2 YÁ̰A̰ GƏ̄ 29
29
Ejekias o̰o̰ ɓē. Tə́gon̄ kújə yā Kɔ́ɔ̄ɓē
(Á̰a̰ī 2 Mba 18.1-4)
1Dan ń Ejekias ndi mban̄g ní ɓālə̄n i kutə jōó gidə i mí. Ni o̰o̰ ɓē Jerusalem ɓāl̄ kutə jōó gidə i ndōhó. Rī kó̰o̰n na i Abia, i ngōn̄ Jakari. 2Ejekias rāā yá̰á̰ kə́ súmūú ta kum Kɔ́ɔ̄ɓē tə́ tītə̄ yā kaan Dabid jéjé.
3Kem nāā kə́ ta kəga dɔ tə́ yā ɓāl̄ ko̰o̰ ɓē yān kə́ ta kəga dɔ tə́ ní, ni teē ta kújə yā Kɔ́ɔ̄ɓē ō, tél rāā ta róbə́ kújə yā Kɔ́ɔ̄ɓē gogə́ rang ō. 4Ni ɓāŕ ngé tun̄ yá̰a̰ gə̄ o, ngán Lebi gə̄ ō, ɔsə dɔdə́ naā tə́ ndágə loo kə́ dūn̄ tə́, 5ba ədadə́ na: Ngán Lebi gə̄, ōōī najə̄ ń m-ā m-ə́dásí ní: Ngɔlaā ní ī-tə́goī rɔ̄sí ō, ī-tə́goī kújə yā Kɔ́ɔ̄ɓē Nə́ɓā yā kaasí gə̄ ō. Yá̰a̰ kə́ yḛr gə̄ malang kə́ kem loo kə́ táĺ tə́ ní ɔ́yiī kɔ̄ɔ́ ō. 6Tɔdɔ̄ bɔbə̄jí gə̄ rāān̄ yá̰á̰ kə́ gōtə́ aĺ ō, rāān̄ majaĺ ta kum Kɔ́ɔ̄ɓē Nə́ɓā yājí tə́ ō, nin̄ əya̰nən̄ kɔ̄ɔ́, unən̄ kumdə́ kɔ̄ɔ́ ta kújə yān tə́ ō, tūrə̄n̄ gidədə́ adə̄nən̄ ō. 7Ngōn̄ kújə́ kə́ ta róbə́ tə́ ní gə̄gē a utə̄n̄ ta kɔ̄ɔ́ ō, tɔ̄lə̄n̄ hor gə̄ kɔ̄ɔ́ ō, róōn̄ ndujə̄ yá̰á̰ kə́ kotə majə ō, yá̰á̰ kə́ yā tun̄ kə taá ō, kem loo kə́ táĺ tə́ adə̄n̄ Nə́ɓā yā Israel to̰ aĺ ō. 8Loo ń noō tə́ wōn̄g rāā Kɔ́ɔ̄ɓē kə ɓē kə́ Jerusalem ō, kə dɔ nang kə́ Juda ō. Yá̰á̰ ń ni-rāā sedə́ ní i yá̰á̰ kə́ to ndíl ka̰ȳ ō, kə́ to kɔr kum ō, kə́ to kadə̄ deē lurdə́ ō, tītə̄ ń sḭḭ̄ kɔ́ gə̄ á̰a̰īń kə kumsí ní. 9I yá̰á̰ ń noō n rāā adə̄ bɔbə̄jí gə̄ oyn̄neé yo kaskar ō, əhɔn̄neé ngánjí kə́ dəngam gə̄ ō, kə́ dəyá̰ gə̄ ō, nə̄yá̰jí gə̄ ō, aw̄n̄neé sedə́ ɓəlo tə́ ní. 10Ngɔlaā ní m̄-sāā əhɔ madə̄ naā kə Kɔ́ɔ̄ɓē Nə́ɓā yā Israel, yā kadə̄ wōn̄g ń rāān sejí ngá̰ý ní tetəń. 11Ní ngánə́ḿ gə̄, ī-lōōī rāā yá̰a̰ jingəling, tɔdɔ̄ i sḭḭ̄ n Kɔ́ɔ̄ɓē gə̄rāsí kadə̄ ī-raī non tə́ ī-rāāī kəla ādə̄niī ō, kadə̄ sḭḭ̄ i de kə́ bo yān gə̄ ō, kadə̄ ī-róōī ndujə̄ yá̰á̰ kə́ kotə majə ādə̄niī ō ní.
12 Ngán Lebi gə̄ ń ndɔ́tə̄n̄ kə̄ kété ní, ngé kə́ gír kaa yā Kehat tə́ gə̄ i Mahat kə́ ngōn̄ Amasia ō, Joel kə́ ngōn̄ Ajaria ō, Ngé kə́ gír kaa yā Merari tə́ gə̄ I Kis kə́ ngōn̄ Abədi ō, Ajaria kə́ ngōn̄ Yehalelel ō. Ngé kə́ gír kaa yā Gerson tə́ gə̄ i Yoa kə́ ngōn̄ Jima ō, Eden kə́ ngōn̄ Yoa ō. 13Ngé kə́ gír kaa yā Elisapan tə́ gə̄ i Simri ō, Yeyel ō. Ngé kə́ gír kaa yā Asap tə́ gə̄ i Jakari ō, Matania ō. 14Ngé kə́ gír kaa yā Heman tə́ gə̄ i Yehiel ō, Simei ō. Ngé kə́ gír kaa yā Yedutun tə́ gə̄ i Semaya ō, Ujiel ō. 15Nin̄ kánə̄n̄ ngákó̰ó̰də́ gə̄ kə́ gír kaa yādə́ gə̄ tə́ ba nin̄ malang tə́gon̄ rɔ̄də́. Gō tə́ anī aw̄n̄ kem kújə yā Kɔ́ɔ̄ɓē tə́ tītə̄ ń mban̄g ədań kə gō ndū Kɔ́ɔ̄ɓēé ní yā tə́gó kújə yā Kɔ́ɔ̄ɓē. 16Ngé tun̄ yá̰a̰ gə̄ udən̄ kem kújə yā Kɔ́ɔ̄ɓē tə́ yā tə́go kem, nin̄ teēn̄ kə yá̰á̰ kə́ yḛr gə̄ malang ń əngen̄ kemeé ní tə́ndān̄ ndágə loo kə́ gīr̄ gidə kújə yā Kɔ́ɔ̄ɓē tə́. Gō tə́ anī ngán Lebi gə̄ langən̄ ta ɔy teēn̄neé ndágá aw̄ ɓōkə́n̄ wól loo kə́ Sedəro̰ tə́. 17Əlan̄ gír tə́go kem kújə́ ní i kə ndɔ̄ kə́ ta kəga dɔ yā nāā kə́ ta kəga dɔɔ́. Kə ndɔ̄ nāā kə́ nge ko̰ sɔ́sɔ́ anī ugə̄n̄ ngōn̄ kújə́ kə́ ta róbə́ tə́. Nin̄ tə́gon̄ kújə yā Kɔ́ɔ̄ɓē ndɔ̄ sɔ́sɔ́. Tɔ̄lə̄n̄ ta kem nāā kə́ ta kəga dɔ tə́, kə ndɔ̄ kə́ nge ko̰ kutə gidə i mehḛ́ yā nāá.
18Gō tə́ anī aw̄n̄ ɓē mban̄g Ejekias ba ədanən̄ na n-tə́gon̄ kújə yā Kɔ́ɔ̄ɓē oy kɔ̄ɔ́. Na n-tə́gon̄ loo kə́ yā tun̄əń yá̰a̰ kə́ yā róō horoó kə taá ō, yá̰a̰ rāā kəla kə tū tə́ gə̄ malang ō, tábəl ń a ɓōkə́n̄ mápá kə́ ndējə̄ gə̄ dɔ tə́ ní na n-tə́gon̄ ō, na n-tə́gon̄ yá̰a̰ rāā kəla kə́ tū tə́ gə̄ malang ō. 19Yá̰a̰ rāā kəla kə́ táĺ gə̄ ń mban̄g Akaj nujəń dan ń a mbātə́nń ndū najə̄ gə̄ yā Nə́ɓā ɓāl̄ ko̰o̰ ɓē yān tə́ ní, na n-tél na n-tə́gon̄ ō, na n-tél na n-tə́ndān̄də́ gogə́ ō, na n-ɔrə̄n̄ kam̄də́ tayā ō. Na n-tə́ndān̄ yá̰a̰ gə̄ ní ta loo tun̄ yá̰a̰ yā Kɔ́ɔ̄ɓē tə́.
20Mban̄g Ejekias ḭḭ dɔɔ́ kə gír looí ɓatə ɔsə dɔ ngār gə̄ kə́ kem ɓēé naā tə́ ba aw̄ sedə́ kem kújə yā Kɔ́ɔ̄ɓē tə́. 21Reēn̄ kə man̄g kə́ bəra gə̄ sīrí ō, bal batə̄ gə̄ sīrí ō, ngán batə̄ gə̄ sīrí ō, bal bə̄yā̰ gə̄ sīrí kə́ yā tun̄ tām̄ majaĺ yā de kə́ ndogó mbangāá gə̄ tə́ ō, majaĺ kə́ loo kə́ táĺ tə́ ō, majaĺ yā Juda gə̄ tə́ ō. Gō tə́ anī mban̄g əda ngé tun̄ yá̰a̰ gə̄ ń i ngán Aaro̰ gə̄ ní na kə tunə̄n̄ yá̰a̰ gə̄ ní dɔ loo tun̄ yá̰a̰ yā Kɔ́ɔ̄ɓē tə́. 22Tā anī əjan̄ míndə man̄g gə̄ ní adə̄ ngé tun̄ yá̰a̰ gə̄ taān̄ mósə́də́ aw̄ ɓōkə́n̄ dɔ loo tun̄ yá̰á̰ tə́ ō, əjan̄ míndə bal batə̄ gə̄ ba ɓōkə́n̄ mósə́də́ dɔ loo tun̄ yá̰á̰ tə́ ō, əjan̄ míndə ngán batə̄ gə̄ ba ɓōkə́n̄ mósə́də́ dɔ loo tun̄ yá̰á̰ tə́ ō. 23Gō tə́ anī reēn̄ kə bal bə̄yā̰ gə̄ kə́ yā tun̄ tām̄ yā majaĺ tə́ ní no mban̄g tə́ ō, no ngé kán̄ naā gə̄ tə́ ō, adə̄ tə́ndān̄ jīdə́ dɔ tə́. 24Ngé tun̄ yá̰a̰ gə̄ əjan̄ míndə bal bə̄yā̰ gə̄ ní ba ɓōkə́n̄ mósə́də́ dɔ loo tun̄ yá̰á̰ tə́ utə̄n̄neé dɔ majaĺ yā Israel gə̄ malang. Tɔdɔ̄ mban̄g əda gān̄g kadə̄ yá̰a̰ tun̄ kə́ róō horoó kə taá ō, yá̰a̰ tun̄ kə́ tām̄ yā majaĺ tə́ ō ní i tām̄ yā Israel gə̄ tə́ malang.
25Gō tə́ anī mban̄g tə́nī ngán Lebi gə̄ kem kújə yā Kɔ́ɔ̄ɓē tə́ kə gində̄ kə́ laa gə̄ kə́ yā kənda naā tə́ kadə̄ ɓār̄ gēé ō, kə kənde gə̄ kə́ kəlādə́ i ngá̰ý gēé ō, kə ngé kə́ kəlādə́ i ngá̰ý aĺ gēé ō, jīdə́ tə́, kə gō ń Dabid ō, Gad nge ka̰a̰ yá̰a̰ yā mban̄g ō, Natan nge koō ta ō, ədan̄neé kadə̄ rāān̄ ní. Tɔdɔ̄ i Kɔ́ɔ̄ɓē n əda kadə̄ yā rāā ní. Ni-əndā najə̄ ní i ta ngé koō ta yān gə̄ tə́ kadə̄ ədan̄. 26Dan ń ngán Lebi gə̄ aw̄ ran̄ kə yá̰á̰ kə́ ɓār̄ gōsə̄ gə̄ ń Dabid rāā ní ō, ngé tun̄ yá̰a̰ gə̄ aw̄ ran̄ kə bərúnjə gēé ō oy anī, 27Ejekias əda kadə̄ tunə̄n̄ yá̰a̰ kógə̄ḿ kə taá dɔ loo tun̄ yá̰á̰ tə́. Dan ń əlan̄ gír tun̄ anī unən̄ pā kə́ yā rɔȳń Kɔ́ɔ̄ɓē ō, kɔ̄rə́n̄ bərúnjə gə̄ ō, ugən̄ yá̰á̰ kə́ ɓār̄ gōsə̄ gə̄ yā Dabid mban̄g kə́ Israel tə́ ō. 28Ngé kán̄ naā gə̄ malang ɔsən̄ nodə́ nang tə́ yā rɔȳń Kɔ́ɔ̄ɓē ō, gōsə̄ gə̄ a̰a̰n̄ najə̄ kənī pā ō kɔ̄ŕ bərúnjə ō, kə́ njɔ́ḿ gə̄ tə́ adə̄ gír tun̄ yá̰á̰ kə́ yā tun̄ kə taá gāngəń. 29Dan ń gír gān̄g anī, mban̄g ō, de gə̄ malang ń seneé ní ō, ɔsən̄ nodə́ nang tə́. 30Gō tə́ anī mban̄g Ejekias ō, ngār gə̄ ō, mērə̄n̄ ngán Lebi gə̄ tɔ̄ȳ Kɔ́ɔ̄ɓē ɓáý to̰ kə pā gə̄ ń Dabid rāā ní ō, kə pā gə̄ ń Asap nge ka̰a̰ yá̰a̰ rāā ní ō, adə̄ nin̄ tɔ̄ȳn̄ Kɔ́ɔ̄ɓē kə rɔ̄nelēé ō, tétə̄n̄ kejədə́ ba ɔsən̄ nodə́ nang tə́ rɔȳn̄neé Kɔ́ɔ̄ɓē ō. 31Mban̄g Ejekias tél un najə̄ ɔr̄ ɓáý to̰ əda na: Ngɔlaā ní sḭḭ̄ gə̄ ń āwī kə yá̰a̰ gə̄ kə́ yā ndējə̄ Kɔ́ɔ̄ɓē jīsí tə́ ní, ī-reēī kə yá̰a̰ tun̄ yāsí gə̄ kə́ tām̄ yā kem kógə̄ḿ tə́ ō, yá̰a̰ tun̄ yāsí gə̄ kə́ yā tɔ̄yiń Kɔ́ɔ̄ɓē ō, kem kújə yā Kɔ́ɔ̄ɓē tə́. Anī ngé kán̄ naā gə̄ reēnneé. Ngé gə̄ ń kem ndaa yādə́ tɔȳ yā madə̄də́ gə̄ ní ndējə̄n̄ Kɔ́ɔ̄ɓē yá̰a̰ tun̄ gə̄ kə́ yā róō horoó kə taá gə̄ ō. 32Yá̰a̰ tun̄ kə́ yā róō kə taá gə̄ ń ngé kán̄ naā gə̄ reē ndējə̄n̄ Kɔ́ɔ̄ɓē ní man̄g kə́ bəra gə̄ malang i kutə sīrí ō, bal batə̄ gə̄ i ɓú ō, ngán batə̄ gə̄ i ɓú jōó ō, 33yá̰a̰ tun̄ kə́ rang gə̄ ń ndējə̄n̄ Kɔ́ɔ̄ɓē ní man̄g gə̄ i ɓú mehḛ́ ō, batə̄ gə̄ kə bə̄yā̰ gə̄ i dūbú mətá ō. 34Kutə ngé tun̄ yá̰a̰ gə̄ asə toó dā̰ kə́ yā tun̄ kə taá gə̄ ní malang alé, adə̄ ngákó̰ó̰də́ kə́ ngán Lebi gə̄ reē dḭḭ̄n̄də́ adə̄ gír kəla tóo dā̰ gāngəń ō, adə̄ ngé tun̄ yá̰á̰ kə́ rang gə̄ tə́gon̄neé rɔ̄də́ oy ō. Tɔdɔ̄ ngán Lebi gə̄ tə́gon̄ rɔ̄də́ láẃ ngá̰ý tɔȳ ngé tun̄ yá̰a̰ gə̄. 35Tá ɓáý to̰ ní yá̰a̰ tun̄ kə́ yā róō kə taá gə̄ i ngá̰ý pá, tá kasə nduú kə́ yā tə́te dɔ tə́ gə̄ i kadə tə́ ɓáý, tá dā̰ gə̄ ń tunə̄n̄ tām̄ yā kem kógə̄ḿ tə́ ní yibə̄də́ kə́ yā róō dɔ loo tun̄ yá̰á̰ tə́ i noó ɓáý to̰. I beé n rāān̄neé adə̄ kəla kə́ kem kújə yā Kɔ́ɔ̄ɓē tə́ tél majəń gogə́ rang ní. 36Yá̰á̰ ń Nə́ɓā rāā tām̄ yā ngán Israel gə̄ tə́ ní adə̄ Ejekias rɔ̄nel̄ ō, adə̄ ngán Israel gə̄ malang rɔ̄nel̄ ō, tɔdɔ̄ rāān̄ yá̰á̰ ní i kə̄ ta jī tə́ kanjə̄ kadə̄ deē nɔ̄m̄ kemən kété.
Currently Selected:
2 YÁ̰A̰ GƏ̄ 29: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
