2 YÁ̰A̰ GƏ̄ 11
11
1Dan ń Roboam ugə̄ Jerusalem ní anī, ɔy de kə́ gír ɓē yā Juda tə́ gə̄ ō, yā Benjamḛ tə́ gə̄ ō, adə̄ i de kə́ ger̄ rɔ̄ɔ̄ majə gə̄ dūbú ɓú kə kutə sɔ́sɔ́ yā kaw̄ rɔ̄ɔń ngán Israel gə̄ ba ko̰o̰ń ɓē dɔdə́ tə́. 2Banī Kɔ́ɔ̄ɓē əda Semaya kə́ nge koō ta na: 3Əda Roboam ngōn̄ Salomo̰ mban̄g kə́ Juda ō, ngán Israel gə̄ malang kə́ dɔ nang yā Juda tə́ ō, yā Benjamḛ tə́ ō na: 4Kɔ́ɔ̄ɓē ɔr̄ najə̄ i beé, əda na: Ī-lōōī kaw̄ rɔ̄ɔ̄ ngákó̰ó̰sí gə̄. Ī-télī kógə̄ḿ kógə̄ḿ kə̄ ɓē yāsí gə̄ tə́! Tɔdɔ̄ i mā n m̄-rāā á yá̰á̰ ń noō rāań yá̰á̰ ní. Dan ń oōn̄ najə̄ yā Kɔ́ɔ̄ɓē ń noō anī, lōōn̄ gír kaw̄ kənī Jeroboam rāā tə́.
Roboam rāā ɓē kə́ tayā tayā gə̄ adə̄ ngan̄g
5Roboam ndi Jerusalem. Ni-rāā ɓē kə́ ngan̄g gə̄ gō nang yā Juda tə́. 6Rāā i ɓē kə́ Betlehem ō, Etam ō, Tekoa ō, 7Bet Sur ō, Soko ō, Adulam ō, 8Gat ō, Maresa ō, Jip ō, 9Adoraim ō, Lakis ō, Ajeka ō, 10Sora ō, Ayalon ō, Hebron ō. Ɓē kə́ ngan̄g gə̄ ń noō i ɓē gə̄ kə́ gō nang yā Juda tə́ ō, yā Benjamḛ tə́ ō. 11Roboam rāā ɓē kə́ ngan̄g gə̄ ní adə̄ ngangə̄n̄ loo nja kə́ jōó tə́ ɓáý ō, tə́ndā ngé ko̰o̰ ɓē gə̄ kemeé ō, kán̄ yá̰a̰ kəsa ō, yibə̄ ō, kasə nduú ō, kə̄ dɔ naā tə́ kem ɓē gə̄ ní tə́ ō. 12Der gə̄ kə nənga gə̄ i kem ɓē gə̄ ní tə́ kété, ba ni-reē kə kə́ rang gēé ngá̰ý dɔ madə̄ tə́ ɓáý. Adə̄ de gə̄ kə́ dɔ nang yā Juda tə́ ō, yā Benjamḛ tə́ ō, i deē yān gə̄.
Ta tɔ̄l̄ ta ko̰o̰ ɓē yā Roboam
13Ngé tun̄ yá̰a̰ gə̄ ō, ngán Lebi gə̄ ō, ḭḭn̄ kə̄ loo gə̄ tə́ dɔ nang kə́ Israel tə́ malang reēn̄ gō Roboam tə́. 14Ngán Lebi gə̄ əya̰n̄ loo yādə́ gə̄ kə́ gidə ɓē gə̄ tə́ ba aw̄n̄ dɔ nang yā Juda té ō, kem ɓē kə́ Jerusalem tə́ ō, i tām̄ kɔgə̄ kə́ Jeroboam nin̄ kə ngánən gə̄ ɔgə̄n̄də́ rāā kəla tun̄ yá̰a̰ yā Kɔ́ɔ̄ɓē kɔ̄ɔ́ tə́. 15Banī Jeroboam tə́ndā ngé tun̄ yá̰a̰ yān nəkɔ́ gə̄ kadə̄ nin̄ i ngé tun̄ yá̰a̰ gə̄ yā nə́ɓā kə́ rɔ̄kum aĺ gə̄ ń de gə̄ a ndɔ̄ȳn̄ loo ndɔ̄ȳ tə́ ní, adə̄ i ɓesə̄ bal bə̄yā̰ gə̄ ō, ɓesə̄ ngán man̄g gə̄ ō ń nəkɔ́ rāā ní. 16De gə̄ malang kə́ gír ɓē gə̄ yā ngán Israel gə̄ tə́ ní, ngé gə̄ ń kemdə́ gḛy rɔȳ Kɔ́ɔ̄ɓē Nə́ɓā yā Israel ní, aw̄n̄ Jerusalem gō ngán Lebi gə̄ tə́ yā ndējə̄ Kɔ́ɔ̄ɓē Nə́ɓā yā kaadə́ gə̄ yá̰á̰ kə́ tun̄ gə̄. 17Nin̄ rāān̄ adə̄ ɓē ko̰o̰ kə́ Juda ndi ngan̄g ō, əhɔn̄ Roboam kə́ ngōn̄ Salomo̰ dɔɔ́ ɓāl̄ mətá ō. Tɔdɔ̄ ni un gō róbə yā Dabid ō, yā Salomo̰ ō, bátə́ ɓāl̄ mətá.
Gír kojə yā Roboam
18Roboam taā Mahalat kə́ ngōn̄ Yerimot kə́ ngōn̄ Dabid. Kó̰o̰ Mahalat i Abihail kə́ ngōn̄ Eliab kə́ ngōn̄ Jese. 19Mahalat ojə ngáń kə́ dəngam gə̄ mətá adə̄ Roboam. Rī ngán gə̄ ní i Yeus ō, Semaria ō, Jaham ō. 20Gō tə́ anī Roboam taā Maaka kə́ ngōn̄ Absalom. Maaka ojə ngán kə́ dəngam gə̄ sɔ́ adə̄n. Rī ngán gə̄ ní i Abia ō, Atai ō, Jija ō, Selomit ō. 21Roboam gḛy Maaka kə́ ngōn̄ Absalom tɔȳ gotə nə̄yá̰n gə̄ malang ō, tɔȳ kə́ dəyá̰ gidə ndogə̄ gə̄ malang ō. Tām̄ nə̄yá̰n gə̄ i kutə gidə i sɔ́sɔ́ ō, dəyá̰ gidə ndogə̄ gə̄ i kutə mehḛ́ ō. Ngánən kə́ dəngam gə̄ i kutə jōó gidə i sɔ́sɔ́, ba ngánən kə́ dəyá̰ gə̄ i kutə mehḛ́. 22Roboam əndā Abia kə́ ngōn̄ Maaka kété kadə̄ ni i ngār yā ngákó̰o̰n gə̄ tɔdɔ̄ ni sāā kadə̄ i Abia n o̰o̰ ɓē gotən tə́ ní. 23Ni-rāā kə kum kedēé, tə̄ndā gotə ngánən kə́ dəngam kə́ rang gə̄ malang tḭ̄ḭ̄də́ kə̄ loo gə̄ tə́ dɔ nang yā Juda tə́ ō, yā Benjamḛ tə́ ō. Ni tə́ndādə́ kə kem ɓē kə́ ngan̄g gə̄ tə́ malang. Adə̄də́ yá̰a̰ kəsa ngá̰ý ō, əhɔ gātə̄ dəyá̰ gə̄ ngá̰ý adə̄də́ ō.
Currently Selected:
2 YÁ̰A̰ GƏ̄ 11: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
