2 YÁ̰A̰ GƏ̄ 27
27
Yotam o̰o̰ ɓē
(Á̰a̰ī 2 Mba 15.32-38)
kəlōo 1Dan ń Yotam ndi mban̄g ní ɓālə̄n i kutə jōó gidə i mí. Ni o̰o̰ ɓē Jerusalem ɓāl̄ kutə gidə i mehḛ́. Rī kó̰o̰n na i Yerusa, i ngōn̄ Sadok. 2Yotam rāā yá̰á̰ kə́ súmūú ta kum Kɔ́ɔ̄ɓē tə́ tītə̄ ń bɔbə̄n Ojias rāań ní ō, kudə kem kújə yā Kɔ́ɔ̄ɓē tə́ ń i yá̰á̰ kə́ gōtə́ aĺ ń bɔbə̄n rāā ní ni rāā alé ō. Ɓá tā ba Juda gə̄ na̰yn̄ kə̄ loo rāā háĺ kə́ majaĺ tə́ ɓáý. 3I Yotam n rāā ta róbə́ kə́ dɔɔ́ kə́ tū kújə yā Kɔ́ɔ̄ɓē tə́ ō, kújə gə̄ kə́ tū ndogə̄ mbal̄ kə́ Opel#27.3 Opel: Á̰a̰ī 2 Mba 5.24 tə́ ō ní. 4Ni rāā ɓē gə̄ gō nang kə́ mbalá kə́ Juda tə́ ō, ngán ndogə̄ mbal̄ kə́ ngan̄g gə̄ kə kújə́ kə́ ngāl̄ kə̄ dɔɔ́ gə̄ loo gə̄ kə́ ku kāgə̄ gə̄ i tū tə́ tə́ ō. 5I ni n rɔ̄ɔ̄ mban̄g yā Amon gə̄ ba tetən rɔ̄ɔ̄ ní. Ɓāl̄ ngeé ń noō tə́ ní ngán Amon gə̄ əgānən̄ tīr̄ kə gində̄ arjā̰a̰ kə́ kɔȳn i kəlōo dūbūú mətá ō, kə kōō gémē kə́ kɔȳn i mbātə́mbɔ̄jə̄ ndōhó ō, kə ɔ́rjə kə́ kɔȳn i mbātə́mbɔ̄jə̄ ndōhó ō. Yá̰a̰ gə̄ ń ngán Amon gə̄ adə̄nən̄ ní n noó. Adə̄nən̄ tītə̄ ń noō kem ɓāl̄ kə́ nge ko̰ jōó tə́ ō, kə́ nge ko̰ mətá tə́ ō. 6Yotam tél de kə́ tɔ́gən i ngá̰ý tɔdɔ̄ hálən i súmūú ta kum Kɔ́ɔ̄ɓē Nə́ɓā yān tə́.
7Ndangən̄ gotə najə̄ kə́ rang gə̄ yā Yotam i kem makətūbə̄ yā mban̄g gə̄ kə́ Israel tə́ ō, kə́ Juda tə́ ō. Ɔjən̄ gotə rɔ̄ɔ̄ yān gə̄ kemeé ō, kəla rāān gə̄ ō. 8Dan ń ndi mban̄g ní ɓālə̄n i kutə jōó gidə i mí ō, o̰o̰ ɓē ɓāl̄ kutə gidə i mehḛ́ kem ɓē kə́ Jerusalem tə́ ō. 9Dan ń Yotam oy ní dubə̄nən̄ i kem ɓē yā Dabid tə́. I ngōnən Akaj n o̰o̰ ɓē gotən tə́ ní.
Currently Selected:
2 YÁ̰A̰ GƏ̄ 27: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
