2 YÁ̰A̰ GƏ̄ 13
13
Abia o̰o̰ ɓē
(Á̰a̰ī 1 Mba 15.1-8)
1Abia əla gír ko̰o̰ ɓē kə́ Juda i kem ɓāl̄ ko̰o̰ ɓē yā Jeroboam kə́ nge ko̰ kutə gidə i sɔ́sɔ́ tə́. 2Ni o̰o̰ ɓē ɓāl̄ mətá kem ɓē kə́ Jerusalem tə́. Rī kó̰o̰n na i Mikaya. Kó̰o̰n i ngōn̄ Uriel kə́ Gibea.
Abia nin̄ kə Jeroboam rɔ̄ɔ̄n̄ naā. 3Abia ɔy i go̰ rɔ̄ɔ̄ gə̄ n əlan̄ gír rɔ̄ɔ̄ ní. I de gə̄ dūbú ɓú sɔ́ kə́ ger̄ rɔ̄ɔ̄ majə gə̄. Jeroboam gə̄rā de gə̄ dūbú ɓú sɔ́sɔ́ tə́ndādə́ ta kə naá no Abia tə́ kə jī loo rɔ̄ɔ́. De gə̄ ní i go̰ rɔ̄ɔ̄ gə̄ malang. 4Abia ra dɔɔ́ dɔ mbal̄ Samaraim ń i mbal̄ kə́ gō nang kə́ mbalá yā Epəraim tə́ ní ba un ndūn kə̄ dɔɔ́ ɔrə̄ń najə̄, əda na: Jeroboam ō, Israel gə̄ malang ō, ōōī najə̄ ń m-ā m-ɔ̄r̄ ní. 5Ko̰o̰ ɓē kə́ Israel tə́ ní, Kɔ́ɔ̄ɓē Nə́ɓā yā Israel adə̄ i Dabid kə gír kojə yānneé. I madə̄ naā kə́ loo nujən gətóo#13.5 Madə̄ naā kə́ loo nujəń gətóo, i madə̄ naā kə́ rāā kə katāá, adə̄ i madə̄ naā kə́ to ngándáńg. Tɔdɔ̄ katə̄ i yá̰á̰ kə́ a ɔgə̄ yá̰a̰ ndum. ní ī-gerī aĺ a. 6Banī Jeroboam kə́ ngōn̄ Nebat ń i nge kəla yā Salomo̰ kə́ ngōn̄ Dabid ní, ɔjə rɔ̄n ō, əsō wōn̄g ta kɔ́ɔ̄n tə́ ō. 7De kə́ ngár̄ aĺ gə̄, ngán kə́ nujə kɔ̄ɔ́ gə̄ əgan̄ naā gidən tə́, ba əndān̄ gúu dɔ Roboam ngōn̄ Salomo̰ tə́. Roboam ń i ngōn̄ ɓáý ō, hálən to ngōn̄ ɓáý ō ní dum̄ tadə́ alé. 8Ba ń toō ɓáa ɔ̄rī i najə̄ mbātə́ ko̰o̰ ɓē yā Kɔ́ɔ̄ɓē ń i kem jī ngán Dabid tə́ ní! Sḭḭ̄ i kósə de kə́ ngá̰ý gə̄ ō, ngán man̄g lɔ́r gə̄ ń Jeroboam rāādə́ nə́ɓā gə̄ tə́ adə̄sí ní nin̄ i sesí ō. 9Ngé tun̄ yá̰a̰ yā Kɔ́ɔ̄ɓē gə̄ ń i ngán Aaro̰ gə̄ ní ō, ngán Lebi gə̄ ō ní, sḭḭ̄ ī-tə̄ɓāīdə́ kɔ̄ɔ́ ba ī-gə̄rāī de gə̄ ə̄ndāīdə́ ngé tun̄ yá̰a̰ yāsí gə̄ tə́ tītə̄ ń gír de gə̄ kə́ kem ɓē kə́ rang gə̄ tə́ a rāān̄neé ní. Deē ń reē kə man̄g kə́ bəra kógə̄ḿ ō, bal batə̄ gə̄ sīrí ō, ɓá anī sḭḭ̄ ə̄ndāniī nge tun̄ yá̰á̰ tə́ kadə̄ rāā kəla adə̄ nə́ɓā kə́ nin̄ i Nə́ɓā aĺ gə̄. 10Banī yājí jḭḭ ɓáa i Kɔ́ɔ̄ɓē n i Nə́ɓā yājí ní ō, j-əya̰n kɔ̄ɔ́ aĺ ō. Lojí ɓáa ngé tun̄ yá̰a̰ gə̄ ń a rāān̄ kəla yā Kɔ́ɔ̄ɓē ní i de kə́ gír kaa yā Aaro̰ tə́ gə̄ ō, ngán Lebi gə̄ rāān̄ kə yādə́ gə̄ ō. 11Nin̄ róōn̄ yá̰a̰ tun̄ kə́ kə taá malang gə̄ tām̄ yā Kɔ́ɔ̄ɓē tə́ kə dɔ ndɔ̄ gə̄ dəloí ō, loo sɔlí ō, róōn̄ ndujə̄ yá̰á̰ kə́ kotə majə gə̄ ō, ɓōkə́n̄ mápa gə̄ dɔ tábəl kə́ unjə̄ njáý njáý tə́ ō, əndān̄ hor loo sɔlí kə dɔ ndɔ̄ gə̄ ta ɗəra hor kə́ rāā kə lɔ́rɔ́ tə́ ō, ta bay hor kə́ tū tə́ gə̄ tə́ ō. Tɔdɔ̄ yá̰a̰ gə̄ ń Kɔ́ɔ̄ɓē Nə́ɓā yājí əda kadə̄ yā rāā ní, jḭḭ j-əndā kumjí gírí jə-rāā kə gōó banī sḭḭ̄ ə́ya̰n̄ī kɔ̄ɔ́. 12Á̰a̰ī, Nə́ɓā i sejí, i ni n i ngār yājí ní. Ngé tun̄ yá̰a̰ yān gə̄ i sejí ō, j-aw̄ kə bərúnjə gə̄ kə́ yā kɔ̄ŕ dɔsí tə́ yā rɔ̄ɔńsí ō. Beé ní, ngán Israel gə̄, ī-lōōī rɔ̄ɔ̄ Kɔ́ɔ̄ɓē Nə́ɓā yā kaasí gə̄ tām̄ ā ī-tetəniī rɔ̄ɔ̄ alé.
13Jeroboam adə̄ ɓūtə̄ áskar gə̄ rə̄ngōn̄ rɔ̄də́ gidə Juda gə̄ tə́ a ngḛyn̄neédə́. Adə̄ Israel gə̄ i no Juda gə̄ tə́ ō, ngé ngḛy Juda gə̄ i gidədə́ tə́ ō. 14Dan ń Juda gə̄ tūrə̄n̄ kumdə́ ní anī a̰a̰n̄ kadə̄ rɔ̄ɔ̄ i kété ō, gogə́ ō. Anī əgan̄ kɔŕ kə̄ dɔ Kɔ́ɔ̄ɓē tə́ ō, ngé tun̄ yá̰a̰ gə̄ kɔ̄rə́n̄ bərúnjə gə̄ ō. 15De kə́ dəngam kə́ Juda tə́ gə̄ túrə̄n̄ kɔĺ rɔ̄ɔ̄. Dan ń nin̄ túrə̄n̄ kɔĺ anī, Nə́ɓā tetə Jeroboam nin̄ kə Israel gə̄ malang rɔ̄ɔ̄ kɔ̄ɔ́ no Abia tə́ ō, no Juda gə̄ tə́ ō. 16Ngán Israel gə̄ a̰ȳn̄ naā kɔ̄ɔ́ no Juda gə̄ tə́ adə̄ Nə́ɓā əladə́ kem jīdə́ tə́. 17Abia nin̄ kə deē yān gēé tetən̄də́ rɔ̄ɔ̄ tetə kə́ to ɓōĺ ngá̰ý. Nin̄ tɔ̄lə̄n̄ Israel kə́ ger̄ rɔ̄ɔ̄ majə gə̄ dūbú ɓú mí. 18Dan ngeé ń noō tə́ ní əlan̄ rɔ̄sɔl̄ dɔ Israel gə̄ tə́ banī Juda gə̄ tá tetən̄ rɔ̄ɔ̄, tām̄ nin̄ əndān̄ tɔ́gə́də́ i dɔ Kɔ́ɔ̄ɓē ń i Nə́ɓā yā kaadə́ gə̄ ní tə́. 19Abia ngɔ̄də̄ Jeroboam. Ni-taā ɓē gə̄ jīn tə́, taā ɓē kə́ Betel ō, Yesana ō, Epəron ō, ngán ɓē kə́ dūú gə̄ ń ɓē gə̄ ń noō o̰o̰n̄ ɓē dɔ tə́ ní ō.
20Dan ń Abia a o̰o̰ń ɓē ní tɔ́gə Jeroboam to tītə̄ kə̄ kété to̰ alé. Ta tɔ̄l ta anī Nə́ɓā əndan adə̄ oy. 21Banī Abia mbūsə̄ gír ko̰o̰ ɓē yān adə̄ ra ngan̄g. Ni táā dəyá̰ gə̄ kutə gidə i sɔ́ ō, ojə ngán kə́ dəngam gə̄ kutə jōó gidə i jōó ō, ngán kə́ dəyá̰ gə̄ kutə gidə i mehḛ́ ō.
22Gotə yá̰á̰ kə́ rang gə̄ ń Abia rāā ní, ndangən̄ i kem makətūbə̄ ń a ɓārə́n̄ na i yá̰a̰ gə̄ ń əga kem Ido kə́ nge koō ta dɔ tə́ ní tə́. 23Dan ń Abia oy ní dubə̄nən̄ i kem ɓē yā Dabid tə́. I ngōnən Asa n o̰o̰ ɓē gotən tə́ ní.
Ta kəla gír ko̰o̰ ɓē yā Asa
(Á̰a̰ī 1 Mba 15.9-11)
Dan ń Asa a o̰o̰ń ɓē ní loo to lɔm kem ɓēé ɓāl̄ kutə kógə̄ḿ.
Currently Selected:
2 YÁ̰A̰ GƏ̄ 13: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
