2 YÁ̰A̰ GƏ̄ 12
12
Sisak mban̄g kə́ Ejiptə taā dɔ nang kə́ Juda
(Á̰a̰ī 1 Mba 14.25-28)
1Dan ń ɓē ko̰o̰ yā Roboam tél ndi majə ō, Roboam ndi ngan̄g dɔ ɓē tə́ ō anī, ni ō, ngán Israel gə̄ malang əya̰ ndū najə̄ yā Kɔ́ɔ̄ɓē kɔ̄ɔ́. 2Sɔɔ̄ń háĺ kə́ sew aĺ ń nin̄ rāān̄ kə Kɔ́ɔ̄ɓēé ní, ɓāl̄ ko̰o̰ ɓē yā Roboam kə́ nge ko̰ mí tə́ anī, Sisak mban̄g kə́ Ejiptə reē ənī ɓē kə́ Jerusalem rɔ̄ɔ̄. 3Ni-reē i kə púsə rɔ̄ɔ̄ gə̄ dūbú kə́ ɓú jōó ō, ngé kal̄ sə́nda gə̄ dūbú kutə mehḛ́ ō, tá de gə̄ ń ḭḭn̄ dɔ nang kə́ Ejiptə tə́ reēn̄ seneé ní, deē asə tə́da kutədə́ alé. De gə̄ ní i Libi gə̄ ō, Suki gə̄ ō, Nubi gə̄ ō. 4Ni-taā ɓē kə́ ngan̄g gə̄ kə́ dɔ nang yā Juda tə́ ō, reē bátə́ ugə̄ Jerusalem ō.
5Semaya kə́ nge koō ta reē rɔ̄ Roboam tə́ ō, rɔ̄ ngār gə̄ kə́ Juda tə́ ń kánə̄n̄ naā Jerusalem najə̄ yā Sisak kə́ reē ugə̄ ngɔr rɔ̄də́ tə́ ní ō, ba ədadə́ na: Kɔ́ɔ̄ɓē ɔr̄ najə̄ i beé, əda na: Sḭḭ̄ ə́ya̰mī kɔ̄ɔ́, adə̄ mā m-ə́ya̰sí kɔ̄ɔ́ jī Sisak tə́ ō. 6Mban̄g nin̄ kə ngār kə́ Israel tə́ gə̄ gerə̄n̄ yá̰á̰ kə́ gōtə́ aĺ ń nin̄ rāān̄ ní ō, ədan̄ na najə̄ i yā Kɔ́ɔ̄ɓē ō. 7Dan ń Kɔ́ɔ̄ɓē a̰a̰ kadə̄ gerə̄n̄ yá̰á̰ kə́ gōtə́ aĺ ń nin̄ rāān̄ ní anī, ɔr̄ najə̄ kə Semayaá ɓáý to̰, əda na: Dan ń nin̄ gerə̄n̄ yá̰á̰ kə́ gōtə́ aĺ ń rāān̄ ní kɔ̄ɔ́ ɓá ní, m-ā m̄-nujə sedə́ alé. M-ā m̄-gān̄g dɔdə́ kem ngɔr ō, m-ā m̄-lōō gír bə̄gā wōn̄g yāḿ dɔ ɓē kə́ Jerusalem tə́ ō, adə̄ m-ā m-ə́ya̰ Sisak kadə̄ nujə ɓē ń toō alé. 8Ɓá tā ba a télən̄ ngé rāā kəla yān gə̄ kadə̄ gerə̄n̄neé na rāā kəla yāḿ mā ō, rāā kəla yā gotə ɓē ko̰o̰ kə́ rang gə̄ ō, i yá̰á̰ kə́ to tītə̄ naā alé.
9Adə̄ Sisak mban̄g kə́ Ejiptə aw̄ ənī ɓē kə́ Jerusalem rɔ̄ɔ̄. Ni ɔy yá̰a̰ kənge gə̄ kə́ kem kújə yā Kɔ́ɔ̄ɓē tə́ ō, kem kújə yā mban̄g tə́ ō. Ni ɔy yá̰a̰ malang, adə̄ ɔy der lɔ́r gə̄ ń Salomo̰ rāā ní ō. 10Mban̄g Roboam rāā der gində̄ nə̄ngā kasə gə̄ kum gotə, ba ɓɔ̄ɔ̄ ngol áskar gə̄ ń a ngɔ̄mə̄n̄ ta róbə kújə yā mban̄g ní. 11Adə̄ kə dɔ kaw̄ mban̄g kújə yā Kɔ́ɔ̄ɓē tə́ gə̄ malang ń noō, ngé ngɔ̄m̄ loo gə̄ a aw̄ a ɔyn̄ der gə̄ ní, ba gō tə́ anī tél aw̄n̄neé gogə́ kem kújə yā ngé ngɔ̄m̄ loo gə̄ tə́. 12Wōn̄g ń rāā Kɔ́ɔ̄ɓē dɔ Roboam tə́ ní tetə, adə̄ ni-lōō gír nujə loo sák sák kɔ̄ɔ́ tə́, tɔdɔ̄ ger̄ kə́ Roboam ger̄ gō tə́ aĺ yān tə́ ō, tɔdɔ̄ yá̰á̰ kə́ majə gə̄ kə́ ton̄ dɔ nang yā Juda tə́ ɓáý tə́ ō.
Gír ko̰o̰ ɓē yā Roboam gān̄g
(Á̰a̰ī 1 Mba 14.21-24,29-31)
13Mban̄g Roboam o̰o̰ ɓē Jerusalem ō, mbūsə̄ gír ko̰o̰ ɓē yān adə̄ ngan̄g ō. Dan ń əndānən̄ mban̄g ní, ɓālə̄n i kutə sɔ́ gidə i kógə̄ḿ. Ni-o̰o̰ ɓē Jerusalem ɓāl̄ kutə gidə i sīrí. Tɔdɔ̄ Jerusalem i ɓē ń Kɔ́ɔ̄ɓē gə̄rā dɔ nang kə́ Israel tə́ malang ní. Ni gə̄rān i yā rāā yá̰a̰ kemeé kadə̄ de gə̄ gerə̄n̄neé na ni i dan gír deē yān gə̄ tə́. Rī kó̰o̰ Roboam na i Naama. I dəyá̰ Amon. 14Roboam rāā yá̰a̰ kə majə alé, tɔdɔ̄ əndā rɔ̄n ta sāā Kɔ́ɔ̄ɓē tə́ kə ngarā̰ kemənneé mámák alé. 15Ndangən̄ kəla rāā Roboam gə̄ kə́ ta kəla gír tə́ bátə́ ta tɔ̄l̄ ta tə́ i kem makətūbə̄ kəla rāā Semaya nge koō ta tə́ ō, i kem makətūbə̄ kəla rāā Ido nge ka̰a̰ yá̰á̰ tə́ ō. Rī gír kaa de gə̄ i kem makətūbə̄ gə̄ ngeé ń noō tə́. Roboam nin̄ kə Jeroboam a rɔ̄ɔ̄n̄ i naā ngándáńg. 16Dan ń Roboam oy ní dubə̄nən̄ i kem ɓē yā Dabid tə́. I ngōnən Abia n o̰o̰ ɓē gotən tə́ ní.
Currently Selected:
2 YÁ̰A̰ GƏ̄ 12: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
