ tə́ ō, 13rāān ɓɔ́ ō. Kum Nə́ɓā o̰o̰n adə̄ rāā yá̰á̰ ń Manase dəjen ní. Nə́ɓā tél aw̄ seneé gogə́ Jerusalem ō, əndān mban̄g gogə́ ō. Loo ń noō tə́ Manase ger̄ kadə̄ i Kɔ́ɔ̄ɓē kal kógə̄ḿ beē ngóy n i Nə́ɓā kə́ rɔ̄kum ní.
14Gō yá̰a̰ gə̄ ń noō tə́ anī Manase ənī ndogə̄ mbal̄ kə́ ngāl̄ ngá̰ý kum kə̄ dɔɔ́ gidə ɓē yā Dabid tə́. Ré deē ra loo ń man̄ Gihon a əɓa tū tə́ ní tə́ anī ndogə̄ ní i kə dām̄ kə́ no ɓē tə́. Ndogə̄ ní un gō kadə wól loo kə́ Sedəron ō, teē gidə ɓē kə́ Opel tə́ ō, ba aw̄ bátə́ ugə̄ ta róbə yā kānjə̄ gə̄ tə́. Manase tə́ndā ngol áskar gə̄ kem ɓē kə́ ngan̄g ngan̄g gə̄ kə́ Juda tə́ malang ō, 15nə́ɓā kə́ mbā gə̄ ō, ɓesə̄ kāgə̄ kə́ tɔ́sə̄ ō ń aw̄ tə́ndādə́ kem kújə yā Kɔ́ɔ̄ɓē tə́ ní ɔy teēń ndágá kɔ̄ɔ́ ō, loo tun̄ yá̰a̰ gə̄ ń rāādə́ dɔ mbal̄ kújə yā Kɔ́ɔ̄ɓē tə́ ō, kem ɓē kə́ Jerusalem tə́ ō ní, nujən̄ kɔ̄ɔ́ malang ba ɔydə́ ɓōkə́də́ gidə ɓē tə́ ndágə́ kɔ̄ɔ́ ō. 16Ni-tél rāā loo tun̄ yá̰a̰ yā Kɔ́ɔ̄ɓē gogə́ rang ba tun̄ yá̰a̰ gə̄ kə́ tām̄ yā kem kógə̄ḿ tə́ ō, yá̰a̰ gə̄ kə́ yā ɓōkə́nń Kɔ́ɔ̄ɓē tɔ̄ȳ ō dɔ tə́. Ni-əda Juda gə̄ kadə̄ rɔȳn̄ Kɔ́ɔ̄ɓē Nə́ɓā yā Israel ō. 17Ɓá tā ba dan ngeé ń noō tə́ ní ngán Israel gə̄ a tunə̄n̄ yá̰a̰ i kə̄ loo gə̄ tə́ loo ndɔ̄ȳ gə̄ tə́ ɓáý, banī i yā rɔȳń Kɔ́ɔ̄ɓē Nə́ɓā yādə́ ngóy.
18Ndangən̄ gotə yá̰á̰ kə́ rang gə̄ ń Manase rāā ní ō, najə̄ ń ɔr̄ kə Nə́ɓā yānneé ní ō, najə̄ gə̄ ń ngé koō ta gə̄ ədanən̄ kə rī Kɔ́ɔ̄ɓē Nə́ɓā yā Israeleé ní ō, i kem makətūbə̄ kəla rāā mban̄g gə̄ kə́ Israel tə́. 19Ba najə̄ ń ɔr̄ kem ndɔ̄ȳ yān tə́ ō, loo koō ń Nə́ɓā oō ndūn ba rāā yá̰á̰ ń dəjen ní ō, yá̰á̰ kə́ majaĺ gə̄ malang ń ni-rāā ō, háĺ kə́ gōtə́ aĺ gə̄ ń rāā kə Nə́ɓāá ní ō, rī loo gə̄ ń ni-rāā loo ndɔ̄ȳ gə̄ tū tə́ ō, túdə̄ kāgə̄ ɓesə̄ kə́ yā ɓōĺ gidə gə̄ tū tə́ ō, túdə̄ yá̰á̰ kə́ tɔ́sə̄ ba rāādə́ kum gotə yá̰a̰ gə̄ tū tə́ ō, pá tá kadə̄ tél ger̄ yá̰a̰ rāān kə́ majaĺ gə̄ ta kum Kɔ́ɔ̄ɓē tə́ ní, ndangən̄ yá̰a̰ gə̄ ń noō malang i kem makətūbə̄ ń rīn na i kəla gə̄ ń Hojai rāā ní tə́.
20Dan ń Manase oy ní dubə̄nən̄ ndogó looneé. I ngōnən Amon n o̰o̰ ɓē gotən tə́ ní.
Amon o̰o̰ ɓē
(Á̰a̰ī 2 Mba 21.19-26)
21Dan ń Amon ndi mban̄g ní ɓālə̄n i kutə jōó gidə i jōó. Ni o̰o̰ ɓē Jerusalem ɓāl̄ jōó. 22Rāā yá̰á̰ kə́ nel̄ Kɔ́ɔ̄ɓē alé tītə̄ yā bɔbə̄n Manase: Ɓesə̄ gə̄ ń bɔbə̄n túdə̄ ní ni tun̄ yá̰a̰ adə̄də́ ō, rɔȳdə́ ō. 23Ni ger̄ majaĺ yān ta kum Kɔ́ɔ̄ɓē tə́ ō, rāān ɓɔ́ ō, tītə̄ yā bɔbə̄n Manase alé, banī rāā yá̰á̰ kə́ majaĺ tɔȳ dɔ yā bɔbə̄n ɓáý. 24Ngé kəla yān gə̄ oōn̄ naā dɔn tə́ ba tɔ̄l̄nən̄ kem kújə mban̄g yān tə́. 25Banī Juda gə̄ tɔ̄lə̄n̄ de gə̄ ń oōn̄ naā dɔn tə́ ní ō, əndān̄ ngōnən Josias mban̄g gotən tə́ ō.
Currently Selected:
2 YÁ̰A̰ GƏ̄ 33: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
