2 YÁ̰A̰ GƏ̄ 26
26
Ojias o̰o̰ ɓē
(Á̰a̰ī 2 Mba 14.21-22; 15.1-3)
1 Juda gə̄ malang unən̄ Ojias ń ɓālə̄n i kutə gidə i mehḛ́ ní əndānən̄ mban̄g gotə bɔbə̄n Amasia tə́. 2I ni n taā ɓē kə́ Elat dan ń bɔbə̄n oy kɔ̄ɔ́ ní. Ni-tél rāā ɓē ní gogə́ rang. 3Dan ń Ojias ndi mban̄g ní ɓālə̄n i kutə gidə i mehḛ́ ō, o̰o̰ ɓē ɓāl̄ kutə mí gidə i jōó kem ɓē kə́ Jerusalem tə́ ō. Rī kó̰o̰n na I Yekolia i dəyá̰ kə́ Jerusalem. 4Ojias rāā yá̰á̰ kə́ gōtə́ ta kum Kɔ́ɔ̄ɓē tə́ tītə̄ yā bɔbə̄n Amasia.
Ojias rāā háĺ kə́ sew kə Nə́ɓāá ba gō tə́ anī tél rāā háĺ kə́ sew aĺ
5Ojias sāā Nə́ɓā kə dɔ ndɔ̄ gə̄ malang ń Jakari nge ndóōn ɓōĺ ndíĺ Nə́ɓā ndiń kə kumneé ní. Adə̄ Nə́ɓā rāā seneé tū yá̰a̰ gə̄ tə́ malang. 6Ojias aw̄ rɔ̄ɔ̄ Pilistin gə̄. Ni tétə̄ ndogə̄ mbal̄ gə̄ kə́ gidə ɓē gə̄ kə́ Gat tə́ ō, Yabəne tə́ ō, Asdod tə́ ō, nang tə́ kɔ̄ɔ́ malang. Gō tə́ anī rāā ɓē gə̄ ń ndin̄ kə gō gidə ɓē kə́ Asdod ní ō, ɓē gə̄ kə́ dɔ nang yā Pilistin gə̄ tə́ ō. 7Nə́ɓā rāā seneé loo rɔ̄ɔ̄ Pilistin gə̄ tə́ ō, Arabə gə̄ ń ndin̄ Gur Baal ní ō, Mewni gə̄ ō. 8Mewni gə̄ əgānən̄ tīr̄.
Tɔ́gə Ojias i ngá̰ý adə̄ rīn ɓār̄ bátə́ ugə̄ dɔ nin̄ dɔ nang kə́ Ejiptə tə́. 9Ni-rāā kújə kə́ ngāl̄ ɓururu kum kə̄ dɔɔ́ gə̄ Jerusalem dɔ ta róbə́ kə́ kíl loo tə́ tə́ ō, kə́ wól loo tə́ tə́ ō, kə́ loo kə́ ndogə̄ mbal̄ kə́ tū tə́ teē kum kə̄ ndágá tə́ ō. 10Ni-rāā kújə́ kə́ ngāl̄ ɓururu gə̄ kem dəla loo tə́ ō, ndēr̄ bəlo taā man̄ gə̄ ngá̰ý ō, tɔdɔ̄ yá̰a̰ kul̄ yān gə̄ i ngá̰ý loo kə́ mbal̄ bo gə̄ gətóon̄ tū tə́ tə́ ō, wól loo tə́ ō. Ni-aw̄ kə ngé ndɔr̄ gə̄ ō, ngé ndɔr̄ kāgə̄ nduú gə̄ ō, tɔdɔ̄ kəla ndɔr̄ nelə̄n ngá̰ý.
11Ojias aw̄ kə áskar gə̄ kə́ gerə̄n̄ rɔ̄ɔ̄ majə ō, asən̄ kaw̄ ta rɔ̄ɔ̄ tə́ ō. Rāān̄ ɓūtə̄ gə̄ i kə gō kutə de gə̄ ń Yeyel nge ndang makətūbə̄ nin̄ kə Maseya nge ko̰o̰ ɓē ɔyn̄ ní. Deē ń i dɔ go̰ rɔ̄ɔ̄ gə̄ ngeé ń toō tə́ ní i Hanania. Ni i kógə̄ḿ kə́ dan pajā yā mban̄g gə̄ tə́. 12Ngār gə̄ kə́ dɔ gír kaa gə̄ tə́ ń tə́ndān̄də́ dɔ go̰ rɔ̄ɔ̄ gə̄ ngeé ń toō tə́ ní, nin̄ malang i deē dūbú jōó kə ɓú mehḛ́. 13Ba go̰ rɔ̄ɔ̄ gə̄ ní nin̄ malang i deē dūbú ɓú mətá kə dūbú sīrí kə dɔn kə́ ɓú mí. Nin̄ ngangə̄n̄ ngá̰ý ō, ndin̄ dɔ rɔ̄də́ tə́ kɔ̄ɔ́ yā rɔ̄ɔ̄ madə̄ ba̰ā̰ mban̄g gə̄ dɔn tə́ ō. 14Kə dɔ kaw̄də́ rɔ̄ɔ̄ tə́ gə̄ malang ń noō mban̄g a adə̄də́ der gə̄ ō, nənga gə̄ ō, jākā gində̄ gə̄ ō, kūbə̄ gində̄ gə̄ ō, ga̰ gərā gə̄ ō, mbal̄ kem bējə̄ gə̄ ō. 15Ojias adə̄ deē kógə̄ḿ kə́ ger̄ yá̰á̰ ngá̰ý rāā yá̰a̰ rɔ̄ɔ̄ gə̄ tə́ndādə́ Jerusalem dɔ kújə́ kə́ ngāl̄ kə̄ dɔɔ́ gə̄ tə́ ō, kíl ndogə̄ mbal̄ gə̄ tə́ ō, yā kurəń kum gərā gə̄ ō, tə́nań kɔkərɔ kə́ bo gə̄ ō.
Nə́ɓā rāā kə Ojias adə̄ tél de kə́ tɔ́gən i ngá̰ý ō, rīn ɓār̄ teē sa̰y ō. 16Banī tɔ́gə̄n ní rāān adə̄ ɔjə rɔ̄n, ba kɔjə rɔ̄ yān kə́ kemən tə́ ní aw̄ seneé bátə́ tḭ̄ḭ̄ tan. Ni-rāā háĺ kə́ sew aĺ kə Kɔ́ɔ̄ɓē Nə́ɓā yānneé, udə kem kújə yā Kɔ́ɔ̄ɓē tə́ yā róō kajaja dɔ loo róō ndujə̄ yá̰á̰ kə́ kotə majə tə́ yā kadə̄ Kɔ́ɔ̄ɓē. 17Ajaria ngol ngé tun̄ yá̰a̰ gə̄ udə gōn tə́ kə ngé tun̄ yá̰a̰ gə̄ yā Kɔ́ɔ̄ɓē kə́ ngé kəhɔ rɔ̄də́ tɔgə gə̄ kutə sɔ́sɔ́. 18Nin̄ ran̄ no mban̄g Ojias tə́ ba ədanən̄ na: Ojias, ndējə̄ Kɔ́ɔ̄ɓē ndujə̄ yá̰á̰ kə́ kotə majə i yá̰a̰ rāāí ḭ̄ alé! I kəla yā ngé tun̄ yá̰a̰ gə̄ ń nin̄ i de kə́ gír kojə yā Aaro̰ tə́ gə̄ ní. Əndān̄də́ nin̄ i kə rī rāā kəla ń noō. Ī-teē kɔ̄ɔ́ kem loo kə́ táĺ tə́, tɔdɔ̄ yá̰á̰ ń ī-rāā ní i gōtə́ alé. Nge ń noō Kɔ́ɔ̄ɓē a ɔsə gɔnií najə̄n tə́ alé! 19Ojias ń əhɔ ganán jīn tə́ tɔdɔ̄ ni-rāā i najə̄ róō kajaja ní, wōn̄g rāān kə ngé tun̄ yá̰a̰ gēé. Anī kə̄ ta jī tə́ noō bānjə̄ teē notə non tə́ kə̄ loo nəkɔ́ noō tə́, ta kum ngé tun̄ yá̰a̰ gə̄ tə́, kem kújə yā Kɔ́ɔ̄ɓē tə́, ngɔr kə̄ kadə loo róō ndujə̄ yá̰á̰ kə́ kotə majə tə́. 20Ajaria ngol ngé tun̄ yá̰a̰ gə̄ ō, ngé tun̄ yá̰a̰ gə̄ malang ō ń ra a a̰a̰n̄ loo kə̄ rɔ̄n tə́ ní a̰a̰n̄ bānjə̄ ní notə non tə́. Nin̄ teēn̄ seneé ndágá láẃ kɔ̄ɔ́ ō, nəkɔ́ ɔr bā̰ā̰ loo teē tə́ aĺ ō, tɔdɔ̄ Kɔ́ɔ̄ɓē əndan ɔjənəń kum.
Gír ko̰o̰ ɓē yā Ojias gān̄g
(Á̰a̰ī 2 Mba 15.5-7)
21Bānjə̄ rāā mban̄g Ojias bátə́ oyń. Ndi i kə kerneé kem kújə́ kógə̄ḿ tə́ sɔɔ̄ń mo̰y bānjə̄ ní. Adə̄nən̄ ta róbə́ tél kaw̄ gogə́ kem kújə yā Kɔ́ɔ̄ɓē tə́ to̰ alé. I ngōnən Yotam ń i ngār kə́ kem kújə yā mban̄g tə́ ní n i nge ko̰o̰ ɓē ní. 22Gotə yá̰á̰ kə́ rang gə̄ ń Ojias rāā ní, ngé kə́ ta kəla gír tə́ gə̄ ō, ta tɔ̄l̄ ta tə́ gə̄ ō ní i Ijai nge koō ta kə́ ngōn̄ Amots n ndang makətūbūú ní. 23Ojias oy aw̄ gō kaan gə̄ tə́. Dubə̄nən̄ i loo dubə̄ mban̄g gə̄ tə́, banī i kem bāá ɓádə yā de kə́ gír kojə yān tə́ gə̄ alé, tɔdɔ̄ ni i nge bānjə̄. I ngōnən Yotam n o̰o̰ ɓē gotən tə́ ní.
Currently Selected:
2 YÁ̰A̰ GƏ̄ 26: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
