2 YÁ̰A̰ GƏ̄ 14
14
1Ni-rāā yá̰á̰ kə́ majə ō, yá̰á̰ kə́ súmūú ō, ta kum Kɔ́ɔ̄ɓē Nə́ɓā yān tə́. 2Ni-rāā adə̄ loo tun̄ yá̰a̰ yā tə̄rā gə̄ kə loo ndɔ̄ȳ yādə́ gə̄ gətóon̄ kɔ̄ɔ́ kem ɓēé ō, ni tɔ̄ɔ̄ mbal̄ kə́ túdə̄ kə nja dɔɔ́ gə̄ ō, tə́gā kāgə̄ ɓesə̄ kə́ yā ɓōĺ gidə gə̄ kɔ̄ɔ́ ō. 3Ni-əda Juda gə̄ kadə̄ sāān̄ Kɔ́ɔ̄ɓē ń i Nə́ɓā yā kaadə́ gə̄ ní ō, kadə̄ rāān̄ yá̰á̰ ń ndū najə̄ yān əda ní ō, yá̰a̰ gə̄ ń ni-əda kadə̄ yā rāā ní ō. 4Asa rāā adə̄ loo ndɔ̄ȳ gə̄ ō, loo róō ndujə̄ yá̰á̰ kə́ kotə majə gə̄ ō, gətóon̄ kem ɓē gə̄ malang kə́ Juda tə́ kɔ̄ɔ́, adə̄ ɓē ko̰o̰ ndi jəke ɓāl̄ yān tə́. 5Ni-rāā ɓē kə́ ngan̄g gə̄ kə́ Juda tə́ tɔdɔ̄ ɓē ndi jəke. Kem ɓāl̄ gə̄ ń noō tə́ ní deē rɔ̄ɔ̄n̄ alé, tɔdɔ̄ Kɔ́ɔ̄ɓē rāā adə̄ ni-ɔr̄ koō. 6Ni-əda Juda gə̄ na: Ādə̄ jə-rāāī ɓē gə̄ ń noō ō, jə-tə́nāī ndogə̄ mbal̄ kə́ nder̄ gə̄ gididə́ gə̄ tə́ ō, jə-rāāī kújə́ kə́ ngāl̄ kə̄ dɔɔ́ gə̄ tū ndogə̄ mbal̄ gə̄ ní tə́ ō, jə-télaī bápə gə̄ ta ɓē gə̄ ní tə́ ba jə-dēsíī kāgə̄ gə̄ ta tə́ j-utīineé ta ō. Ɓē to lɔm nojí tə́, tɔdɔ̄ jə-sāāī Kɔ́ɔ̄ɓē Nə́ɓā yājí, jə-sāāniī adə̄ ni əya̰jí adə̄ j-ɔrī koō tām̄ madə̄ ba̰ā̰jí gə̄ ń ndin̄ gīrə̄n̄ gidəjí ní rɔ̄ɔ̄n̄jí alé. Loo ń noō tə́ nin̄-rāān̄ ɓē gə̄ ní adə̄ ɓē gə̄ ní télən̄ ɓē kə́ ngan̄g gə̄.
7Ngé rɔ̄ɔ̄ yā Asa kə́ Juda gə̄ i deē dūbú ɓú mətá. Yá̰a̰ rɔ̄ɔ̄ yādə́ i der kə́ bo ō, nənga ō. Ngé rɔ̄ɔ̄ yān gə̄ kə́ Benjamḛ i deē dūbú ɓú jōó kə dūbú kutə sɔ́sɔ́. Yá̰a̰ rɔ̄ɔ̄ yādə́ i ngán der kə́ dūú gə̄ ō, nin̄ i ngé kur gərā gə̄ ō. Nin̄ malang i go̰ rɔ̄ɔ̄ gə̄. 8Jera ń i de kə́ Nubi ní reē kə de gə̄ kə́ kutədə́ i dūbú ɓú nja kutə ō, kə púsə rɔ̄ɔ̄ gə̄ ɓú mətá ō, ənīńdə́ rɔ̄ɔ̄. Ni-reē bátə́ ugə̄ Maresa. 9Asa teē tə́nī tan adə̄ nin̄-ran̄ kə ta naá kə jī loo rɔ̄ɔ́ wól loo kə́ Sepata tə́, ngɔr kə̄ Maresa. 10Asa əga kɔŕ kə̄ dɔ Kɔ́ɔ̄ɓē Nə́ɓā yān tə́, ə́da na: Kɔ́ɔ̄ɓē, de kə́ asə ra dɔ dán de kə́ tɔ́gən i ngá̰ý tə́ kə de kə́ tɔ́gən gətóó tə́ kə́ rang gətóo, i ḭ̄ ngóy. Kɔ́ɔ̄ɓē Nə́ɓā yājí, ī-rāā sejí! Tɔdɔ̄ j-ə̄ndā tɔ́gə́jí i dɔí tə́ ō, kósə de kə́ ngá̰ý gə̄ ń toō, jə-reē yā rɔ̄ɔ̄də́ i kə rīí ō. Kɔ́ɔ̄ɓē, ḭ̄ i Nə́ɓā yājí. Ādə̄ deē ndul tɔ́sə̄ gātīí alé! 11Kɔ́ɔ̄ɓē tetə Nubi gə̄ rɔ̄ɔ̄ no Asa tə́ ō, no Juda gə̄ tə́ ō, adə̄ Nubi gə̄ a̰ȳn̄ naā. 12Asa nin̄ kə deē yān gēé ngɔ̄də̄n̄də́ bátə́ ugə̄n̄ Gerar. Nubi gə̄ oyn̄ malang sutə. Deē kógə̄ḿ dandə́ tə́ kə́ teē t yo tə́ gətóo. Tɔdɔ̄ Kɔ́ɔ̄ɓē ō, ngé rɔ̄ɔ̄ gə̄ ō, nujən̄ sedə́ kɔ̄ɔ́. Deē yā Asa gə̄ ɔyn̄ yá̰a̰ kənge kə́ kəhɔ ta rɔ̄ɔ̄ tə́ kɔy kə́ to ɓōĺ ngá̰ý. 13Gō tə́ anī nin̄ taān̄ ɓē gə̄ ń gīrə̄n̄ gidə ɓē kə́ Gerar ní malang, tɔdɔ̄ Kɔ́ɔ̄ɓē əla ɓōĺ kə́ ngá̰ý kem de kə́ kemeé gə̄ tə́ ō, ɔyn̄ yá̰á̰ kə́ kem ɓē gə̄ ní tə́ ō, tɔdɔ̄ yá̰a̰ kənge kə́ kemdə́ gə̄ tə́ kə́ yā kɔy gə̄ i ngá̰ý. 14Nin̄ ənīn̄ ngé kul̄ yá̰a̰ gə̄ ń ndin̄ kem gong yādə́ gə̄ tə́ ní rɔ̄ɔ̄ ō, adə̄ əhɔn̄ batə̄ gə̄ ō, jámbal gə̄ ō ngá̰ý. Gō tə́ anī nin̄ tél aw̄n̄ gogə́ Jerusalem.
Currently Selected:
2 YÁ̰A̰ GƏ̄ 14: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
