2 YÁ̰A̰ GƏ̄ 25
25
Amasia o̰o̰ ɓē
(Á̰a̰ī 2 Mba 14.1-7)
1Dan ń Amasia ndi mban̄g ní ɓālə̄n i kutə jōó gidə i mí, Ni o̰o̰ ɓē ɓāl̄ kutə jōó gidə i ndōhó kem ɓē kə́ Jerusalem tə́. Rī kó̰o̰n na i Yoadan i dəyá̰ kə́ Jerusalem. 2Amasia rāā yá̰á̰ kə́ gōtə́ ta kum Kɔ́ɔ̄ɓē tə́ ɓá tā ba i kə kemən kə́ nelən ngá̰ý alé. 3Dan ń Amasia mbūsə̄ gír ngəra ko̰o̰ ɓē yān adə̄ ngan̄g anī, tɔ̄l̄ ngé kəla yān gə̄ ń tɔ̄lə̄n̄ bɔbə̄n mban̄g Joas ní. 4Banī tɔ̄l̄ ngáńdə́ gə̄ alé tītə̄ ń ndangən̄neé kem makətūbə̄ ndū najə̄ yā Moijə tə́ ní. Tɔdɔ̄ Kɔ́ɔ̄ɓē əda kemeé na: Deē a tɔ̄l̄ bɔbə̄ ngōn̄ tām̄ majaĺ yā ngōn̄ tə́ aĺ ō, deē a tɔ̄l̄ ngōn̄ tām̄ majaĺ yā bɔbə̄ ngōn̄ tə́ aĺ ō. Banī náā nəkɔ́ a oy i najə̄ majaĺ yān tə́#25.4 K. 4: Á̰a̰ī Ndū 24.16.
5Amasia adə̄ de kə́ dəngam kə́ kem ɓē yān tə́ gə̄ kánə̄n̄ naā, adə̄ i Juda gə̄ ō, Benjamḛ gə̄ ō. Ba ni tə́ndā ngol ngé rɔ̄ɔ̄ gə̄ dɔ de kə́ dūbú gə̄ tə́ ō, de kə́ ɓú gə̄ tə́ ō, kə dɔ gír kaa gēé. Ni tə́da de gə̄ ń ɓāl̄də́ ḭḭ dɔ kutə jōó tə́ kum kə̄ dɔɔ́ ní anī ənge de gə̄ i dūbú ɓú mətá. I de kə́ asən̄ kaw̄ ta rɔ̄ɔ̄ tə́ gə̄ ō, gerə̄n̄ rɔ̄ɔ̄ kə nəngaá gə̄ ō, kə dereé gə̄ ō. 6Ni ɔy ngé rɔ̄ɔ̄ kə́ rang gə̄ Israel tə́ dūbú ɓú ɓáý to̰ kə nar gində̄ arjā̰a̰ kə́ kɔȳn asə kəlōo dūbú mətá. De gə̄ ní i go̰ rɔ̄ɔ̄ gə̄ malang. 7Banī deē yā Nə́ɓā kógə̄ḿ reē ədan na: Á mban̄g, ādə̄ ngé rɔ̄ɔ̄ kə́ Israel tə́ gə̄ aw̄n̄ seí alé, tɔdɔ̄ Kɔ́ɔ̄ɓē i kə Israel gēé alé. Ngán Epəraim gə̄ malang ń noō Kɔ́ɔ̄ɓē i sedə́ alé! 8Tɔdɔ̄ ré aw̄n̄ seí anī ā ī-ngan̄g ngá̰ý ta rɔ̄ɔ̄ tə́ ɓá ta ba Kɔ́ɔ̄ɓē a rāāī kadə̄ ā ā̰ȳ no madə̄ ba̰ā̰í gə̄ tə́. Tɔdɔ̄ i Nə́ɓā kógə̄ḿ beē ngóy n asə rāā kadə̄ deē tetə rɔ̄ɔ̄ ō, i ni ngóy n asə rāā kadə̄ rɔ̄ɔ̄ rāā deē ō ní. 9Amasia əda deē yā Nə́ɓā ní na: Ba nar ń m-ādə̄ ɓūtə̄ ngé rɔ̄ɔ̄ gə̄ kə́ Israel tə́ ní m-ā m̄-rāań i ba̰ý? Anī deē yā Nə́ɓā ní tél ədan na: Yá̰á̰ ń Kɔ́ɔ̄ɓē a adī ní tɔȳ nge ń noō sa̰y ngá̰ý. 10Loo ń noō tə́ Amasia əya̰ ɓūtə̄ ngé rɔ̄ɔ̄ gə̄ ń ḭḭn̄ Epəraim reēn̄ ní adə̄ tél gogə́ kə̄ ɓē yādə́ gə̄ tə́. Banī wōn̄g rāādə́ ngá̰ý kə ɓē ko̰o̰ kə́ Juda. Nin̄ tél aw̄n̄ gogə́ ɓēé i kə wōngōó. 11Dan ń Amasia ənge tɔ́gə́ ngá̰ý anī, njə̄rā kété no ngé rɔ̄ɔ̄ yān gə̄ tə́ aw̄ sedə́ wól loo ń katə̄ i tū tə́ ní tə́. Ni tɔ̄l̄ ngé rɔ̄ɔ̄ kə́ Edom gə̄ dūbú kutə kógə̄ḿ loo ní tə́. 12Ngán Juda gə̄ əhɔn̄ kə́ rang gə̄ dūbú kutə kə kumdə́, aw̄n̄ sedə́ ta tél mbal̄ kógə̄ḿ tə́ ba mbə́rēn̄də́ adə̄ təsō tétə̄n̄ rárák kɔ̄ɔ́ nang tə́. 13Ngé rɔ̄ɔ̄ kə́ Israel tə́ gə̄ ń Amasia ɔgə̄də́ kaw̄ seneé ta rɔ̄ɔ̄ tə́ ní udən̄ dɔ ɓē gə̄ kə́ dɔ dán ɓē kə́ Samari tə́ kə ɓē kə́ Bet Horon ń i ɓē gə̄ kə́ dɔ nang kə́ Juda tə́ ní rɔ̄ɔ̄n̄də́. Nin̄ tɔ̄lə̄n̄ de kə́ kemeé gə̄ dūbú mətá ō, ɔyn̄ yá̰a̰ kənge kə́ kemeé gə̄ ngá̰ý aw̄n̄neé ō.
Joas mban̄g kə́ Israel tetə Amasia rɔ̄ɔ̄
(Á̰a̰ī 2 Mba 14.8-14)
14Dan ń Amasia tetə Edom gə̄ rɔ̄ɔ̄ ba tél ní, ɔy ɓesə̄ Edom gə̄ ń i nə́ɓā yādə́ gə̄ ní reēń jīn tə́. Ni rāādə́ nə́ɓā yān gə̄ tə́ ō, ɔsə non nang tə́ nodə́ tə́ rɔȳńdə́ ō, ndējə̄də́ kajaja ō. 15Wōn̄g rāā Kɔ́ɔ̄ɓē seneé adə̄ əla nge koō ta kógə̄ḿ adə̄ reē ədan na: Nə́ɓā gə̄ yā gír de gə̄ ń toō ń asən̄ taādə́ jīí tə́ aĺ ní ī-rɔȳdə́ i tām̄ rí tə́? 16Dan ń a əda Amasia najə̄ ń noō ɓáý anī Amasia dəjen na ké əndānən̄ nge kadə̄ mban̄g kɔjə̄ wa. Ré gḛy kadə̄ əndanən̄ aĺ ɓáa kə lōō kaw̄ kə najə̄ ní kə̄ kété. Nge koō ta aw̄ kə najə̄ ní kə̄ kété to̰ alé banī əda na: Mā m̄-ger̄ kadə̄ Nə́ɓā gḛy rāā kadə̄ óy kɔ̄ɔ́ tām̄ ḭ̄ ī-rāā yá̰á̰ ń noō ō, ōō najə̄ yāḿ aĺ ō. 17Amasia mban̄g kə́ Juda gḛy i najə̄ kə́ rang gə̄ tá ō, əla de gə̄ rɔ̄ Joas mban̄g kə́ Israel tə́ ń i ngōn̄ Joakajə kə́ ngōn̄ Yehu ní ō. Ni-əla ədan na: Ī-rēē ādə̄ jə-rɔ̄ɔ̄ naā. 18Joas tél əda Amasia na: Ndɔ̄ kógə̄ḿ tə́ kōn̄ ngār kə́ Liban əla əda kāgə̄ sédər kə́ Liban na: Ādə̄ ngōnə̄ḿ kə́ dəngam ngōnīí kə́ dəyá̰ ādə̄ taā. Banī dā̰ kə́ bembeé kə́ Liban mān̄ anī tə́ɓā kōn̄ ngar̄ njan tə́. 19Ḭ̄ Amasia, i tām̄ tetə ń ī-tetə Edom gə̄ rɔ̄ɔ̄ ní n ā ɔ́jə rɔ̄í noō. Ní, ɔ́r ta rɔ̄í ba ī-ndi ɓēé looí. Ī-ndigə kəla gír rɔ̄ɔ̄ kə́ ta tɔ̄l̄ ta a majə aĺ tām̄ yāí tə́ i najə̄ rí tə́? Tɔdɔ̄ a tetənī rɔ̄ɔ̄ naā tə́ kə ngé rɔ̄ɔ̄ kə́ Juda tə́ gə̄ malang loo rɔ̄ɔ̄ ní tə́. 20Banī Amasia oō najə̄ yān alé. Nə́ɓā gḛy kadə̄ Amasia nin̄ kə ngé rɔ̄ɔ̄ yān gēé gətóon̄ kɔ̄ɔ́ i tām̄ tūr̄ kə́ nin̄ tūrə̄n̄ rɔ̄də́ kə̄ rɔ̄ nə́ɓā gə̄ yā Edom gə̄ tə́. 21Loo ń noō tə́ Joas mban̄g kə́ Israel aw̄ rɔ̄ɔ́. Ngé rɔ̄ɔ̄ yān gə̄ ō, ngé rɔ̄ɔ̄ yā Amasia gə̄ ō, dəban̄ naā tə́ Bet Semes, dɔ nang kə́ Juda tə́. 22Ngé rɔ̄ɔ̄ kə́ Israel tə́ gə̄ tetən̄ ngé kə́ Juda tə́ gə̄ rɔ̄ɔ̄, adə̄ nin̄ malang a̰ȳn̄ naā aw̄n̄ kə̄ ɓē yādə́ gə̄ tə́. 23Joas mban̄g kə́ Israel əhɔ Amasia mban̄g kə́ Juda ń i ngōn̄ Joas kə́ ngōn̄ Akajias ní ɓəlo tə́ kem ɓē kə́ Bet Semes tə́ ba aw̄ seneé gogə́ Jerusalem ō, ni tétə̄ ndogə̄ mbal̄ kə́ Jerusalem kə́ dɔ dán ta róbə yā Epəraim tə́ kə ta róbə́ kə́ kíl loo tə́ ní nang tə́ kɔ̄ɔ́ ō. Ngāl̄ ndogə̄ mbal̄ ń ni tétə̄ nang tə́ ní asə kíl deē ɓú sɔ́. 24Ni ɔy lɔ́r ō, gində̄ arjā̰a̰ ō, yá̰a̰ malang kə́ kem kújə yā Kɔ́ɔ̄ɓē tə́ ń Obed Edom a ngɔ̄m̄ ní ō, ɔy yá̰a̰ kənge gə̄ kə́ kem kújə yā mban̄g tə́ ō, əhɔ de gə̄ kə́ kadə̄ gāngə̄n̄ dɔdə́ ō, ba tḛ́l dɔ tə́ aw̄ gogə́ Samari.
Gír ko̰o̰ ɓē yā Amasia gān̄g
(Á̰a̰ī 2 Mba 14.15-20)
25Dan ń Joas mban̄g kə́ Israel oy ní, Amasia mban̄g kə́ Juda ndi kə kumneé gotən tə́ ɓāl̄ kutə gidə i mí ɓáý. 26Gotə kəla gə̄ ń Amasia rāā ní, nge kə́ ta kəla gíŕ tə́ bátə́ ugə̄ń dɔ nge kə́ ta tɔ̄l̄ ta tə́ ní, ndangən̄ kem makətūbə̄ yā mban̄g gə̄ kə́ Juda tə́ ō, kə́ Israel tə́ ō. 27De gə̄ oōn̄ naā dɔ Amasia tə́ kem ɓē kə́ Jerusalem tə́ i kem ɓāl̄ ń ni tūrəń gidən kɔ̄ɔ́ ta kum Kɔ́ɔ̄ɓē tə́ ní. Ndɔ̄ kógə̄ḿ tə́ ni a̰ȳ aw̄ Lakis, banī ngɔ̄də̄n̄ gōn, tɔ̄l̄nən̄ i loo ń noō tə́. 28Ənīn̄ nīnə́n i kem púsú adə̄ sə́nda gə̄ ndɔ́rə̄n̄ ō, dubə̄nən̄ i kem bāá ɓádə yā bɔbə̄n gə̄ tə́ kem ɓē kógə̄ḿ kə́ dɔ nang kə́ Juda tə́ ō.
Currently Selected:
2 YÁ̰A̰ GƏ̄ 25: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
