2 YÁ̰A̰ GƏ̄ 28
28
Akaj o̰o̰ ɓē
1Dan ń əndān̄ Akaj mban̄g ní ɓālə̄n i kutə jōó. Ni o̰o̰ ɓē ɓāl̄ kutə gidə i mehḛ́ kem ɓē kə́ Jerusalem tə́. Ni-rāā yá̰á̰ kə́ súmūú ta kum Kɔ́ɔ̄ɓē tə́ tītə̄ yā kaan Dabid alé, 2ndájə̄ i hál mban̄g kə́ Israel tə́ gə̄. Aw̄ bátə́ udə ɓesə̄ tām̄ yā Baal gə̄ tə́. 3Ni-rāā yá̰á̰ kə́ yḛr kum gə̄ yā nápar de gə̄ ń Kɔ́ɔ̄ɓē tə̄ɓādə́ kɔ̄ɔ́ ba əya̰ń loo adə̄ ngán Israel gə̄ ní: Róō kajaja wól loo kə́ Ben Hinom tə́ ō, róō ngánən kə́ dəngam gə̄ horoó ō. 4Ni tun̄ yá̰a̰ ō, róō kajaja ō, loo ndɔ̄ȳ gə̄ tə́ ō, gír kāgə̄ gə̄ kə́ mbīdə́ əga ku gə̄ tə́ ō.
5Kɔ́ɔ̄ɓē Nə́ɓā yān əlan kem jī mban̄g kə́ Aram tə́ adə̄ tetən rɔ̄ɔ̄ ō, əhɔ deē yān gə̄ ngá̰ý ɓəlo tə́ ba aw̄ sedə́ Damas ō. Əlan kem jī Peka kə́ ngōn̄ Remalia ń i mban̄g kə́ Israel tə́ ní ō, adə̄ tetən rɔ̄ɔ̄ tetə kə́ to ɓōĺ ngá̰ý. 6Peka tɔ̄l̄ go̰ rɔ̄ɔ̄ kə́ Juda tə́ gə̄ dūbú ɓú kə dūbú kutə jōó ndɔ̄ kógə̄ḿ beē, tɔdɔ̄ əya̰n̄ Kɔ́ɔ̄ɓē Nə́ɓā yā kaadə́ gə̄ kɔ̄ɔ́. 7Jikəri ń i de kə́ ngan̄g kə́ Epəraim tə́ ní tɔ̄l̄ Maseya ngōn̄ mban̄g ō, Ajrikam ngār kə́ ndogó mbangāá ō, Elkana pajā yā mban̄g ō. 8Ngán Israel gə̄ əhɔn̄ ngákó̰ó̰də́ gə̄ dūbú ɓú jōó ɓəlo tə́, əhɔn̄ i dəyá̰ gə̄ ō, ngáń kə́ dəngam gə̄ ō, ngáń kə́ dəyá̰ gə̄ ō, ɔyn̄ yá̰a̰ kənge gə̄ ń əhɔn̄ ta rɔ̄ɔ̄ tə́ ní ngá̰ý aw̄n̄neé Samari ō.
9Nge koō ta yā Kɔ́ɔ̄ɓē kógə̄ḿ ndi Samari noó, rīn na i Oded. Ni teē tə́nī ta ngé rɔ̄ɔ̄ kə́ Israel tə́ gə̄ ń tél a reēn̄ kə̄ ɓēé ní ba ədadə́ na: Wōn̄g rāā Kɔ́ɔ̄ɓē Nə́ɓā yā kaasí gə̄ kə Juda gēé adə̄ əladə́ kem jīsí tə́. Banī wōn̄g ń rāāsí á ī-tɔ̄līineé de kə́rēý gə̄ dandə́ tə́ ní to ɓōĺ ngá̰ý adə̄ aw̄ bátə́ ugə̄ dɔ rā̰ tə́. 10Tá ń toō ɓáa dəngam gə̄ kə dəyá̰ gə̄ kə́ Juda tə́ ō, Jerusalem tə́ ō ń toō ɔ̄rī i najə̄ rāādə́ ɓəlo yāsí gə̄ tə́ ɓáý to̰. Ní sḭḭ̄ kɔ́ gə̄ kə dɔsí ī-rāāī yá̰á̰ kə́ gōtə́ aĺ gə̄ kə Kɔ́ɔ̄ɓē Nə́ɓā yāsí adə̄ najə̄ i dɔsí tə́ aĺ a? 11Ngɔlaā ní ōōī najə̄ yāḿ, ngákó̰ó̰sí gə̄ ń ə́hɔīdə́ ɓəlo tə́ ní ə́ya̰īdə́ dɔɔ́ ādə̄ aw̄n̄, tɔdɔ̄ wōn̄g rāā Kɔ́ɔ̄ɓē sesí ngá̰ý.
12Tā anī Ajaria ngōn̄ Yohanan ō, Berekia ngōn̄ Mesilemot ō, Yehijəkia ngōn̄ Salum ō, Amasa ngōn̄ Hadəlay ō ń i ngār gə̄ dan ngār gə̄ yā ngán Epəraim gə̄ tə́ ní, ḭḭ mbātə́n̄ najə̄ gō ngé gə̄ ń télən̄ ta rɔ̄ɔ̄ tə́ ní, 13ədan̄də́ na: De gə̄ ń ə́hɔīdə́ ɓəlo tə́ ní ī-lōōī reē sedə́ laā, tɔdɔ̄ ré ī-reēī sedə́ anī, jə-rāāī i yá̰á̰ kə́ gōtə́ aĺ kə Kɔ́ɔ̄ɓēé, adə̄ najə̄ a əsō dɔjí tə́. Yá̰á̰ kə́ gōtə́ aĺ ń jə-rāāī ní ɔȳjí ngá̰ý ō, wōn̄g rāā Kɔ́ɔ̄ɓē ngá̰ý kə Israel gēé ō anī ī-sāāī rāā yá̰á̰ kə́ majaĺ kə́ rang gə̄ ō, yá̰á̰ kə́ gōtə́ aĺ kə́ rang gə̄ ō, kə̄ dɔ tə́ ɓáý a? 14Loo ń noō tə́ ngé rɔ̄ɔ̄ gə̄ əya̰n̄ ɓəlo gə̄ dɔɔ́ ō, əya̰n̄ yá̰a̰ kənge gə̄ ń ɔyn̄ ta rɔ̄ɔ̄ tə́ ní kɔ̄ɔ́ ō, ta kum ngār gə̄ tə́ ō, ngé kán̄ naā gə̄ tə́ malang ō. 15Gō tə́ anī de gə̄ ń tə́dan̄ rīdə́ ní rāān̄ kə de gə̄ ń əhɔn̄də́ ɓəlo tə́ ní: Ɔyn̄ kūbə̄ gə̄ ō, sākə̄rā gə̄ ō, dan yá̰a̰ kənge kə́ kɔy ta rɔ̄ɔ̄ tə́ gə̄ tə́ adə̄n̄ ngé gə̄ ń kūbə̄ yādə́ gətóo ō, sākə̄rā yādə́ gə̄ gətóo ō ní. Adə̄n̄ de gə̄ malang yá̰a̰ kəsa ō, yá̰a̰ ka̰ȳ ō, ngé gə̄ ń əngen̄ do ní do̰ō̰n̄ ta ō, ɔyn̄ ngé kə́ tɔ́gə gətóo gə̄ dɔ kərō gə̄ tə́ aw̄n̄ sedə́ rɔ̄ ngákó̰ó̰də́ gə̄ tə́ Jeriko, ɓē kə́ kāgə̄ túmbur gə̄ i tū tə́ tə́ ō. Gō tə́ anī télən̄ dɔ tə́ aw̄n̄ gogə́ Samari.
Akaj ɓāŕ Asiri gə̄ kadə̄ dḭḭ̄nən̄
(Á̰a̰ī 2 Mba 16.7-20)
16Dan ngeé ń noō tə́ ní mban̄g Akaj əla de gə̄ rɔ̄ mban̄g kə́ Asiri tə́ yā dəjen̄ kadə̄ reē kə dḭḭ̄n. 17Tɔdɔ̄ Edom gə̄ tél reē ənīn̄ ɓē ko̰o̰ kə́ Juda rɔ̄ɔ̄ gogə́ ɓáý to̰. Nin̄ əhɔn̄ de gə̄ aw̄n̄ sedə́ ɓəlo tə́. 18Pilistin gə̄ ran̄ yādə́ dām̄ kə́rēý tə́ táān̄ ɓē kə́ gō nang kə́ mbal̄ bo gə̄ gətóon̄ tū tə́ tə́ ō, ɓē gə̄ yā Juda kə́ dām̄ mbɔ́r ɓē kə́ geleé tə́ ō, taān̄ i ɓē kə́ Bet Semes ō, Ayalon ō, Gederot ō, Soko ō, ngán ɓē gə̄ ń ɓē kə́ Soko o̰o̰ ɓē dɔ tə́ ní ō, Timna ō, ngán ɓē gə̄ ń ɓē kə́ Timna o̰o̰ ɓē dɔ tə́ ní ō, Gimjo ō, ngán ɓē gə̄ ń ɓē kə́ Gimjo o̰o̰ ɓē dɔ tə́ ní ō. 19Kɔ́ɔ̄ɓē əla rɔ̄sɔl̄ dɔ ɓē ko̰o̰ kə́ Juda tə́ tītə̄ ń noō i najə̄ yā mban̄g Akaj tə́. Tām̄ Akaj sə̄lā deē yān gə̄ kadə rāān̄ Kɔ́ɔ̄ɓē nja bə̄yā̰ kə́ gogə́ tə́ ō, ni-rāā Kɔ́ɔ̄ɓē yá̰á̰ kə́ gōtə́ aĺ gə̄ ō.
20Tigəlatə Pileser mban̄g kə́ Asiri reē dḭḭ̄n alé, banī reē rɔ̄ɔ̄n ō, adə̄ ngé rɔ̄ɔ̄ yān gə̄ gírə̄n̄ gidə ɓē yān əlan̄ ta naā tə́ ō. 21Tá Akaj ɔy yá̰a̰ kənge kə́ kem kújə yā Kɔ́ɔ̄ɓē tə́ ō, yā mban̄g tə́ ō, yā de kə́ bo yān gə̄ tə́ ō, adə̄ mban̄g kə́ Asiri, banī nge ń noō rāā majə seneé aĺ bátə́. 22Dan ń yá̰a̰ tɔȳń dɔ Akaj ngá̰ý gə̄gē ní, ni to dan rāā yá̰á̰ kə́ gōtə́ aĺ tə́ kə Kɔ́ɔ̄ɓē 23Ni tun̄ yá̰a̰ adə̄ nə́ɓā gə̄ kə́ Damas ń tetənən̄ rɔ̄ɔ̄ ní ba əda na: Nə́ɓā gə̄ yā mban̄g Aram gə̄ dḭḭ̄n̄də́, adə̄ i nin̄ n m̄-tun̄ yá̰a̰ m-ādə̄də́ kadə̄ dḭḭ̄mə̄n̄neé ní. 24Akaj kán̄ gájə́ yá̰a̰ rāā kəla gə̄ kə́ kem kújə yā Nə́ɓā tə́ ba tɔ̄ɔ̄də́ kɔ̄ɔ́. Gō tə́ anī utə̄ ta róbə́ kújə gə̄ yā Kɔ́ɔ̄ɓē kɔ̄ɔ́ ō, rāā loo tun̄ yá̰a̰ gə̄ kə dɔ gajə róbə gə̄ malang kə́ Jerusalem ō, 25rāā loo ndɔ̄ȳ gə̄ kə̄ kem ɓē kə́ Juda tə́ malang yā ndējəń nə́ɓā kə́ mbā gə̄ ndujə̄ yá̰á̰ kə́ kotə majə gə̄ ō. I tītə̄ ń noō n Akaj adə̄ń Nə́ɓā yā kaan gə̄ wōn̄g ní.
26Gotə yá̰á̰ kə́ rang gə̄ ń rāā ní, əla gír dɔ nge kə́ ta kəla gíŕ tə́ bátə́ ugə̄ń dɔ nge kə́ ta tɔ̄l̄ ta tə́ ní ndangən̄də́ i kem makətūbə̄ yā mban̄g gə̄ kə́ Juda tə́ ō, kə́ Israel tə́ ō. 27Akaj oy aw̄ gō kaan gə̄ tə́. Dubə̄nən̄ i kem ɓē kə́ Jerusalem tə́, banī i kem bāá ɓádə yā mban̄g gə̄ kə́ Israel tə́ alé. I ngōnən Ejekias n o̰o̰ ɓē gotən tə́ ní.
Currently Selected:
2 YÁ̰A̰ GƏ̄ 28: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
