2 YÁ̰A̰ GƏ̄ 24
24
Joas adə̄ rāān̄ loo kə́ nujə gə̄ kə́ tū kújə yā Kɔ́ɔ̄ɓē tə́
(Á̰a̰ī 2 Mba 12.1-17)
1Dan ń Joas ndi mban̄g ní ɓālə̄n i sīrí. Ni o̰o̰ ɓē ɓāl̄ kutə sɔ́ kem ɓē kə́ Jerusalem tə́. Rī kó̰o̰n na i Sibia, i dəyá̰ kə́ Beer Seba. 2Joas rāā yá̰á̰ kə́ gōtə́ ta kum Kɔ́ɔ̄ɓē tə́ kə dɔ ndɔ̄ gə̄ malang ń Yoyada nge tun̄ yá̰a̰ ndiń kə kumneé ní. 3Yoyada táā dəyá̰ gə̄ jōó adə̄ Joas ojəń ngán kə́ dəngam gə̄ ō, ngáń kə́ dəyá̰ gə̄ ō. 4Gō tə́ anī Joas gḛy rāā loo kə́ nujə gə̄ kə́ tū kújə yā Kɔ́ɔ̄ɓē tə́. 5Ni kán̄ ngé tun̄ yá̰a̰ gə̄ ō, ngán Lebi gə̄ ō, ba ədadə́ na: Āwī kem ɓē gə̄ kə́ Juda tə́ ī-táāī nar jī ngán Israel gə̄ tə́ malang, ī-rāāīneé loo kə́ nujə gə̄ kə́ tū kújə yā Nə́ɓā yāsí tə́ kə dɔ ɓāl̄ gə̄. Ī-rāāī láẃ tá. Banī ngán Lebi gə̄ ɔrən̄ bā̰ā̰ loon tə́. 6Adə̄ mban̄g ɓāŕ Yoyada ngol ngé tun̄ yá̰a̰ gə̄ ba ədan na: Lambóó ń Moijə nge kəla yā Nə́ɓā ō, ngé kán̄ naā gə̄ kə́ Israel tə́ ō, gāngə̄n̄ tām̄ yā kújə kənge naā tə́ ní, i tām̄ rí tə́ á ī-ra kə ngán Lebi gēé ādə̄ aw̄ táān̄ jī de kə́ Jerusalem gə̄ tə́ ō, jī Juda gə̄ tə́ ō aĺ ní? 7Tɔdɔ̄ Atali nge rāā yá̰a̰ gōtə́ aĺ nin̄ kə ngánən gēé əya̰n̄ kújə yā Nə́ɓā adə̄ nujə kɔ̄ɔ́. Yá̰á̰ kə́ yā ɓōĺ gidə gə̄ malang kə́ kem kújə yā Kɔ́ɔ̄ɓē tə́ gə̄gē ɔy aw̄ rāān̄neé kəla adə̄n̄ ɓesə̄ Baal gə̄.
8Mban̄g mēr̄ rāā sandúkə́ kógə̄ḿ adə̄ əndān̄ ta róbə́ kújə yā Kɔ́ɔ̄ɓē tə́ ndágá, 9ba adə̄ ənīn̄ mbēr̄ Jerusalem ō, dɔ nang kə́ Juda tə́ malang ō, kadə̄ de gə̄ kógə̄ḿ kógə̄ḿ reēn̄ kə lambóó ń Moijə nge kəla yā Nə́ɓā gān̄g dɔ Israel gə̄ tə́ kem dəla loo tə́ ní adə̄n̄ Kɔ́ɔ̄ɓē. 10Ngār gə̄ malang ō, de gə̄ malang ō, rāān̄ rɔ̄nel̄. Nin̄ reēn̄ kə naraá ɓōkə́n̄ kem sandúkə́ ní tə́ bátə́ adə̄ rosə kem.
11Dan ń kum mbang kə́ kadə̄ ngán Lebi gə̄ aw̄n̄neé kə sandúkú kadə̄ mban̄g a̰a̰ yá̰á̰ kə́ kemeé ugə̄ anī, a̰a̰n̄ kadə̄ nar i ngá̰ý kemeé. Loo ń noō tə́ nge ndang makətūbə̄ yā mban̄g ō, pajā yā ngol ngé tun̄ yá̰a̰ gə̄ ō, reē ɔyn̄ nar kə́ kem sandúkə́ ní tə́ kɔ̄ɔ́, ba télən̄ kə sandúkə́ ní kadə̄ əndān̄ gogə́ loo ndin tə́. Nin̄ rāān̄ tītə̄ ń noō kə dɔ ndɔ̄ gə̄ adə̄ nar malang ń kánə̄n̄ ní i ngá̰ý. 12Mban̄g nin̄ kə Yoyada télən̄ kə nar ní adə̄n̄ ngol ngé rāā kəla gə̄. Adə̄ nin̄ ɔyn̄ ngé tə́gā mbal̄ gə̄ ō, ngé njár̄ kāgə̄ gə̄ ō, ngé rāā kəla gində̄ kə́ karī gə̄ ō, gində̄ nə̄ngá kasə gə̄ ō, kadə̄ tél rāān̄ loo kə́ nujə gə̄ kə́ ta kújə yā Kɔ́ɔ̄ɓē tə́ gogə́. 13Ngé kəla gə̄ udən̄ kə̄ rɔ̄ kəla tə́ rāān̄. Ger̄ kəla yādə́ rāā adə̄ kəla ndɔ́tə̄ kə̄ kété ō, kújə yā Nə́ɓā tél majə gogə́ ō, tél ngan̄g gogə́ ō. 14Dan ń gír kəla gān̄g anī ngol ngé rāā kəla gə̄ reēn̄ kə gotə nar ní adə̄n̄ mban̄g nin̄ kə Yoyada. Ɔyn̄ gotə nar ní rāān̄neé yá̰a̰ rāā kəla gə̄ kə́ kem kújə yā Kɔ́ɔ̄ɓē tə́, adə̄ i yá̰a̰ rāā kəla yá̰a̰ ndējə̄ gə̄ ō, yá̰a̰ rāā kəla yá̰a̰ tun̄ kə́ kə taá malang gə̄ ō, bay gə̄ kə səmbē gə̄ kə́ rāān̄də́ kə lɔ́rɔ́ gə̄ ō, kə gində̄ arjā̰a̰á̰ gə̄ ō. Ndējə̄n̄ Kɔ́ɔ̄ɓē yá̰a̰ tun̄ kə́ róō horoó gə̄ kem kújə yā Kɔ́ɔ̄ɓē tə́ kə dɔ ndɔ̄ gə̄ malang ń Yoyada ndiń kə kumneé ní.
Joas rāā yá̰á̰ kə́ gōtə́ aĺ kə Nə́ɓāá
15Yoyada tɔgə ɓə́gá ngá̰ý kɔ̄ɔ́. Dan ń oy ní ɓālə̄n i ɓú kə kutə mətá. 16Dubə̄nən̄ i kem ɓē yā Dabid tə́, bāá ɓádə yā mban̄g gə̄ tə́, tɔdɔ̄ ni-rāā i yá̰á̰ kə́ majə ngándáńg tām̄ yā Israel tə́ ō, tām̄ yā Nə́ɓā tə́ ō, tām̄ yā kújə yā Nə́ɓā tə́ ō.
17Dan ń Yoyada oy kɔ̄ɔ́ anī, ngār kə́ Juda gə̄ reē əsō ɔsən̄ nodə́ nang tə́ no mban̄g tə́ adə̄ mban̄g oō najə̄ yādə́. 18Adə̄ nin̄ əya̰n̄ kújə yā Kɔ́ɔ̄ɓē Nə́ɓā yā kaadə́ gə̄ kɔ̄ɔ́ ba rāān̄ ɓesə̄ kāgə̄ kə́ yā ɓōĺ gidə gə̄ ō, ɓesə̄ kə́ rang gə̄ ō. Yá̰á̰ kə́ gōtə́ aĺ ń nin̄ rāān̄ ní rāā adə̄ wōn̄g rāā Nə́ɓā kə dɔ nang yā Juda ō, kə ɓē kə́ Jerusalem ō. 19Gō tə́ anī Kɔ́ɔ̄ɓē əla ngé koō ta yān gə̄ kadə̄ tél reēn̄ sedə́ gogə́ rɔ̄n tə́, banī deē oō najə̄ yādə́ alé. 20Anī Ndíĺ Nə́ɓā reē dɔ Jakari ngōn̄ Yoyada nge tun̄ yá̰á̰ tə́, adə̄ ni-ḭḭ ra no kósə de gə̄ tə́ ba ədadə́ na: Nə́ɓā əda na yá̰a̰ gə̄ ń n-ədasí kadə̄ ī-rāāī ní ī-mbātíī rāā i tām̄ rí tə́? Nge ń noō ā ə́ngeī yá̰a̰ tū tə́ alé. Dan ń ə́ya̰ī Kɔ́ɔ̄ɓē kɔ̄ɔ́ ní, ni əya̰sí kɔ̄ɔ́ ō. 21Loo ń noō tə́ kósə de gə̄ oōn̄ naā dɔ Jakari tə́, anī mban̄g adə̄də́ ta róbə adə̄ tə́nīnən̄ kə mbalá ndágə loo kə́ gīr̄ gidə kújə yā Kɔ́ɔ̄ɓē tə́. 22Kem majə ń Yoyada bɔbə̄ Jakari rāā kə mban̄g Joas ní, dɔ mban̄g Joas ndígə̄nal kɔ̄ɔ́, adə̄ tɔ̄l̄ ngōnən. Dan ń Jakari a rāā yā koy ní əda na: Ādə̄ Kɔ́ɔ̄ɓē a̰a̰ yá̰á̰ ń rāā yá̰á̰ ní ba rāāī yá̰á̰ kə́ tōr̄ kum gotə.
Gír ko̰o̰ ɓē yā Joas gān̄g
(Á̰a̰ī 2 Mba 12.18-22)
23Dan ń ɓāl̄ ndɔ̄ anī ngé rɔ̄ɔ̄ yā Aram gə̄ reē ənīn̄ Joas rɔ̄ɔ̄. Nin̄ taān̄ dɔ nang kə́ Juda ō, ɓē kə́ Jerusalem ō. Nin̄ tɔ̄lə̄n̄ ngār gə̄ kə́ dɔ ngán Israel gə̄ tə́ malang kɔ̄ɔ́ ō, yá̰a̰ kənge gə̄ ń ɔyn̄ ta rɔ̄ɔ̄ tə́ ní əlan̄neé adə̄n̄ mban̄g kə́ Damas malang ō. 24Ngé rɔ̄ɔ̄ kə́ Aram gə̄ ń reēn̄ ní nin̄ i ngá̰ý aĺ ɓá ta banī Kɔ́ɔ̄ɓē əla ngé rɔ̄ɔ̄ kə́ ngá̰ý gə̄ ń i Juda gə̄ ní kem jīdə́ tə́, tām̄ kəya̰ ń əya̰nən̄ ni Nə́ɓā yā kaadə́ gə̄ kɔ̄ɔ́ ní tə́. Adə̄ gāngə̄n̄ sarya dɔ Joas tə́ i tītə̄ ń noō.
25Dan ń ngé rɔ̄ɔ̄ kə́ Aram gə̄ aw̄n̄ ní əya̰nən̄ i kə mo̰y kə́ ngan̄g ngá̰ý. Ngé kəla yān gə̄ oōn̄ naā ba rāān̄ ba̰ā̰ ngōn̄ Yoyada nge tun̄ yá̰á̰ ń oy ní. Nin̄ tɔ̄l̄nən̄ kem tə̄rá yān tə́. Dubə̄nən̄ i kem ɓē yā Dabid tə́, banī i kem bā ɓádə yā mban̄g gə̄ tə́ alé. 26De gə̄ ń oōn̄ naā dɔn tə́ ní i Jabad ngōn̄ dəyá̰ Amon ń rīn na i Simeat ní ní ō, Yehojabad ngōn̄ dəyá̰ Moab ń rīn na Simrit ní ō.
27Najə̄ kə́ dɔ ngánən gə̄ tə́ ō, najə̄ gə̄ ń ngé koō ta gə̄ ədan̄ dɔn tə́ ngá̰ý ní ō, najə̄ kə́ dɔ kújə yā Nə́ɓā kə́ nujə tə́ ń ni-tél rāā gogə́ rang ō ní, i kə́ ndang kem makətūbə̄ kə́ yā kadə̄ əgań kem de gə̄ dɔ mban̄g gə̄ tə́ ní. I ngōnən Amasia n o̰o̰ ɓē gotən tə́ ní.
Currently Selected:
2 YÁ̰A̰ GƏ̄ 24: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
