2 YÁ̰A̰ GƏ̄ 30
30
Ejekias əla gō Israel gə̄ tə́ malang kadə̄ reē rāān̄ nāā Pákə
1-5Mban̄g Ejekias oōn̄ naā kə de kə́ bo yān gə̄ ō, ngé kán̄ naā kə́ Jerusalem malang ō, yā rāā nāā Pákə kə ndɔ̄ ń ɔjən̄neé ní alé, tɔdɔ̄ kutə ngé tun̄ yá̰a̰ gə̄ ń tə́gon̄ rɔ̄də́ ní asə aĺ ō, ngán Israel gə̄ kánə̄n̄ naā Jerusalem aĺ ō. Mban̄g ō, ngé kán̄ naā gə̄ ō, a̰a̰n̄ kadə̄ gír̄ ní i gír̄ kə́ majə. Loo ń noō tə́ nin̄ ndigən̄ ɓāŕ de gə̄ kə́ gō nang kə́ Israel tə́ malang, əla gír dām̄ mbɔ́r ɓē kə́ geleé tə́ bátə́ dām̄ mbɔ́r ɓē kə́ ko̰ó̰ tə́ kadə̄ reēn̄ Jerusalem rāā nāā Pákə tə́. Tām̄ kété ní i de kə́ ngá̰ý aĺ gə̄ n rāān̄ nāā Pákə ní kə gō ń ndangən̄neé kem makətūbūú ní. Tā anī mban̄g əla gō de gə̄ tə́ dɔ nang kə́ Israel tə́ malang ō, dɔ nang kə́ Juda tə́ ō, kadə̄ reē rāān̄ nāā Pákə ní yā rɔȳń Kɔ́ɔ̄ɓē Nə́ɓā yā Israel kem kújə yā Kɔ́ɔ̄ɓē tə́. Ni-ndang makətūbə̄ əlań gō Epəraim gə̄ tə́ gə̄gē Manase gə̄ tə́ gə̄gē. 6Makətūbə̄ gə̄ ń mban̄g nin̄ kə de kə́ bo yān gēé ndangən̄ ní, ngámbang kəla gə̄ aw̄n̄neé kə gō ɓē gə̄ kə́ Israel tə́ malang ō, gō ɓē gə̄ kə́ Juda tə́ ō. Nin̄ ədan̄ de gə̄ kə gō ndū mbangāá na: Ngán Israel gə̄, sḭḭ̄ ń ī-teēī ta yo tə́ jī mban̄g gə̄ kə́ Asiri tə́ ní, ī-tél ī-reēī gogə́ rɔ̄ Kɔ́ɔ̄ɓē Nə́ɓā yā Abəraham ō, Isaak ō, Israel ō tə́, anī ni a tél yā reē rɔ̄sí tə́ ō. 7Ī-lōōī ndájə̄ kaasí gə̄ ō, ngákó̰ó̰sí gə̄ ō ń rāān̄ háĺ kə́ gōtə́ aĺ kə Kɔ́ɔ̄ɓē Nə́ɓā yā kaadə́ gə̄ ní. Ni əladə́ kem jī madə̄ ba̰ā̰də́ gə̄ tə́ adə̄ nujən̄ sedə́ sák sák kɔ̄ɔ́ tītə̄ ń sḭḭ̄ kɔ́ gə̄ á̰a̰īń ní. 8Ngɔlaā ní ī-lōōī rāā dɔ ngan̄g tītə̄ yādə́ ba ōōī ta Kɔ́ɔ̄ɓē. ī-tél ī-reēī gogə́ loo kə́ táĺ yān ń ɔr̄ kamə̄n tayā kə́ njɔ́ḿ gə̄ tə́ tə́ ní ō, ādə̄ sḭḭ̄ i ngé rāā kəla gə̄ yā Kɔ́ɔ̄ɓē Nə́ɓā yāsí ō. Loo ń noō tə́ wōn̄g ń rāān sesí ngá̰ý ní a tetə. 9Ré ī-tél ī-reēī gogə́ rɔ̄ Kɔ́ɔ̄ɓē tə́ anī, de gə̄ ń ɔyn̄ ngákó̰ó̰sí gə̄ ō, ngáńsí gə̄ ō, aw̄n̄ sedə́ ɓəloó ní kumdə́ a o̰o̰də́ sedə́, adə̄ a əya̰n̄də́ kadə̄ a tél a reēn̄ gogə́ dɔ nang ń toō tə́. Tɔdɔ̄ Kɔ́ɔ̄ɓē Nə́ɓā yāsí i nge kem majə ō, kumən a o̰o̰n kə deē ō, adə̄ ré ī-tél ī-reēī gogə́ rɔ̄n tə́ anī, a tūr̄ gidən tasí tə́ alé.
10Ngámbang kəla gə̄ ní aw̄n̄ kə gō ɓē gə̄ kə́ dɔ nang yā Epəraim tə́ ō, Manase tə́ ō, bátə́ ɓē gə̄ kə́ dɔ nang yā Jabulo̰ tə́. Banī de gə̄ əgōn̄də́ ō, lúrə̄n̄də́ ō. 11Ɓá tā ba de kə́rēý gə̄ kə́ gír ɓē yā Aser tə́ ō, Manase tə́ ō, Jabulo̰ tə́ ō, tél gerə̄n̄ kadə̄ rāān̄ i yá̰á̰ kə́ gōtə́ alé, adə̄ aw̄n̄ Jerusalem. 12Kɔ́ɔ̄ɓē rāā kəla kem de gə̄ tə́ dɔ nang kə́ Juda tə́ ō, adə̄ de gə̄ malang gḛyn̄ rāā yá̰á̰ ń mban̄g ō, de kə́ bo gə̄ ō, ədan̄ kə gō ndū Kɔ́ɔ̄ɓēé ní.
Ejekias rāā nāā Pákə
13Kósə de gə̄ kánə̄n̄ naā Jerusalem kem nāā kə́ nge ko̰ jōó tə́, yā rāā nāā yā mápa kə́ kanjə̄ kaa. De gə̄ ń kánə̄n̄ naā ní i kósə de kə́ sḛ́ý beé tə́ aĺ gə̄. 14Nin̄ əlan̄ gír nujə loo tun̄ yá̰a̰ kadə̄ ɓesə̄ gə̄ kə́ Jerusalem ō, loo róō kajaja yādə́ gə̄ malang ō, ba ɔy aw̄ ɓōkə́n̄ wól loo kə́ Sedəron tə́. 15Nin̄ tɔ̄lə̄n̄ dā̰ Pákə gə̄ kə ndɔ̄ kə́ nge ko̰ kutə gidə i sɔ́ yā nāā kə́ nge ko̰ jōó. Rɔ̄ ngé tun̄ yá̰a̰ gə̄ ō, ngán Lebi gə̄ ō sɔl̄də́, adə̄ tə́gon̄ rɔ̄də́ ba ɔyn̄ dā̰ kə́ yā róō kə taá gə̄ aw̄n̄neé kem kújə yā Kɔ́ɔ̄ɓē tə́. 16Nin̄ ran̄ loo kəla yādə́ gə̄ tə́ tītə̄ ń i jī bēl̄ loo rāādə́ ní, kə gō ndū najə̄ yā Moijə ń i deē yā Nə́ɓā ní. Ngán Lebi gə̄ i ngé taā mósə dā̰ kə́ tun̄ gə̄ kadə̄ ngé tun̄ yá̰a̰ gə̄, ɓáa nin̄ gə̄ ń toō i ngé taā ɓōkə́ dɔ loo tun̄ yá̰á̰ tə́. 17De gə̄ ngá̰ý dan ngé kán̄ naā gə̄ tə́ tə́gon̄ rɔ̄də́ alé, adə̄ unjə̄n̄ njáý njáý yā rāań yá̰á̰ kə́ yā ɓōĺ gidə yā Kɔ́ɔ̄ɓē alé. I tām̄ najə̄ ń noō tə́ n ngán Lebi gə̄ əndān̄neé rɔ̄də́ ta kəla kəja míndə dā̰ Pákə gə̄ tə́ kum gotədə́ ní. 18De gə̄ ngá̰ý unjə̄n̄ njáý njáý alé. Ngá̰ý gə̄ i de kə́ gír ɓē yā Epəraim tə́ gə̄ ō, Manase tə́ gə̄ ō, Isakar tə́ gə̄ ō, Jabulo̰ tə́ ō. Adə̄ nin̄ əsan̄ dā̰ Pákə i kə gō ń ndangən̄neé kem makətūbūú ní alé. Banī Ejekias rāā Nə́ɓā ɓɔ́ tām̄ yādə́ tə́ əda na: 19Kɔ́ɔ̄ɓē, Nə́ɓā yā kaají gə̄, ḭ̄ ń i de kə́ majə ní, de gə̄ malang ń ɓōkə́n̄ rɔ̄də́ a sāānī kə ngarā̰ kemdə́ mámák ní, ká ré nin̄ unjə̄n̄ njáý njáý tām̄ yā yá̰á̰ kə́ táĺ gə̄ tə́ aĺ gə̄gē anī, ī-mā̰ȳ rɔ̄í dɔdə́ tə́. 20Kɔ́ɔ̄ɓē rāā yá̰á̰ ń Ejekias dəjen ní, adə̄ lōō gír rāā ngán Israel gə̄ yá̰á̰ kə́ tōr̄ tə́.
21Ngán Israel gə̄ ń əngen̄ naā Jerusalem ní rāān̄ nāā mápá kə́ kanjə̄ kaa ndɔ̄ sīrí kə rɔ̄nel̄ kə́ ngá̰ý. Ngán Lebi gə̄ ō, ngé tun̄ yá̰a̰ gə̄ ō, tɔ̄ȳn̄ Kɔ́ɔ̄ɓē kə dɔ ndɔ̄ gə̄ kə yá̰á̰ kə́ ɓār̄ ngá̰ý gə̄, rɔȳn̄neé Kɔ́ɔ̄ɓē. 22Ngán Lebi gə̄ malang ń gerə̄n̄ yá̰a̰ yā Kɔ́ɔ̄ɓē majə ní, Ejekias ɔr̄ najə̄ sedə́ adə̄ńdə́ tɔ́gə. De gə̄ rāān̄ nāā ndɔ̄ sīrí, ndējə̄n̄ yá̰a̰ tun̄ gə̄ kə́ tām̄ yā kem kógə̄ḿ tə́ ō, ndadə̄ adə̄n̄ Kɔ́ɔ̄ɓē Nə́ɓā yā kaadə́ gə̄ ō. 23Gō tə́ anī ngé kán̄ naā gə̄ ndigən̄ kadə̄ ndɔ̄ nāā ní kə to ndɔ̄ sīrí ɓáý, adə̄ rāān̄ nāā ní ndɔ̄ sīrí ɓáý kə rɔ̄nelēé. 24Tɔdɔ̄ mban̄g Ejekias adə̄ ngé kán̄ naā gə̄ man̄g kə́ bəra gə̄ dūbú ō, batə̄ gə̄ dūbú sīrí ō, de kə́ bo gə̄ adə̄n̄də́ man̄g kə́ bəra gə̄ dūbú ō, batə̄ gə̄ dūbú kutə ō. Tá ngé tun̄ yá̰a̰ gə̄ ngá̰ý tə́gon̄ rɔ̄də́ ō. 25Rɔ̄ de gə̄ malang nel̄də́, adə̄ i Juda gə̄ ō, ngé tun̄ yá̰a̰ gə̄ ō, ngán Lebi gə̄ ō, de gə̄ ń ḭḭn̄ ɓē ko̰o̰ yā Israel tə́ reēn̄ kə rī rāā nāá ní ō, Israel gə̄ ń ndɔ́tə̄n̄ ɓē reē ndin̄ dɔ nang kə́ Juda tə́ ní ō. 26Rɔ̄nel̄ i ngá̰ý kem ɓē kə́ Jerusalem tə́, tām̄ əla gír dɔ ɓāl̄ yā Salomo̰ kə́ ngōn̄ Dabid ń i mban̄g kə́ Israel tə́ ní, yá̰á̰ kə́ beē gətóo kem ɓē kə́ Jerusalem tə́ ɓáý. 27Gō tə́ anī ngán Lebi kə́ ngé tun̄ yá̰a̰ gə̄ ḭḭn̄ dɔɔ́ ba tɔ́rə̄n̄ tadə́ dɔ de gə̄ tə́. Ndɔ̄ȳ yādə́ aw̄ bátə́ teē dɔ rā̰ ń i loo ndi kə́ táĺ yā Nə́ɓā ní tə́ ō, Nə́ɓā rāā yá̰á̰ ń dəjen̄ ní ō.
Currently Selected:
2 YÁ̰A̰ GƏ̄ 30: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
